“Ia me Kena iLutua”
Kakaburaki ena Veituberi ni iVakarau ni Vuli ni Lotu • 12 ni June, 2019 • Church Office Building Main Floor Auditorium
E sega beka ni o taleitaka mo raici ira nomu gonevuli? Vinaka vakalevu ki na matasere. Taumada au via vakavinavinaka vei kemuni ena nomuni igu mo ni vakanamata vua na iVakabula me itakele ni nomuni vulica ka vakavulica na kosipeli. Niu dau vakadikeva na veikalasi ka sarava na nomuni kunea na Nona veitutu kei na itavi, vulica na nona ivakarau kei na ivakarau ni rai ka vuli mai na Nona ivakaraitaki uasivi,1au sa vakila na nona vakavinavinaka na Tamada Vakalomalagi ni ko ni sa vakadinadinataka tiko na Luvena Daulomani. Ena nomuni vakamuria na ivakasala nei Elder Clark mo vukei ira na nomu gonevuli me ra vulica me ra kilaiKoya ka vuli maiVua,2au sa raica na kena levu cake na Yalo Tabu ena nomuni veivakavulici kei na veisureti. Me vaka a tukuna vei au e dua na qasenivuli ena dua na gauna walega qo, “Na noqu biuti Jisu me itakele ni noqu veivakavulici sa kauta lesu mai na reki ki na loma ni noqu valenivuli.” Au vakayaloqaqataki kemuni mo ni tomana tikoga nomuni vaqara na veivakauqeti ena sala mo ni dau cakava tikoga kina oqo e veisiga.
Nikua au via sureti kemuni mo ni tomana nomuni tara cake nomuni sasaga mo ni vukei ira na gonevuli me ra raica na iVakabula, sega walega ena nodra vulica na ivolanikalou, ia vei iko talega—ena nomu segata mo vakatotomuria Nona ivakaraitaki kei na Nona loloma. O na nauma beka na vakasama oqo mai vei Peresitedi Boyd K. Packer kau raica na kena veivakayavalati ka bibi ena kena yaga:
Na ivakarau ni rai sa mai madigi dokai au digitaka meu vakadinadinataka vei kemuni na taciqu kei na ganequ ena veiyabaki e sega ni levu cake se lailai sobu mai na kena iyaloyalo na iVakavuvuli Levu. Au vakabauta ni ivakatagedegede o veiqaravi kina, me vaka na bolebole kei na ilesilesi e nomu, sa na ceuti kina ena kemuni ivatuka na ivakatayaloyalo kei Karisito. Ena inaki kilai kece sara, ena rumu ni vuli oya ena gauna oya kei na ivakaraitaki oya kei na veivakauqeti oya, ko sa i Koya ka o Koya o iko.”3
Ena nona veiitovo ni bula kilai na iVakabula, na kena e vaka me veivakauqeti ka kedra yavu na kena vo sai koya na Nona loloma uasivi—Nona loloma vei Tamana mai Lomalagi kei na Nona loloma vei keda yadua.
E vola na iApositolo o Paula, “Ia kevaka kau sa parofisai rawa, ka kila talega na ka kecega sa vuni, kei na vuku kecega; ia kevaka sa tu vei au na vakabauta kecega, … ka sega vei au na loloma, au sa ka walega.”4 Ki vei ira e dua na ilawalawa qasenivuli ni semineri kei na inisitute, a kaya beka o Paula, “E dina ena tu beka vei au na taledi vakalou kau kila na veivakavulici kei na vuli kei na kena iwalewale kece sara, ka ra tu vei au na ivakaraitaki ni lesoni cecere eso ka sega vei au na loloma, au sa ka walega.” Yalovinaka kakua ni vakayagataka na malanivosa oya me iulubale ni nomu sega ni cakacaka vakaukauwa mo dua na qasenivuli maqosa sara. Ia nanuma toka ni da masuta na kila ka, na vuku, kei na vakabauta sara mada ga, kevaka eda sega ni vakuria ena loloma, eda sa na vaka ga na “kaukamea sa rorogo, se na lali sa tataqiriqiri.”5
“Sa Dau Vosota Vakadede na Loloma, sa Yalovinaka;
A vola talega na iApositolo ko Paula, “Sa dau vosota vakadede na loloma, sa yalovinaka.”6
E dua na ivakaraitaki ni nona yalovinaka na iVakabula e volai ena ena Luke 19 O Sakiusa, e dua na dau kumuna na ivakacavacava, sa yaco me vutuniyau ena nona veiqaravi tiko vei ira na kai Roma ia era cati koya na Jiu ka ra nanuma ni lawakitaki ira tiko ena nona kumuni ivakacavacava. Ena dua na siga sa segata ko Sakiusa me raici Jisu a mani sega ni rawa baleta ni sa rui lekaleka ka sega ni rawa me suguraki koya ena kedra maliwa na lewevuqa, ni ra sega ni via vukei koya. A mani cici yani kina ki liu ko Sakiusa ena vanua e lakova tiko ko Jisu ka kabata e dua na vu ni lolo me raici Koya ni lako voleka kina.
[iyaloyalo kei Sakiusa ena vu ni lolo]
E kaya na ivolatabu, “Ia ni sa yaco ki na yasana ko ya ko Jisu, sa ta cake, ka raica ka kaya vua, I Sakiusa, kusarawa mo kevu sobu mai; niu na tiko e nomu vale edaidai.
“A sa kevu kusarawa sobu mai ko koya, a sa vakacegui koya ena marau.”7
E rawa beka ni o raitayaloyalotaka na kena ibalebale vei Sakiusa me laurai, kei na revurevu ni nona veisureti na iVakabula vua e dua sa matau tu vua na biliraki? Na ivalavala lailai oqo ni yalovinaka sa kauta mai e dua na duidui levu.
Era gadreva na noda gonevuli na noda vosota vakadede kei na noda yalovinaka. Na itovoca, veivagolei tani, kei na ivakarau ni rai malumalumu e rawa, ena so na gauna, me vakadredretaka na veivakavulici. Ia ena veigauna oqori, au vakauqeti kemuni mo ni raibaleta na itovonibula ka raica na tamata. Yalovinaka cegu vakabalavu vakalailai me rawa ni o taroga, “Na cava tale e rawa ni vakavuna tiko na itovo se ivakarau ni rai vaqo?” Oti, me vaka e vakavuvulitaka o Elder Jeffrey R. Holland:
“Kevaka era sega ni vakaitavitaki ira mai na gone oqori, de rairai se bera beka ni gauna mo vakavulici ira kina, ia e rawa ni o lomani ira. Ia kevaka o lomani ira nikua, de rairai sa na rawa ni o vakavulici ira ni mataka.
“… E sega ni dua na ka oqori e vakatau vei ira. E rawa ni da lomani ira mai na ivakatekivu ki na itinitini, ka na yaco na cakamana.”8
Ia mo kitaka vakacava oqori, vakabibi ni so e dredre toka ni da lomana? A vukei keda talega kina o Elder Holland ena nona kaya, “E rawa ni o tekivu ena nomu lomana na Kalou. Oti qai kerei Koya me vukei iko ena nomu vakatetea yani nomu lomani Koya vei ira era gadreva nomu loloma.9 E rawa mo “masuta na Tamada ena yalomudou taucoko me vakasinaiti kemudou ena loloma oqo.”10 E rawa ni o masuta mo raici ira me vakataki Koya. E rawa ni o vakarorogo ka tovolea mo ciqomi ira. Me vaka e tomana o Peresitedi Erying, “Veiqaravi vei ira, ka raica na veika lalai e rawa ni o cakava vei ira. Sauma na isau ni veiqaravi, ena doka na Kalou. Au na kitaka vei kemuni na yalayala oya. Kakua ni leqataka kevaka e dredre me ra lomani ena so na gauna na nomu gonevuli. Cakava mada ga e dua na ka ena vukudra, ena vaka me rawarawa cake me ra lomani. Ena dua na isolisoli mai vua na Kalou.”11
Vei kemuni kece o ni dau tiko ena nodra vakatasuasua vakaivakatagi se na nodra qito na nomu gonevuli se o ni raica tiko eso na ivakarau vuni mo ni qaravi ira kina, vinaka vakalevu. Kevaka sara mada ga era sega ni raici kemuni, era na vakila ni tubu cake tiko na nomu lomani ira ni na vakalougatataki iko ena loloma cecere na Turaga baleta ni o qaravi ira
E dua tale na ivakaraitaki ni nona yalovinaka na Turaga e kunei ena Marika wase 5.
[iyaloyalo kei Karisito kei na marama turumi dra balavu]
Vakasamataka mada vakalailai na veika a vakayacora o Jisu vua na marama turumidra balavu. A levu cake tale na ka e cakava mai na nona vakabulai koya ga vakayago. A oca tu beka ena mosi, sega ni ciqomi mai vei ira na tamata, kei na leqa vakailavo. Ni vakila o Jisu ni sa yali mai Vua na kaukauwa, a “rai voli yani me kunei koya ka cakava na ka ko ya.”12 Sa yaco oti na veivakabulai vakayago. A gole tiko ko Jisu me qarava e dua na leqa bibi ia a tuvakadua. A vakadinadinataka ko Koya na nona vakabauta na yalewa, ka mani kacivi koya kina “luvequ.”13 A raici koya na iVakabula, ka sega ni raica nona tauvimate. A raica e dua na tamata e gadreva me lomani ka laveti, e sega ni dua na leqa me wali se dua na cakacaka me caka vakaoti.14
Se cakacaka cava ga o gadreva mo vakaotia, se lesoni cava ga o gadreva mo vakarautaka se mo vakavulica, se leqa cava ga ni itovo o sotava, e madigi kecega me ra laveti cake kina na tamata.
Kau nuitaka ni na tete yani na noda loloma vei ira era se bera tiko ni vakacuruyaca se o ira era sa vuli tiko ena gauna oqo. E levu tu era vakataki Sakiusa kei na yalewa oqo era wawa tu mai dakudra na lewevuqa. Me da muria na nona ivakaraitaki na iVakabula sai koya me da lako ka vaqarai ira.15 Yalovinaka mo ni dau masumasu ka dau veitalanoa ena nomuni vakasaqara na veivakauqeti ena ivakarau mo vukei ira kina e levu na itabagone me ra vuli mai vua na iVakabula kei na Nona ivakavuvuli. E dodonu me taumada na noda sasaga kei na igu ena vakacuruyaca ka vakacavari na vuli me ra vakalougatataki kina na luvena na Tamada Vakalomalagi.
“Ia me Kena iLutua, Dou Vakaisulu ena iVau ni Loloma Uasivi, me Vaka sa Nomudou iTutuvi”
E kaya na Turaga vua na parofita o Josefa Simici, “Me KenaiLutua, dou vakaisulu ena ivau ni loloma uasivi me vaka sa nomudou itutuvi, sai koya na ivau sa uasivi sara kei na vakacegu.”16 Ena vakacava beka na kena irairai me da vakaisulu ena ivau ni loloma uasivi?
[biuta na iyaloyalo kei Karisito kei na yalewa a tobo ni veibutakoci]
Ena Joni 8 eda wilika kina baleta e dua na yalewa era a kauta mai ki na valetabu na Farisi ka vakaraitaka vei Jisu. Era kaya vua na iVakabula,
“Vakavuvuli sa kune na yalewa ni sa dautagane, ni sa ia tiko.
“A sa vosa vei keda ko Mosese ena vunau, me ra vakaviriki ena vatu ko ira sa vakaoqo: ia ka cava ko sa kaya?”
Ia sa cuva sobu ko Jisu ka vola na qele ena nona iqaqalo, me vaka ni sega ni rogoci ira. Ni ra taro tikoga, a tucake ko Koya ka kaya yani vei ira, “O koya vei kemudou sa sega ni ivalavala ca, me viriki koya mada i liu ena vatu.” Sa qai cuva sobu tale ko Koya, ka vola na soso.
Ni sa tekivu me vesuki ira na Farisi na dui lomadra ga, era sa tekivu lako tani yadudua. Ni rau sa tiko ruarua ga ko Jisu kei na yalewa, sa taroga yani vakamalua ko Koya, “Yalewa sai ivei ko ira oqori, sa sega e dua sa lewai iko mo cudruvi, ne?
“A sa kaya ko koya, Sa sega e dua Turaga. Sa qai kaya vua na yalewa o koya, Au sa sega talega ni lewai iko mo cudruvi: mo lako, ka mo kakua ni valavala ca tale.”17
Ni o vakananuma na ka a yaco oqo, e rawa beka ni o vakasamataka e tolu vei ira na vuqa na lesoni e rawa ni da vulica mai na nona ivakaraitaki uasivi sara na iVakabula?
Taumada, na Veisorovaki nei Jisu Karisito e rawa kina ni da vuli mai na noda cala kei na veivutuni, eda na sega kina ni vakacalai mai vei ira. Ena noda veikalasi era tu na gone vuli era sa caka cala oti. Ni da vakavulica ena yalololoma na Nona sa tuvakarau na Tamada Vakalomalagi me veivosoti kei na marau ni veivutuni,18 eda sa vukei ira na gonevuli (kei ira na luveda) me ra vakabauta ni nona Veisorovaki na iVakabula e baleti ira—baleta ni vakadina kina.
Wawa mada, na ivakasala oqo e baleti keda yadua vakatautauvata. Eda gadreva talega na veisorovaki ni iVakabula me vukei keda me da vosoti ka da vakabulai. Ni da sa dui vakila yadua na marau ni veivutuni, eda na rawa ni vakauqeti ira na noda gonevuli me ra vuki vua na iVakabula baleta na veisureti oya ena yaco mai ena yaloda sa veisautaki.
iKarua, na loloma na dauveivakauqeti cecere me vukei keda me da vinakata me da cakava na veika e dodonu. E kaya o Elder Dale G. Renlund
E dina sara, na iVakabula e sega ni duavata kei na dautagane. Ia a sega talega ni cudruva na yalewa o Koya. A vakayaloqaqataki koya me veisautaka nona bula. A vakauqeti me veisau ena vuku ni Nona yalololoma kei na loloma cecere. Na ivakadewa ni iVolatabu nei Josefa Simici e vakadinadinataka na nona bula vakatisaipeli ni oti oya: “A sa vakalagilagia na Kalou na marama oya me tekivu mai na gauna oya, ka vakabauta na yacana’ [Joni 8:11, ivakamacala e ra c].”19
Ni da qasenivuli, se ni da itubutubu, eda na temaki beka me da kinoca na ivakaraitaki ni loloma dau gadrevi baleta ni da leqataka de nanumi ni vakaiulubaletaki na ivalavala ca se vakadonui na itovoca. O ira na noda gonevuli kei ira na luveda e wasoma ni ra sa dau kila tu na noda nanuma me baleta na Turaga kei na Nona ivakaro. Era dau gadreva vakavuqa na veivakadeitaki ni ra lomani ka kilai tu na kedra yaga. Na loloma kei na inuinui a vakila na yalewa oqo ena gauna a vakalougatataki kina mai na nona “ivau ni loloma cecere” na iVakabula sai koya eda nuitaka ni ra na vakila o ira kece noda gonevuli ni ra vulica na veika baleti Koya ka baleta Nona kosipeli.
Kena ikatolu, na loloma ni Vakabula, vosota, e lomana na ivakavuvuli nei Tamana ka sega ni vakayagataka me veivakacacani. Era kila vinaka na Farisi ka ra taleitaka talega na lawa i Mosese, ka dusi kina na lawa kei na kena revurevu. Ia o Koya saraga a solia na lawa, ka nona cakacaka me “vakabulai ira sa ramusu na yalodra [ka] vunautaka na veisereki vei ira na bobula,”20a digitaka me solia na loloma cecere. A taqomaka na yalewa mai na ligadra kei na yalodra veibeitaki na Farisi ni vakarautaka tiko vei ira na dikevi koya vakataki koya kei na nodra kila ni dodonu me ra veisau.
Ena so na gauna eso na gonevuli kei ira na qasenivuli era dau vakayagataka na ivunau ena ivakarau e sureta na yalo ni veibeitaki kei na veivakacacani. Ka sega ena veivakayaloqaqataki kei na veivakatataki cake, na iwalewale oqo e veivakalolovirataki ka rawa sara ga ni veivakarusai. Me da muria na ivakaraitaki ni iVakabula sai koya me da veivakavulici ena ivakarau ena kauta mai na inuinui ka vakabulai ira e kavoro tu na yalodra.
Me ikuri ni ivalavala ca, na kavoro ni yalo e dau yaco mai ena veiituvaki duidui. E levu na gonevuli era cavutu mai na veituvaki dredre, ka veivakadrukai sara mada ga ka vakavuna nodra vakatitiqataka nodra lomani se kauwaitaki. Eso era sotava na dredre na lomaleqa se gagadre ni vinaka vakaniu ka vakavuna nodra rogoca na veivakacacani ka sega na inuinui. Eso tale era nanuma ni ra sega ni taleitaki baleta ni ra vakatovolei se bolei tu ena kedra ivakatakilakila vakatagane se vakayalewa ka ra nanuma ni ra sa coriti tu ka lomaleqataka ni sega nodra tikina se na nodra vunilagi ena Lotu vakalesui mai nei Jisu Karisito.
Ni da qasenivuli, eda na gadreva me da kila se na vakacava beka na veika oqo vei ira na noda gonevuli. E dua na gonevuli ni semineri a vakamacalataka vaqo: “Na ivakaro sai koya mo lomana na wekamu, ia e vaka ni ra nanuma na tamata ni dodonu mo lomana na wekamu vakavo kevaka era veivinakati tiko vakatagane se vakayalewa. Na itukutuku cecere ni oqori na kena e ca duadua, ka vakavuna meu vakataroga na sala cava au rawa ni daumaka cake kina kei na sala cava e rawa ni lomani au kina na Tamada Vakalomalagi?”
Se cava ga na bolebole era sotava na gonevuli, eda gadreva me da vakarorogo me da rawa ni kila ka solia na veitokoni kei na loloma dina. Eda na gadreva me da taracake na valenivuli era taleitaki kina na taro ka veivosakitaki na leqa eso ena vakarokoroko kei na veiciqomi. E gadrevi me da vakavulica vakamatata na dina ka vukei ira na gonevuli yadua me ra kila ka vakadinadinataka na kedra ivakatakilakila tawamudu ni ra luvedrau na itubutubu dauloloma vakalomalagi.21 Ka gadrevi me da vukei ira na gonevuli me ra kila ni ra sega ni tu taudua. Ni levu cake noda loloma kei na veiciqomi ena sureta na Yalo Tabu, vakalevutaka na vuli, ka vakamamacataka na yalo mavoa.22
E vakavulica o Elder DallinH. Oaks:
“Sa noda itavi me da ‘veivuketaka na noda icolacola me mamada kina’ [Mosaia 18:8]. Eda sega ni rawa ni veisautaka na ivunau ni Turaga, eda vinakata me ra dau veinanumi na noda lewenilotu kei na noda lawatu ena vukudra era sotava tu na dredre ena vuku ni bula oqo.” E kaya talega ni “nodra sasaga na noda lewenilotu’ me ra veiciqomi, yalololoma ka veilomani vakalevu cake e dodonu me vakalevutaka na veirokorokovi kei na veiciqomi … [ka] vakalailaitaka na veicati kei na veiqati sa takalevu tu nikua. … Oqori dina na noda gagadre, ka da kerea na nodra veivuke na noda lewenilotu kei ira tale eso me da rawata kina.”23
Sa ka bibi sara me ra kila na qasenivuli yadua na ivunau, kila na veika era tukuna tiko na parofita ni Turaga ena gauna oqo me baleta na veiulutaga eso oqo, ka kila na sala me sotava kina ena veivuke kei na yalololoma.24 Keimami sa gagadre vakalevu sara me da toso ena veitikina oqo ka na soli tiko na ikuri ni veituberi kei na ivurevure eso me vukei kemuni.
Kevaka ena so na gauna e tukuni kina eso na ka mai vei iko se mai vei ira na gonevuli ka na vakavuna nona nanuma e dua ni sega ni taleitaki, e rawa ni o masuta na kaukauwa kei na kilaka ena ivakarau mo veivuke kina ena kena vakarubeci na liga ni veibeitaki? Vukei ira nomu gonevuli me ra nanuma ni o keda kece eda se tubu tiko ka gadreva na nona loloma cecere na iVakabula. O Lusefa sai koya a kilai me Dauveibeitaki, o koya ka “beitaki [keda] tiko ena mata ni noda Kalou ena siga kei na bogi.”25 Me vakatauvatani, kei na qeteqete ni ligana, na ligana taucoko, kei na loloma ni Turaga e se dodo tu ga.
E dua tale na itovo ni loloma vakalou sai koya na nona gagadre na Tamada mai Lomalagi me da yaco me vakataki Koya ka ciqoma na veivakalougatataki kece sara sa vakarautaka tu o Koya ena vukuda na Luvena.
Na Kalou na Tamada Vakalomalagi e cecere sara na veika e namaka.
A kaya o Elder D. Todd Christofferson: “Sa daunamaka na veika cecere na Tamada Vakalomalagi.”26 E sega vakadua ni soreva ena vukuda. E waraki keda ni da tarabe, vakanuinui ena vukuda ni da sa vinaka cake, ka vosota vakadede ni da sa tubu tiko. Na qasenivuli e lomani ira nona gonevuli sa tu talega nona nanamaki cecere ka na kauwaitaka vakalevu cake na nodra tubu vakayalo mai na itosotoso ni kalasi nikua se na nodra taleitaki koya na nona gonevuli.
A kauwaitaka vakatitobu o Jisu na nodra toso na Nona imuri.
[iyaloyalo ni Karisito ni laveta tiko e dua na tamata mai wai]
Me vaka, a raica vei Pita ko Jisu na veika e sega ni raica rawa vei koya. Ni tarabe o Pita, a laveti koya cake na iVakabula, ka vakanamata toka ga ena tamata ka na yaco o Pita me vaka.
Ni cecere ni veika eda namaka ena vakauqeti ira na gone me ra cakacaka ena vakabauta, ka na rawa kina me ra sotava na nona veivakalougatataki yalataki na Turaga. E vakavuvulitaka o Elder Neil L. Andersen ni gauna eda veiliutaki ka veivakavulici kina ni sega na loloma ka toka e ra na noda nanamaki, eda sa vakayaloqaqataka na gole tani. Na nanamaki cecere ka sega kina na loloma ena susuga na veisaqasaqa. Ni cecere na loloma ka toka e ra na nanamaki ena tara cake na yalo ni veitokani vakaisoqosoqo ia e lailai na toso. Ia, na loloma cecere kei na nanamaki cecere ena vakavuna na cakamana.27 Oqori na mataqali loloma e tu vua na iVakabula kei na mataqali loloma e dodonu me tu vei keda kevaka me da na vakavuna na veisau ena nodra bula na noda gonevuli.
Niu tarogi ira na gonevuli ni semineri kei na inisitute se sa vakalougatataki ira vakacava na nodra loloma na nodra qasenivuli, e totolo mai na kena isau ka vakasinaiti ena vakavinavinaka vei kemuni. Oqo e vica na kena ivakaraitaki ena dua na gauna walega qo.
E kaya e dua na goneyalewa, “Au dau taleitaka niu curu yani ki semineri ka raica nona matadredredre ni mamarau noqu qasenivuli. Au sega mada ga ni kila meu tukuna vakacava na levu ni ka sa cakava vei au na nona loloma. Ena dua na gauna lekaleka sa oti a vakacaucautaki, kau biuta mai na vale oya niu tovolea tiko meu kua ni tagi, a vakamarautaki au vakalevu. Me veivakacaucautaki oqo—e kena ibalebale, ni ulubale e caka tiko e veisiga—e vakavuna meu marau tiko e veisiga meu lako mai ki na semineri. Sa dau ilutua tu ni noqu veisiga. Na nona lomani au noqu qasenivuli sa vakavullici au meu lomani ira na tamata kecega me vaka ni ra luvena tagane se yalewa na Kalou.”
Meu kaya nona vosa e dua tale, “Sa veisautaki au sara ga na neitou kalasi nikua. Au a yaloqaqa meu taroga e dua na taro dredre me baleta na keda ivakatakilakila vakatagane se yalewa, a vakarorogo vakavinaka sara noqu qasenivuli ka tovolea me ciqoma na vanua au raica tiko yani. Ni taura na gauna me sauma noqu taro. Na veika e tukuna a dolava na mataqu ki na so na ka au sega ni se bau vakasamataka mada e liu.”
Kei na kena iotioti, a vola vaqo e dua na cauravou: “Au tekivutaka na iwasewase oqo ena dua na yaloca. Au sega ni kauwaitaka na kosipeli se o au, kau yawakalia sara mai na marau. Au tukuna vei rau noqu itubutubu niu sa vinakata meu biuta na semineri. Kau qai lako yani ki na kalasi. Au qai lakova na kalasi, e kila o qasenivuli na yacaqu niu se bera mada ga ni bau lakova vakadua. E vakarautaka sara ga na yalo ni neitou kalasi na draki vakayalo ni siga taucoko oya vei au, ka vinaka cake vakalailai na bula. Au veisautaka noqu itovo, tekivu lako wasoma ki lotu, wilika noqu ivolanikalou, ka tekivu vakasama. Ena vuku ni nona lomani keimami kei na kosipeli, kei na rarama i Karisito au raica vua, au sa vaqara na rarama oya kei na loloma. Au na taurivola ena semineri, laki kaulotu, ka vakamau ena valetabu ena dua na siga baleta ni a sureta na Yalo noqu qasenivuli ka veivakavulci vata kei Koya me nona itokani e veisiga.”
Meu tinia, au vinakata meu vakavoqataka noqu vakavinavinaka vua na Turaga kei kemuni. Au vakavinavinakataka na nona loloma rabailevu e veivanua kecega na Turaga. Au vakavinavinakataka na Nona vosota vakadede ena noqu segata meu vulica na veilesoni sara ga eda veivosakitaka tiko nikua. Na nona yalololoma sa vakavuna noqu vinakata meu vinaka cake. Kau vinakata mo ni kila na levu ni neimami lomani kemuni. Keimami vakadinadinataka na nomuni veiqaravi gugumatua vei ira o ni vakavulica ka vukea. Keimami kila na levu ni nomuni dau masulaki ira, na nomuni dau mosita ni ra sotava na dredre, kei na nomuni reki ni ra rawata na qaqa. Keimami kila ni ko ni dui colata tu na nomuni icolacola e veisiga ka vakararavi vua na Turaga me baleta Nona igu ena vukumuni kei na na nomuni matavuvale. Keimami nuitaka ni ko ni kila ni keimami masulaki kemuni ka keimami lomani kemuni.
Mo ni vukei ira yadua na gone me ra yaco me kila ka lomana na iVakabula ena nomu vukei ira me ra raici Koya, ena nodra vulica na ivolanikalou—kei iko. Na noqu masu sai koya me da yalovinaka, me da raica na tamata ka sega ni raica na leqa; ni da na dolele yani ka veivakalougatataki tikoga vei ira na luvena na Tamada Vakalomalagi; ni da na lokia na liga ni veibeitaki ka vukei ira na tamata kecega me ra vakila ni dua na nodra tikina kei na vunilagi ena Lotu ni Turaga; ni da na vakayaloqaqataki ira na noda gonevuli me ra muria na nona ivakavuvuli na iVakabula vakatisaipeli ni bula taucoko i Jisu Karisito, kukuva toka na salatu ni veiyalayalati me rawa ni ra ciqoma na veivakalougatataki kece sara e tu vei Tamada Vakalomalagi me baleti ira. Me da vukei ira me ra vakila ka vakararavi ki na loloma ni Tamada Vakalomalagi kei na Luvena ko Jisu Karisito. Ka mo ni kakua ni guilecava ni rawa ni laurai vei kemuni na “ivatuka kei Karisito. Ena inaki kilai kece sara, ena rumu ni vuli oya ena gauna oya kei na vosa oya vata kei na veivakauqeti oya, sai iko o Koya kei Koya o iko.”28
Ena yacai Jisu Karisito, emeni.
© 2019 mai na Intellectual Reserve, Inc. Dodonu kece e taqomaki. Na iLavelave: 2/19. iVakadewa ni “Above All Things.” Fijian. PD60009021 858