20:21

Ang Pagtuo isip usa ka Baruganan sa Lihok ug Gahum

Chad H Webb

Administrator, Seminaries and Institutes of Religion

Tinuig nga Training Broadcast sa Seminaries and Institutes of Religion • Hunyo 13, 2017

Kanunay kong maghinam-hinam nga makauban kamo niining importanting panagpundok. Agig pagpangandam alang niini nga miting, nangamuyo ko sa Ginoo aron masayud unsay Iyang ipabuhat nato alang sa Iyang mga anak nga manglingkod sa atong mga classroom ug panimalay. Sa hilom nga mga higayon gibati nako ang Iyang pagdayeg sa inyong makugihong mga paningkamot ug dili maihap nga mga sakripisyo. Gibati usab nako kon unsa gayud Niya ka gusto nga mopanalangin ninyo ug sa inyong mga pamilya. Ug gibati nako ang Iyang tinguha nga mopanalangin sa inyong mga estudyante og gugma ug pagpamatuod sa Iyang Hinigugmang Anak.

Dili kini matuman pinaagi lang sa mas daghan o mas maayo nga mga programa, kurikulum, training, o teknolohiya tungod kay walay usa niadtong mga butang nga makapuli sa milagrusong impluwensiya sa langit sa mga kinabuhi sa atong mga estudyante. Ang atong gilauman moabut lamang isip gasa gikan sa atong mahigugmaong Amahan sa Langit ug magkinahanglan sa Iyang gahum sa paghimo og mga milagro sa indibidwal nga mga kinabuhi.

Magkinahanglan kini kanato nga mopakita og mas hugot nga pagtuo tungod kay ang hugot nga pagtuo mag-una sa matag milagro. Si Elder Dallin H. Oaks miingon: “‘Patay ang pagtuo nga walay binuhatan.’ Apan [dayon mipuno siya], ‘Ang binuhatan nga walay pagtuo mas labaw nga patay.’”¹ Sa laing pagkasulti, ang tanan natong paningkamot dili makamugna sa gitinguha nga resulta kon gibuhat kini nga walay pagtuo. Tungod kana kay ang pagtuo usa ka baruganan sa lihok ug usa ka baruganan sa gahum. Ang pagdugang sa atong hiniusang pagtuo usa ka timailhan sa Ginoo nga misalig kita Kaniya ug nagsalig sa Iyang gahum sa pagdasig, pagkabig, paglig-on, pagpangandam, ug pagpanalipod sa nagtubo nga henerasyon. Ang dugang nga pagtuo sa Manluluwas makapalig-on sa atong pagtudlo, sa atong mga pagdapit sa kabatan-onan ug mga young adult sa pagtambong sa seminary o institute o sa pagbasa sa kasulatan, ug gani sa atong mga relasyon sa mga ginikanan ug mga lider sa priesthood. Busa, sa umaabut nga mga semana ug bulan, mahimo ba nga moapil mo nako sa paghangyo sa atong Amahan sa Langit nga dugangan ang atong pagtuo? Nagtuo ko nga andam Siya nga motabang kon mohangyo lang ta.

Paggamit sa Pagtuo isip usa ka Baruganan sa Lihok

Mitudlo si Joseph Smith nga ang paggamit og pagtuo sa Dios nagkinahanglan kanato nga adunay “usa ka saktonga ideya sa iyang kinaiya, pagkahingpit, ug mga hiyas” ug usa ka “kahibalo nga ang dalan sa kinabuhi nga [atong] gisunod nahisubay sa iyang kabubut-on.”² Kining duha ka mga kinahanglanon nagkinahanglan nga gamiton nato ang pagtuo isip baruganan sa lihok.³

Sa pinakabag-o nga kinatibuk-ang komperensya, si Presidente Russell M. Nelson mipaambit og usa ka paagi nga atong mahimo ang nag-una niining duha ka mga kinahanglanon:

“Kon mas masayud kita sa pangalagad ug misyon sa Manluluwas—kon mas masabtan nato ang Iyang doktrina ug unsay Iyang gibuhat alang kanato—mas masayud kita nga Siya makahatag og gahum nga atong gikinahanglan sa atong kinabuhi.

Sayo niining tuiga, mihangyo ko sa mga young adult sa Simbahan sa pagpahinungod og porsyon sa ilang panahon matag semana sa pagtuon sa tanan nga gisulti ug gibuhat ni Jesus nga narekord diha sa sumbanang mga basahon. Gidapit nako sila nga ang mga pakisayran sa kasulatan kabahin ni Jesukristo diha sa Topical Guide himoon nilang personal nga kurikulum.

“Gihatag nako kana nga hagit tungod kay gidawat ko kana sa akong kaugalingon. Akong gibasa ug gibadlisan ang matag bersikulo nga gikutlo kabahin ni Jesukristo, nga nalista ubos sa 57 ka mga subtitle diha sa Topical Guide. Dihang nahuman ko kana nga makadasig nga buhat, nangutana ang akong asawa kon unsay epekto niini kanako. Giingnan nako siya, ‘Lahi na ako nga tawo!’”⁴

Gusto kong mopahinumdom ninyo niini nga pagdapit tungod kay ako mismo nakakita sa mga benepisyo niining nakatutok nga pagtuon ug nasayud nga kon mas nakasabut ug nahigugma kita sa Manluluwas, mas molambo ang atong pagtuo diha Kaniya.

Sama sa akong gihisgutan ganiha, mitudlo si Propeta Joseph nga laing importanting elemento sa pagtuo mao ang pagkat-on sa pagpahiangay sa atong mga kinabuhi sa kabubut-on sa Ginoo. Sa paghulagway niini, mopaambit ko og usa ka ehemplo diin ang mga inahan nga ania dinhi maka-relate:

Si Celeste Davis batan-ong inahan nga dunay tulo ka anak kansang masuso momata kasagaran, matag gabii. Misugod siya pag-ampo nga siya ug ang iyang masuso makaangkon sa tulog nga ilang gikinahanglan. Apan daw wala gitubag ang iyang mga pag-ampo. Hinungdan kini nga gusto niyang mas makasabut sa pag-ampo ug nganong wala siya mapanalangini og kahupayan. Iyang nakat-unan sa Bible Dictionary nga “kita nag-ampo sa pangalan ni Kristo kon ang atong hunahuna mao ang hunahuna ni Kristo, ug ang atong mga tinguha mao ang mga tinguha ni Kristo. … Kita dayon mangayo sa mga butang nga posibleng ihatag sa Dios. Daghang mga pag-ampo wala matubag tungod kay dili kini pinaagi sa ngalan ni Kristo; dili gyud kini ang Iyang hunahuna, apan tungod sa kahakog sa kasingkasing sa tawo.”⁵

Busa nakahukom si Celeste nga mohimo og lista sa mga butang nga iyang giampo. Pinaagi sa paghimo niini nga lista, nakaamgo siya nga ang iyang mga pag-ampo kasagaran naglangkob sa paghangyo sa Langitnong Amahan alang sa unsay iyang gusto, nga usbon Niya ang iyang mga kahimtang. Dayon mihukom siya nga maghimo og laing lista, gisulat ang mga butang nga sigurado siya nga gusto sa Langitnong Amahan alang niya. Siyempre ang duha ka lista dili gayud hingpit nga nagkasumpaki—nahigugma Siya kanato ug gusto nga kita magmalipayon. Apan kining gamay nga buhat nagtudlo og importante nga kamatuoran. Samtang gusto niyang mausab ang iyang kahimtang, gusto Niya nga siya ang mausab. Busa, nakahukom siya nga usbon ang iyang pamaagi sa pag-ampo aron mas mapahiangay ang iyang kabubut-on ngadto sa kabubut-on sa Langitnong Amahan. Misulat siya:

“Mihimo ko og gamayng pormula nga makatabang kanako sa akong mga pag-ampo. Ingon niini lang—kon mangayo kamo og butang nga dili kaayo mo sigurado kon mao ba kini ang gusto sa Dios alang ninyo, ipuno ang mga pulong nga ‘apan kon dili’ ug dayon dugangi og usa ka butang nga sigurado kamo nga gusto sa Dios alang ninyo.

“Sama pananglit: ‘[Langitnong Amahan], palihug tabangi ko nga makatulog karong gabii, apan kon dili, tabangi ko nga dunay igong kusog nga magmaya ug makugihon bisan pa man.’ ‘[Langitnong Amahan], palihug panalangini ang akong bata nga maulian gikan niini nga sakit ug mamaayo, apan kon dili, tabangi kami nga mosalig Kanimo ug magmapailubon sa usag usa.’ ‘[Langitnong Amahan], palihug panalangini ko nga malakip sa akong grupo, apan kon dili, bisan kon mobati ko nga walay labut, tabangi ko nga magmabination ug manggihatagon.’”

Mipadayon siya:

“Gibuhat ko kini sulod na sa usa ka tuig karon, ug makaingon ko nga ang gidaghanon sa akong kalampusan sa pag-ampo misaka og maayo. …

“Gibati nako nga sa katapusan nagtuman ko sa tinuod nga katuyoan sa pag-ampo, nga dili ipakigsabut ang akong mga tinguha, apan sa pagpahiangay sa akong kaugalingon ngadto sa Dios. …

“Usa ka wala damha nga kaayohan mao nga dili na ko kaayo mahadlok og lisud nga mga sitwasyon o kon dili makuha ang akong gusto sama kaniadto tungod kay nakita ug nabati nako ang Dios nga mitubag sa akong mga pag-ampo—ang akong mga tinguha ug ang akong mga ‘apan kon dili.’”⁶

Ang kasinatian ni Celeste naghatag og sumbanan nga makatabang kanato sa atong mga pag-ampo ug sa atong mga paningkamot sa paggamit sa pagtuo isip baruganan sa lihok. Sa pagklaro, ang pagtuo dili mokuha sa kabubut-on sa atong mga anak o sa atong mga estudyante ug dili kini motangtang sa tanang pagsulay ug mga hagit sa atong kinabuhi. Apan makatabang kini kanato nga molahutay pag-ayo ug gani makat-on gikan sa lisud nga mga kahimtang. Kini usab makapausab kon unsaon nato sa pagtan-aw ang atong mga estudyante (ug ang atong mga anak) ug unsaon nato pag-ampo alang kanila. Mousab kini sa atong mga inter-aksyon sa atong mga classroom ug sa atong mga panimalay. Motabang kini kanato nga mobarug uban sa paglaum, kalipay, ug pagkapositibo sa nagkangitngit nga kalibutan. Makamugna kini og mga oportunidad alang sa personal nga pagpadayag ug magdala og gahum sa atong pagtudlo. Modala kini sa atong mga pagpamatuod ngadto sa mga kasingkasing niadtong atong gihigugma.

Ang tinuod nga pagtuo mowagtang sa pagpangatarungan. Mosangput kini sa kaugalingong pagtimbang-timbang, nga mosangput sa sinsero nga paghinulsol ug makahuluganong kalamboan. Mopugos kini kanato sa paglikay sa lit-ag nga maglaum nga ang mga solusyon makit-an lamang kon mag-usab ang uban, sama kon moingon kita og “Kon mas dako pa ko og suporta gikan sa mga ginikanan o mga lider sa Simbahan, niana mas maayo unta ang sitwasyon.” Kana nga paagi wala mosalig sa Manluluwas ug, busa, dili makagamit sa Iyang gahum. Dili kana makamugna sa milagro nga atong gikinahanglan. Igo kitang makatuman sa buhat sa Ginoo kon igo ang atong pagtuo nga sinserong mohangyo Kaniya sa pag-usab kanato ug sa paghulma kanato isip mga himan sa Iyang mga kamot.

Tinuod kini bisan kon kita mobati nga dili angay ug nabug-atan. Nakat-unan ko kini nga leksyon isip batan-ong lalaki nga nangandam alang sa misyon. Nagtuo gyud ko nga moserbisyo ko, apan sa katuigan nga mas bata pa ko ang paghunahuna niini makapakulba nako. Dili gayud ako komportable nga mamulong atubangan sa mga tawo. Duna koy iyaan kinsa moingon gihapon nga wala siya makakita sa akong mata hangtud nga nagtin-edyer na ko tungod kay maglakaw ko nga magduko, nagtago sa akong nawong. Sa junior high nakadawat ko og D- sa drama class, ang pinakaubos nga grado nga makapasar. Dili gyud ko makahimo sa pagbarug atubangan sa klase, bisan sa pagbasa og inandam nga script nga gihatag sa akong titser kanako.

Human nako madawat ang akong mission call para sa Mexico, gihangyo ko nga mamulong sa usa ka youth fireside uban sa akong magulang nga lalaki. Migamit lang ko og mga singko minutos, ug siya ang mihurot sa nahabilin nga oras. Dili ko motuo nga sobra ra ang pag-ingon nga ang akong pagpamulong tingali maoy labing ngil-ad nga pakigpulong nga gihatag sukad niini o sa bisan unsang simbahan. Pagkahuman sa fireside, daghang kabatan-onan ang milinya aron motimbaya sa akong magulang. Usa ka mabinationg kalag mitipas og gamay sa linya ug miingon kanako, “Salamat. Maayo to nga pakigpulong.” Literal kong naghunahuna, “Mabination ka, apan bakakon kaayo ka.” Miuli ko nga walay kadasig, naghunahuna kon unsaon kaha nako pagserbisyo og misyon. Wala ko mobati nga angayan nga motudlo sa ebanghelyo sa Iningles, samot na sa pinulongang Spanish nga kinahanglan pa nakong kat-unan.

Paglabay sa pipila ka adlaw, nga bug-at pa gihapon ang dughan, giablihan nako ang mga kasulatan ug gibasa ang istorya ni Enoch. Sa dihang gisugo si Enoch sa pag-awhag sa katawhan sa paghinulsol, ang bersikulo 31 nag-ingon, “siya miyukbo sa iyang kaugalingon ngadto sa yuta, sa atubangan sa Ginoo, ug misulti sa atubangan sa Ginoo, nag-ingon: Ngano nga ako nakakaplag og pag-uyon sa imong panan-aw, ug apan ako usa lamang ka batan-on, ug ang tanan nga mga katawhan nagdumot kanako; kay ako dili maayo nga mosulti; busa ako ba mao ang imong sulugoon?”⁷ Agig tubag sa pagduha-duha ug klaro nga kakulang sa pagsalig ni Enoch sa iyang tawag, ang Ginoo mihatag niining nindot ug makahupay nga tubag diha sa bersikulo 34: “Tan-awa ang akong Espiritu anaa kanimo, busa ang imong tanan nga mga pulong ako mohatag og kaangayan; ug ang mga bukid mahanaw sa imong atubangan, ug ang mga sapa mobalhin sa ilang agianan; ug ikaw magpuyo ngari kanako, ug Ako nganha kanimo; busa lakaw uban kanako.”⁸

Gikulbaan, dili sigurado sa kaugalingon, ug dili andam alang sa unsay anaa sa unahan, apan gidasig niadto nga mga pulong, misakay ko og eroplano sa unang higayon sa akong kinabuhi ug mibiyahe ngadto sa Mexico aron moserbisyo. Didto akong nakat-unan nga kon kita andam, tinud-anay kitang makalakaw uban sa Ginoo. Akong nakat-unan nga ang gisulti ni Presidente Ezra Taft Benson tinuod: “Ang mga lalaki ug mga babaye kinsa mitugyan sa ilang kinabuhi ngadto sa Dios makakaplag nga siya makahimo og mas daghan pa sa ilang kinabuhi kay sa ilang mahimo.”⁹

Paggamit sa Pagtuo isip usa ka Baruganan sa Gahum

Gikan sa istorya ni Enoch, duna koy lain usab nga nakat-unan kabahin sa pagtuo. Paminawa ang deskripsyon kon unsay nahitabo niining batan-on, kinsa dili maayong mosulti ug gidumtan sa katawhan. Ang Moises 7:13 mabasa nga, “Ug dako kaayo ang hugot nga pagtuo ni Enoch nga siya nangulo sa mga katawhan sa Dios, ug ang ilang mga kaaway miabut aron sa pakiggubat batok kanila; ug siya misulti sa pulong sa Ginoo, ug ang yuta mikurog, ug ang mga bukid nahanaw, gani sumala sa iyang sugo; ug ang mga suba nga mao ang tubig nabalhin sa ilang mga agianan; ug ang ngulob sa mga leon nadungog gikan sa kamingawan; ug ang tanan nga mga nasud hilabihan sa kahadlok, gamhanan kaayo ang pulongni Enoch, ug dako ang gahum sa pinulongan nga gihatag sa Dios kaniya.”¹⁰ Mora’g dili kana ang bata nga dili maayo mosulti. Mora’g usa kana ka tawo sa pagtuo kinsa, naglakaw uban sa Ginoo, makapabalhin og mga bukid.

Usahay mogamit kita sa mga pulong nga “palihuka ang dial” o “palihuka ang dagum” nga nagrepresentar sa gagmay, gikinahanglan nga mga kalamboan, apan ang Ginoo wala magdapit kanato sa pagpalihok sa dagum. Midapit Siya kanato sa pagpabalhin og mga bukid. Miingon Siya, “Kon may pagtuo kamo nga ingon og liso sa mustasa, makaingon kamo niining bukid, Bumalhin ka gikan dinhi ngadto didto, ug kini mobalhin; ug walay magamakuli alang kaninyo.”¹¹

Kining pagtuo nga makabalhin og mga bukid—literal man kadto nga bukid o pinasumbingay—lahi nga ang-ang sa pagtuo. Sama sa gitudlo ni Elder D. Todd Christofferson:

“[Dunay] ang-ang sa pagtuo nga naglangkob og espirituhanong kasiguroan ug nagmugna og maayong mga buhat, ilabi na sa pagkamasulundon sa mga baruganan ug mga sugo sa ebanghelyo. Kini ang tinuod nga pagtuo diha kang Kristo. …

“Hinoon, adunay ang-ang sa pagtuo nga dili lang modumala sa atong pamatasan apan usab makapahimo nato sa pag-usab sa unsay anaa ug sa pagpahinabo sa mga butang nga dili unta mahitabo. Naghisgot ako sa pagtuo dili lamang isip usa ka baruganan sa lihok apan usab isip usa ka baruganan sa gahum.”¹²

Mao kini ang matang sa pagtuo nga gihulagway sa Mga Hebreohanon 11 nga gigamit ni Enoch, Abraham, Sara ug Moises. Kini ang pagtuo nga ang mga propeta “gipangdaug nila ang mga gingharian, gipatuman nila ang pagkamatarung, gipanagdawat nila ang mga saad, gipanagtak-om nila ang mga baba sa mga leon, gipalong nila ang mabangis nga kalayo, nakaikyas sila sa sulab sa ispada, gikan sa kahuyang nakab-ot nila ang kalig-on, … [ug diin] ang nangamatay nga mga anak gipabalik ngadto sa ilang mga inahan pinaagi sa pagkabanhaw.”¹³

Kini ang matang sa pagtuo nga gihulagway sa Ether 12, nga nagpasabut kang Alma, Amulek, Nephi, Lehi, ug Ammon.¹⁴ Kini ang pagtuo nga gipakita sa “igsoon nga lalaki ni Jared [kinsa] miingon ngadto sa bukid sa Zerin, Pahawa—ug kini mipahawa. Ug kon siya wala pay hugot nga pagtuo kini dili molihok.”¹⁵ Ug sa katapusan, “dihay daghan kansang hugot nga pagtuo hilabihan ka lig-on bisan sa wala pa moabut si Kristo, kinsa dili mapugngan gikan sa sulod sa tabil”—ug dayon paminaw niin nga mga pulong—“apan sa pagkatinuod nakakita uban sa ilang mga mata sa mga butang diin sila nakakita uban ang mata sa hugot nga pagtuo.”¹⁶

Kini tanan mga halandumong paghulagway sa pagtuo isip usa ka baruganan sa gahum. Apan ang katapusang ehemplo madanihon kaayo kanako. Una nilang nakita kining mga butanga gamit ang mata sa pagtuo sa wala pa nila kini makita sa ilang pisikal nga mga mata. Adunay importanting modernong ehemplo niini gikan ni Presidente Brigham Young. Sa dihang naghisgut sa yuta kon asa natukod ang Salt Lake Temple, siya miingon: “Panagsa ra kaayo ko maghisgut og mga pagpadayag, o mga panan-awon, apan igo na ang pag-ingon … dinhi ako, ug nakita diha sa espiritu ang Templo. … Wala gayud ako motan-aw niana nga yuta, apan diha ang panan-awon niini.”¹⁷

Ang makabaton og panan-awon sa unsay mahimo, sa unsay gusto sa Ginoo, usa ka kinahanglanong bahin sa paggamit sa pagtuo isip baruganan sa gahum.

Makita ba ninyo ang milagro nga atong gikinahanglan gamit ang inyong mata sa pagtuo? Makita ba ninyo ang inyong kaugalingon nga nagtudlo og mga klase uban sa dugang nga pagsalig sa Ginoo, sa Iyang pulong, ug sa inyong mga estudyante? Makita ba ninyo ang inyong mga estudyante nga mibiya sa inyong classroom nga mas nagsalig sa mga pagtulun-an ug Pag-ula sa Manluluwas, mas makabatok sa sala, ug mas andam nga mobuhat sa tanan nga gisugo sa Ginoo kanila? Ug makita ba ninyo sa inyong mata sa pagtuo ang mas daghang batan-on, mga miyembro ug kadtong dili sama nato og tinuohan, mitubag sa atong mga pagdapit sa pagduol ug pag-apil niini nga milagro? Unsa kaha ang buhaton sa Ginoo kon atong gamiton ang atong hiniusang pagtuo, isip usa ka baruganan sa lihok ug isip usa ka baruganan sa gahum?

“Ang Ginoo Uban Kanato; Ayaw Kahadloki Sila”

Sa dili pa ko motapos, gusto kong mopaambit og katapusang ehemplo. Sa akong opisina duna koy usa ka kinulit nga kahoyng oliba nga nagpakita sa usa sa akong paborito nga istorya sa kasulatan ug kanunay nga pahinumdom kanako sa panginahanglan sa pagtuo. Usa kini ka paghulagway ni Caleb ug Josue, kinsa gitudlo ni Moises, kauban sa 10 pa ka mga tawo, sa pagpangita sa yuta sa Canaan ug sa pagreport niini. Ang 10 ka mga tawo mibalik nga nag-ingon, “Ang katawohan nga nagapuyo niadtong yutaa mga kusgan, ug ang mga kalungsoran mga malig-on ug mga dagku gayud.”¹⁸

“Gipahilum ni Caleb ang katawohan sa atubangan ni Moises, ug miingon: Manungas kita gilayon, ug managiya niini; kay kita makahimo kaayo sa pagdaug niana.

“Apan ang mga tawo nga mingtungas uban kaniya ming-ingon: Dili kita makahimo sa pagtungas batok niadto nga katawohan; kay sila labi pang kusgan kay kanato.”¹⁹

Tungod sa kakulang sa ilang pagtuo, “sila nanagdala ug dautang taho mahitungod sa yuta … naga-ingon, … didto nakita namo ang mga higante, … ug kami sa among pagtan-aw [sama sa] mga dulon lamang.”²⁰

Apan si Josue ug Caleb mitubag, “Ang Ginoo uban kanato ayaw kahadloki sila.”²¹

Apan ang mga tawo, sama sa 10 ka walay pagtuo nga mga sinugo, wala makakita sa unsay andam nga buhaton sa Ginoo ug dili mosunod kang Josue ug Caleb. Tungod niining kakulang sa pagtuo, ang katawhan naglatagaw sa kamingawan og 39 pa ka mga tuig. Gikan niana nga orihinal nga grupo, si Josue ug Caleb lamang ang naluwas ug gitugutan nga makasulod sa gisaad nga yuta. Tingali inyong mahinumduman ang inila nga mga pulong ni Caleb samtang siya ug si Josue mibarug atubangan sa Bukid Hebron, ang mismong dapit nga ilang gipangita daghang katuigan na ang milabay. Miingon si Caleb:

“Sa gihapon ako mabaskug karon sama sa adlaw sa pagsugo ni Moises kanako. …

“Busa karon ihatag kanako kining dapit sa kabungturan.”²²

Tungod sa iyang pagtuo, siya ug ang iyang pamilya sulod sa daghang henerasyon nakapanunod sa iyang bukid sa gisaad nga yuta.

Adunay mga hagit sa umaabut. Mahimo kitang matintal sa pagduha-duha ug sa pagdala og ngil-ad nga report nga puno sa kahadlok ug pagduhaduha. Kini nga kakulang sa pagsalig sa Ginoo dili modala kanato sa gisaad nga yuta. Sama ni Caleb ug Josue, kinahanglan natong isalikway ang atong kahadlok ug mogamit sa atong pagtuo sa pag-angkon sa mga panalangin nga Iyang giandam kanato. Kinahanglang atong tan-awon ang matag hagit ug pagsulay sa atong kinabuhi isip usa ka oportunidad aron mapalambo ang atong pagtuo diha ni Jesukristo.

Unsa kaha ang buhaton sa Ginoo kon maghiusa kita nga pulihan og paglaum ug pagtuo ang kahadlok ug pagduha-duha? Nagtuo ko nga dili lang dagum ang Iyang palihukon apan mga bukid—aron ang mga milagro mahitabo sa kinabuhi sa kabatan-onan ug mga young adult sa Simbahan. Samtang motubo ang atong pagtuo, motubo usab ang pagtuo sa atong gitudloan. Nasayud ko nga ang atong Amahan sa Langit mopanalangin kaninyo ug Siya mopanalangin sa atong mga estudyante samtang mogamit kita sa atong pagtuo sa Iyang mahigugmaon ug hingpit nga Anak, ang Manluluwas, Manunubos, ug Tigluwas sa kalibutan. Sa pangalan ni Jesukristo, amen.