17:31

Tan-awa ang Indibidwal

Lori Newbold

Direktor, Training Services

Sibya sa Tinuig nga Training sa Seminaries and Institutes of Religion • Hunyo 13, 2017

Mapasalamaton ko sa oportunidad nga makaanhi karon ug mopakigbahin sa akong gugma alang sa Manluluwas, para kaninyo, ug para sa mga kabatan-onan ug mga single adult nga kami adunay pribilihiyo nga moserbisyo.

Nakahinumdom ko sa gamhanan nga saksi sa Espiritu nga akong nadawat isip usa ka student teacher sa unang higayon nga akong nabasa ang pamahayag ni Presidente Boyd K. Packer: “Nagtuo ko niana sa gidak-on sa inyong paghimo, sumala sa hagit ug sa sugo nga anaa ninyo, ang imahen ni Kristo nakulit diha sa inyong panagway. Ug alang sa tanang praktikal nga mga katuyoan, diha niana nga klasehananniana nga panahon ug niana nga pagpahayag ug uban niana nga inspirasyon, kamo mao Siya ug Siya mao kamo.”¹ Ang paghunahuna nga ako adunay pribilihiyo sa pagrepresentar sa Manluluwas sa akong mga responsibilidad usa ka makadasig nga tinguha ug kamatuoran sa tibuok nakong pagtrabaho sa S&I.

Nagtudlo kanato si Elder Gong sa pinakabag-o lang nga Gabii uban sa General Authority nga usa sa mga butang nga nakapahimo sa Manluluwas nga hingpit nga magtutudlo mao ang Iyang katakus sa pagtudlo sa 5,000 ka tawo, matag usa sa samang higayon.Siya miingon, “Usa kini ka milagro nga gitinguha nato nga mga magtutudlo—sa pagtudlo sa atong tibuok klase ug sa matag tawo diha sa klase. Gikinahanglan niini ang pag-atiman sa 5,000 ug sa indibidwal. Nagdapit kini nga tubagon ang kinatibuk-ang mga kabalaka ug indibidwal nga mga panginahanglan.”² Nahunahuna ba ninyo kon giunsa Niya kana paghimo?

Gusto kong mopakigbahin sa akong kasinatian sa ikaduha nakong tuig sa pagtudlo diin gitudloan ko sa Ginoo pinaagi sa pagtabang nako nga makita unsay buot ipasabut sa pagrepresentar niya sa classroom. Adunay batan-ong lalaki, mga 15 anyos ang edad, nga naa sa usa sa akong mga klase. Nakahibalo ko sa unang pipila ka mga adlaw nga wala koy pasensya para sa iyang badlungon nga personalidad ug mibati nga mahimo kining taas nga semester sa pagbansay sa usa ka gasa nga wala nako. Nag-ampo ko para sa abilidad nga higugmaon siya ug ang akong tanang mga estudyante.

Atol sa ikaduhang semana sa klase, dihang kini nga batan-on mibarug aron sa paghatag sa debosyonal ug gamay nga impormasyon kabahin sa iyang kinabuhi, nahatagan ko sa gasa nga makita siya sama sa nakita sa Ginoo ug diha-diha gibati og dugang nga gugma kaniya. Iyang gisaysay nga ang iyang mga ginikanan naa sa proseso sa pag-diborsiyo ug ang iyang inahan wala lang mibiya sa Simbahan, apan mibatok pa niini. Makita nako sa iyang panagway ang kaguol ug kalibog nga iyang gibati samtang siya mipakigbahin sa iyang istorya. Sa pagkatinuod wala gayud nako mahinumdumi ang espiritwal nga panghunahuna nga iyang gipakigbahin, apan akong nahinumduman unsay gitudlo sa Espiritu Santo kanako. Adunay misantop sa akong hunahuna,“Huboa ang imong mga sandalyas kay aron makaimpluwensya ka og maayo kaniya. Misalig ko kanimo nga mahimong matinud-anon nga babaye nga makaimpluwensya sa kinabuhi niining batan-on nga lalaki, ug nagkinanglan ko nimo nga higugmaon siya sama sa Akong paghigugma niya.” Sukad niana nga higayon, ako nausab. Ang akong kasingkasing nausab. Nakita nako siya—tinud-anay nga nakita siya—isip anak sa Dios, nga adunay balaanong potensyal, adunay espiritwal nga mga gasa ug daghan nga ikatampo sa among klase. Wala dako kaayong kausaban sa iyang batasan niana nga semester, pero ako ang nausab. Ug niana nga kausaban kami adunay mga maanindot nga kasinatian nga magkauban. Mahangturon kong mapasalamaton niining batan-on nga lalaki ug sa kahigayunan nga gihatag sa Ginoo kanako nga mausab ang kasingkasing ug panglantaw.

Padayon ko nga nahingangha sa abilidad sa atong Amahan sa Langit nga wala lamang nakaila apan usab nakahatag sa mga panginahanglan sa matag indibidwal. Nakahibalo ko nga Siya hingpit nga nakakita, nakasabot, ug nakaila kanako.Ug dugang pa, Siya hingpit nga nahigugma kaninyo. Nakahibalo usab ako nga Siya nakakita kanako isip usa nga adunay balaanong potensyal ug nakahibalo nga sa Iyang tabang, mahimo kong sama Kaniya.Nakahibalo ko nga Siya adunay sama nga pagtuo sa matag usa kaninyo ug sa matag batan-ong lalaki ug babaye nga mosulod sa atong mga pultahan. Siya nakakita nila sa hingpit, ug gusto Niyang luwason ang matag usa nila. Siya nakakita lapas pa sa ilang hitsura ug batasan ug mipili sa pag-pokus sa ilang balaanong mga kalidad ug kalig-on.Ug isip mga magtutudlo, Siya naglaum nga mao usab ang atong buhaton.

Karong tuiga kami dunay ipagawas nga bag-ong prayoridad nga giulohan og “Tan-awa ang Indibidwal.” Ang gitutukan niini nga prayoridad mao nga matag usa kanato makapalambo ang Kristohanong abilidad nga makita ang indibidwal nga mga panginahanglan, kalig-on, ug balaanong potensyal sa matag estudyante. Atong gilauman nga matag usa kanato mapalambo o mapalawom ang Kristohanong abilidad nga motan-aw lapas pa sa unsay nakita ug makat-on sa pagtan-aw sa matag estudyante isip lahi nga indidbidwal nga adunay balaanong potensyal ug motratar kanila sumala nianan.

Ang matag estudyante nga mosulod sa atong classroom adunay indibidwal nga mga sirkumstansya, mga panginahanglan, ug mga pagsulay nga makaapektar sa ilang kasinatian sa pagkat-on. Importante nga atong hinumduman nga ang seminary o institute kabahin lang sa kinabuhi sa matag estudyante—importante bahin, apan usa lang ka bahin. Mga pamaagi sa pagtudlo, mga kalainan sa kultura, mga kakulangan, adiksyon, ug pagkawala ug kasubo maoy pipila lamang sa mga butang nga makaapektar sa kasinatian sa pagkat-on sa estudyante.Ang mga sirkumstansya ug pag-ila dili maoy motino sa atong mga estudyante kondili naghatag nato og oportunidad sa pagtan-aw ug paghigugma nila sama sa gihimo sa Manluluwas.Anaa nato ang sagradong pribilehiyo ug responsibilidad nga mas matabangan kadtong kinsa bug-at ang mga gipas-an ug kinsa moanha sa klase nga nangita sa paglaum nga ihatag sa Manluluwas sa tanang katawhan.

Sa pagpamalandong niining sagradong responsibilidad nga makita ang indibidwal, nakat-on kaayo ko sa mga gitudlo ni Apostol Pablo sa 1 Mga Taga-Corinto 12. Gusto nakong ipaambit ang tulo ka mga leksyon nga akong nakat-unan.

Lesksyon 1: Si Pablo nagsugod sa iyang pagtudlo kabahin sa lawas ni Kristo ug ang bili sa matag miyembro pinaagi sa pagtudlo kabahin sa mga espiritwal nga gasa.Samtang nagtuon ko sa mga bersikulo 1–11, nakahunahuna ko nga kon usa sa mga yawe aron makita ang matag indibidwal sama sa nakita sa Manluluwas nila mao nga unahon pag-ila nga sila dunay mga gasa ug kalig-on nga kinahanglang makita ug gamiton. Kon makita nato ang mga estudyante niini nga paagi, atong mailhan ug magamit ang ilang mga kalig-on kay sa magtutok sa ilang mga kahuyang o dili maayong mga lihok. Usahay ang pamatasan sa usa ka estudyante wala gayud magpakita sa iyang tinuoray nga bili.Usa ka yanong kahanas nga mapalambo sa magtutudlo mao ang paghunong og kadiyot sa dili pa motubag sa komentaryo sa estudyante o kinaiya ug dayon mokonsiderar og duha o tulo ka posible nga mga rason “ngano” nga ingon niana ang gitubag o ang kinaiya sa estudyante. Makatabang kini nga makalikay ang usa ka magtutudlo nga malahi ang reaksyon ug mas maksabut sa espirituhanong mga gasa sa estudyante.

Sa pagpaninguha nga mahinumduman ang balaanong potensyal sa matag estudyante, kinahanglan usab natong mahibaloan nga ang mga sirkumstansya o mga kakulangan makapugong sa ilang tinguha o abilidad sa pagkat-on. Kini nanginahanglan nga mas tarungon nato sa pagpalambo ang mga leksyon nga makadapit ug makadasig sa mga indibidwal nga bansayon ang kabubut-on sa paggamit sa ilang espiritwal nga mga gasa sa proseso sa pagkat-on. Kini nga proseso dili sayon, apan kon pangayoon nato ang tabang sa Ginoo, iya kitang tabangan nga mahibalo unsaon nato pag-impluwensya ang Iyang mga anak.

Usa nako ka kasinatian diin akong nakat-unan ang bili sa pag-ila sa espiritwal nga mga gasa sa akong mga estudyante mao ang pinaagi sa usa sa akong mga estudyante nga dili ganahan mobasa sa sulod o gawas sa klase. Siya adunay talagsaong talento sa musika, ug samtang nag-ampo ko unsaon pagtabang niya, ang Ginoo mitubag og usa ka butang nga wala pa nako sukad mahimo. Gihatagan nako siya og iskedyul sa mga leksyon ug gihangyo siya nga mangita og kanta sa kada leksyon nga makatabang sa pagtudlo sa usa sa mga kamatuoran niana nga scripture block. Nanginahanglan kini nga siya mobasa sa gawas sa klase para mailhan ang mga kamatuoran aron siya makapangita og kanta. Naghatag usab kini niya og oportunidad sa pagpamatuod diha sa klase kon unsa ang iyang nakat-unan sa iyang pagpangandam. Sulod sa pipila ka mga semana, akong nakita nga milambo ang gugma niini nga estudyante sa Manluluwas ug ang iyang pag-apil sa klase miuswag. Nagserbisyo siya karon isip full-time missionary ug wala lamang magbasa apan nagtudlo sa mga kasulatan ug mipakigbahin sa iyang gasa sa pagpamatuod pinaagi sa musika.

Leksyon 2: Si Pablo mipasabut nga matag miyembro adunay bili. Sa mga bersikulo 14–18 Siya mitudlo kanato:

“Kay ang lawas dili usa ka bahin lamang, kon dili daghan.

“Kon ang tiil magaingon, Kay dili man ako kamot, dili ako bahin sa lawas; kana wala makapahimo niini nga dili bahin sa lawas?

“Ug kon ang dalunggan magaingon, Kay dili man ako mata, dili ako bahin sa lawas; kana wala makapahimo niini nga dili bahin sa lawas?

“Kon ang tibuok lawas lonlon pa nga mata, asa na man ang pagdungog? Kon ang tibuok lawas lonlon pa nga dalunggan, asa na man ang pagpanimaho?

“Apan ingon nga mao karon, ang mga bahin gipahimutang sa Dios diha sa lawas, ang matag usa kanila sumala sa iyang gikahimut-an.”

Ganahan ko sa imahe sa mga bahin sa lawas nga naghimo sa lain-lain apan importanteng nga papel. Ang kamot dili makapuli sa tiil. Ang dalunggan dili makapuli sa mata. Matag usa adunay talagsaon ug importanting papel, ug kada usa lain-lain og kontribusyon.Ang matag usa mahinungdanon aron ang lawas makalihok sa tibuok nga kapasidad.

Si Elder Holland migamit og laing panig-ingnan aron pagtudlo sa samang kamatuoran: “Sa balaang plano gituyo nga dili tanang mga tingog sa choir sa Dios magkaparehas. Kinahanglan lain-lain—soprano, ug alto, mga baritone ug mga base—aron makahimo og nindot nga huni. … Kon atong ipakaubos ang atong pagkalahi o maningkamot nga mahaum sa konsepto nga tumo-tumo … mawala kanato ang kaanindot sa panagkalahi-lahi sa katawhan nga gituyo sa Dios sa dihang gilalang Niya ang kalibutan.”³

Aron epektibong matabangan ang matag estudyante nga mahimong “makabig samtang kauban sila nato,”⁴kinahanglan motuo kita nga ang matag estudyante adunay bili ug mobuhat sumala niana. Sa pagkonsiderar niini nga kamatuoran, ako modapit sa matag usa kaninyo sa pagpangutana sa inyong kaugalingon niining duha ka pangutana: Tinud-anay ba ko nga nagtuo nga matag usa sa akong mga estudyante adunay bili ug mahimong miyembro nga dunay ikaabag? Ang ako bang mga lihok nagpakita niana nga pagtuo?

Nag-ampo ko nga ang Ginoo motabang nato nga mas magiyahan niini nga pagtuo.

Leksyon 3: Nagtudlo si Pablo nga kinahanglan natong ipakita ang sama nga pagtagad sa matag miyembro. Miingon siya, “Aron walay panagkasumpaki sa sulod sa lawas; hinonoa aron ang mga bahin niini masigbaton sa samang pagtagad alang sa usag-usa.”⁵

Usa kini ka gamhanang makapahinuktok nga bersikulo para nako: Gihatag ba nako “ang sama nga pagtagad” sa matag estudyante? Mas gitutukan ba nako ang mga estudyante nga mora og nakatampo sa klaro nga mga paagi?Mas sayon ba nako ang paghigugma niadtong kinsa mopataas sa ilang mga kamot ug kanunay andam ang ilang mga kasulatan aron sa pagpaambit sa ilang pagpamatuod ug mga makahuluganong mga komentaryo? Mas sayon ba nako ang paghatag og gugma ug atensyon niadtong kinsa nahigugma nako, ganahan sa klase, moabot sa saktong oras ug moabsent lang tungod kay dunay grabeng sakit? Nabantayan ba sa ubang mga estudyante dihang wala ko mohatag og “sama nga pagtagad” sa matag estudyante? Ug sa unsang paagi kini nakaapekto sa gugma, pagtahud, ug katuyoan sa akong classroom? Ang mga estudyante mas makapakita ug motagad sa matag usa sama sa gihimo sa Manluluwas kon ang matag usa kanato mopakita niini ngadto kanila.

Samtang naningkamot kita sa pagrepresentar sa Manluluwas sa atong pagtudlo ug mapalambo ang abilidad sa pagtan-aw sama sa Iyang pagtan-aw, kinahanglan atong hinumduman nga ang(1) tanan adunay espiritwal nga mga gasa nga ikatampo, (2) matag miyembro bililhon, ug (3) kinahanglan ipakita nato “ang sama nga pagtagad” sa matag miyembro.

Gusto kong mopaambit og usa pa ka dugang nga leksyon nga akong nakat-unan samtang naghunahuna ko sa panginahanglan niini nga prayoridad.Sa atong panahon ang kaaway, “sama sa nagangulob nga leon, nagalibut-libot, nga nangitag kinsay iyang matukob.”⁶ Isip bantugang kawatan, padayon niyang gikawatan ang mga indibidwal sa ilang balaanong pagkatawo ug koneksyon sa langit. Kinahanglan natong ipalambo ang abilidad nga makakita sama sa makita sa Manluluwas aron makatabang kita sa uban nga masabtan ang ilang balaanong potensyal ug magmatinud-anon sa Ginoo diha sa makalibog nga kalibutan nga nagtawag sa “dautan nga maayo, ug sa maayo nga dautan; nga nagabutang sa kangitngit nga ilis sa kahayag, ug sa kahayag nga ilis sa kangitngit.”⁷

Usa sa akong mga bayani sa kasulatan nga maayo kaayong nagpakita niini nga abilidad mao si Abigail. Gihulagway siya sa Daang Tugon isip “usa ka babaye nga masinabuton kaayo, ug may usa ka maanyag nga panagway.”⁸ Naminyo siya ngadto ni Nabal, usa ka tawo nga “dautan sa iyang binuhatan.”⁹ Human si Nabal miinsulto ug mibalibad sa pagtabang ni David, gipundok ni David ang iyang mga sundalo nga adunay tumong nga patyon si Nabal ug ang iyang banay. Sa dihang gisultian si Abigail sa mga sulugoon ni Nabal sa nagsingabot nga kakuyaw, nagdali siya og tipon og mga pagkaon ug nag-andam pagsugat ni David.

Sa ilang panagkita, miyukbo si Abigail sa atubangan ni David ug, sama sa simbolo ni Kristo, giangkon ang responsibilidad sa usa ka sala nga wala niya mabuhat ug nangayo sa iyang kapasayloan.¹⁰ Unsa ang nakita ni Abigail kang Nabal nga nakaawhag niya nga mahimo niyang manlalaban?

Pasayloa, ako nangaliyupo kanimo, ang paglapas sa imong sulogoon nga babaye: kay sa pagkatinuod ang Ginoo magahimo og usa ka malig-ong balay sa akong amo; tungod kay ang akong amo mogubat sa mga gubat sa Ginoo, ug ang dautan dili hikaplagan diha kanimo sa tanan nimong mga adlaw.”¹¹

Nganong mipili man siya, nianang importante nga higayon, sa pagpahinumdom ni David kon kinsa siya ug ang mga saad nga gihimo sa Ginoo? Unsa ang epekto sa iyang buhat sa pagtuo?

Ganahan ko sa tubag ni David sa dihang siya mideklarar:

“Bulahan ang Ginoong Dios sa Israel, nga nagpaanhi kanimo niining adlawa aron sa pagsugat kanako:

“Ug bulahan ang imong kaligdong, ug bulahan ikaw, nga nakapalikay kanako niining adlawa gikan sa pagpakasala tungod sa dugo, ug gikan sa pagpanimalos sa akong kaugalingon pinaagi sa akong kamot.”¹²

Mituo ko nga niana nga higayon, paghinumdom sa saad ni Presidente Packer, si Abigail adunay “imahe ni Kristo … nga nakakulit sa [iyang panagway]. Ug alang sa tanang praktikal nga mga katuyoan, diha niana nga classroom, niana nga panahon, ug niana nga pagpahayag ug uban niana nga inspirasyon, [ikaw mao Siya ug Siya mao ikaw].”¹³

Kita adunay oportunidad sa makakita sa uban sama sa Iyang makita kanila ug tabangan sila nga makita ang balaan nga anaa sa ilang kaugalingon.

Dili mahulagway sa mga pulong ang gugma ug pasalamat nga akong gibati alang niadtong kinsa nagpakita niining Kristohanong kinaiya sa akong kinabuhi. Una ug labaw sa tanan, ang akong anghel nga inahan nga kanunay nakakita nako isip usa nga adunay balaanong potensyal ug espiritwal nga mga gasa. Kanunay ko niyang nakita nga magtatampo—bisan kon wala ko magpakita niini—ug walay hunong sa paglihok aron matabangan ko sa pagpalambo niana nga potensyal. Aduna koy mga lider sa priesthood kinsa naghatag og paglaum sa akong kinabuhi pinaagi sa pagpabati sa gugma sa Amahang Langitnon para nako ug nagpahinumdum nako sa akong bili. Ang akong kaugalingong mga magtutudlo sa seminary ug sa institute—kadaghanan nagtan-aw karon—nakakita og butang kanako nga dili nako makita sa akong kaugalingon. Ang akong trabaho nindot nga napalambo sa mga lalaki ug babaye kinsa mialsa nako ug migiya nako ngadto sa Manluluwas pinaagi sa ilang ehemplo sa pagtan-aw sa indibidwal.

Mahangturon kong mapasalamaton sa mga paagi diin ang Ginoo nagpadayon sa pagpakita nga Iya kong nakita nga dunay bili ug balor. Iya kong gipanalanginan og mga gasa nga naghatag nako og mga oportunidad nga magamit kadto nga mga gasa aron matabangan ang uban nga mahisama Niya. Ug nakahibalo ko nga Iya usab na nga gibuhat sa matag usa kaninyo ug sa atong mga estudyante.

Sa miaging pipila ka bulan, aduna koy nindot nga kasinatian sa pagtuon sa mga kasulatan nga nagtutok kon giunsa pagtan-aw sa Manluluwas ang indibidwal ug nagtudlo base niana nga panlantaw. Ang pagkat-on gikan Kaniya direktang nakapausab nako. Giawhag ko kamo nga dawaton ang sama nga oportunidad. Siya mao ang hingpit nga modelo. Adunay dili maihap nga nga ehemplo kon giunsa niya paghimo og mga kasinatian sa pagkat-on ug mga leksyon nga motukma sa indibidwal nga mga panginahanglan ug mas matabangan kadtong Iyang mga gitudloan nga masabtan ang ilang balaanong potensyal.

Minahal kong mga higala, mag-ampo ko nga ang atong Amahan sa Langit magpadayon sa pagpalambo sa atong indibidwal nga kapasidad nga makakita sama sa Iyang pagkakita, mahigugma sama sa Iyang paghigugma, ug mobuhat sama sa Iyang pagbuhat. Mag-ampo ko nga atong pangitaon kini nga gasa ug mangita og paagi nga maangkon o mapun-an kini. Mag-ampo ko nga kita magpadayon nga maningkamot nga maanaa ang imahe sa Manluluwas sa atong mga panagway samtang mobarug kita atubangan sa atong mga estudyante matag adlaw. Nakahibalo ko nga atong mapalambo kini nga gasa kon atong pangayoon ang Iyang tabang. Sa ingon ako mopamatuod, sa pangalan ni Jesukristo, amen.