17:31

Raica na Dua

Lori Newbold

Dairekita, Veiqaravi ni Veituberi

Kakaburaki ni Vuli Vakayabaki ni Semineri kei na Inisitute ni Lotu • 13 ni June, 2017

Au vakavinavinakataka na madigi meu tiko eke nikua ka wasea na noqu lomana na iVakabula, lomani kemuni, kei ira na itabagone kei na itabagone qasecake e noda na galala me da qaravi ira.

Au nanuma na ivakadinadina qaqa ni Yalo Tabu au a ciqoma ena imatai ni gauna au wilika kina na vosa nei Peresitedi Boyd K. Packer: “Au vakabauta ni itagede ga o sotava kina na bolebole kei na ilesilesi e nomu, ena laurai talega vei iko na iyaloyalo i Karisito. Ena inaki kilai kece sara, ena rumu ni vuli oya ena gauna oya kei na vosa oya vata kei na veivakauqeti oya, ko sa i Koya ka o Koya sa iko.”¹ Na vakasama ni noqu galala meu matataka na iVakabula ena noqu itavi sa gagadre veivakauqeti ka dina veiliutaki ena noqu bula vakacakacaka ena S&I.

A vakavulica vei keda o Elder Gong ena noda iotioti ni Yakavi vata kei na Vakaitutu Raraba ni dua vei ira na ka e vakavuna me qasenivuli uasivi sara na iVakabula sai koya na Nona rawata me vakavulica vata ena dua ga na gauna na 5,000 na tamata vata kei na dua. A kaya kina vaqo, “Oqo na cakamana eda dau segata na qasenivuli—me da vakavulica na noda kalasi taucoko kei na lewe ni kalasi yadua. E gadrevi kina me da kauwaitaka na 5,000 kei na dua. Ena sureta me sotavi na kauwai raraba kei na lomaleqa yadua.”² O sa bau taroga mada ena dua na gauna se a rawata vakacava na iVakabula na veika oqori?

Au vinakata meu wasea mada e dua na ka a yaco ena ikarua ni noqu yabaki ni veivakavulici ka a vakavulici au kina na Turaga ena nona vukei au meu raica na kena ibalebale meu matataki Koya e valenivuli. E tiko ena dua na noqu kalasi e dua na cauravou yabaki 15. Au kila rawa ena vica ga na siga niu na sega ni rawa ni waraka na nona imoimoi malua kau kila ni na dua na iwasewasenivuli dredre oqo ena noqu tovolea meu bulataka e dua na isolisoli e sega ni tiko vei au. Au masuta na kaukauwa meu lomani koya kei ira kece noqu gonevuli.

Ena ikarua ni macawa ni vuli, ni tucake na gone oqo me liutaka na lotu ka wasea tale eso na itukuni ni nona bula, a soli vei au na isolisoli meu raici koya me vaka na Turaga ka vakila ena gauna vata oya na levu cake ni noqu lomani koya. E wasea ni rau sa veisere tiko nona itubutubu ka sega walega ni sa biuta na Lotu o nana, ia sa vorata tiko. Au raica rawa e matana na mosiniyalo kei na veilecayaki e vakila tu ni talanoa tiko. Au sa sega dina ni nanuma na vakasama vakayalo a wasea o koya, ia au rawa ni nanuma na ka a vakavulica vei au na Yalo Tabu. E votu mai vei au na vakasama, “Luvata nomu ivava ni sa vakarau meu vakacurumi iko ki na dua na yalo. Au nuitaki iko mo dua na veivakauqeti yalewa ena nona bula na cauravou oqo, kau gadrevi iko mo lomani koya me vaka na noqu lomani koya.” Mai na gauna oya au sa veisau. Sa veisau na yaloqu. Au sa raici koya—raici koya vakaidina—ni luve ni Kalou, kei na kena inaki vakalou, kei na isolisoli vakayalo kei na vuqa na ka e rawa ni cau kina ena kalasi. E sega ni levu na nona itovo e veisau ena iwasewasenivuli oya, ia au sa veisau. Ena veisau oya keirau a sotava vata kina e vuqa na veika vakasakiti. Au na dau vakavinavinaka tu ga me baleti rau na cauravou kei na madigi a vakarautaka na Turaga vei au me veisau na yaloqu kei na noqu rai.

Au dau qoroqoro ena Nona rawata na Tamada Vakalomalagi me sega walega ni kila ia me sotava talega na leqa ni tamata yadua. Au kila ni raici au, ciqomi au ka kilai au vakavinaka sara o Koya. Ka uasivi cake sara, ni lomani au vakavinaka sara o Koya. Au kila talega ni raici au o Koya me vaka e dua ka tu vua na kaukauwa vakalou ka kila ni; ena Nona veivuke, au na yaco me vakataki Koya. Au kila ni tu Vua na vakabauta vata oya, baleti kemuni yadua kei ira yadua na cauravou kei na goneyalewa ena curuma mai na noda katuba. E raici ira yadua vakavinaka sara, ka vinakata o Koya me vakabulai ira yadua. E raibaleta o Koya na kedra irairai kei na itovo ka digitaka me vakanamata ga ena nodra veitikinibula vakalou kei na kaukauwa. Ni da qasenivuli, sa namaka vei keda o Koya me da vakayacora vakakina.

Ena yabaki oqo keitou sa vakaveikilaitaka kina e dua na vakanamata vou ka kena ulutaga “Raica na Dua.” Na vakanamata ni sasaga oqo oya, o keda yadua me da tara cake na kaukauwa Vakarisito me da raica na gagadre, igu, kei na inaki vakalou ni gonevuli yadua. Na noda vakanuinui me da dui vakatitobutaka na kaukauwa Vakarisito me raibaleti na ivakatakilakila kei na irairai e taudaku ka vulica me raici ira na gonevuli yadua ni dua na tamata duatani ka tu na kena inaki vakalou ka sotavi ira me vakakina.

Era curu mai ki na noda valenivuli na gonevuli yadua ena duidui ni ituvaki, na gagadre kei na bolebole ka na vakilai ena nodra vuli. Sa bibi kina me da nanuma ni semineri kei na inisitute e dua walega na tiki ni nodra dui bula na gonevuli—e tikina bibi, ia e se dua tikoga na tikina. Na iwalewale ni vuli, duidui ni itovo vakavanua, malumalumu vakayago, itovo veivakabobulataki, kei na lusi kei na yaluma eso vei ira na ka ena rawa ni manata na nona vuli e dua na gonevuli. Na ituvaki ni bula kei na ivakatakilakila e sega ni vakamacalataki ira na noda gonevuli ia e solia vei keda na madigi me da raici ira ka lomani ira me vaka na iVakabula. Na noda na galala bibi kei na itavi me da cakava eso tale na ka me ra vukei o ira e bibi na nodra icolacola kei ira era lako mai ki na kalasi ka vakasaqara vagumatua na inuinui e vakarautaka na iVakabula ni kawatamata.

Ni da vakananuma vakatitobu na itavi bibi me da raica na dua, au sa vuli vakalevu mai na nona ivakavuvuli na iApositolo o Paula ena 1 Korinica 12. Au vinakata meu wasea e tolu na lesoni au sa vulica mai na iwase oya.

Lesoni 1: E tekivu nona ivakavuvuli o Paula baleta na yagoi Karisito kei na yaga ni veitikina ena nona vakavuvulitaka na isolisoli vakayalo. Niu vulica na tikina 1–11, au vakataroga kevaka e dua vei ira na idola ni noda raici ira na tamata me vaka na iVakabula me da vakadinadinataka ni tu vei ira na isolisoli kei na kaukauwa ena gadrevi me laurai ka vakayagataki. Ni da raici ira vakaoqo na gonevuli, eda na vakadinadinataka ka vakayagataka na nodra kaukauwa ka sega ni raica na nodra malumalumu se nodra itovo ca. Ena so na gauna e sega ni dau rokataki na kilikili ni nona bula e dua na gonevuli mai na nona itovo. E dua na maqosa rawarawa e rawa ni taracake e dua na qasenivuli sai koya me cegu vakalailai ni bera ni sauma yani vakatotolo nona nanuma se itovo e dua na gonevuli qai vakasamataka e rua se tolu na “vuna” e vaqo tiko kina nona vosa se nona itovo e dua na gonevuli. Oqo ena vukea nona levea e dua na qasenivuli na saumitaro vakatotolo ka na rokova vinaka cake kina nona isolisoli vakayalo e dua na gonevuli.

Ni da segata me da nanuma toka na kedra inaki vakalou na gonevuli yadua, sa dodonu me da vakadinadinataka tale tikoga ni rawa ni vakataotaka na nodra gagadre se kaukauwa ni vuli na ituvaki era sotava se malumalumu vakayago. Ena gadrevi kina me da navuca vakamatau na gauna ni vuli ka na sureta ka vakauqeta na tamata yadua me vakatovotovotaka na galala ni digidigi me vakayagataka nodra isolisoli vakayalo ena iwalewale ni vuli. E sega ni rawarawa na iwalewale oqo, ia ni da segata na veivuke ni Turaga, ena vukei keda o koya me da kila na ivakarau e rawa ni da yacovi ira kina na Luvena.

E dua na ka a yaco kau vulica kina na kena yaga me vakadinadinataki na isolisoli vakayalo vei ira noqu gonevuli, mai vua e dua na gonevuli ka sega ni dau taleitaka na wilivola ena kalasi se taudaku ni kalasi. E dua na taledi levu ni ivakatagi kei na sere e tu vua, niu masuta na ivakarau meu yacovi koya kina, a sauma na Turaga ena dua na ka au se bera vakadua ni tovolea. Au solia vua e dua na ituvatuva ni lesoni ka kerei koya me vaqara mai e dua na sere me baleta na lesoni yadua ena rawa ni vakatagitaki ena kalasi ka na vukea na kena vakavulici na dina ena uma ivolanikalou oya. A vukei koya oqo me wilivola ena taudaku ni kalasi me kila kina na dina ka kunea e dua na sere. Qo talega a solia vua na madigi me wase ivakadinadina ena kalasi baleta na veika e vulica ena nona vakavakarau. Ena loma ni vica ga na macawa leleka, au sa sarava na tubu ni nona lomana na iVakabula na gonevuli oqo kei na vakaitavi ena kalasi. Sa veiqaravi tiko ena gauna oqo vakadaukaulotu tudei ka sega walega ni wilika ia sa vakavulica na ivolanikalou ka wasea nona isolisoli ni ivakadinadina ena ivakatagi kei na sere.

Lesoni 2:E vakabibitaka o Paula ni tu na kedra yaga na leweilotu yadua. Ena tikina e 14–18 E vakavulica o Koya:

“Ni sa sega ni dua walega na tikina ena yago, sa vuqa ga.

“Ia kevaka ena kaya na yava, Oi au, kau sa sega ni tiki ni yago, niu sa sega ni liga; sa sega ni ka oqo sa sega kina ni tiki ni yago?

“Ia kevaka ena kaya na daliga, Oi au, kau sa sega ni tiki ni yago, niu sa sega ni mata; sa sega ni ka oqo sa sega kina ni tiki ni yago?

“Kevaka sa mata na yago taucoko, ena qai evei na ka me rogo kina? Kevaka e ka ni rogo na tikina kece, ena qai evei na ka me boi kina?

“Ia oqo sa cakava na Kalou na veitiki ni yago me tu yadua, me vaka na nona lewa.”

Au taleitaka na ivakatayaloyalo ni nodra qarava na itavi duidui ka gadrevi vakalevu na veitikiniyago. Na liga e sega ni rawa ni vakaisosomitaka na yava. Na daliga e sega ni rawa ni vakaisosomitaka na mata. O ira yadua e dui tu na nodra itavi duidui ka bibi, ka duidui na ka era cau kina. Era dui yaga kece ki na yago me rawa ni cakacaka kina ena kena vinaka duadua.

E vakayagataka o Elder Holland e dua tale na vakasama me vakavulica kina na dina vata oya: “E inaki vakalou na kena duidui na domo ena matasere ni Kalou. Ena gadrevi na veimataqali—saparano kei na alato, tena kei na besi—me rawa ni buli kina na sere totoka. … Ni da vakalailaitaki keda se tovolea me da vakatotomuria eso na ka ga eda vakasamataka … ena yali na irogorogo ni domo a nakita na Kalou ena Nona bulia e dua na vuravura ni duidui.”³.

Me rawa ni da vukei ira vakavinaka na gonevuli yadua me ra “saumaki … mai ni ra tiko vata kei keda,”⁴sa dodonu me da vakadinata ni tu na kedra yaga na gonevuli yadua ka cakacakataka. Ena rarama ni dina oqo, au sureti kemuni yadua kina mo ni tarogi kemuni ena rua na taro oqo: Matai, “Au vakabauta dina sara ni tu na kedra yaga o ira yadua noqu gonevuli ka rawa ni lewenilotu dau vakaitavi?” Karua, “E vakaraitaki beka ena noqu ivalavala na vakabauta oqo?”

Au masuta me vukei keda na Turaga me da liutaki mai na vakabauta oqo.

Lesoni 3: E vakavuvulitaka o Paula ni dodonu me da kauwaitaki ira vakatautauvata na lewenilotu yadua. E kaya kina, “Me kakua kina ni veisei na yago; ka me veinanumi vakatautauvata na veitikina vakaira.”⁵

Oqo e dua na tikina qaqa ni dikevi koya vakataki koya vei au: Au dau “veinanumi vakatautauvata” li vei ira na gonevuli yadua? Au dau vakanamata vakalevu beka vei ira na gonevuli era dau cau ena veisala laurai levu eso? E dau rawarawa vei au na lomani ira era dau laveta na ligadra ka sa dau tu vakarau tu kei na nodra ivolanikalou me ra wasea na nodra ivakadinadina kei na vakasama vakaibalebale eso? E rawarawa beka meu lomani ira ka dau rogoci ira era lomani au, lomana na kalasi, era dau yaco mai ena kena gauna ka dau sega ga ni tiko ni dua na tauvimate bibi? Era dau vakila beka na vo ni gonevuli niu sega ni “veinanumi vakatautauvata” vei ira na gonevuli yadua? Ena manata vakacava na draki ni loloma, veidokai, kei na inaki ena noqu valenivuli? Ena rawarawa cake nodra veiraici ka veisotari me vaka na iVakabula na gonevuli ni da vakatakarakarataka vei ira o keda.

Ni da segata me da matataka na iVakabula ena noda veivakavulici ka tara cake na kaukauwa me da rai me vaka na Nona rai, sa dodonu me da nanuma (1) e tu taucoko vei keda na isolisoli me da cau kina, (2) na lewenilotu yadua e levu na kena yaga, kei na (3) eda gadreva me da vakaraitaka na “veinanumi vakatautauvata” baleta na lewenilotu yadua.

Au via wasea e dua tale na ikuri ni lesoni au sa vulica niu vakananuma vakatitobu na gadrevi ni ka bibi oqo. Ena noda gauna, na meca, sa veilakoyaki voli “me vaka na laioni sa tagi, a sa vakasaqara eso me tiloma.”⁶ Me vaka ni daubutakoca na ivakatakilakila, sa dau vaqara tikoga me butakoci ira na tamata ena kedra ivakatakilakila vakalou kei na kedra isema ki lomalagi. Sa dodonu me da tara cake na kaukauwa me da rai me vaka na iVakabula me rawa ni da vukei ira na tani me ra ciqoma na kedra inaki vakalou ka dina vua na Turaga ena dua na vuravura veilecayaki ka vakatoka “na ca me vinaka, kei na vinaka me ca; era kaya sa rarama na butobuto, ka butobuto na rarama.”⁷

E dua na noqu yalewa yaloqaqa ena ivolanikalou ka vakaraitaka vakavinaka sara na kaukauwa oqo o Apikali. E vakamacalataki ena Veiyalayalati Makawa o koya me “dua na yalewa yalomatua, ka matavinaka.”⁸ Sa veiwatini kei Nepali, na tamata “ca na nona ivalavala.”⁹ Ni sa vosaca ka sega ni via vukei Tevita ko Nepali, a vakasoqoni ira na nona tamata ko Tevita ena inaki me vakamatei Nepali kei na nona matavuvale. Ni ra tukuna vei Apikali na tamata i Nepali na veika rerevaki sa vakarau yaco, a vakasoqona na kakana ka lako me sotavi Tevita.

Ni rau sota, a cuva vakarokoroko o Apikali vei Tevita ka, me vaka na Karisito, ciqoma me nona e dua na cala a sega ni cakava ka kerea nona veivosoti.¹⁰ Na cava beka e raica o Apikali vei Nepali ka vakauqeti koya kina me nona dautataro?

Na cava beka a raica vei Tevita ka vakavuna nona kaya: “Mo ni kakua mada ni cudruva na noqu cala na nomuni vada; ni na vakadeitaka vakaidina ko Jiova na nomuni vale na noqu turaga; ni ko sa kitaka tiko na ivalu i Jiova koi kemuni na noqu turaga, ka sega na ca ena kune vei kemuni ena nomuni gauna kecega.”?¹¹

Na cava beka e digitaka kina, ena gauna dredre vakakoya, me vakananuma vei Tevita o cei o koya kei na yalayala eso sa vakayacora na Turaga? Na cava beka na revurevu ni nona ivalavala ni vakabauta?

Au taleitaka na kena isau mai vei Tevita ena nona kaya:

“Me vakavinavinakataki ko Jiova na nodra Kalou na Isireli, o koya ka talai iko mai edaidai mo tavaki au:

“Ia me vakavinavinakataki na nomu vuku, ia mo kalougata ko iko ka tarovi au edaidai meu kakua ni ia na veivakamatei, ka sauma na ca sa caka vei au.”¹²

Au vakabauta ena gauna ko ya, me vaka na yalayala nei Peresitedi Packer, sa tu vei Apiakali na “ivatuka i Karisito … sa volai e matana. Ena inaki kilai kece sara, ena rumu ni vuli oya, ena gauna oya, kei na vosa oya vata kei na veivakauqeti oya, [o koya sa i Koya kei Koya sai koya].”¹³

Au vakadinadinataka ni tautauvata na noda madigi me da raici ira na tani me vaka Nona raici ira ka vukei ira me ra raica na tikinibula vakalou e tu vei ira.

E sega ni vakamacalataki rawa na loloma kei na vakavinavinaka au vakila baleti ira era a vakatakarakarataka na itovonibula Vakarisito oqo ena noqu bula. Taumada ka bibi duadua, sa dau raici au e veigauna na tinaqu agilosi niu dua ka tu na kequ inaki vakalou kei na isolisoli vakayalo. Sa dau raici au niu dau cau—kevaka sara mada ga e sega ni dau vakakina na noqu ivakarau—ka dau sega ni guce ena nona vukei au meu tara cake na inaki oya. Era dau tu na iliuliu ni matabete ka ra kauta mai ki na noqu bula na inuinui ena nodra vakadewataka mai na loloma ni Tamada Vakalomalagi vei au ka vakananuma vei au na kequ yaga. O ira na noqu qasenivuli ni semineri kei na inisitute—e vuqa era sarasara tiko mai nikua—era a raica e dua na ka vei au kau a sega ni rawa ni raica o au. Sa totoka na kena vakaiyautaki na noqu bula vakacakacaka mai vei ira na turaga kei na marama era sa laveti au cake ka tuberi au yani ki Vua mai na nodra ivakaraitaki ena raici ni dua.

Au na dau vakavinavinaka tawamudu ena ivakarau sa dau vakaraitaka tikoga kina vei au na Turaga ni raici au tu o Koya niu dua na ka yaga vakalevu. Savakalougatataki au o Koya ena isolisoli ka vakarautaka na madigi meu vakayagataka na isolisoli eso oqori me ra vukei kina eso me ra vakataki Koya. Kau kila ni sa vakayacora talega ko Koya vei kemuni yadua kei ira yadua na noda gonevuli.

Ena vica na vula sa oti, a yaco e dua na gauna totoka ena vuli ivolanikalou niu vakanamata ena ivakarau e raica kina na dua na iVakabula ka veivakavulici me vaka na rai oya. Na vuli vakadodonu saraga mai Vua sa veisautaki au. Au sureti kemuni mo ni taura na madigi vata oya. O Koya na ivakaraitaki uasivi sara. Era tu na ivakaraitaki sega ni wili rawa ni ivakarau e bulia kina na veigauna ni vuli kei na lesoni me sotava na gagadre yadua ka vukei ira vakavinaka cake e vakavulica o Koya me ra kila na kedra inaki vakalou.

Kemuni na itokani lomani, au masuta me na dau vakalevutaka cake tikoga na Tamada Vakalomalagi na noda dui kaukauwa me da rai me vakataki Koya, loloma me vaka Nona loloma, ka ivalavala me vaka na Nona ivalavala. Au masuta me da na vaqara na veisolisoli oqo ka kunea na ivakarau me da rawata ka vakatitobutaka cake kina. Au masuta ni da na segata tikoga me da rawata na ivatuka ni iVakabula ena keda irairai ni da tu e matadra na noda gonevuli e veisiga. Au kila ni rawa ni da tara cake na isolisoli oqo ni da vaqara na Nona veivuke. Au vakadinadinataka oqo ena yaca i Jisu Karisito, emeni.