22:22

ការរៀនសូត្រ និងអំណរដ៏ជ្រាលជ្រៅនៅក្នុងព្រះអម្ចាស់

អែលឌើរ គីម ប៊ី ក្លាក

ពួកចិតសិបនាក់ដែលមានសិទ្ធិអំណាចទូទៅ

ការចាក់ផ្សាយអំពីការបំពាក់បំប៉នថ្នាក់សិក្ខាសាលា និងថ្នាក់វិទ្យាស្ថាននៃសាសនាប្រចាំឆ្នាំ • ថ្ងៃទី ១៣ ខែ មិថុនា ឆ្នាំ ២០១៧

វាគឺជាពរជ័យមួយដើម្បីនិយាយទៅកាន់គ្រួសារថ្នាក់សិក្ខាសាលា និងថ្នាក់វិទ្យាស្ថាននៅជុំវិញពិភពលោក ។ ខ្ញុំស្រឡាញ់បងប្អូនខ្លាំងណាស់ ហើយខ្ញុំមានអំណរគុណចំពោះបងប្អូន និងរាល់កិច្ចការដែលបានបងប្អូនបានធ្វើ ។ ខ្ញុំសូមអធិស្ឋានឲ្យ ពរជ័យរបស់ព្រះអម្ចាស់កើតមានដល់បងប្អូននៅក្នុងកិច្ចការដ៏អស្ចារ្យនេះដែលមាននៅចំពោះមុខយើង ។

បងប្អូនប្រុសស្រីជាទីស្រឡាញ់ ការបង្រៀន ការរៀបចំខ្លួន ការលើកស្ទួយ និងការពង្រឹងដល់ជំនាន់កំពុងពេញវ័យគឺជាកិច្ចការដ៏សំខាន់ ។ ខ្ញុំទទួលអារម្មណ៍ពីភាពបន្ទាន់ និងប្រពលភាពអំពីកិច្ចការនោះ ។ យុវជន និងយុវមជ្ឈិមវ័យក្នុងសាសនាចក្ររបស់ព្រះអម្ចាស់ជួបឧបសគ្គលំបាកៗនិងឱកាសដ៏អស្ចារ្យជាច្រើន ។ ពិភពលោកនៅជុំវិញពួកគេបានពោរពេញដោយបច្ចេកវិទ្យាដ៏មានឥទ្ធិពល ដែលបានប្រើសម្រាប់ការណ៍ល្អដ៏ធំ និងការណ៍អាក្រក់ដែលគួរឲ្យខ្លាច ។ យុវវ័យយើងជាច្រើនរស់នៅក្នុងប្រទេសដែលបានរងឥទ្ធិពលដោយសង្គ្រាម និង ពាក្យចចាមអារ៉ាមអំពីសង្គ្រាម សកម្មភាពភេរវកម្ម អំពើពុករលួយ ការបំផ្លិចបំផ្លាញក្រុមគ្រួសារ ការបែងចែកខាងនយោបាយ និងសង្គម និងការរាតត្បាតនៃភាពទ័លក្រ ជំងឺ និងទុរិ្កក្ស ។

ប៉ុន្តែ នៅកណ្ដាលភាពចលាចល និងភាពវឹកវរនេះ ព្រះអម្ចាស់ ព្រះយេស៊ូវគ្រីស្ទកំពុងរៀបចំនគរ និងរាស្ត្រទ្រង់សម្រាប់ការយាងមករបស់ទ្រង់ ។ ទ្រង់កំពុងកាន់កាប់ដោយព្រះចេស្ដានៅជុំវិញពិភពលោកដើម្បីប្រមូលផ្ដុំរាស្ត្រ អ៊ីស្រាអែលដែលបែកខ្ញែក ដើម្បីស្ថាបនានគររបស់ទ្រង់ និងស្ថាបនាទីក្រុងស៊ីយ៉ូន ។ ព្រះហស្ដនៃសេចក្ដីស្រឡាញ់ និងសេចក្ដីមេត្តាករុណារបស់ទ្រង់បានលាតសន្ធឹងទៅកាន់យុវវ័យ និងយុវមជ្ឈិមវ័យនៃសាសនាចក្ររបស់ទ្រង់ ដោយអញ្ជើញពួកគេឲ្យទទួលព្រះចេស្ដានៃការព្យាបាល ការពង្រឹង និងការប្រោសលោះរបស់ទ្រង់នៅក្នុងជីវិតរបស់ពួកគេ ។

សង្គ្រាមដ៏ធំរវាងសេចក្ដីល្អ និងសេចក្ដីអាក្រក់ដែលបានចាប់ផ្ដើមនៅកាលពីជីវិតមុនផែនដី បន្តមានកម្លាំងកាន់តែខ្លាំងឡើងនៅថ្ងៃចុងក្រោយនេះ ។ នៅក្នុងចម្បាំងនោះ យុវវ័យ និងយុវមជ្ឈិមវ័យនៃជំនាន់កំពុងពេញវ័យនេះពុំបានលាក់ខ្លួនពួនសម្ងំក្នុងផ្ទះឡើយ ។ ពួកគេនៅជួរមុខ ហើយពួកគេនឹងដើរតួនាទីយ៉ាងសំខាន់នៅក្នុងកិច្ចការដ៏អស្ចារ្យរបស់ព្រះអម្ចាស់ ។ នេះជាអ្វីដែលខ្ញុំចង់និយាយទៅកាន់បងប្អូននៅថ្ងៃនេះ ។

បងប្អូនស្ថិតនៅជួរមុខជាមួយនឹងជំនាន់កំពុងពេញវ័យ ។ កាលខ្ញុំគិតពីបងប្អូន និងអ្វីដែលបងប្អូនធ្វើរាល់ថ្ងៃដើម្បីជួយដល់ជីវិតយុវវ័យ និងយុវមជ្ឈិមវ័យរាប់ម៉ឺននាក់នៃសាសនាចក្ររបស់ព្រះអម្ចាស់ ខ្ញុំគិតពីការនិមិត្តរបស់នីហ្វៃអំពីជំនាន់របស់យើង ៖

« ខ្ញុំ នីហ្វៃ បាន ឃើញ ថា ព្រះ ចេស្ដា នៃ កូន ចៀម នៃ ព្រះ បាន យាង ចុះ មក សណ្ឋិត លើ ពួក បរិសុទ្ធ ក្នុង សាសនាចក្រ នៃ កូន ចៀម ហើយ លើ រាស្ត្រ ដែល នៅ ក្នុង សេចក្ដី សញ្ញា នៃ ព្រះ អម្ចាស់ ដែល បាន ខ្ចាត់ខ្ចាយ ពាសពេញ លើ ផ្ទៃ ផែនដី ហើយ ពួក គេ ប្រដាប់ អាវុធ ដោយ សេចក្ដី សុចរិត និង ដោយ ព្រះ ចេស្ដា នៃ ព្រះ ដោយ សិរី ល្អ ដ៏ អស្ចារ្យ» ។^១

នីហ្វៃពិពណ៌នាពីដំណើរការដ៏ទេវភាពមួយដែលបងប្អូនបានចូលរួមតាមរបៀបមួយដ៏សំខាន់ ។ កាលខ្ញុំគិតពីអ្វីដែលបងប្អូនកំពុងធ្វើដើម្បី បង្រៀនថ្នាក់សិក្ខាសាលា និងថ្នាក់វិទ្យាស្ថាន ខ្ញុំសង្ឃឹមថា បទគម្ពីរនេះនឹងកើតមានក្នុងគំនិតរបស់បងប្អូន ។ បងប្អូនគឺជាឧបករណ៍ក្នុងព្រះហស្ដរបស់ព្រះនៅក្នុងដំណើរការដ៏ទេវភាពមួយដែលកូនចៅនៃសេចក្ដី សញ្ញារបស់ទ្រង់បានពរដោយសេចក្ដីសុចរិត ហើយទទួលព្រះចេស្ដា និងសិរីល្អរបស់ទ្រង់ ។

នេះគឺជាអ្វីដែលបងប្អូនធ្វើ ។ បងប្អូនបង្រៀនដំណឹងល្អនៃព្រះយេស៊ូវគ្រីស្ទដល់យុវវ័យដ៏ឆ្នើម ហើយបងប្អូនជួយពួកគេឲ្យទទួលអំណាចនៃព្រះនៅក្នុងបព្វជិតភាព ព្រះវិហារបរិសុទ្ធ ភាពជាដៃគូនៃព្រះវិញ្ញាណបរិសុទ្ធ បទគម្ពីរបរិសុទ្ធ សេចក្ដីសញ្ញា និងពិធីបរិសុទ្ធដ៏ពិសិដ្ឋ ។ វាគឺជាព្រះចេស្ដានៃព្រះ ហើយទ្រង់ប្រទានវាដល់បុត្រាបុត្រីជាទីស្រឡាញ់របស់ទ្រង់ ដើម្បីពួកគេអាចស្រឡាញ់ បង្រៀន ហើយបម្រើដោយសេចក្ដីជំនឿ និងសេចក្ដីសង្ឃឹមលើទ្រង់ ដោយធ្វើកិច្ចការរបស់ទ្រង់ពេញមួយជីវិតរបស់ពួកគេ ។

ពេលខ្លះ វាប្រហែលជាមានការលំបាកដើម្បីភ្ជាប់ការនិមិត្តដ៏បំផុសគំនិតរបស់នីហ្វៃទៅនឹងជីវិតពិតនៃថ្នាក់សិក្ខាសាលារបស់បងប្អូននៅម៉ោង ៦:១៥ នាទីព្រឹក ឬនឹងថ្នាក់វិទ្យាស្ថាននៅពេលយប់ដែលមាននិស្សិតនៅសាកលវិទ្យាល័យជាច្រើនដែលនឿយហត់ ។ ខ្ញុំធ្លាប់ឃើញក្រសែភ្នែកនៃការងងុយដេករបស់ក្មេងជំទង់នៅព្រឹកព្រលឹម ។ ហើយខ្ញុំដឹងយ៉ាងប្រាកដពីភិនភាគនៃនិស្សិតនៅសាកលវិទ្យាល័យ ។ ប៉ុន្តែខ្ញុំធ្លាប់ឃើញអ្វីកើតឡើងដល់ក្មេងជំទង់ និងនិស្សិតនៅសាកលវិទ្យាល័យទាំងនោះ ពេលគ្រូបង្រៀនម្នាក់ដែលស្រឡាញ់ពួកគេបង្រៀនពួកគេដោយព្រះវិញ្ញាណបរិសុទ្ធ ។ ខ្ញុំធ្លាប់ឃើញអ្វីកើតឡើងនៅក្នុងដួងចិត្ត និងព្រលឹងពួកគេ នៅពេលគ្រូបង្រៀននោះបើកបទគម្ពីរដ៏មានឥទ្ធិពលប្រាប់ពួកគេ ហើយជួយពួកគេរៀនយ៉ាងស៊ីជម្រៅតាមរបៀបរបស់ព្រះអម្ចាស់ ។ ខ្ញុំដឹងពីរឿងនោះ ដោយសារវាជាអ្វីដែលបានកើតឡើងដល់កូនចៅខ្ញុំគ្រប់រូប ។ ហើយវាជាអ្វីដែលកំពុងកើតឡើងដល់ចៅៗរបស់ខ្ញុំ ។

យុវវ័យ និងយុវមជ្ឈិមវ័យដែលបងប្អូនបង្រៀនគឺជាមនុស្សដ៏អស្ចារ្យ ។ ប៉ុន្តែយើងត្រូវការពួកគេជាច្រើនដើម្បីទទួលពរជ័យនៃបព្វជិតភាព និងព្រះវិហារបរិសុទ្ធ បម្រើបេសកកម្ម រៀបការក្នុងព្រះវិហារបរិសុទ្ធ បង្កើតក្រុមគ្រួសារអស់កល្ប បម្រើព្រះអម្ចាស់នៅក្នុងនគរទ្រង់ ហើយធ្វើជាពន្លឺដល់ពិភពលោកនេះ—គឺត្រូវការពួកគេជាច្រើននាក់ទៀត ។ នោះមានន័យថា បងប្អូនត្រូវតែមានភាពស្ទាត់ជំនាញចំពោះអ្វីដែលបងប្អូនធ្វើ ។ ព្រះអម្ចាស់ត្រូវការឲ្យបងប្អូនកាន់តែមានឥទ្ធិពល និងមានប្រសិទ្ធភាពនៅក្នុងកិច្ចការដ៏អស្ចារ្យនេះ ។

អំណរនៅក្នុងព្រះអម្ចាស់

នៅថ្ងៃនេះ ខ្ញុំចង់ចែកចាយនឹងបងប្អូននូវគំនិតខ្លះៗដែលខ្ញុំសង្ឃឹមថា វានឹងជួយបងប្អូន ពេលបងប្អូនស្វែងរកព្រះរាជបំណងរបស់ព្រះ ។ សារលិខិតរបស់ខ្ញុំសាមញ្ញ ៖ យើងត្រូវធ្វើច្រើនដើម្បីជួយយុវវ័យ និងយុវមជ្ឈិមវ័យក្នុងសាសនាចក្រឲ្យដកពិសោធន៍អំណរ—ជាអំណរពិតប្រាកដខាងវិញ្ញាណ—ក្នុងព្រះអម្ចាស់ព្រះយេស៊ូវគ្រីស្ទ ។ ខ្ញុំជឿថា វិធីដ៏ល្អបំផុតដើម្បីធ្វើកិច្ចការនោះគឺតាមរយៈការរៀនសូត្រដ៏ស៊ីជម្រៅពីគោលលទ្ធិរបស់ព្រះគ្រីស្ទតាមរបៀបរបស់ព្រះអម្ចាស់ ។ វាគឺជាសាក្សី និងទីបន្ទាល់របស់ខ្ញុំចំពោះបងប្អូនថា ការរៀនសូត្រស៊ីជម្រៅអំពីគោលលទ្ធិរបស់ព្រះយេស៊ូវគ្រីស្ទដឹកនាំទៅរកអំណរនៅក្នុងព្រះអម្ចាស់ ។

ដូចប្រធាន ណិលសុន បានបង្រៀនថា

« បងប្អូនប្រុសស្រីជាទីស្រឡាញ់របស់ខ្ញុំ អំណរដែលយើងមាននោះ វាមានឥទ្ធិពលតិចតួចចំពោះកាលៈទេសៈនៃជីវិតយើង ប៉ុន្តែវាមានឥទ្ធិពលខ្លាំងលើអ្វីដែលជីវិតយើងផ្តោតទៅលើ ។

« ពេលយើងផ្ដោតជីវិតរបស់យើងលើផែនការនៃសេចក្ដីសង្គ្រោះរបស់ព្រះ និងព្រះយេស៊ូវគ្រីស្ទ ព្រមទាំងដំណឹងល្អរបស់ទ្រង់ យើងអាចមាននូវអំណរ ទោះជាមានអ្វីកំពុងកើតឡើង—ឬមិនកើតឡើង—នៅក្នុងជីវិតយើងក៏ដោយ ។ អំណរកើតមានឡើង ហើយដោយសារតែទ្រង់ ។ ទ្រង់គឺជាប្រភពនៃអំណរទាំងអស់ ។^២

នោះគឺជាអំណរដែលយុវវ័យយើងត្រូវមាន ។ វាការពារពួកគេពីអំពើអាក្រក់ លើកទឹកចិត្តពួកគេឲ្យធ្វើជាមនុស្សសុចរិត ធ្វើឲ្យពួកគេមានបំណងចង់បានព្រះវិញ្ញាណបរិសុទ្ធគង់នឹងពួកគេជានិច្ច ហើយខិតពួកគេទៅជិតព្រះអម្ចាស់ ។

ព្រះអង្គសង្គ្រោះបានប្រទានគន្លងដ៏អស្ចារ្យមួយនៅក្នុងព្រះគម្ពីរមរមនដើម្បីជួយបងប្អូនឲ្យជួយដល់សិស្សរកឃើញអំណរនៅក្នុងទ្រង់ ៖

« ដូច្នេះ ចូរលើកពន្លឺរបស់អ្នករាល់គ្នាឡើង ប្រយោជន៍ឲ្យបានភ្លឺដល់មនុស្សលោក ។ មើលចុះ យើងជា ពន្លឺ ដែលអ្នករាល់គ្នានឹងលើកឡើង—គឺនូវអ្វីដែលអ្នករាល់គ្នាបានឃើញយើងធ្វើ ។ មើលចុះ អ្នករាល់គ្នាឃើញថា យើងបានអធិស្ឋានដល់ព្រះវរបិតា ហើយអ្នកទាំងអស់គ្នាបានធ្វើបន្ទាល់ទុក ។

« ហើយអ្នករាល់គ្នាឃើញថា យើងមិនបានបញ្ជានរណាមួយក្នុងពួកអ្នកឲ្យចេញទៅឡើយ ប៉ុន្តែបានបញ្ជាអ្នករាល់គ្នាឲ្យមករកយើងវិញ ដើម្បីឲ្យអ្នករាល់គ្នាអាចស្ទាប ហើយឃើញយើង ម្ល៉ោះហើយ អ្នករាល់គ្នាក៏ត្រូវធ្វើយ៉ាងនោះដល់មនុស្សលោកដែរ ហើយអស់អ្នកណាដែលបំបាក់បញ្ញត្តិនេះ គឺបណ្ដោយខ្លួនឲ្យត្រូវដឹកនាំទៅក្នុងការល្បួងវិញ » ។^៣

ពេលព្រះអង្គសង្គ្រោះបង្ហាញអង្គទ្រង់ដល់ប្រជាជននៅព្រះវិហារបរិសុទ្ធលើដែនដីបរិបូរ ទ្រង់ស្រឡាញ់ពួកគេ បង្រៀនពួកគេពីគោលលទ្ធិរបស់ទ្រង់ ហើយបានប្រទានពរដល់ពួកគេ ។ ពួកគេមានអំណរដ៏ធំ ។ នៅក្នុងបទគម្ពីរនេះព្រះអង្គសង្គ្រោះបានហៅបងប្អូនឲ្យមករកទ្រង់ ហើយទទួលអារម្មណ៍ពីសេចក្ដីស្រឡាញ់ទ្រង់ ហើយដកពិសោធន៍អំណរទ្រង់តាមរយៈព្រះចេស្ដានៃព្រះវិញ្ញាណបរិសុទ្ធ ។ បន្ទាប់មក ទ្រង់បង្គាប់បងប្អូនឲ្យយកអ្វីដែលបងប្អូនបានឃើញ ហើយមានអារម្មណ៍ទៅប្រាប់ដល់សិស្សរបស់បងប្អូន ៖ ស្រឡាញ់ពួកគេ បង្រៀនពួកគេពីគោលលទ្ធិទ្រង់ អញ្ជើញពួកគេមករកទ្រង់ ហើយទទួលអំណរទ្រង់ ។ ប្រសិនបើបងប្អូនមានសេចក្ដីស្រឡាញ់ គោលលទ្ធិ ពន្លឺ និងអំណររបស់ព្រះគ្រីស្ទ បងប្អូនអាចបំផុសគំនិត ហើយលើកទឹកចិត្តពួកគេឲ្យស្វែងរកបទពិសោធន៍ផ្ទាល់ខ្លួនខាងវិញ្ញាណរបស់ពួកគេជាមួយនឹងព្រះអម្ចាស់ ។

អំណរ និងការរៀនសូត្រស៊ីជម្រៅ

ការរៀនសូត្រដែលដឹកនាំទៅរកអំណរគឺជាការរៀនសូត្រស៊ីជម្រៅក្នុងគោលលទ្ធិរបស់ព្រះយេស៊ូវគ្រីស្ទ ហើយវាត្រូវតែធ្វើឡើងតាមរបៀបរបស់ព្រះអម្ចាស់ ។ ការរៀនសូត្រស៊ីជម្រៅគឺជាការរៀនសូត្រឲ្យអស់ពីព្រលឹង—គំនិត ដួងចិត្ត រូបកាយ និងវិញ្ញាណអមតៈ ។ ការរៀនសូត្រស៊ីជម្រៅបង្កើនអំណាចរបស់សិស្សដើម្បីធ្វើរឿងបីយ៉ាង ៖^៤

១.ដឹង ហើយយល់

ទីមួយគឺដើម្បីដឹង ហើយយល់ នេះគឺជាចំណេះដឹងនៃគំនិត និងដួងចិត្ត ។ ឧទាហរណ៍ ដោយអនុវត្តសេចក្ដីជំនឿលើព្រះយេស៊ូវគ្រីស្ទ សិស្សរៀនថា សេចក្ដីជំនឿលើព្រះគ្រីស្ទគឺជាគោលការណ៍មួយនៃសកម្មភាព និងអំណាច ។ តាមរយៈសាក្សីពីព្រះវិញ្ញាណ ពួកគេទទួលអារម្មណ៍ពីសេចក្ដីពិតនៃគោលការណ៍នោះ ហើយចាប់ផ្ដើមមើលឃើញកាន់តែច្បាស់ មានបំណងប្រាថ្នាកាន់តែខ្លាំង ហេតុដូច្នោះហើយពួកគេយល់នៅក្នុងដួងចិត្តរបស់ពួកគេកាន់តែពេញលេញនូវដំណើរការនៃគោលការណ៍នោះនៅក្នុងជីវិតរបស់ពួកគេ ។

២.ធ្វើសកម្មភាពសុចរិតដែលមានប្រសិទ្ធភាព

ទីពីរគឺដើម្បីធ្វើសកម្មភាពសុចរិតដែលមានប្រសិទ្ធភាព សិស្សរៀនពីរបៀបដើម្បីអនុវត្តគោលការណ៍នៃសេចក្ដីជំនឿលើព្រះយេស៊ូវគ្រីស្ទក្នុងជីវិតរបស់ពួកគេ រួចហើយធ្វើវា ។ ឧទាហរណ៍ ពួកគេអាចនឹងសម្រេចចិត្តធ្វើសកម្មភាពដោយសេចក្ដីជំនឿលើព្រះអង្គសង្គ្រោះដើម្បីមានភាពក្លាហានក្នុងការអញ្ជើញមិត្តម្នាក់ឲ្យអានព្រះគម្ពីរមរមន ។ នៅពេលពួកគេធ្វើសកម្មភាពដោយសេចក្ដីជំនឿលើទ្រង់ នោះភាពជឿជាក់របស់ពួកគេលើទ្រង់រីកចម្រើន ហើយព្រះអម្ចាស់ប្រទានពរដល់ពួកគេឲ្យមានសេចក្ដីជំនឿដ៏អស្ចារ្យ ។

៣.ប្រែក្លាយដូចជាព្រះវរបិតាសួគ៌របស់យើង

ទីបីគឺដើម្បីប្រែក្លាយដូចជាព្រះវរបិតាសួគ៌របស់យើង ។ ការប្រែក្លាយគឺជាដំណើរការផ្លាស់ប្ដូរលក្ខណៈសម្បត្តិមួយ និងនិស្ស័យរបស់សិស្ស ។ វាកើតមានតាមរយៈព្រះចេស្ដាប្រោសលោះ និងពង្រឹងរបស់ព្រះយេស៊ូវគ្រីស្ទ ។ ដោយអនុវត្តតាមគោលការណ៍នៃសេចក្ដីជំនឿលើព្រះអង្គសង្គ្រោះ វាមានន័យថា សិស្សម្នាក់ប្រែក្លាយជាមនុស្សម្នាក់កាន់តែស្មោះត្រង់ ។ សេចក្ដីជំនឿលើព្រះគ្រីស្ទក្លាយជាលក្ខណៈមួយនៃលក្ខណៈសម្បត្តិរបស់ពួកគេ ជាអត្តសញ្ញាណពិតរបស់ពួកគេ ពេលពួកគេរីកចម្រើនជាបន្តបន្ទាប់នៅក្នុងចំណេះដឹង និងការយល់ដឹងពីសេចក្ដីជំនឿលើព្រះយេស៊ូវគ្រីស្ទ ធ្វើសកម្មភាពដោយសេចក្ដីជំនឿលើទ្រង់ ដើម្បីធ្វើអ្វីដែលទ្រង់ចង់សម្រេច ហើយស្វែងរកអំណោយទាន និងពរជ័យរបស់ទ្រង់ដើម្បីប្រែក្លាយដូចជាទ្រង់ និងព្រះវរបិតាទ្រង់ ។

កត្តាទាំងបីនេះនៃការរៀនសូត្រស៊ីជម្រៅជួយពង្រឹងដល់គ្នាទៅវិញទៅមក ។ ការប្រែក្លាយជាមនុស្សស្មោះត្រង់ម្នាក់បង្កើនសមត្ថភាពរបស់សិស្សម្នាក់ឲ្យដឹង ហើយយល់ ។ ការយល់ដឹងស៊ីជម្រៅលើកទឹកចិត្តឲ្យមានសកម្មភាពដ៏មានប្រសិទ្ធភាពច្រើន ដែលវាបង្កើតនូវគំនិតថ្មី ហើយដឹកនាំទៅលក្ខណៈសម្បត្តិដ៏រឹងមាំ ។ មានអំណរដ៏ធំនៅក្នុងកត្តានីមួយៗនៃការរៀនសូត្រស៊ីជម្រៅ—អំណរនៅក្នុងការយល់ដឹងថ្មី អំណរក្នុងសកម្មភាពសុចរិត អំណរក្នុងការប្រែក្លាយកាន់តែដូចជាព្រះវរបិតា និងព្រះរាជបុត្រា ។

របៀបរបស់ព្រះអម្ចាស់ដើម្បីរៀនឲ្យស៊ីជម្រៅ

ការអញ្ជើញទាំងបី

របៀបរបស់ព្រះអម្ចាស់ដើម្បីរៀនឲ្យស៊ីជម្រៅគឺសាមញ្ញ ប៉ុន្តែមានឥទ្ធិពល ។ នេះគឺជាការពិពណ៌នារបស់ព្រះអម្ចាស់ស្ដីពីការរៀនសូត្រតាមរបៀបទ្រង់ ៖

« បើសិនជាភ្នែករបស់អ្នកស្មោះស្ម័គ្រទាំងស្រុងទៅចំពោះសិរីល្អរបស់យើង នោះរូបកាយអ្នកទាំងមូលនឹងបានពោរពេញទៅដោយពន្លឺ » ។^៥

« ប្រុងប្រៀបខ្លួន ហើយញែកខ្លួនជាបរិសុទ្ធ » ។^៦

« បង្រៀនគ្នាទៅវិញទៅមកនូវគោលលទ្ធិនៃនគរ » ។^៧

« ចូរអ្នករាល់គ្នាព្យាយាមបង្រៀន ហើយព្រះគុណរបស់យើងនឹងនៅជាមួយអ្នក » ។^៨

« ចូរអ្នករាល់គ្នាព្យាយាមស្វែងរក ហើយបង្រៀនគ្នាទៅវិញទៅមកនូវពាក្យសម្ដីនៃប្រាជ្ញាវាងវៃ » ។^៩

« ចូរស្វែងរកការរៀនសូត្រ គឺដោយសារការសិក្សា និង ដោយសារសេចក្តីជំនឿផង » ។^១០

« តាំងគ្រូបង្រៀនម្នាក់នៅក្នុងចំណោមអ្នករាល់គ្នា ហើយចូរកុំឲ្យទាំងអស់គ្នានិយាយព្រមគ្នាឡើយ » ។^១១

« ចូរនិយាយម្នាក់ម្ដង ហើយចូរឲ្យទាំងអស់គ្នាស្ដាប់ … ទើបឲ្យទាំងអស់បានស្អាងឡើងទាំងអស់គ្នា » ។^១២

« ហួសពីអស់ទាំងអ្វីៗទៅទៀត ចូរបំពាក់ខ្លួនដោយចំណងនៃសេចក្ដីសប្បុរស » ។^១៣

បទគម្ពីរដ៏មានខ្លឹមសារទាំងនេះដកស្រង់មកពីកណ្ឌទី ៨៨នៃគោលលទ្ធិ និងសេចក្ដីសញ្ញាបង្ហាញឲ្យស្គាល់ពី ធាតុបីយ៉ាងដែលពង្រឹងគ្នាទៅវិញទៅមកក្នុងរបៀបរបស់ព្រះអម្ចាស់ដើម្បីរៀនសូត្រឲ្យស៊ីជម្រៅ ។^១៤ ទីពីរគឺ ការប្រមូលផ្ដុំគ្នាដើម្បី បង្រៀនគ្នាទៅវិញទៅមក ក្នុងចំណងនៃសេចក្ដី សប្បុរស បានដឹកនាំដោយគ្រូបង្រៀនដ៏បំផុសគំនិតម្នាក់ បានចូលរួមដោយព្រះគុណរបស់ព្រះយេស៊ូវគ្រីស្ទ ។ ទីបីគឺ ការទទួលវិវរណៈ ការបំផុសគំនិត និងអំណោយទានខាងវិញ្ញាណផ្សេងទៀតដែលកើតមានតាមរយៈព្រះចេស្ដានៃព្រះវិញ្ញាណបរិសុទ្ធ ។

គ្រូបង្រៀនតាមរបៀបរបស់ព្រះអម្ចាស់ដើរតួបំផុសគំនិតយ៉ាងសកម្មមួយក្នុងការធ្វើឲ្យសិស្សចូលប្រឡូកនៅរាល់ធាតុនៃការរៀនសូត្រស៊ីជម្រៅ ។ មានរឿងពីរយ៉ាងដែលចាំបាច់ ៖ ទីមួយ គឺថាបងប្អូនមានព្រះវិញ្ញាណបរិសុទ្ធគង់នៅនឹងបងប្អូន ហើយថាបងប្អូនស្រឡាញ់សិស្ស ។

បងប្អូនមាននូវធនធានអស្ចារ្យមួយនៅក្នុង—ក្បួនខ្នាត ការបង្រៀន និងការរៀនសូត្រដំណឹងល្អ^១៥—ដើម្បីជួយបងប្អូនបង្រៀនដើម្បីសិស្សរបស់អ្នកនឹងរៀនសូត្រតាមរបៀបរបស់ព្រះអម្ចាស់ ។ ដូច្នេះ ខ្ញុំមានកិច្ចការមួយឲ្យបងប្អូនធ្វើ ៖ខ្ញុំចង់ឲ្យបងប្អូនអាន ហើយសិក្សាក្បួនខ្នាតនៅក្នុងកែវភ្នែកនៃការរៀនសូត្រស៊ីជម្រៅ ជាពិសេសអំពីគោលលទ្ធិរបស់ព្រះយេស៊ូវគ្រីស្ទ ដែលវាដឹកនាំទៅរកអំណរ ។ ពេលបងប្អូនយល់ដឹងពីការរៀនសូត្រស៊ីជម្រៅនោះ ពីព្រោះអំណរគឺជាគោលបំណងរបស់បងប្អូន វានឹងផ្លាស់ប្ដូររបៀបដែលបងប្អូនអនុវត្តគោលការណ៍ដ៏មានឥទ្ធិពលដែលមាននៅក្នុងក្បួនខ្នាតនោះ ។ ខ្ញុំសូមផ្ដល់ឧទាហរណ៍សាមញ្ញបី ( មានច្រើនទៀត ) ៖

បងប្អូននឹងសុំឲ្យសិស្សរបស់បងប្អូនត្រៀមខ្លួន—មកថ្នាក់ដោយត្រៀមខ្លួនបង្រៀនគ្នាទៅវិញទៅមក ។
បងប្អូននឹងដាក់អាទិភាពដើម្បីជួយសិស្សបងប្អូនឲ្យអភិវឌ្ឍលក្ខណៈដូចជាព្រះគ្រីស្ទ ។
បងប្អូននឹងធ្វើឲ្យអំណរក្លាយជាគោលបំណងរួមមួយក្នុងថ្នាក់រៀនបងប្អូន ហើយសិស្សនឹងចែកចាយទីបន្ទាល់អំពីអំណរជាទៀងទាត់ ។

បងប្អូនប្រុសស្រីជាទីស្រឡាញ់ ខ្ញុំដឹងថា បងប្អូនបានធ្វើនូវរឿងដ៏អស្ចារ្យជាច្រើនរួចហើយ ដើម្បីជួយសិស្សបងប្អូនដាក់ដំណឹងល្អនៃព្រះយេស៊ូវគ្រីស្ទក្នុងជម្រៅចិត្តរបស់ពួកគេ ហើយដកពិសោធន៍នូវអំណរក្នុងទ្រង់ ។ ខ្ញុំដឹងពីពលិកម្ម និងការលះបង់របស់បងប្អូន ។ ហើយព្រះអម្ចាស់ទ្រង់ត្រាស់ដឹងដូចគ្នា ។

នៅថ្ងៃនេះ ខ្ញុំចង់បញ្ចប់ជាមួយនឹងការអញ្ជើញចំនួនបី ។ ខ្ញុំដឹងថា ប្រសិនបើបងប្អូនធ្វើតាមការអញ្ជើញទាំងនេះ បងប្អូននឹងជួយសិស្សបងប្អូនរៀនកាន់តែស៊ីជម្រៅតាមរបៀបរបស់ព្រះអម្ចាស់ ហើយដកពិសោធន៍អំណរកាន់តែច្រើនក្នុងទ្រង់ ។

ការអញ្ជើញទី ១៖ អត្តសញ្ញាណ និងគោលបំណងដ៏នៅអស់កល្បជានិច្ច ។ ខ្ញុំសូមអញ្ជើញបងប្អូនឲ្យជួយសិស្សរបស់បងប្អូនរៀនពីអត្តសញ្ញាណពិតរបស់ពួកគេ ។ សូមជួយពួកគេឲ្យឃើញ ទទួលអារម្មណ៍ ហើយដឹងថា ពួកគេពិតជាកូនចៅរបស់ព្រះ ជាបុត្រាបុត្រីជាទីស្រឡាញ់របស់ទ្រង់ ។ សូមជួយពួកគេឲ្យយល់ពីអត្ថន័យ និងការជាប់ទាក់ទិននៃ« ក្រុមគ្រួសារ ៖ការប្រកាសដល់ពិភពលោក » នៅពេលវាប្រកាសថា សិស្សបងប្អូនម្នាក់ៗ« មានលក្ខណៈ និងជោគវាសនាដ៏ទេវភាព និងគោលបំណង … អស់កល្បជានិច្ច[ មួយ ] » ។^១៦

សូមជួយពួកគេឲ្យទទួលអារម្មណ៍ដក់ជាប់ក្នុងចិត្តពួកគេថា ពួកគេគឺជាតួអង្គខាងវិញ្ញាណដែលកំពុងមានបទពិសោធន៍មួយក្នុងជីវិតរមែងស្លាប់ ។ ព្រះអម្ចាស់ និងព្រះអង្គសង្គ្រោះ ព្រះយេស៊ូវគ្រីស្ទបានរងទុក្ខ ហើយសុគតជំនួសពួកគេ ដើម្បីពួកគេអាច« រីកចម្រើនទៅរកភាពល្អឥតខ្ចោះ ហើយនៅទីបញ្ចប់នឹងដឹងពីគោលបំណងដ៏ទេវភាពរបស់ពួកគេ ដោយទទួលជីវិតដ៏នៅអស់កល្បទុកជាមរតក » ។^១៧ នោះគឺជាផែនការរបស់ព្រះវរបិតាសួគ៌សម្រាប់ពួកគេ ។ សូមជួយធ្វើឲ្យផែនការរបស់ទ្រង់មានភាពពិតចំពោះពួកគេ ។

សូមបង្រៀនពួកគេថា ពួកគេបានកើតមកពីឪពុកម្ដាយសួគ៌ា ដើម្បីរៀន ហើយរីកចម្រើន ព្រមទាំងប្រែក្លាយដូចជាពួកទ្រង់ ។ ការរៀនសូត្រគឺជាកត្តាសំខាន់ចំពោះគោលបំណងនៃជីវិតមុនផែនដី និងជីវិតរមែងស្លាប់ និងចំពោះសេចក្ដីសង្គ្រោះដ៏អស់កល្បរបស់ពួកគេ ។ ពួកគេត្រូវរៀនអំពីរឿងរបស់ព្រះ និងរឿងនៃលោកិយ ដើម្បីពួកគេអាចបំពេញព្រះរាជបំណងរបស់ព្រះនៅក្នុងជីវិតរបស់ពួកគេ ។ សូមជួយពួកគេឲ្យមើលឃើញថា ការរៀនសូត្រគឺចាំបាច់នៅក្នុងផែនការដ៏អស់កល្បជានិច្ចរបស់ព្រះ និងជាគោលបំណងដ៏អស់កល្បជានិច្ច និងជោគវាសនាដ៏ទេវភាពរបស់ពួកគេ ។

ការអញ្ជើញទី ២ ៖ របៀបរបស់ព្រះអម្ចាស់ចំពោះការរៀនឲ្យស៊ីជម្រៅ ។ ខ្ញុំសូមអញ្ជើញបងប្អូនឲ្យជួយសិស្សរបស់បងប្អូនឲ្យរៀនតាមរបៀបរបស់ព្រះអម្ចាស់ ។ បងប្អូនធ្វើកិច្ចការនេះតាមរយៈគំរូ ។ តាមរបៀបដ៏មានឥទ្ធិពលមួយ របៀប ដែលបងប្អូនបង្រៀនគឺជា អ្វី ដែលបងប្អូនបង្រៀនពួកគេអំពីរបៀបរៀនសូត្ររបស់ព្រះអម្ចាស់ ។ ប្រសិនបើបងប្អូនបង្កើតបទពិសោធន៍រៀនសូត្រឲ្យពួកគេតាមរបៀបរបស់ព្រះអម្ចាស់ ពួកគេនឹងរៀនតាមរបៀបរបស់ទ្រង់ ។ ប្រសិនបើបងប្អូនពុំធ្វើដូច្នេះទេ នោះពួកគេនឹងពុំរៀនឡើយ ។

ខ្ញុំសង្ឃឹមថា បងប្អូននឹងបង្រៀនសិស្សរបស់បងប្អូននូវរបៀបរៀនសូត្ររបស់ព្រះអម្ចាស់តាមរយៈគំរូផ្ទាល់របស់បងប្អូន ។ ប៉ុន្តែខ្ញុំក៏សង្ឃឹមថា បងប្អូននឹងបង្រៀនពួកគេនូវរបៀបរបស់ទ្រង់ដោយផ្ទាល់ និងដោយមានបំណងចង់ដឹង ។ មានឱកាសអស្ចារ្យមួយដើម្បីធ្វើកិច្ចការនោះនៅក្នុងចំណេះចំណានខាងគោលលទ្ធិ ដែលមាននូវគោលការណ៍ទាំងឡាយនៃ « ការទទួលបានចំណេះដឹងខាងវិញ្ញាណ » បង្រៀនរបៀបរៀនសូត្រពិតប្រាកដរបស់ព្រះអម្ចាស់ ។ ពេលបងប្អូនបង្រៀនគោលការណ៍ទាំងនោះពេញមួយឆ្នាំ បងប្អូននឹងបង្រៀនពួកគេពីរបៀបរៀនសូត្ររបស់ព្រះអម្ចាស់ ។ ការបង្រៀននោះអាចសម្រេចបានផងដែរនៅក្នុងវគ្គសិក្សាដែលបងប្អូនបង្រៀននៅថ្នាក់វិទ្យាស្ថាន ។

សូមជួយសិស្សរបស់បងប្អូនឲ្យដឹងថា របៀបរបស់ព្រះអម្ចាស់អនុវត្តចំពោះអ្វីៗដែលពួកគេសិក្សា ។ វិធីសាស្ត្រជាក់លាក់ដែលពួកគេជួបក្នុងថ្នាក់រៀនពួកគេនៅការអប់រំថ្នាក់វិទ្យាល័យ ឬថ្នាក់សាកលវិទ្យាល័យនឹងអាស្រ័យទៅលើគ្រូបង្រៀនដែលពួកគេមាន ។ ប៉ុន្តែសិស្សរបស់បងប្អូនអាចចូលប្រឡូកយ៉ាងសកម្ម ព្យាយាមក្នុងការសិក្សារបស់ពួកគេ ហើយមានពរជាមួយនឹងភាពជាដៃគូនៃព្រះវិញ្ញាណបរិសុទ្ធជានិច្ច ។ សូមអញ្ជើញសិស្សរបស់បងប្អូនឲ្យយាងព្រះវិញ្ញាណបរិសុទ្ធទៅសាលាជាមួយនឹងពួកគេ ។

ការអញ្ជើញទី ៣ ៖ការប្រែចិត្ត និងការរៀនសូត្រ ។ ខ្ញុំសូមអញ្ជើញបងប្អូនឲ្យបង្រៀនសិស្សរបស់បងប្អូនថា ការប្រែចិត្តគឺជាកត្តាសំខាន់ចំពោះការរៀនសូត្រស៊ីជម្រៅ ។ ការប្រែចិត្តគឺជាដំណើរការរបស់ព្រះអម្ចាស់សម្រាប់ការរៀនសូត្រផ្ទាល់ខ្លួន ការរីកចម្រើនខាងវិញ្ញាណ និងការប្រែក្លាយកាន់តែដូចទ្រង់ ។ សិស្សរបស់បងប្អូនរៀនតាមរបៀបរបស់ព្រះអម្ចាស់តាមរយៈព្រះចេស្ដាប្រោសលោះ និងពង្រឹងរបស់ព្រះយេស៊ូវគ្រីស្ទធ្វើការនៅក្នុងជីវិតរបស់ពួកគេ ដោយបើកសេចក្ដីមេត្តាករុណា និងព្រះគុណរបស់ទ្រង់ដល់ពួកគេ ។

សូមជួយសិស្សរបស់បងប្អូនឲ្យយល់ថា ការប្រែចិត្តគឺជាដំណើរការដ៏ទេវភាពដែលពួកគេអាចប្រែក្លាយកាន់តែដូចព្រះអង្គសង្គ្រោះនៅគ្រប់ពេលបាន ។ ពេលខ្លះ ការប្រែចិត្តរបស់ពួកគេនឹងទាក់ទងអ្វីដែលពួកគេត្រូវឈប់ធ្វើ ។ ពេលខ្លះ វានឹងទាក់ទងអ្វីមួយដែលពួកគេត្រូវចាប់ផ្ដើមធ្វើ ។ សូមជួយពួកគេដឹងថា ការប្រែចិត្តគឺលើសពីការទូលប្រាប់ព្រះអម្ចាស់ និងប៊ីស្សពរបស់ពួកគេថា ពួកគេបានធ្វើរឿងខុសទៅទៀត ។ ការប្រព្រឹត្តបាប គឺជាការបែរចេញពីព្រះអម្ចាស់ ។ ការប្រែចិត្ត គឺជាការត្រឡប់មករកទ្រង់វិញ ។ ការប្រែចិត្តតម្រូវឲ្យមានការផ្លាស់ប្ដូរដួងចិត្ត និង គំនិត ការផ្លាស់ប្ដូរជីវិតកែប្រែទៅតាមស្ថានភាពផ្ទាល់របស់សិស្សបងប្អូន ។

ប៉ុន្តែក៏សូមបង្រៀនពួកគេថា ការប្រែចិត្តអាចផ្ដល់ពរជ័យដល់ពួកគេជាបន្តបន្ទាប់ផងដែរ ។ វាគឺជារបៀបដែលព្រះអម្ចាស់ជួយពួកគេឲ្យធ្វើរឿងដ៏ប្រសើរពេញមួយជីវិតរបស់ពួកគេ ។ វាតម្រូវឲ្យពួកគេផ្លាស់ប្ដូរ ហើយរីកចម្រើន ហើយវាមានន័យថា ពួកគេត្រូវប្រែចិត្ត ងាកមករកព្រះអម្ចាស់ឲ្យកាន់តែពេញលេញ ថ្វាយដួងចិត្តទាំងស្រុងរបស់ពួកគេចំពោះទ្រង់គ្រប់ពេលវេលា ។ ដំណើរការត្រឡប់មកវិញនោះ និងដំណើរការនៃការថ្វាយនោះគឺមានពេញមួយជីវិត ។ វាមានសារៈសំខាន់ចំពោះការរៀនសូត្រស៊ីជម្រៅ ។

ទីបន្ទាល់

ខ្ញុំសូមផ្ដល់ការសន្យានេះដល់បងប្អូនថា ប្រសិនបើបងប្អូនបង្រៀនសិស្សរបស់បងប្អូនពីអត្តសញ្ញាណពិតរបស់ពួកគេ របៀបរៀនឲ្យស៊ីជម្រៅតាមរបៀបរបស់ព្រះអម្ចាស់ និងគោលការណ៍ទេវភាពនៃការប្រែចិត្ត នោះពួកគេនឹងរៀនសូត្រឲ្យស៊ីជម្រៅពីគោលលទ្ធិរបស់ព្រះយេស៊ូវគ្រីស្ទ សេចក្ដីជំនឿរបស់ពួកគេលើទ្រង់ និងសេចក្ដីស្រឡាញ់របស់ពួកគេចំពោះទ្រង់នឹងរីកចម្រើន ហើយពួកគេនឹងមានអំណរក្នុងព្រះអម្ចាស់ ។ ទាំងបងប្អូន និងសិស្សរបស់បងប្អូននឹងទទួលនូវការសន្យាដ៏អស្ចារ្យនេះពីព្រះអម្ចាស់ ៖ « ប្រាកដមែន យើងប្រាប់អ្នករាល់គ្នាជាប្រាកដថា យើងនឹងរំលែកដល់អ្នក នូវព្រះវិញ្ញាណរបស់យើង ដែលនឹងបំភ្លឺគំនិតរបស់អ្នកដែលនឹង បំពេញព្រលឹងរបស់អ្នកដោយសេចក្ដីអំណរ » ។^១៨

ខ្ញុំដឹងថា ការសន្យានោះគឺជាការពិត ។ ខ្ញុំសូមថ្លែងជាសាក្សីដល់បងប្អូនថា ព្រះជាព្រះវរបិតានៃយើងទ្រង់មានព្រះជន្មរស់ ។ ព្រះយេស៊ូវជាព្រះគ្រីស្ទ ។ ទ្រង់មានព្រះជន្មរស់ ! នេះគឺជាកិច្ចការដ៏បរិសុទ្ធរបស់ពួកទ្រង់ ។ ខ្ញុំថ្លែងទីបន្ទាល់នេះ ហើយបន្សល់ទុកសេចក្ដីស្រឡាញ់របស់ខ្ញុំចំពោះបងប្អូន ក្នុងព្រះនាមនៃព្រះយេស៊ូវគ្រីស្ទ អាម៉ែន ។