2:3

Ena Rarama ni Nona Loloma

Bonnie H. Cordon

Peresitedi Raraba ni Goneyalewa

Kakaburaki ni Veituberi ni iVakarau ni Vuli ni Lotu • 12 ni June, 2019 • Vale ni Valenivolavola ni Lotu iTabavale Liu

Kemuni na taciqu kei na ganequ, sa ka marautaki dina na mai tiko kei kemuni.

Eda sa kalougata sara na mai rogoca na vosa nei Brother Chad Webb. Sa ka talei dina na levu ni nona lomani keda na Turaga. Na iulutaga qo ni loloma e tiki talega ni nona vakanananu ni yaloi Brother Chadd Webb. E marautaki dina ni da na mai veitalanoataka tiko na veika oqo. Au gadreva ni na rawa ni da taura na gauna me da katona na veika eda vakauqeti kina ka o na ciqoma nikua ena iulutaga ni loloma.

Au via vakaraitaka na noqu vakavinavinaka vei Elder Kim B. Clark kei Brother Chad Webb ena nodrau muria na kaci ni Yalotabu ena vakamamasu dei me vakaukauwataki ira na itabagone. Ena gauna eda sa ciqoma kina na ivakavuvuli ni kosipeli me iusutu ni vuvale erau a taroga na veitacini oqo, “Ena rawa vakacava ni ra iyaragi lelevu cake na itabagone ni vakaukauwataki ni matavuvale?” O ni sa kila na ka ea yaco tarava. Erau a cakacaka ena tinikadua na duidui ituvatuva ni vuli e vuravura me veiuturitaka na ka ni vuli ni semineri kei na ivola ni ivolanikalou ka vakayagataki e veiyabaki ena lewenivuli ni Lako Mai Mo Muri Au. Na veisau vakauqeti oqo e sega ni lailai sobu mai na cakacaka mana!

Au marau niu raitayaloyalotaka ni ra kauta mai na itabagone kei na itabagone qasecake na dina vakosipeli mai na kalasi ki na nodra vale. Era na rawata na lomadei ena vu ruarua ni nodra kila matata kei na nodra kato ni wasea na kosipeli. Ni ra rogoca tiko na domodra vakai ira ni ra tukuna na dina ni iVakabula ena dau ka sotavi kaukauwa tu ga ni buli ivakadinadina.

Au matalau dina ena vakalesui tiko ga mai ni kosipeli kei na gauna lagilagi ni tubu oqo.

Au via dolele ena vakavinavinaka vei rau na watidrau kei ira eso tale ka tokoni rau na qasenivuli veivakurabuitaki oqo; vei kemuni ka rogoca na vakasama ni lesoni, ka wasei na nomuni italanoa yadudua (nuitaki ni sa vakadonui), kei kemuni ka yanaraki nomuni valenikuro kei na qaraji me kunei na iyaya ni lesoni. Au nuitaka ni o ni na sega ni beca na nomuni veivakayarayarataki.

E sa dau tukuni ni, “Vakawati e ituvaki tawa levei rawa duadua … ni veivakavulici.… Ni ra vakawati na tamata, ena dua na yasana, era sa vakadonuya tiko mera vuli mai vei ira yadudua.”¹ Na watiqu o Derek, e noqu itokani nuitaki vinaka duadua, dina ga ni sega ni dau tiko e yasaqu ena veimadigi ni veivakavulici. Ni dou sa vuli ka veivakasalataki vata, na itabagone qasecake, itabagone, kei ira na nodra matavuvale era na vakalougatataki baleta na nomu veivakayarayarataki. Ko ni sa tiki bibi ni cakacaka levu oqo.

Na noqu itukutuku nikua e tekivu mai na dua na iyatu mai na dua na sere kilai ni Lalai. Au sa na tekivuna, ka o ni na vakacavara. “Tuberi au ”

“ ena nona loloma.”

“Tuberi au e nona loloma.”² Na ivakavuvuli e rua oqo, na rarama kei na loloma, sa noqu itokani vaka vakasama ena gauna ni noqu veilakoyaki niu vakasamataka vakatitobu na nodatou gauna vata. Na semati ni veivosa oqo e laurai talega ena imatai ni iyatu ni vosa mai vei Peresitedi Henry B. Eyring; ea kaya, “Na noqu vakanuinui vei keda nikua me da vakila kece na loloma kei na rarama mai vua na Kalou.”³ Oqo e gagadre rawarawa ka kaukauwa me tekivu kina na kalasi. Sa noqu vakanuinui ni gonevuli kece ena vakila na loloma kei na rarama mai vua na Kalou. Na yalayala tawamudu lelevu e sa maroroi me nodra kei na nodra matavuvale ni ra vuli mera vakila na Nona rarama kei na loloma.

Au a tarogi, Dallin, na luvequ tagane, “Na ka cava levu ko a vulica mai na semineri?” Au a namaka na isaunitaro me vaka na Rawata na iVakavuvuli se vakaotiya na iVola i Momani. Au a kurabui niu rogoca na isau vakasamataki matua.

“O ira na qasenivuli.”

“O ira na qasenivuli?” Au taroga yani.

Ea vakamacalataka, “Eso vei ira na qasenivuli e rawa ni keimami kila ni ra lomani keimami dina.”

Na ka sotavi oqo e vakadeitaka vei au na tau bibi ni loloma ki na loma yadudua.

E sa nomuni na reki ni vakatavulica na itabagone kei na itabagone qasecake matalia ena Lotu kei na vakadinadinataki ni loloma ni Kalou vei ira. Au lomani ira, kau kila ni ko ni vakatale ga kina. E sai ira dina ka a kaya vaka kina ko Peresitedi Russell M. Nelson, era nona na Tamada Vakalomalagi “na yalo vakaturaga duadua … Na Nona timi vakasakitiduadua—[tu wawa] baleta na iotioti ni tabana oqo.”⁴

Ena vica na yabaki sa oti, au a dau tiko ena kemuni maliwa ni veivakavulici. E sa tu vei au na loloma ena vukumuni kau kila vakalailai na nomuni itavi. Ena 2008, au a kacivi meu qasenivuli ni semineri mataka e Utah. Ena nona kacivi au na peresitedi ni iteki, au vakasamataka, “e sega beka ni ra tu e Utah na qasenivuli tudei?” E vinaka, niu a sega ni tukuna na noqu vakasama, ka sa mai tu vei au e dua na itui ki kei na itavi meu dolava na vale ni semineri ena 5:45 ena veimataka. Meu bau kaya mada, e Utah na vulaililiwa e batabata ena 5:45 ena mataka.

Ena noqu gauna ni veivakavulici ena semineri, e sa vakadeitaki vei au na levu ni loloma ni Turaga vei ira yadua na gone vuli. Au raica na kalougata vei ira eso na itabagone ka nodra na itubutubu lomadina, dau loloma. Ea tuburi au talega na vakila e vukudra na itabagone ka ra sega ni sotava na loloma kei na kauwaitaki era gadreva ka tagica vakabibi. Eda kunea na gagano vata vei ira na itabagone qasecake.

Au kidava ni dua na ivakarau bibi duadua ni qasenivuli oya na nona rawata me loloma—na loloma ka a cavuta ko Joni: “Oi kemudou sa lomani, meda veilomani, ni sa mai vua na Kalou na loloma; ia ko koya yadua sa dauloloma, sa vakasucumi koya na Kalou, a sa kila na Kalou ko koya. O koya sa sega ni dauloloma, sa sega ni kila na Kalou; ni sa loloma na Kalou.”⁵

Ni da qasenivuli, e noda itavi levu sai koya meda vakalevutaka cake na noda lomana na Kalou ka qai wasea na loloma ni Kalou vei ira na itabagone kei na itabagone qase cake eda sa kacivi meda vakatavulica.

Sa tu na kaukauwa vakaitamera ena loloma ni Kalou. Au via vakasamataka na loloma oqo ena tolu na matana duidui: na loloma ena noda bula, na loloma e vale, kei na loloma ena kalasi.

A imatai, na kaukauwa ni loloma e noda bula yadua. E sa yaga dina meda vakabauta ka nuitaka ni Kalou e lomani keda. Ko ira na noda gonevuli era na sega ni vakila na loloma ni Kalou mai vei keda vakavo ga keda vakila na loloma ni Turaga e lomada. Au qoroqoro ena tiki ni ivolanikalou oqo: “Sa vakaoqo na nona lomani ira na kai vuravua na Kalou me solia kina na Luvena e dua bauga sa vakatubura.”⁶ Eda vakananuma ka vakila li na vakaitamera ni loloma oqo? Ena so na gauna au dau lialiaci ke da sa vakasaqara vakarauta tiko beka meda vakila na loloma koya. Eda sa kila tiko beka ko cei koi keda ka da nei cei?⁷ Au sureti kemuni moni kerei Koya ena masu yalomalumalumu, lomadina mo ni vukei me vakila Nona loloma vakalou vei kemuni.

Me baleta ni vuravura e veivakacacani, veivakawelei, ka sugusugu, e rawa ni yaco me rawarawa na vakalaiva ka solia lecaika na vakatulewa. E ka yaga dina meda taura matua na Nona ivua vei keda⁸ ka segata meda vakila na Nona loloma. Ni da cakava na sasaga oqo, ena sovaraka mai o Koya na Nona loloma me sinai vakalevu.

Ai karua, na loloma ni Kalou e dodonu me tu ena noda veivale. Meu bau vakaraitaka na ivakavuvuli oqo ena dua na italanoa. Ena dua na yakavi keirau a duidui rai baleta e dua na ka kei Derek, na watiqu. Keirau laki moce yani ka sega ni walia; ia au a kila niu dina tiko.

Ena mataka ka tarava, au a tekiduru me masu, ka kerea me vakasinaiti ena Yalotabu niu vakavakarau vakatavulica noqu kalasi ni semineri. Au vakatakekere mera vakila na itabagone na loloma ni Turaga mai vei au. Niu sa vakavakarau tiko ena vuku ni siga, ea lesu vakavuqa noqu vakasama ki na veisei ena bogi e liu. Niu vodo ena motoka e levu na lomaqu niu kila niu dina, au vakadonuya niu rawa ga ni vakatavuvuli ka loloma ena Yalotabu. Au kerekere tikoga meu tuberi vakalou niu draiva tiko ki vale ni semineri. Ena balavu ni sala, ni votu mamaca tiko na noqu veivakadonui vakai au, au tovolea tiko ga meu vakadromuca na domo gatagata ni Yalotabu. Ia e veitalia ga ni vaka na vatu dei na noqu veivakadonui, ea vakasolokakana tiko mai na Yalotabu, “Lesu tale. Ka kere veivosoti. E sega ni bibi se ko cei e dina; veivutuni ka cakava me donu.”

“Vinaka!” Oti au a qai veisau vuturi kau vukica lesu na motoka. Au curu yani ki na rumu ni moce, au wilika na kaloko ni sa 5:20 ena mataka kau raica ni se moce tu na noqu Derek lomani. Ea malumu vakamalua na yaloqu niu yaqa yani. “Derek, vosoti au baleta na bogi ena noa.” Na veika oqo e matau vei Derek, e kaya mai vakamalua o koya, “Au sa veivosoti kau sa guilecava.” Sa vuabale na yaloqu ena loloma, kau vakila na yalo loloma levu ni Turaga.

Ea vakasinaiti ena loloma kei na Yalotabu na kalasi ena siga koya. Na loloma e noda vale e tatara me sivia na noda lalaga.

Ai Katolu, ko ira na qasenivuli ni semineri kei na inisitute e nodra na madigi uasivi me ra wasea na loloma ni Kalou. Na nomu kalasi e dua na madigi mo lomana na dua. Au a sega ni vakatavulica e 34; au vakatavulica e 34 na dua. Au nanuma ni oqo na loloma e vakila na luvequ o Dallin—ka sega ni ioloolo ni loloma me baeta na kalasi taucoko, ia e dua na vakila ni kilai ka lomani yadudua. Ni sa vaka oya na loloma nei Tamada Vakalomalagi. Meda lomani ira dina na noda gonevuli, e dodonu meda raici ira me vaka e raici ira na iVakabula. Na cava e lomana o Koya me baleti ira yadua? Nai solisoli cava so esa solia vei ira o Koya? Na icavacava cava e raica o Koya vei ira? Ni da lomani ira sara vakaidina, eda na kauti ira mai vua na iVakabula.

Ena gauna eda nanuma kina ni o Karisito e ivurevure ni loloma kecega, eda na lako Vua meda vakila na vakatuburi ni loloma ena noda bula yadudua, e noda vale, kei na noda kalasi. E sega ni rawa ni da bulia na loloma—e lako duadua ga mai Vua ka curumi keda. Ena Moronai, eda vakatavulici meda “masuta na Tamada ena yalomudou taucoko me vakasinaiti kemudou ena loloma oqo, ka sa solia vei ira era sa muria na Luvena ko Jisu Karisito ena yalodina.”⁹ Sa noqu masu ni da na ciqoma yadudua na veisureti nei Moronai.

Na veisureti nei Peresitedi Eyring oya meda vakila ruarua na “loloma kei na rarama mai vua na Kalou.”¹⁰ Ena rawarawa ni da vakasamataka vata na loloma kei na rarama ni da nanuma ni o Koya e sega walega ni ivurevure ni loloma kecega, sai Koya na rarama. E a vakadinadinataka vakai koya o Jisu Karisito, “Koi Au na rarama kei na vu-ni-bula kei vuravura.”¹¹ Ni da toso voleka yani Vua, ena vakatakila o Koya e levu cake na rarama, kei na loloma vei keda.

Meda raica lesu vakalekaleka na tolu na tikina ni loloma ka da veitalanoa kina ka vakasamataka na revurevu ruarua ni loloma kei na rarama:

Ni ko sa vakila na loloma ni Kalou ena nomu bula vakai iko, na rarama cava e sa votu mai? Na raivotu kei na raimailoma cava e tuburi iko vakai iko?
Na tubu cava e sa yaco ki na nomu vakawati kei na nomu matavuvale ni ko sa vakila na loloma ni Kalou ka sotava na vakalevutaki ni rarama?
Ena nomu rumu ni kalasi, ni ra sa vakila na gonevuli na loloma ni Kalou mai vei iko, na rarama cava ena lako mai ki nodra bula? Era na tubu ka veisau vakacava?
Na butobuto cava ena seavu ni ra sa raica ka vakasaqara vakai ira na rarama?

Dodonu vakalawa Simon Dewey 2019 Veivakadonui Altus Fine Art

E qai kurabuitaki li ni noda parofita, o Peresitedi Russell M. Nelson, e sa sureti keda meda “vakatubura na [noda] rawaka vakayalo meda ciqoma na ivakatakila.”¹² Ni da vakila na loloma ni Kalou, eda na vakasinaiti ena Nona rarama kei na inuinui. Ni da vakasaqara na rarama ni Kalou, eda na vakila na Nona loloma vakaitamera. Sa dua na isema cakacaka yaco levu.

Na noqu ka sotavi vakamataka caca e yaco kei na dua na tamata lomadina e yacana ko John Lund. Na tuwawa vakayalo (ka vakayago) oqo e vakatavulici au ena so na ka baleta na veitokani ni loloma kei na rarama. Meu wasea mada kei kemuni e rua na italanoa, kei na rua na ivakaraitaki vei kemuni.

E dua na gonevuli ni mataka lailai e dau itovo veibolei toka. Na noqu ivukivuki meu vakaceba cake na mataqu. E digia me loloma ka vakasaqara na rarama, o John. Ni keirau sota me veitalanoa baleta na gone koya, ea tekivu ko John ni a kaya, “Au a masu tiko ena vukuna ena bogi.” Ni dolava wale tu na veitalanoa vaka oya, e vakavuna meu tu vakadua. E kauta mai ko John na yaca ni cauravou oqo ki nona vale, ka sinai tu kina na loloma, ka tarogi Tamada Vakalomalagi ena kilai koya vinaka cake vakacava ka raica matata na gonevuli oqo. Meda na lomani ira noda gonevuli, vakabibi meda lomani ira me vaka e vakayacora na Turaga, e gadreva na vakasaqarai kei na yavala ena vuku ni ivakatakila.

Au na wasea na ikarua ni italanoa ena vosa i John:

“Na Turaga e kilai ira dina tiko na noda gonevuli. Au nanuma tiko e dua na cauravou ka a sota dredre tiko. Au vosota voli nona veisavosa me vica vata na vula, ka dina ga, e gone mosi.

“Au a vakarautaka e dua na lesoni, kau marautaka vakalevu na kena sa yaco vata mai na ka kece. Au sa kunea mada ga e dua na lesoni ivakaraitaki ka na itukutuku. Niu a yaco yani ki na vale ni semineri ea biligi au na Yalotabu, ka kaya, ‘John e dodonu mo vakatavuvuli baleta na masu.’ Masu? Au vinakata sara ga meu vakavulica na noqu lesoni taleitaki. Ea sega ni tiko vei au e dua na lesoni vakarautaki baleta na masu.

“Au duri e mata ni kalasi ka kaya, ‘Au sega ni kila o cei e gadreva qo nikua, ia au na veisautaka na lesoni. E dua na e loma ni rumu oqo e gadreva meda veitalanoataka kece baleta na masu.’ Na lesoni rawarawa oqo e tekivu ena dua na taro, ‘Na cava eda gadreva kina na masu?’”

Ena bogi oya ea dua na tukituki e lako mai kina ki na katuba nei John. Ena nona matanikatuba sa duri tu kina e dua ka qai wasea na ivakaoti ni talanoa. Na bogi ni siga kadua, a ciqoma mai vei nona itau na gonevuli nei John ka sotava tiko na dredre—e kerei koya me masulaka me kila kevaka e dina na Lotu. Nona veisureti, ni sala vata kei na lesoni sega ni namaki nei Brother Lund me baleta na masu, sa vakavuna me cakacaka kina na gonetagane oqo. E yaco na gauna ea vakadinadinataka o John na veisau vei koya nona gonevuli ni sa tubu nona ivakadinadina baleta na kosipeli vakalesui ka yaco sara me vauci e valetabu kei nona itau lomadina ka veivakayaloqaqataki.

E vakavudua sara noda vulica se lako mai vakacava na veivakayarayarataki vaka oya, ia kevaka eda lomadei ena loloma ni Turaga vei ira noda gonevuli, e rawa ni da cakacaka ena ivakatakila kaukauwa, ka da wasea Nona rarama vei ira Nona gone lomani.

Ni da vakasaqara na ivakatakila meda loloma me vaka na Kalou, eda na tuberi meda tarai ka vakatavulici ira na gonevuli yadudua. Ia na vuana e taukeni yadudua sara. Na Turaga e vakaraitaka na veitorovi yadua oqo vei Nifai ni a segata me taura na peleti. Ea tukuna o Nifai, “A sa liutaki au tiko na Yalo, ka’u a sega ni kila rawa tiko yani na ka me’u na cakava. Ia au sa lako ga yani.”¹³

Sa vakarau tu ko Lepani me vakamatei Nifai

E tu o Lepani e tadrua kei Nifai kei na peleti. Ea vakaroti Nifai na Turaga me vakamatei Lepani. Ea talairawarawa, ena yaluma levu. Ena bogi talega oya ea tu kina o Soramu ena tadrua kei Nifai kei na peleti. Ia ka cava ga e sega ni vakayacora kina na ivakatakila vata ga vei Soramu ka a ciqoma e vukui Lepani? Na cava ea sega ni ucuna vakarua kina o Nifai na iselewau?

Na Turaga e kilai Soramu, ka kila na Turaga ko Nifai ka ravita na veidusimaki ni Yalotabu. Na Turaga e kila ni ko Soramu ena yaco me “itokani dina vei … Nifai.”¹⁴ E sega li ni da vakavinavinaka ni ena itekitekivu, ea vakasaqara o Nifai na ivakatakila yadua ka a “liutaki mai na Yalo.”¹⁵

Ni ko qasenivuli, e rawa ni vuturitaki na kauta tiko na itavi me vakila na loloma ni Kalou vei ira yadua na gonevuli ka ciqoma na ivakatakila me na vukei vakacava na tamata yadua. Ena veivakacegui me vakasamataki na noda ilesilesi kei na itavi ni da veitokani kei Karisito.

Ea sureti keda o Elder Jeffrey R. Holland: meda “sa veiqaravi veitauriliga kei na Turaga ni were ni vaini, solia vua na Kalou na Tamada kece sara na liga ni veivuke ena Nona itavi veivakaocai ni saumi ni masu, veivakacegui, qusi wai ni mata, ka vaqaqacotaka na duru malumalumu. Kevaka eda cakava oya, eda na vaka na tisaipeli dina [ka qasenivuli] i Karisito sa nakiti meda vakakina.”¹⁶

O ira noda itabagone kei na itabagone qasecake era gadreva mera vakila, kila, ka mai nuitaka na loloma kei na rarama ni Turaga. Ni ko vakatara, na loloma ni iVakabula ena vure mai vei iko. Ia ni ra vakila na nomu gonevuli na Nona loloma, era na mai raica ka ciqoma na ivakatakila yadudua. Era na kunea na ibalebale ni “lako ena rarama ni nona loloma.”¹⁷ Na loloma kei na rarama oqo ena vukei ira mera yaco mera vaka na Tamada mai lomalagi kei na noda iVakabula lomani ka lakova na sala ni veiyalayalati lesu vei Rau. Au sa vakadinadinataka oqo ena yaca i Jisu Karisito, emeni.