Te ʼŌpuaraʼa nō te Faʼaoraraʼa ʼe te Uʼi ʼĀpī

Elder Kim B. Clark

Nō te Hitu ’Ahuru

Ha’apurorora’a nō te Haʼapiʼipiʼiraʼa Matahiti nā te mau Ha’api’ira’a ’Evānelia (Séminaire ’e te Institut) • 12 nō tiunu 2018• Piha Teataraʼa nō te Pū ʼĀmuiraʼa

Tē māuruuru nei au i te paraparau ia ’outou i teie mahana. Tē faʼatura nei au ia ʼoutou nō te ʼohipa faʼahiahia tā ʼoutou e rave nei. Tei te faʼaueraʼa ʼoutou ʼa te Fatu ʼia tauturu i te uʼi ʼāpī ia haʼapiʼi hōhonu mai i te ʼEvānelia ʼa Iesu Mesia. Ma taua faʼaueraʼa i roto i tōʼu feruriraʼa i māʼiti ai au i te paraparau atu ia ʼoutou i teie mahana nō niʼa i te haʼapiʼiraʼa i te ʼōpuaraʼa nō te faʼaoraraʼa i taua mau uʼi ʼāpī faʼahiahia ra.

ʼUa piʼi te Peresideni Nelson ia tātou paʼatoʼa ia tiʼa atu i mua i te mau haʼamaitaʼairaʼa faʼahiahia tā te Atua i hōroʼa mai nā tātou.¹ E faʼaueraʼa ïa te reira ia ʼoutou, ʼe i te uʼi ʼāpī. ʼUa ʼite au e ʼe tiʼa ia tātou paʼatoʼa ia rave rahi atu ā nō te tauturu i teie feiā ʼapī faufaʼa rahi ʼia haʼapiʼi hōhonu mai i te ʼōpuaraʼa ʼa te Metua i te Ao ra. E tiʼa ia rātou ʼia ʼite ʼe ʼia taʼa i te reira i roto i tō rātou mau feruriraʼa ʼe tō rātou mau ʼāʼau; ʼe tiʼa ia rātou ia here ʼe ia ʼora i te reira; ʼe ʼe tiʼa ia rātou ia riro i te mea tā te Metua i te faʼataʼa atea ia rātou ʼia riro mai. Na roto i te pūai ʼo te Fatu ʼe ma te mana ʼo te Vārua Maitaʼi, ʼe nehenehe ia tātou ʼia rave i teie ʼohipa rahi. ’Ua ’ite au e parau mau te reira.

E rave rahi mau matahiti aʼenei, ʼua tāvini au i te hōʼē misioni i te Fenua Helemani. I taua mau mahana ra ʼua faʼaʼohipa mātou i te mau tābula ahu ʼe te mau rēni menemene naʼinaʼi nō te haʼapiʼi i te ʼōpuaraʼa nō te faʼaoraraʼa. ʼUa faʼahōhoʼa te mau haʼamenemeneraʼa i te basileia mātamua, te oraraʼa tahuti nei, te ao vārua, ʼe na basileia ʼe toru nō te hanahana. Mai te mea e haʼamanaʼo maitaʼi vau, ʼua riro te pāruru nō te ʼaramōinaraʼa ʼe hōʼē reni ʼōmiʼimiʼi, ʼe te mahana haʼavāraʼa ʼe hōʼē ïa ʼoehā. ʼAita te mau misionare e faʼaʼohipa faʼahou i te mau tābula ʼahu, ʼe mea oraora ʼe ʼe mea maitaʼi noa ra rā te mau rēni menemene.

Teie te hōʼē hōhoʼa nō roto mai i te haʼapiʼiraʼa ʼevānelia nō te Buka ʼa Moromona nō niʼa i te ʼōpuaraʼa nō te faʼaoraraʼa.²

Hōho’a

faʼanahoraʼa nō te faʼaoraraʼa

Pāpū ia’u ē, e tauturu te hōhoʼa i te mau pīahi, ʼe ʼua riro te haʼapiʼiraʼa ʼei puʼohuraʼa faʼahiahia nō te mau tufaʼa tumu nō te ʼōpuaraʼa ʼa te Metua.

Tera rā, te peʼapeʼa nei au nō teie mau rēni menemene, ʼe teie tāʼu na uiraʼa ʼe piti nō ʼoutou a haʼapiʼi ai ʼoutou i te ʼōpuaraʼa nō te faʼaoraraʼa.

A tahi, ʼa ara i te mau pīahi e manaʼo nei ʼe te hōhōʼa ʼo te ʼōpuaraʼa ïa. ʼE ʼere te ʼōpuaraʼa, ʼe mea ʼohie roa rā nā te mau pīahi ʼia manaʼo ʼe mai te mea e mea ʼafaro tā rātou mau rēni menemene, ʼua taʼa ïa ia rātou te ʼōpuaraʼa.

Te piti, a tauturu ’ia rātou ʼia oraora te ʼōpuaraʼa i roto i tō rātou mau feruriraʼa ʼe mau ʼāʼau. ʼA tauturu ia rātou ʼia ʼite ʼe ʼia here i te ʼōpuaraʼa a te Metua. Tē tiʼaturi nei au ʼe te rāveʼa nō te rave i te reira ʼo te ʼafaʼi hōhonu atu ā ïa ia rātou i roto i te ʼōpuaraʼa.

I roto i taua vārua ra, ʼua māʼiti au i te haʼapāpū pūai ʼe toru parau tumu i roto i te ʼōpuaraʼa ʼa te Metua tāʼu e tiʼaturi e tauturu ïa i te uʼi ʼāpī ia ʼite, ʼia here ʼe ʼia ora i teie ʼōpuaraʼa hanahana.

Tumu Parau #1: ʼo Iesu Mesia te ʼĒʼa, te Parau Mau ʼe te Ora

No reira, tumu parau #1: ʼo Iesu Mesia te ʼĒʼa, te Parau Mau ʼe te Ora.³ Te Fatu ʼe Faʼaora ʼo Iesu Mesia ʼo te ʼohipa tumu ïa ʼo te ʼōpuaraa nō te faʼaoraraʼa. Nā Tāna tusia tāraʼehara ʼe nehenehe ai i te ʼōpuaraʼa ʼa te Metua i te tupu. ʼA faʼaroʼo na i te mau parau ʼa Alama a faʼaʼite ai ʼoia i te mea tā te Faʼaora i rave nō tātou: « E e haere atu ʼoia ma te faʼaʼoromaʼi i te mauiui, ʼe te ʼati, ʼe te mau huru faʼahemaraʼa atoʼa ra; …

« E e faʼaoroma’i ʼoia i tōna poheraa, i tatara ai ʼoia i te mau tāpe’a ʼo te pohe i ruʼuruʼuhia’i tōna ra mau taʼata ; e e rave ʼoia i tō rātou paruparu i ni’a iāna iho ʼia faʼaʼīhia tōna ra ʼāʼau i te aroha… ʼia ʼite ʼoia na roto i te tino, te rāve’a e faʼaora ai i tōna mau taʼata i tō rātou paruparuraʼa ra…

« ’Ua faʼaʼoromaʼi te Tamaiti ʼa te Atua i te mamae tino nei, ’ia rave ʼoia i te mau hara ʼa tōna ra mau taʼata i niʼa iāna iho, ’ia parai ʼoia i tā rātou mau hapa mai te au i te mana o tōna faʼaora ».⁴

Mea au nāʼu teie mau ʼīrava. I ō nei, na roto i te reo nehenehe, ʼua hōhora mai Alama i te ʼohipa tumu nō te Tāraʼehara ʼa Iesu Mesia i roto i te ʼōpuaraʼa nō te faʼaoraraʼa. Teie te Tiʼafaʼahouraʼa tei hōroʼahia nō te taʼatoʼaraʼa. Teie te faʼaʼoreraʼa hara ʼe te faʼaoraraʼa i te hara nō rātou ʼo tē tātarahapa. Teie te here ʼo Iesu ʼa faʼaora ai ʼOia, ʼa faʼateitei ʼe ʼa haʼapūai ai ʼoia ia tātou i roto i tō tātou nei tere tahuti. Teie te mana ʼo Iesu Mesia nō te faʼaʼora ia tātou mai roto mai i te pohe ʼe te hara, ʼe nō te ʼiriti atu ia tātou te mau haʼamaitaʼiraʼa nō te faʼateiteiraʼa ʼe te ora mure ʼore.

Tē hinaʼaro nei au ʼe ia ʼite ʼe ʼia māramarama tā tātou mau pīahi i te faufaʼa rahi ʼo Iesu Mesia i roto i te ʼōpuaraʼa a te Metua ʼe nō to rātou oraraʼa. Nō Tāna tusia tāraʼehara, ʼua ’ī te mau mea atoʼa tā te Atua i poiete i tōna māramarama.⁵ ʼOia mau, tei roto ʼOia « i roto i te mau mea atoʼa ʼe nā roto hoʼi i te mau mea atoʼa, te māramara nō te parau mau. »⁶ E hōroʼa mai taua māramarama ra i te ora i te mau mea atoʼa ʼe e hopoi te reira i te « ture ʼo tei nā roto i te reira te mau mea atoʼa ra e faʼaterehia ai. »⁷ ’A feruri na i te reira ! Te mau mea atoʼa i roto i te ao ʼa te Atua, te mau ao rarahi roa aʼe e vai ra i roto te mau hanere milia fetiʼa, te mau mea naʼinaʼi roa aʼe ō te materia, tō tātou mau tino tahuti, tō tātou mau vārua mure ʼore, ʼe tō tātou haereraʼa i mua mure ʼore, ʼua faʼaterehia ïa nā te ture hanahana na roto atu i te here ʼa tō tātou Metua i te Ao ra ʼe te Tāraʼehara faʼahiahia ʼa te Fatu ra ia Iesu Mesia.

E mea ʼaʼaʼno te Tāraʼehara ʼa Iesu Mesia e taeʼahi i te mau vahi atoʼa, ʼe nō te taʼata iho ra. ʼOia mau, e haʼamaitaʼi tātaʼitahi te here, te aroha, ʼe te mana ʼo tō tātou Faʼaora i tā tātou pīahi. Tē haʼapiʼi mai nei te mau pāpaʼiraʼa moʼa e ʼua faʼaʼoromai Iesu i te mau mauiui atoʼa, te mau ʼoto atoʼa, ʼe te mau ʼati atoʼa tā tātou mau pīahi ʼe faʼaruru nei i roto i tō rātou oraraʼa tahuti nei.⁸ ʼUa rave ʼOia i niʼa iho Iāna te mau hara ʼa te taʼata nei ia nehenehe ia rātou ʼia tātarahapa.⁹ ʼUa ʼite tātaʼitahi ʼe ma te maitaʼi i tō tātou mau pīahi. ʼUa ʼite ʼOia i tō rātou mau ʼēʼa nō te mea ʼua haere aʼena ʼOia nā niʼa i taua mau haereʼa ra.

ʼE nehenehe tā rātou e fariu atu Iāna, ʼia faʼaroʼo Iāna, ʼia tātarahapa i tā rātou mau hara, ʼe ʼia peʼe atu Iāna ma te pāpū ʼe tiʼa turiraʼa ʼe ʼua ʼite ʼOia i te ʼēʼa. ʼUa riro mau ʼOia te ʼēʼa anaʼe i te mau mea atoʼa ʼo tei riro ʼei mea faufaʼa nō rātou.¹⁰ ʼO ʼOia te ʼēʼa nō te faʼaʼoreraʼa hara ʼe te faʼaoraraʼa faʼahiahia. ’O ’oia te ʼēʼa nō te ’oa’oa e vai maoro mai. ʼO ʼOia te ʼēʼa i te hoaraʼa ʼo te Vārua Maitaʼi, ʼe nō reira i te pūai hanahana, te tāmahanahanaraʼa, te heheuraʼa, te māramarama, ʼe te mana i roto i tō rātou mau oraraʼa. ʼO ʼOia te ʼēʼa i te itoito ʼe te faʼaʼoromaʼi, ʼe i te mau mea maitaʼi atoʼa ʼa te Atua. ʼO ʼOia te ʼēʼa i te here mau ʼe te ateate, ʼe i te manaʼo hau ʼo tei hau atu i te mau mea atoʼa. ʼO ʼOia te ʼēʼa i te mau auraʼa nō te here ʼe te tāviniraʼa ʼo te ʼafaʼi mai i te manaʼo māuruuru hōhonu i roto i te taʼata iho, te auraʼa ʼe te tumu i roto i tō rātou mau oraraʼa i teie nei ʼe ʼa muri noa atu. ʼO ʼOia te ʼēʼa i te faʼateiteiraʼa ʼe te ora mure ʼore i pihai iho i tō rātou Metua i te Ao ra ʼe tō rātou mau ʼutuāfare. E tōʼu mau taeaʼe ʼe mau tuahine here e, ʼa haʼapiʼi i tā tātou mau pīahi ʼe « te mau mea maitaʼi atoʼa [nō ʼo mai ïa ia Iesu Mesia ra.¹¹ ʼUa riro ʼOia ʼe mau mea atoʼa nō rātou.

Tumu Parau #2: E tiʼaraʼa ʼe ʼe tumu mure ʼore tō te mau tamaroa ʼe te mau tamahine ʼa te Atua.

E tiʼaraʼa ʼe ʼe tumu mure ʼore tō tō tātou mau pīahi tātaʼitahi. ʼUa riro rātou tāta’itahi « ʼei tamaiti ʼe ʼei tamahine vārua herehia ʼe na metua i te ra’i ra, e nō reira, e turara’a hanahana tō rātou tāta’itahi. »¹²

ʼUa faʼanahohia te ʼōpuaraʼa ʼa te Metua i te Ao ra nō te tauturu i tā tātou mau pīahi atoʼa ʼia faʼatupu i tō rātou tiʼaraʼa ʼe tō rātou tumu mure ʼore na roto i te aroha ʼe te maitaʼi ʼo te Fatu ra ʼo Iesu Mesia. Te hinaʼaro nei au ʼia haʼamāramarama atu ʼe toru hiʼoraʼa nō tō rātou tiʼaraʼa mure ʼore tāʼu e manaʼo e mea faufaʼa rahi nō rātou ʼia ʼite.

E haʼamata ïa vau ma te ʼiteraʼa ʼe ʼe mau tamariʼi vārua tā tātou mau pīahi ʼa te Atua. A tauturu ia rātou ʼia ʼite e ʼo ʼOia mau tō rātou Metua i te Ao ra. Na roto i Tāna Tamaiti Here, ʼua haʼamaitaʼi te Metua i te Ao ra i tā tātou mau pīahi na roto i te rāveʼa ʼe te ʼaravihi ʼia haʼapiʼi hōhonu atu ā i Tāna ʼōpuaraʼa mure ʼore--ʼia tupu i roto i te ʼite ʼe te māramaramaraʼa , ʼia noaʼa i te ʼite nō te rave ma te manuiaraʼa i te ʼohipa parau-tiʼa, ʼe te riroraʼa mai Iāna ra te huru. Teie ïa te tumu rahi nō teie tufaʼa hau roa atu i te faufaʼa ʼo tō rātou tiʼaraʼa mure ʼore.¹³

Te piti o te tufaʼa faufaʼa rahi ʼo te tiʼaraʼa mure ʼore ʼo tō tātou mau pīahi ʼo te riroraʼa ïa ʼe hōʼē metua vahine ʼaore rā metua tāne, te hōʼē tāne faʼaʼipoipo ʼaore rā te hōʼē vahine faʼaipoipo, i roto i te hōʼē ʼutuāfare mure ʼore.¹⁴ Te faʼaipoiporaʼa i roto i te hōʼē tāne ʼe i te hōʼē vahine ʼe mea faʼauehia ʼe te Atua ʼei mea mure ʼore.¹⁵ I roto i te hiʼoraʼa mure ʼore ʼa tō tātou Metua i te Ao ra, e mau metua vahine ïa ʼe ʼe mau metua tāne ïa tā tātou mau pīahi i roto i te basileia. Tera ïa tō rātou tiʼaraʼa mure ʼore ʼe tera ïa Tāna ʼōpuaraʼa. Nō reira tā rātou fā mure ʼore, ʼo te haʼamauraʼa ïa i te hōʼē faʼaipoiporaʼa tiretiera ʼe te hōʼē ʼutuāfare mure ʼore.

I te pae hopeʼa, ʼe tiʼa i tā tātou mau pīahi ia ʼite ʼe e mau huāʼai rātou na Aberahama, te nūnaʼa fafauhia ʼa te Fatu. ʼUa fafau te Atua ia Aberahama ʼe e ʼafaʼi ïa tōna huāʼai i te ʼevānelia ʼa Iesu Mesia ʼe te autahuʼaraʼa moʼa (mai te mau ʼōroʼa nō te faʼaoraraʼa) i te mau fenua atoʼa nō te haʼamaitaʼi i te mau ʼutuāfare atoʼa i niʼa i te fenua i na pae ʼe piti ʼo te pāruru.¹⁶ Teie ïa te haʼaputuputuraʼa ʼo Iseraela tei haʼapurarahia ʼe teie ïa te hōʼē tufaʼa faufaʼa rahi ʼo te ʼōpuaraʼa ʼa te Metua.¹⁷ E huāʼai tā tātou mau pīahi nā Aberahama, ʼe tā rātou fā mure ʼore ʼo te raveraʼa ïa i te ʼohipa ʼa te Atua mai Tāna mau tāvini tei tiʼaturihia e Ana. E ti’ara’a faufa’a ’e e tuha’a faufa’a tō rātou i roto i te ’ōpuara’a a te Metua.

A hoʼi nā i muri ʼe ʼa feruri na i te mau haʼamaitaʼiraʼa maere mau tā te Metua i te Ao ra e hinaʼaro i te hōroʼa i tā tātou mau pīahi. E te maere nei paha te tahi ʼo tā tātou mau pīahi mai te mea ʼe tiʼaraʼa ʼe ʼe fā ānei tā te Atua mai teie te huru nō rātou. E manaʼo paha te tahi ʼe te riroraʼa mai te Metua i te Ao ra, haʼaraʼa mai Tāna mau tāvini tei tiʼaturihia ʼe Ana, ʼaore rā ʼia taʼatihia i te hōʼē hoa here mure ’ore ʼe te fānauraʼa i te mau tamariʼi eʼita paha ïa e roaʼahia ʼe rātou. ʼIa hiʼo anaʼe rātou i roto i te hiʼo, eʼita paha rātou ʼe ʼite i te mea tāʼu i faʼaʼite i teie mahana. Mai te mea te manaʼo nei vetahi o rātou i te reira, a faʼaitoito na ia rātou ʼia rave i te tahi ē atu hiʼoraʼa. ʼA parau atu ia rātou ia hiʼo atu i roto i te hiʼo ma te mata ʼo te faʼaroʼo ʼe ia hiʼo ʼeiaha noa i tō rātou iho hōhoʼa mata i te hōhoʼa mata rā ʼo te Fatu ʼo Iesu Mesia i pihai iho ia rātou ma te pūai ʼe te hanahana ʼe te here maitaʼi ʼe te hopeʼa ʼore. ʼAita ʼOia i haere mai nō te faʼaʼere ia rātou i Tāna mau haʼamaitaʼiraʼa.¹⁸

Tumu Parau #3: Te mau mea atoʼa ʼua tuʼu atu Iesu Mesia i Tōna ra iʼoa i niʼa ʼe Tufaʼa ïa nō te ʼŌpuaraʼa

ʼE ʼere noa Iesu Mesia te pū nō te ʼōpuaraʼa ʼa te Metua, ʼua natihia rā Tōna iʼoa, Tōna mana, Tāna ʼohipa ʼe Tōna huru taʼata i roto i te reira. Te hinaʼaro nei au e ʼia ʼite ʼe ʼia māramarama tā tātou mau pīahi ʼe te mau mea atoʼa ʼua tuʼu atu te Fatu ra ia Iesu Mesia Tōna iʼoa i niʼa ʼe tufaʼa ïa nō te ʼōpuaraʼa ʼa te Metua.

ʼA feruri na maʼa taime iti ʼeaha taua mau mea ra. I hea tō te Faʼaora tuʼuraʼa i Tōna ra iʼoa? Teie te hōʼē tābula nō taua mau mea tei amo i te iʼoa ʼo Iesu Mesia tāʼu i tiʼaturi ʼe mea hau roa atu i te faufaʼa ʼia ʼite ʼe ia māramarama tā tātou mau pīahi.

Te ʼEkālesia ʼa Iesu Mesia i te Feiā Moʼa i te mau Mahana Hopeʼa nei: Te iʼoa ʼo te ʼĒkālesia ʼo te hōʼē ïa ʼite ʼe ua hāmanihia ʼe ʼua arataʼihia te reira ʼe te Fatu ra ia Iesu Mesia; ʼo Tāna hoʼi ʼĒkālesia.¹⁹ te ʼĒkālesia, ʼo te basileia ïa ʼo te Atua i ni’a i te fenua nei. Nā roto atu i te ʼĒkālesia, te pāturu nei te Fatu ʼe te Faʼaora i te mau taʼata tātaʼitahi ʼe te mau ʼutuāfare i roto i tā rātou ʼimiraʼa i te ora mure ʼore ʼe te faʼaineine nei i te fenua nō Tōna Tae Pitiraʼa mai. Te ʼĒkālesia—te ’Ēkālesia mau ’e te oraa te Fatu—e tufaʼa faufaʼa rahi ïa nō te ʼōpuaraʼa ʼa te Metua nō te faʼaoraraʼa i Tāna mau tamariʼi.
Te Autahuʼaraʼa Moʼa, mai te au i te Haʼapaʼoraʼa ʼa te Tamaiti ʼa te Atua: te autahuʼaraʼa moʼa ʼo te pūai ʼe te mana faʼatere ïa ʼa te Atua. ʼUa hōroʼahia te reira i te taʼata ia nehenehe i te Feiā Moʼa haʼapaʼo i te mau Mahana Hopeʼa nei ʼe rave i te ʼohipa ʼa te Fatu na roto i Tāna mana ʼe Tāna pūai. E mea na roto i taua pūai ra ʼe taua mana rā e fariʼi ai tātou i te mau ʼōroʼa nō te faʼaoraraʼa ʼe noaʼa ai ia tātou te mau haʼamaitaʼiraʼa rahi ʼa te ʼōpuaraʼa hanahana ʼa te Metua.¹⁸
Te Fare ʼo te Fatu: Te ora nei tātou i roto i te hōʼē tau paturaʼa rahi ʼo te mau hiero i niʼa i te fenua nei. Te ʼoaʼoa nei tātou e ʼua faʼatiʼa te Fatu i Tāna mau tamariʼi haʼapaʼo maitaʼi e rave rahi ia fariʼi i tō rātou mau haʼamaitaʼiraʼa hiero, mai te taʼatiraʼa i te mau ʼutuāfare mure ʼore, i na pae ʼe piti ʼo te pāruru. ʼE tūʼati te mau ʼōroʼa ʼo te Fare ʼo te Fatu ia tātou i te mau mana nō te atuʼaraʼa; ʼe mea faufaʼa rahi te reira nō te ʼōpuaraʼa ʼoaʼoa ʼa te Metua nō Tāna mau tamariʼi.²¹
Te peropheta ʼa te Fatu: ʼUa parau te Fatu nō niʼa i Tāna peropheta, « E farii ho’i ʼoutou i tāna parau mai te mea ra ʼe no roto i tōʼu iho vaha. »²² Te peropheta ʼa te Fatu ʼe hōʼē ïa hiʼo ʼe heheu parau. Tāna mau parau ʼo te mau parau ïa ʼa te Fatu nō tātou, nō tō tātou haʼamaitaʼiraʼa i roto i teie oraraʼa, ʼe nō tō tātou faʼateiteiraʼa ʼe ora mure ʼore i roto i te oraraʼa ʼa muri atu. Te peropheta ʼa te Fatu e tufaʼa faʼahiahia ïa ʼo te ʼōpuaraʼa ʼa te Metua.
Te Buka ʼa Moromona: Te Tahi ʼIte nō Iesu Mesia: Te Buka ʼa Moromona ʼo te hōʼē ïa ʼite e te Fatu Iesu Mesia ʼo te Faʼaora ʼe te Tāraʼehara ïa, ʼe ʼe peropheta Iosepha Semita nō te Faʼahoʼiraʼa mai, ʼe ʼua haʼamau te Fatu i Tāna ʼĒkālesia i te mau mahana hopeʼa nei. Tei roto i te reira te mau haʼapiʼiraʼa nehenehe nō niʼa i te ʼōpuaraʼa ʼa te Metua ʼe tā teie hoʼi buka e faʼaʼite pāpū nei mā te pūai.²³ Nō teie mau tumu atoʼa i riro ai te Buka ʼa Moromona ʼei hōʼē tufaʼa faufaʼa rahi nō te ʼōpuaraʼa rahi nō te faʼaoraraʼa.

Te mau tamariʼi ʼa te Metua i te Ao ra: ʼUa tuʼu Iesu Mesia i Tōna ra iʼoa i niʼa i te mau tamariʼi ʼa te Metua i te Ao ra ʼo te rave ʼe te haʼapaʼo i te mau fafauraʼa moʼa. ʼUa tuʼu ʼOia i Tōna iʼoa i niʼa ia ʼoutou e haʼapiʼi nei, ʼia haere atu ʼoutou i te hiero.²⁴ E ʼōpua ʼOia i te tuʼu i Tōna ra iʼoa i niʼa i tā ʼoutou mau pīahi, ʼe i niʼa i te mau ʼiteraʼa pāpū tā rātou e faʼaʼite i tō te ao a rave ai rātou i te haʼaputuputuraʼa ʼo Iseraela.²⁵ Teie te ʼōpuaraʼa ʼa te Metua

Te mau mea atoʼa tā tātou i faʼahiti i ō nei—e rave rahi atu ā tā tātou ʼe nehenehe e parau, mai te mau fare pureraʼa atoʼa na te ao nei ʼe tā tātou mau pure i te Metua i te Ao ra—e mau mea ïa ʼua tuʼu Iesu Mesia i Tōna iʼoa i niʼa. E mau tufaʼa ïa nō te ʼōpuaraʼa ʼe te tupuraʼa ʼo te tohuraʼa. Mai tā Paulo i parau ʼe mea maoro aʼenei, « E ia tae i te tuʼuraʼa parau i te hoperaʼa mau ʼo te mau tau ra, ʼe ʼāmui ai [te Metua] i te mau mea atoʼa i te Mesia ra, tō te raʼi ʼe tō te ao nei, ʼei iāna. »²⁶

Te mau taeaʼe ʼe te mau tuahine, a tauturu i tā tātou mau pīahi ʼia ʼite i teie mau mea tei mātauhia ʼe rātou—te ʼĒkālesia, te autahuʼaraʼa, te hiero, te peropheta, te Buka ʼa Moromona, ʼo rātou iho—te amo nei teie mau mea atoʼa i te iʼoa ʼo te Faʼaora nō te mea tei ʼōnei rātou paʼatoʼa nō te ʼafaʼi ia tātou ia Iesu Mesia ra, ʼo te ʼēʼa hoʼi i te hau i roto i teie oraraʼa ʼe te faʼateiteiraʼa ʼe te ora mure ʼore i roto i te ao ’a muri atu.

E faʼaoti au i teie mahana ma te hōʼē manaʼo nō niʼa i te ʼohipa ʼa te ʼōpuaraʼa ʼa te Metua i roto i te oraraʼa i te mau mahana atoʼa ʼo tā tātou mau pīahi. ʼUa tae mai te manaʼo nō roto mai i te aʼo ʼa te Ariʼi Beniamina i tōna ra mau taʼata. I te ʼōmua-roa-raʼa nō tāna aʼoraʼa, ʼua parau ʼoia, « ʼIa faʼaroʼo rā ʼoutou iāʼu, ʼe ia faʼafatafata i tō ʼoutou tariʼa ʼia faʼaroʼo, ʼe tō ʼotou ʼāʼau ʼia ʼite, ʼe tō ʼoutou manaʼo ʼia faʼaʼitehia mai te mau parau ʼaro ʼa te Atua ia ʼoutou na. »²⁷

Mea au nāʼu te pereota « ia faʼaʼitehia mai te mau parau ʼaro ate Atua ia ʼoutou na, » ʼe te hinaʼaro nei au i te faʼahaere i te reira i tā tātou mau pīahi. ʼUa haʼamāramarama mai te Ariʼi Beniamina ʼe te « mau parau ʼaro ʼa te Atua » tāna i ʼōpua i te faʼaʼite atu i tōna ra nūnaʼa ʼe mau tufaʼa faufaʼa rahi ïa nō te ʼōpuaraʼa rahi ʼa te Metua nō te faʼaoraraʼa. Nō tātou mau fā, te vai nei ïa ʼe piti auraʼa nō te parau ʼa te Ariʼi Beniamina. ʼA tahi, te auraʼa ʼo te reira ʼo teie ïa, e mai te mea ʼe mātara te mau ʼāʼau ʼe te mau feruriraʼa ʼa tō tātou mau pīahi, ʼe ʼe haʼapiʼi hoʼi tātou na roto i te Vārua, ʼe ʼite ʼe ʼe māramarama ïa tātou mau pīahi i te ʼōpuaraʼa. Te vai atoʼa rā te tahi atu auraʼa. Mai te mea e taʼa ia rātou i te ʼōpuaraʼa i roto i tō rātou mau ʼāʼau, ʼe riro ïa te ʼōpuaraʼa te ʼēʼa e ʼite ai rātou ia rātou iho ʼe te ao na pihai iho ia rātou. E riro ïa te ʼōpuaraʼa tō rātou hiʼoraʼa. E ʼite ïa tā tātou mau pīahi i te ʼōpuaraʼa, ʼe e tauturu ïa te ʼōpuaraʼa ia rātou ʼia ʼite.

Nāhea ʼe nehenehe mau ai i tā tātou mau pīahi ia ʼite i te ʼōpuaraʼa? E mea faufa’a roa te mau piha ha’api’ira’a i roto i teie ravera’a, ’e ’ua ’īriti fa’ahou te Metua i te Ao ra i tōna ’ōpuara’a nō rātou. A haʼapiʼi i tā tātou mau pīahi ʼe ʼe nehenehe tā rātou e hiʼo i te ʼōpuaraʼa:

I te fānauraʼa ʼo te hōʼē ʼaiū, ʼe i te mau taime atoʼa ʼe pohe te tahi taʼata.²⁸
I roto i te hiero, i roto i te mau ʼōroʼa nō tei pohe.²⁹
I roto i te ʼōroʼa nō te pane ʼe te pape i te mahana Sābati.³⁰
I roto i te tātarahaparaʼa, ia pure anaʼe rātou i te Metua i te Ao ra ia faʼaʼorehia mai tā rātou mau hara i te iʼoa ʼo Iesu Mesia.³¹
I roto i te Buka ʼa Moromona, taua ʼite pūai nō Iesu Mesia.³²
I roto i te hiʼoraʼa, te faʼaroʼoraʼa, ʼe te peʼeraʼa i te Peropheta ʼa te Atua.³³
I roto i te mau haʼamaitaʼiraʼa ʼautahuʼaraʼa.³⁴
I roto i te Haʼapiʼiraʼa ʼevānelia nā te feiā ʼāpī ʼe te feiā ʼāpī paʼari i reira rātou ʼe ʼite ai i te here ʼo te Mesia, Tōna māramarama ʼe Tōna mana.³⁵
I te mau taime atoʼa ʼe pure ai rātou i te Metua i te iʼoa ʼo Iesu Mesia.³⁶

ʼA tauturu i tā tātou mau pīahi ia ʼite i teie parau mau nehenehe: ia ʼite anaʼe rātou i teie mau meaʼ, te ʼite ra ïa rātou i te ʼōpuaraʼa ʼa te Metua i te tupuraʼa. Mai te mea e mātara tō rātou mau ʼāʼau, e faʼaʼite pāpū mai ïa te Vārau Maitaʼi ia rātou ʼe ʼe parau mau te ʼōpuaraʼa nō te faʼaoraraʼa ʼe ʼe nō rātou hoʼi te reira.³⁷ ʼIa tupu anaʼe tō rātou faʼaroʼo ia Iesu Mesia ʼe tō rātou ʼite i te rahi, e riro ïa te ʼōpuaraʼa ʼei hiʼoraʼa nō rātou nō niʼa i te oraraʼa ʼe nō niʼa ia rātou iho. E ʼite īa rātou ia rātou iho i roto i te ʼōpuaraʼa, ʼe e haʼamata ïa rātou i te hiʼo i te ao na pihai iho ia rātou mai tā te Fatu ʼe hiʼo nei.

E riro ïa te ʼōpuaraʼa ʼe arataʼiraʼa tā rātou ʼe faʼaʼohipa nō te hāroʼaroʼa i te mau tumu parau, te mau fifi ʼe te mau tāmataraʼa tā rātou e faʼaruru nei. ʼOia mau, ʼo te mea ïa tā tātou e haʼapiʼi nei i roto i te Parau tumu nō te ha’api’ira’a tumu. Teie ïa: « Nō te hiʼopoʼa i te mau manaʼo haʼapiʼiraʼa, te mau uiraʼa, ʼe te mau tumu parau tōtiare ma te hōʼē hiʼoraʼa mure ʼore, te hiʼo nei ïa tātou i te reira mai te au i te ʼōpuaraʼa nō te faʼaoraraʼa ʼe te mau haʼapiʼiraʼa ʼa te Faʼaora… E faʼatiʼa ïa te reira i te faʼahiti faʼahou i te uiraʼa… ʼe ʼia hiʼo i te mau manaʼo ia au i te ture parau mau ʼa te Fatu ʼeiaha rā i te fariʼiraʼa i te mau manaʼo… o te ao nei. »³⁸

Mai te mea e peʼe tā tātou mau pīahi i teie hōhoʼa, ʼe riro ïa te ʼōpuaraʼa nō te faʼaoraraʼa ʼe ʼēʼa e ʼite ai rātou ia rātou iho, ʼe i tā rātou mau hōpoiʼa, mau rāveʼa ʼe mau haʼamaitaʼiraʼa. Nā reira ïa rātou ʼe ʼite ai i te auraʼa ʼe te tumu i roto i tō rātou mau oraraʼa. Nā roto i te arataʼiraʼa ʼe te haʼapiʼiraʼa ʼa te Vārua Maitaʼi ia rātou, e noaʼa ïa ia rātou i te mea tā Paulo i piʼi « te ʼāʼau ʼo te Mesia. »³⁹

E tōʼu mau taeaʼe ʼe mau tuahine, te pure nei au ʼe ia vai mai ïa te ʼōpuaraʼa ʼa te Metua i roto i tō ʼoutou mau ʼāʼau, ʼ ia ʼite outou ia ʼoutou iho i roto i te ʼōpuaraʼa, ʼe ia riro mai te ʼōpuaraʼa te huru ʼo tō ʼoutou hiʼoraʼa atu i te ao.⁴⁰ Te faʼaʼite pāpū nei au ʼe e parau mau te ʼōpuaraʼa ʼa te Metua. Te ora nei te Atua tō tātou Metua. ʼO Iesu te Mesia, tō tātou Faʼaora ʼe tō tātou Tāraʼehara. Ua ite au e, te ora nei ʼOia. ’O teie Tāna ’Ēkālesia. Te rave nei ʼoutou i Tāna faʼaueraʼa, ʼia haʼapiʼi i te ʼōpuaraʼa ʼa te Metua i te uʼi ʼāpī na roto i te mana ʼo te Vārua Maitaʼi. ʼO teie ïa tō’u iteraa pāpū i te i’oa mo’a ʼo Iesu Mesia, ʼāmene.

© 2018 nā Intellectual Reserve, Inc. Fatura’a pāruruhia. Parau fa’ati’a nō te reo peretāne : 3/18 Parau fa’ati’a nō te ’īritira’a : 3/18 ʼIritiraʼa nō Te ʼŌpuaraʼa nō te Faʼaoraraʼa ʼe te Uʼi ʼĀpī Tahitian PD60006246 895