អំណាចនៃវិវរណៈផ្ទាល់ខ្លួន

អែលឌើរ គីម ប៊ី ក្លាក

នៃពួកចិតសិបនាក់

ការចាក់ផ្សាយរបស់ប្រព័ន្ធអប់រំសាសនាចក្រ ឆ្នាំ ២០១៩ • ថ្ងៃទី ១២ ខែ មិថុនា ឆ្នាំ ២០១៩ • សាលប្រជុំនៃអគារការិយាល័យសាសនាចក្រជាន់ផ្ទាល់ដី

មុននឹងខ្ញុំចាប់ផ្ដើមសុន្ទរកថារបស់ខ្ញុំថ្ងៃនេះ ខ្ញុំសូមបង្ហាញនូវការដឹងគុណ និងក្ដីស្រឡាញ់របស់ខ្ញុំចំពោះបងប្អូន ។ វាជាអំណរមួយក្នុងការចូលរួមជាមួយនឹងបងប្អូននៅក្នុងកិច្ចការដ៏អស្ចារ្យជួយដល់ជំនាន់ដែលកំពុងធំឡើង ឲ្យរៀនកាន់តែជ្រៅជ្រះពីដំណឹងល្អរបស់ព្រះយេស៊ូវគ្រីស្ទ ។ ខ្ញុំស្រឡាញ់បងប្អូន ហើយអធិស្ឋានសូមឲ្យពរជ័យរបស់ព្រះអម្ចាស់មានដល់បងប្អូន និងគ្រួសារបងប្អូន ។

ថ្ងៃនេះ ខ្ញុំចង់និយាយអំពីគំរូបីនៃវិវរណៈផ្ទាល់ខ្លួននៅក្នុងព្រះគម្ពីរមរមន ៖

ទីមួយ បញ្ជីពិសិដ្ឋទាំងឡាយដែលថ្លែងទីបន្ទាល់អំពីព្រះយេស៊ូវគ្រីស្ទ និងផែនការរបស់ព្រះវរបិតា ។ ទីពីរ ទីបន្ទាល់របស់ព្រះវិញ្ញាណបរិសុទ្ធដែលពង្រឹងដល់សេចក្ដីជំនឿលើព្រះយេស៊ូវគ្រីស្ទ និងធ្វើឲ្យមានការប្រែចិត្តជឿកាន់តែជ្រាលជ្រៅទៅលើទ្រង់ ។ ទីបី ពួកព្យាការីនៅរស់ដែលថ្លែងទីបន្ទាល់អំពីព្រះយេស៊ូវគ្រីស្ទ ហើយក្រោកឡើងប្រឆាំងនឹងការណ៍អាក្រក់ ។

គំរូទាំងនេះត្រូវបានបង្ហាញយ៉ាងជាក់ច្បាស់ និងប្រកបដោយអំណាចនៅក្នុងព្រះគម្ពីរមរមន ព្រោះគំរូទាំងនេះសំខាន់ណាស់—ថែមទាំងចាំបាច់ផង—ដល់ការបង្កើនជំនឿលើព្រះយេស៊ូវគ្រីស្ទ និងការធ្វើឲ្យការប្រែចិត្តជឿលើទ្រង់កាន់តែជ្រាលជ្រៅនៅក្នុងជំនាន់របស់យើង ។^១

យើងរស់នៅក្នុងជំនាន់មួយដែលបុរស និងស្ត្រីទុច្ចរិត ហើយដើរផ្លូវខុសកំពុងតែធ្វើអ្វីៗគ្រប់យ៉ាងដែលពួកគេអាចធ្វើបាន ដើម្បីបញ្ចុះបញ្ចូលជំនាន់ដែលកំពុងធំឡើងឲ្យជឿថា ការណ៍ល្អជាការណ៍អាក្រក់ ហើយការណ៍អាក្រក់ជាការណ៍ល្អវិញ ។ ពួកគេប្រើវិធីសាស្ត្រដូចជា សេរេម នីហូរ និងកូរីហូរ នៅក្នុងព្រះគម្ពីរមរមន—ការប្រកែកដ៏ប៉ិនប្រសព្វ គំនិតបញ្ជោរ ព្រមទាំងស្លាកសញ្ញា និងរូបភាពដែលបានរចនាយ៉ាងប្រុងប្រយ័ត្ន—ដើម្បីបង្កើតគោលលទ្ធិក្លែងក្លាយអំពីទំនាក់ទំនងរបស់យើងនឹងព្រះ ក្ដីស្រឡាញ់ ការអត់ធ្មត់ អាពាហ៍ពិពាហ៍ អត្តសញ្ញាណដ៏អស់កល្ប ក្រុមគ្រួសារ និងអ្វីៗជាច្រើនទៀត ។ មនោគមវិជ្ជា និងគោលលទ្ធិរបស់មនុស្សទាំងនេះជាច្រើនមាននូវ « ឫកពាជាអ្នកគោរពប្រតិបត្តិដល់ព្រះ ប៉ុន្តែ [ ពួកគេទាំងអស់គ្នា ] មិនព្រមទទួលស្គាល់ព្រះចេស្ដា ដែលមកដោយការគោរព ប្រតិបត្តិនោះទេ » ។^២

សិស្សរបស់យើងប្រឈមមុខនឹងសារដំណឹងបែបនេះគ្រប់នាទីជារៀងរាល់ថ្ងៃ ហើយពួកគេត្រូវការវិវរណៈផ្ទាល់ខ្លួនដើម្បីពង្រឹងជំនឿរបស់ពួកគេលើព្រះយេស៊ូវគ្រីស្ទ និងធ្វើឲ្យការប្រែចិត្តជឿរបស់ពួកគេលើទ្រង់កាន់តែជ្រាលជ្រៅ ។ ខ្ញុំសង្ឃឹម ហើយអធិស្ឋានថា បងប្អូននឹងធ្វើអ្វីៗគ្រប់យ៉ាងនៅក្នុងអំណាចរបស់បងប្អូន ដើម្បីជួយសិស្សរបស់យើងឲ្យរៀនពីគំរូនៃវិវរណៈផ្ទាល់ខ្លួនទាំងនេះឲ្យបានជ្រៅជ្រះ ។

បញ្ជីពិសិដ្ឋទាំងឡាយថ្លែងទីបន្ទាល់អំពីព្រះយេស៊ូវគ្រីស្ទ

ខ្ញុំចាប់ផ្ដើមនឹងបញ្ជីពិសិដ្ឋដែលថ្លែងទីបន្ទាល់អំពីព្រះយេស៊ូវគ្រីស្ទ ។ នេះជាប្រធានបទដែលមានពេញក្នុងព្រះគម្ពីរមរមន ។ វាបានចាប់ផ្ដើមជាមួយនឹងផ្ទាំងលង្ហិន ។^៣

បទពិសោធន៍របស់នីហ្វៃជាមួយនឹងឡាបាន់ គឺជាព្រឹត្តិការណ៍ទើបចាប់ផ្ដើមមួយនៅក្នុងជីវិតលោក ។ នីហ្វៃបានរៀនថាបញ្ជីទាំងនោះសំខាន់យ៉ាងណាចំពោះលោក និងគ្រួសារលោក ៖ « នេះគឺជាប្រាជ្ញានៅក្នុងព្រះ ដែលយើងត្រូវតែយកបញ្ជីទាំងនេះមកឲ្យបាន ដើម្បីឲ្យយើងអាចថែរក្សានូវភាសារបស់ពួកអយ្យកោយើង ... ហើយក៏ដើម្បីឲ្យយើងអាចរក្សានូវពាក្យពេចន៍ទាំងឡាយ ដែលបានពោលដោយមាត់នៃគ្រប់ទាំងពួកព្យាការីដ៏បរិសុទ្ធ » ។^៤

ផ្ទាំងលង្ហិនមាននូវឥទ្ធិពលយ៉ាងជ្រាលជ្រៅលើការអភិវឌ្ឍខាងវិញ្ញាណ ខាងសាសនា និងខាងសង្គមរបស់ប្រជាជននីហ្វៃ ។ ផ្ទាំងទាំងនោះបានក្លាយជាប្រភពនៃវិវរណៈផ្ទាល់ខ្លួន និងជាការព្យាករដ៏រុងរឿងនៃការយាងមករបស់ព្រះរាជបុត្រានៃព្រះ ជាព្រះដ៏បរិសុទ្ធនៃសាសន៍អ៊ីស្រាអែល ។ វាក៏បានថ្លែងនូវទីបន្ទាល់ដ៏មានអានុភាពអំពីផែនការដ៏អស្ចារ្យនៃសេចក្ដីសង្គ្រោះរបស់ព្រះវរបិតាផងដែរ ។ ព្យាការីដ៏បរិសុទ្ធទាំងឡាយនៅក្នុងផ្ទាំងលង្ហិនបានថ្លែងទីបន្ទាល់ថា ព្រះមែស៊ីនឹងធ្វើដង្វាយធួនសម្រាប់អំពើបាបនៃពិភពលោក រងទុក្ខ ហើយសុគត និងមានព្រះជន្មរស់ឡើងវិញដោយឈ្នះលើអំពើបាប និងក្ដីស្លាប់ ។^៥

ផ្ទាំងលង្ហិនក៏មាននូវសេចក្ដីសញ្ញាទាំងឡាយរបស់ព្រះវរបិតាជាមួយនឹងអ័ប្រាហាំ ព្រមទាំងវង្សអ៊ីស្រាអែលទាំងអស់ផងដែរ ។ លីហៃបានរកឃើញថា លោកជាពូជពង្សរបស់យ៉ូសែប ហើយថាពូជពង្សរបស់លោកនឹងជាកូនចៅនៃសេចក្ដីសញ្ញា គ្រងមរតកនៃសេចក្ដីសន្យាទាំងអស់ដែលព្រះបានធ្វើជាមួយនឹងអ័ប្រាហាំ រួមទាំងការប្រមូលផ្ដុំអ៊ីស្រាអែលនៅថ្ងៃចុងក្រោយផងដែរ ។

លីហៃបានប្រើផ្ទាំងលង្ហិនដើម្បីបង្រៀនកូនចៅលោកអំពីព្រះអង្គសង្គ្រោះ និងសេចក្ដីសញ្ញាដែលព្រះវរបិតាបានធ្វើជាមួយនឹងវង្សអ៊ីស្រាអែល ។ នីហ្វៃ និងប្អូនប្រុសលោកគឺយ៉ាកុប បានបន្តអនុវត្ត ហើយក្រោយមកបានបន្ថែមបញ្ជីរបស់ពួកលោកផ្ទាល់តាមបញ្ជាពីព្រះអម្ចាស់ ។^៦ នីហ្វៃពិតជាបានប្រែចិត្តជឿដល់សារៈសំខាន់នៃការរក្សាបញ្ជីជាអចិន្ត្រៃយ៍ ជាពិសេសអ្វីដែលពិសិដ្ឋ ។^៧

ចេញពីគ្រឹះនៃជំនាន់មុនៗនៅក្នុងដែនដីសន្យា នោះប្រជាជននីហ្វៃបានអភិវឌ្ឍនូវវប្បធម៌មួយដែលបានចែងថា ការរក្សាទុក អាន និងបង្រៀនចេញពីបញ្ជីពិសិដ្ឋ ជាការទទួលខុសត្រូវមួយដ៏ខ្ពស់ និងបរិសុទ្ធ ។ ជាមួយនឹងសេចក្ដីជំនឿលើព្រះយេស៊ូវគ្រីស្ទ និងការតាំងចិត្តស្រឡាញ់ និងថែរក្សាព្រះបន្ទូលរបស់ទ្រង់ នោះប្រជាជននីហ្វៃបានក្លាយជាសង្គមមួយនៃអ្នករក្សាទុក អ្នកអាន និងអ្នកបង្រៀនបញ្ជីដ៏ពិសិដ្ឋ ។^៨ បញ្ជីជាផ្លូវការទាំងឡាយត្រូវបានរក្សាទុកនៅក្នុងផ្ទាំងទាំងឡាយ តែយូរៗទៅ ប្រជាជននីហ្វៃបានអភិវឌ្ឍប្រព័ន្ធបោះពុម្ពមួយដើម្បីឲ្យបញ្ជីពិសិដ្ឋទាំងឡាយអាចថតចម្លងបាន និងសរសេរបាននៅលើផ្ទាំងដែលស្រាលជាង ហើយផ្សព្វផ្សាយបានទូលំទូលាយជាង ។^៩

ការផ្សព្វផ្សាយទូលំទូលាយពីបញ្ជីពិសិដ្ឋទាំងឡាយ ធ្វើឲ្យឪពុកម្ដាយមានលទ្ធភាពបង្រៀនដល់កូនៗពួកគេនូវបទបញ្ញត្តិរបស់ព្រះអម្ចាស់ និងអាចឲ្យកូនៗពួកគេបង្រៀនកូនៗពួកគេតទៀតជាច្រើនសតវត្ស ។^១០ ពួកអ្នកផ្សព្វផ្សាយសាសនា ដូចជាបុត្រាទាំងឡាយរបស់ម៉ូសាយ អាចយកបញ្ជីទាំងនោះជាមួយពួកគេ ហើយប្រើវាដើម្បីបង្រៀនដល់ពួកលេមិនដោយទទួលបានលទ្ធផលដ៏ប្រសើរ ។^១១ ដូចអាលម៉ាបានបង្រៀនហេលេមិន បញ្ជីពិសិដ្ឋទាំងឡាយបង្កើតនូវបទពិសោធន៍ប្រកបដោយវិវរណៈមួយដែល « ពង្រីកស្មារតីរបស់ប្រជាជននេះ មែនហើយ ... បាននាំ [ ពួកលេមិនរាប់ពាន់នាក់ ] ឲ្យស្គាល់ព្រះអម្ចាស់ជាព្រះរបស់គេ ហើយដើម្បីអររីករាយនៅក្នុងព្រះយេស៊ូវគ្រីស្ទ ជាព្រះដ៏ប្រោសលោះរបស់គេ » ។^១២

ការរីករាយនេះបានទៅដល់កម្រិតខ្ពស់មួយពេលដែលព្រះអង្គសង្គ្រោះដែលមានព្រះជន្មរស់ឡើងវិញបានយាងមកជួបប្រជាជននៅព្រះវិហារបរិសុទ្ធនៅដែនដីបរិបូរណ៍ ។^១៣ យើងមាននូវសាក្សីដ៏អស្ចារ្យ គួរឱ្យទាក់ទាញទាំងនេះអំពីពលិកម្មធួន និងការមានព្រះជន្មរស់ឡើងវិញដ៏រុងរឿងរបស់ព្រះគ្រីស្ទដ៏មានព្រះជន្មរស់នៅក្នុងព្រះគម្ពីរមរមននៅសព្វថ្ងៃនេះ តាមរយៈព្រះគុណ អំណោយ និងព្រះចេស្ដានៃព្រះ ។^១៤ ដូចពួកសាសន៍នីហ្វៃដែរ និងដោយសារពួកគេ យើងមាននូវបញ្ជីពិសិដ្ឋទាំងឡាយដែលថ្លែងទីបន្ទាល់អំពីព្រះយេស៊ូវគ្រីស្ទ និងផែនការនៃសេចក្ដីសង្គ្រោះរបស់ព្រះវរបិតា ។ ដូចអាលម៉ាបានព្យាករដល់កូនប្រុសលោកគឺហេលេមិនជាយូរលង់មកហើយ ព្រះអម្ចាស់« [បាន]ថែរក្សាវត្ថុទាំងនេះ សម្រាប់ប្រយោជន៍ដ៏វាងវៃមួយដែលនៅក្នុងទ្រង់ ដើម្បីទ្រង់អាចបង្ហាញព្រះចេស្ដារបស់ទ្រង់ដល់ពួកជំនាន់ក្រោយ » ។^១៥

ជំនាន់ក្រោយនោះគឺពេលឥឡូវនេះឯង ។ ព្រះអម្ចាស់កំពុងបង្ហាញព្រះចេស្ដារបស់ទ្រង់ដល់ជំនាន់ដែលកំពុងធំឡើងនៅក្នុងរបៀបដ៏អស្ចារ្យមួយ ។ ពេលយើងបង្រៀនដំណឹងល្អដ៏ពេញលេញរបស់ព្រះយេស៊ូវគ្រីស្ទនៅក្នុងព្រះគម្ពីរមរមន សិស្សរបស់យើងអាចទទួលអារម្មណ៍ពីអំណាចនោះ ។ ពេលសិស្សរបស់យើងស្វែងរកវិវរណៈផ្ទាល់ខ្លួនតាមរយៈការទទួលទាននូវព្រះគម្ពីរមរមន នោះវានឹងមានអត្ថន័យចំពោះពួកគេដូចជាផ្ទាំងលង្ហិនបានមានសម្រាប់ប្រជាជននីហ្វៃដូច្នោះដែរ—ជាសាក្សីមួយអំពីព្រះយេស៊ូវគ្រីស្ទ និងព្រះចេស្ដាដ៏ប្រោសលោះរបស់ទ្រង់ និងជាប្រភពមួយនៃវិវរណៈ និងអំណរផ្ទាល់ខ្លួន ។

ទីបន្ទាល់របស់ព្រះវិញ្ញាណបរិសុទ្ធ ដែលពង្រឹងដល់សេចក្ដីជំនឿលើព្រះយេស៊ូវគ្រីស្ទ និងធ្វើឲ្យមានការប្រែចិត្តជឿកាន់តែជ្រាលជ្រៅលើទ្រង់

ឥឡូវ យើងបែរទៅរកព្រះវិញ្ញាណបរិសុទ្ធ ។ ការធ្វើដំណើររបស់លីហៃទៅដែនដីសន្យាជាការធ្វើដំណើរនៃអំណាចខាងវិញ្ញាណមួយ ។ វាជាពេលមួយដែលព្រះអម្ចាស់បានបង្រៀន បានដឹកនាំ និងលួងលោមដល់លីហៃ សារ៉ាយ និងកូនៗទាំងអស់របស់ពួកគាត់ដោយព្រះចេស្ដានៃព្រះវិញ្ញាណបរិសុទ្ធ តាមរយៈការបំផុសគំនិត សុបិន្ត និងការនិមិត្តទាំងឡាយ ព្រះសូរសៀងរបស់ទ្រង់ផ្ទាល់ ព្រមទាំងការលេចមករបស់សារទូតស្ថានសួគ៌ ។ នីហ្វៃបានប្រកាសថា ពរជ័យនៃអំណាចខាងវិញ្ញាណទាំងនេះបានមក « ដោយព្រះចេស្ដានៃព្រះវិញ្ញាណបរិសុទ្ធ ដែលជាអំណោយទាននៃព្រះដល់អស់អ្នកណា ដែលព្យាយាមស្វែងរកទ្រង់ » ។^១៦

នីហ្វៃពិតជាបានស្វែងរកព្រះអម្ចាស់ ហើយបានទទួលវិវរណៈដ៏អស្ចារ្យតាមរយៈព្រះវិញ្ញាណបរិសុទ្ធ ។ ដំណើរស្វែងរករបស់លោកដើម្បីដឹងដោយខ្លួនឯង បានទុកជាគំរូមួយដែលយើងអាចមើលឃើញនៅពេញទាំងព្រះគម្ពីរមរមន ។ នីហ្វៃបាន « មានចិត្តមោះមុតចង់ដឹងនូវសេចក្ដីអាថ៌កំបាំងទាំងឡាយនៃព្រះ » ។^១៧ ចិត្តមោះមុតនោះដំណើរការនៅក្នុងចិត្តលោក ហើយលោក « បានអំពាវនាវដល់ព្រះអម្ចាស់ »^១៨ នៅក្នុងការអធិស្ឋានដោយបំណងពិត ។ ក្នុងដំណើរស្វែងរករបស់លោក ព្រះអម្ចាស់បានមានព្រះបន្ទូលទៅនីហ្វៃថា « អ្នកមានពរហើយ ដោយសារសេចក្ដីជំនឿរបស់អ្នក ព្រោះអ្នកបានព្យាយាមស្វែងរកយើងដោយមានចិត្តសុភាពរាបសា » ។^១៩

ដូច្នេះនេះជាគំរូ ៖ បំណងប្រាថ្នាដើម្បីដឹង ការអធិស្ឋានដ៏ក្លៀវក្លាចេញពីចិត្ត ការស្វែងរកដោយឧស្សាហ៍ព្យាយាមដោយរាបសា និងដោយសេចក្ដីជំនឿលើព្រះយេស៊ូវគ្រីស្ទ និងអំណោយនៃព្រះវិញ្ញាណបរិសុទ្ធ ។^២០ យើងឃើញគំរូនេះនៅក្នុងជីវិតអេណុស អាលម៉ា បុត្រាទាំងឡាយរបស់ម៉ូសាយ ស្ដេចឡាម៉ូណៃ និងបិតាទ្រង់ ប្រជាជនរបស់អាំម៉ូន ហេលេមិន និងពួកពលទ័ពកំឡោះ ព្រមទាំងអ្នកដទៃច្រើនទៀត ។^២១ តាមពិតទៅ ក្នុងគ្រាសុចរិតក្នុងចំណោមប្រជាជននីហ្វៃ និងលេមិន វិវរណៈផ្ទាល់ខ្លួនតាមរយៈព្រះវិញ្ញាណបរិសុទ្ធបានមានពាសពេញក្នុងចំណោមពួកគេ ។^២២

កាលដែលពួកនីហ្វៃ និងពួកលេមិនដ៏ស្មោះត្រង់បានអនុវត្ត—ហើយបានសរសេរទុក—នូវអ្វីដែលព្រះអម្ចាស់បានបើកបង្ហាញដល់ពួកគេ នោះព្រះអម្ចាស់បានប្រទានពរពួកគេបន្ថែមទៀត ។ ដោយសារពួកគេបានផ្ដល់តម្លៃយ៉ាងខ្ពង់ខ្ពស់^២៣ចំពោះអ្វីដែលទ្រង់បានប្រទានដល់ពួកគេ នោះព្រះអម្ចាស់បានប្រទានពរដល់ពួកគេឲ្យមានសេចក្ដីជំនឿដែលកាន់តែកើនឡើងទៅលើទ្រង់ ការប្រែចិត្តជឿកាន់តែជ្រាលជ្រៅ និងវិញ្ញាណនៃវិវរណៈ ។ សមត្ថភាពរបស់ពួកគេក្នុងការទទួលវិវរណៈបានចម្រើនឡើង តាមរយៈព្រះចេស្ដានៃព្រះវិញ្ញាណបរិសុទ្ធ ។

បទពិសោធន៍របស់អាលម៉ាគឺជាឧទាហរណ៍ល្អមួយអំពីគំរូនេះ ។ លោកចងចាំថា លោកបានឃើញពួកទេវតា ហើយបានទទួលការនិមិត្តដ៏អស្ចារ្យ ហើយលោកនៅតែបន្តស្វែងរកទីបន្ទាល់នៃព្រះវិញ្ញាណពីព្រះអម្ចាស់ ៖ « មើលចុះ ខ្ញុំសូមធ្វើបន្ទាល់ដល់អ្នករាល់គ្នាថា ខ្ញុំដឹងរឿងដែលខ្ញុំបាននិយាយទាំងអំបាលម៉ាននេះថាជារឿងពិត ។ ហើយតើអ្នករាល់គ្នាគិតស្មានថា ខ្ញុំដឹងរឿងទាំងនេះយ៉ាងប្រាកដដូចម្ដេចដែរ ?

« មើលចុះ ខ្ញុំសូមប្រាប់អ្នកថា រឿងទាំងនេះគឺព្រះវិញ្ញាណបរិសុទ្ធនៃព្រះទ្រង់បានប្រាប់ដល់ខ្ញុំ ។ មើលចុះ ខ្ញុំបានតមអាហារ ហើយបានអធិស្ឋានជាច្រើនថ្ងៃដើម្បីខ្ញុំអាចដឹងនូវរឿងទាំងនេះដោយខ្លួនខ្ញុំ ។ ហើយឥឡូវនេះ ខ្ញុំដឹងរឿងទាំងនោះដោយខ្លួនខ្ញុំថាជារឿងពិត ព្រោះព្រះអម្ចាស់ដ៏ជាព្រះទ្រង់បានសម្ដែងប្រាប់ខ្ញុំ ដោយព្រះវិញ្ញាណបរិសុទ្ធរបស់ទ្រង់ ហើយនេះគឺជាវិញ្ញាណនៃវិវរណៈដែលមាននៅក្នុងខ្លួនខ្ញុំ » ។^២៤ ( បិទការដកស្រង់ ) ។

ទីបន្ទាល់នៃព្រះវិញ្ញាណបរិសុទ្ធបានមានឥទ្ធិពលយ៉ាងសំខាន់លើប្រជាជននីហ្វៃ និងសង្គមដែលពួកគេបានរស់នៅ ។^២៥ ពុំមានឧទាហរណ៍ណាល្អជាងបេសកកម្មរបស់ពួកបុត្រារបស់ម៉ូសាយទៅកាន់ពួកលេមិន ៩១ ឆ្នាំមុនការប្រសូត្ររបស់ព្រះអង្គសង្គ្រោះឡើយ ។ តាមរយៈការស្រាវជ្រាវព្រះគម្ពីរដ៏ឧស្សាហ៍ ការតមអាហារ និងការអធិស្ឋាន នោះពួកអ្នកផ្សព្វផ្សាយសាសនាដ៏អស្ចារ្យទាំងនេះបាន « ប្រកបដោយវិញ្ញាណនៃការព្យាករ និងវិញ្ញាណនៃវិវរណៈ » ។^២៦

កិច្ចការរបស់ពួកគេក្នុងចំណោមពួកសាសន៍លេមិនបានមានឥទ្ធិពលយ៉ាងខ្លាំងលើដំណើរប្រវត្តិសាស្ត្រពួកសាសន៍នីហ្វៃ និងលេមិន ។ ជាលើកទីមួយក្នុងរយៈពេល ៥០០ ឆ្នាំ « [ ពួកសាសន៍លេមិន ] រាប់ពាន់នាក់ត្រូវបាននាំមកឲ្យស្គាល់ព្រះអម្ចាស់ ... ហើយពួកគេត្រូវបានបង្រៀនពីបញ្ជីទាំងឡាយ និងសេចក្ដីព្យាករណ៍ទាំងឡាយ » ។^២៧ ការពិពណ៌នារបស់មរមនអំពីបទពិសោធន៍នេះ គឺជាការសន្យាដ៏ព្យាករណ៍ពីអ្វីដែលអាចកើតឡើងដល់បុត្រាបុត្រីនៃព្រះណាដែលធ្វើតាមគំរូនៃវិវរណៈផ្ទាល់ខ្លួនតាមរយៈព្រះវិញ្ញាណបរិសុទ្ធ ៖ « មនុស្សជាច្រើន ដែលត្រូវបាននាំមកឲ្យស្គាល់សេចក្ដីពិត តាមរយៈការផ្សាយរបស់អាំម៉ូន និងបងប្អូនលោក ស្របតាមវិញ្ញាណនៃវិវរណៈ និងវិញ្ញាណនៃការព្យាករ និងព្រះចេស្ដានៃព្រះ ដែលសម្ដែងអព្ភូតហេតុនៅក្នុងពួកគេ ... ហើយបានប្រែចិត្តជឿដល់ព្រះអម្ចាស់ នោះពួកគេពុំបោះបង់ចោលសាសនាឡើយ » ។^២៨

បងប្អូនប្រុសស្រី នេះគឺជាទីបន្ទាល់ និងព្រះចេស្ដានៃព្រះវិញ្ញាណបរិសុទ្ធ ដែលពង្រឹងសេចក្ដីជំនឿលើព្រះយេស៊ូវគ្រីស្ទ និងធ្វើឲ្យការប្រែចិត្តជឿលើទ្រង់បានជ្រាលជ្រៅ ។

ពួកព្យាការីដែលថ្លែងទីបន្ទាល់អំពីព្រះយេស៊ូវគ្រីស្ទ ហើយទប់ទល់នឹងការណ៍អាក្រក់

គំរូទីបីនៃវិវរណៈផ្ទាល់ខ្លួនគឺពួកព្យាការីដែលនៅរស់ ដែលត្រូវបានប្រទានឲ្យនូវអំណាច និងសិទ្ធិអំណាចដើម្បីនិយាយថា « ព្រះអម្ចាស់ទ្រង់មានព្រះបន្ទូលដូច្នេះថា » នៅក្នុងគ្រាពិតប្រាកដទៅដល់មនុស្សទាំងអស់គ្នា ។ នេះជាគំរូនៃការព្យាករដ៏អស្ចារ្យ ដែលយើងឃើញនៅពាសពេញព្រះគម្ពីរមរមន ៖ ពួកព្យាការីថ្លែងទីបន្ទាល់អំពីព្រះយេស៊ូវគ្រីស្ទ បង្រៀនដំណឹងល្អទ្រង់ ហៅប្រជាជនឲ្យប្រែចិត្ត ហើយព្រមាន និងទប់ទប់នឹងការណ៍អាក្រក់នៅជំនាន់របស់ពួកលោក ។^២៩ តាមរយៈវិវរណៈ ជាពិសេសពីពួកទេវតា នោះព្យាការីក្នុងព្រះគម្ពីរមរមនបានផ្ដល់ដល់យើងនូវការយល់ដឹងដ៏ជ្រាលជ្រៅ និងអស្ចារ្យអំពីព្រះយេស៊ូវគ្រីស្ទ គោលលទ្ធិរបស់ទ្រង់ និងដង្វាយធួនទ្រង់ ។^៣០

ពួកព្យាការីមានភាពម៉ឺងម៉ាត់ និងនិយាយត្រង់ៗនៅក្នុងការហៅប្រជាជនឲ្យប្រែចិត្ត ។ ហេតុដូច្នេះហើយ យើងមានការបង្រៀនដ៏អស្ចារ្យនៅក្នុងព្រះគម្ពីរមរមនអំពីការប្រែចិត្តមកពី នីហ្វៃ យ៉ាកុប ស្ដេចបេនយ៉ាមីន អាលម៉ា អាម៉ូលេក ពួកបុត្រារបស់ម៉ូសាយ មេទ័ពមរ៉ូណៃ មរមន និងមរ៉ូណៃ ។^៣១ ពួកព្យាការីដ៏អស្ចារ្យទាំងនេះបានបង្រៀនពីភាពច្បាស់លាស់ ចំៗ សេចក្ដីស្រឡាញ់ និងក្ដីសង្ឃឹម ។ ការបង្រៀនរបស់ពួកលោកនៅតែជួយយើងឲ្យទទួលអារម្មណ៍ពីព្រះចេស្ដានៃព្រះវិញ្ញាណបរិសុទ្ធ ៖

« តើអ្នករាល់គ្នាបានកើតមកពីព្រះនៅក្នុងវិញ្ញាណហើយឬនៅ ? »^៣២
« បើសិនជាអ្នករាល់គ្នាបានចាប់អារម្មណ៍ចង់ច្រៀងនូវចម្រៀងនៃសេចក្ដីស្រឡាញ់ដែលប្រោសលោះ ខ្ញុំសូមសួរថា តើអ្នករាល់គ្នាអាចចាប់អារម្មណ៍យ៉ាងនេះឥឡូវនេះទេ ? »^៣៣
« តើអ្នករាល់គ្នាបានរលាស់ចោលនូវការឆ្មើងឆ្មៃរបស់អ្នកហើយឬ ? »^៣៤
« ចូរប្រែចិត្តចុះ ចូរប្រែចិត្តចុះ ដ្បិតព្រះអម្ចាស់ដ៏ជាព្រះ ទ្រង់មានបន្ទូលថាដូច្នោះ! ... ទ្រង់បានអញ្ជើញមនុស្សលោកទាំងអស់ ដ្បិតព្រះពាហុនៃសេចក្ដីមេត្តាករុណាបានលាតសន្ធឹងមករកគេ ហើយទ្រង់មានព្រះបន្ទូលថា ៖ ចូរប្រែចិត្តចុះ នោះយើងនឹងទទួលអ្នក » ។^៣៥

ពួកព្យាការីក្នុងព្រះគម្ពីរមរមនបានក្រោកឡើងទប់ទល់នឹងមនុស្សអាក្រក់ដែលព្យាយាមទាញមនុស្សចេញពីព្រះយេស៊ូវគ្រីស្ទ ហើយបំផ្លាញសាសនាចក្រ ។ មនុស្សដូចជា សេរេម នីហូរ អាំលីសៃ កូរីហូរ អាម៉ាលិកាយ និងជាច្រើននាក់ទៀត ត្រូវបានដឹកនាំដោយមារសត្រូវឲ្យបំភាន់ និងបញ្ឆោតយ៉ាងស្ទាត់ជំនាញ ។^៣៦ ពួកគេមានចំណេះដឹងគ្រប់គ្រាន់ពីភាសា ហើយបានប្រើការបញ្ឆោត ឬការប្រកែកដ៏ប៉ិនប្រសព្វ ដើម្បីធ្វើឲ្យការណ៍ល្អមើលទៅដូចជាការណ៍អាក្រក់ ហើយការណ៍អាក្រក់មើលទៅដូចជាការណ៍ល្អ ។

ពួកគេបានបញ្ជោរប្រជាជន ដោយទាក់ទាញដល់ភាពឥតប្រយោជន៍ អំនួត តណ្ហារបស់ពួកគេដើម្បីបានអំណាច និងបំណងប្រាថ្នាដើម្បីបំពេញចំណង់ចង់បានរបស់ពួកគេ ។ ព្រះគម្ពីរថ្លែងថា ពួកគេមាន « កលល្បិចនៃសម្ដីជាច្រើនដោយអំណាចនៃអារក្ស »^៣៧ និង « បានដំឡើងសំឡេង ដោយនិយាយពាក្យក្រអោង » ។^៣៨ ថ្វីបើការបង្រៀន ការប្រកែក និងការសន្យាទាំងអស់នេះខុសឆ្គងក្ដី ក៏វាមានភាពទាក់ទាញណាស់ដល់មនុស្សលោកិយ ហើយមនុស្សជាច្រើនបានប្រឆាំង ហើយចាកចេញពីសាសនាចក្រ ហើយវង្វេងផ្លូវ ទាល់តែពួកព្យាការីបានក្រោកឡើងរិះគន់ និងទាស់នឹងការណ៍អាក្រក់ ។^៣៩

ឥឡូវ នៅពេលពាក្យសម្ដីព្យាការីពុំបានប្រកាសគ្រប់គ្រាន់ នោះមនុស្សអាក្រក់បង្កឲ្យមានជាភាវរកម្ម ឃាតកម្ម និងការឆក់ប្លន់ ហើយបង្កើតប័ក្សព័ន្ធសម្ងាត់ ដើម្បីលាក់បាំងអំពើអាក្រក់របស់ពួកគេ ។^៤០

ពួកព្យាការីបានក្រោកឡើងទាស់នឹងទម្រង់នៃការអាក្រក់ទាំងនេះជាមួយនឹងព្រះបន្ទូលនៃព្រះដ៏ច្បាស់ និងសាមញ្ញ ជាមួយនឹងទីបន្ទាល់របស់ពួកលោកដែលថ្លែងដោយព្រះចេស្ដានៃព្រះវិញ្ញាណបរិសុទ្ធ ព្រមទាំងដោយអព្ភូតហេតុដែលបានធ្វើឡើងដោយព្រះហស្ដនៃព្រះអម្ចាស់ ។ ដូចយ៉ាកុបបានមានប្រសាសន៍ពីជំនួបរបស់លោកនឹងសេរេម « ព្រះអម្ចាស់ដ៏ជាព្រះ ទ្រង់បានស្រោចព្រះវិញ្ញាណរបស់ទ្រង់មកលើព្រលឹងខ្ញុំ ដរាបដល់ខ្ញុំបានធ្វើឲ្យគាត់ជ្រប់មុខចំពោះគ្រប់ទាំងពាក្យរបស់គាត់ » ។^៤១

ពួកព្យាការីនៅរស់ថ្លែងជំនួសព្រះនៅជំនាន់យើងនេះ ។ ពេលយើងឮពាក្យសម្ដីរបស់ពួកលោកជាមួយនឹងព្រះវិញ្ញាណ យើងទទួលបានវិវរណៈផ្ទាល់ខ្លួន រួមទាំងវិវរណៈដែលបញ្ជាក់ថា អ្វីដែលព្យាការីបានថ្លែងគឺពិត ។^៤២ ពេលយើងបង្រៀនសិស្សរបស់យើងឲ្យស្វែងរកពាក្យសម្ដីរបស់ព្យាការីនៅរស់ចំពោះសំណួររបស់ពួកគេ នោះយើងដឹកនាំពួកគេទៅកាន់ប្រភពដ៏មានអានុភាពមួយនៃសេចក្ដីពិតដែលបានបើកសម្ដែង ។ សិស្សរបស់យើងរៀនថា វិវរណៈផ្ទាល់ខ្លួនហូរចូលក្នុងជីវិតពួកគេ ពេលពួកគេធ្វើតាមពួកព្យាការីនៅរស់ ដែលថ្លែងទីបន្ទាល់ពីព្រះយេស៊ូវគ្រីស្ទ ហើយក្រោកឡើងទាស់នឹងការណ៍អាក្រក់ ។^៤៣

ការរៀនឲ្យបានស៊ីជម្រៅពីគោលការណ៍នៃវិវរណៈផ្ទាល់ខ្លួន

បងប្អូនប្រុសស្រី យើងបានពិចារណាជាមួយគ្នាពីវិវរណៈផ្ទាល់ខ្លួន តាមរយៈបញ្ជីដ៏ពិសិដ្ឋ ទីបន្ទាល់នៃព្រះវិញ្ញាណបរិសុទ្ធ និងព្យាការីនៅរស់ ដែលបានលើកឡើងយ៉ាងមានអានុភាពនៅក្នុងព្រះគម្ពីរមរមន ។^៤៤ យើងបានពិចារណាពីចំណុចទាំងនោះដោយឡែកពីគ្នា ប៉ុន្តែវាមានទំនាក់ទំនងគ្នាយ៉ាងជ្រាលជ្រៅ ។ តាមពិតទៅ ចំណុចទាំងនោះជាផ្នែកនៃ « [ ការ ] បំព្រួមគ្រប់ទាំងអស់ក្នុងព្រះគ្រីស្ទ » ដ៏អស្ចារ្យ ^៤៥ នៅក្នុងជំនាន់នេះ ។

គំរូនៃវិវរណៈផ្ទាល់ខ្លួនទាំងនេះរួមគ្នាថ្លែងទីបន្ទាល់ ពង្រឹងសេចក្ដីជំនឿលើ និងធ្វើឲ្យការប្រែចិត្តជឿកាន់តែជ្រាលជ្រៅលើព្រះយេស៊ូវគ្រីស្ទ ។ សិស្សរបស់យើងចាំបាច់ត្រូវរៀនឲ្យជ្រៅជ្រះអំពីគោលការណ៍នៃការមានវិវរណៈផ្ទាល់ខ្លួនដើម្បី និងយល់ដឹងនៅក្នុងគំនិត និងដួងចិត្តរបស់ពួកគេ ។ ពួកគេចាំបាច់ត្រូវដឹងអំពីរបៀបដើម្បីធ្វើសកម្មភាពសុចរិតប្រកបដោយប្រសិទ្ធភាពដើម្បីទទួលបានវិវរណៈ ហើយពួកគេចាំបាច់ត្រូវរីកចម្រើននៅក្នុងគោលការណ៍នៃវិវរណៈ ហើយប្រែក្លាយកាន់តែដូចជាព្រះអង្គសង្គ្រោះរបស់ពួកគេ គឺព្រះយេស៊ូវគ្រីស្ទកាន់តែខ្លាំងឡើងៗ ។

ឥឡូវ ខ្ញុំសូមផ្ដល់យោបល់មួយចំនួន ដែលខ្ញុំសង្ឃឹមថានឹងបង្រៀនសិស្សរបស់អ្នក ពេលពួកគេព្យាយាមរៀនឲ្យបានជ្រៅជ្រះពីគោលការណ៍ដ៏អស់កល្បនៃវិវរណៈផ្ទាល់ខ្លួន ។

ទីមួយ វិវរណៈផ្ទាល់ខ្លួនគឺជារឿងផ្ទាល់ខ្លួន ។

ប្រសិនបើសិស្សរបស់បងប្អូននឹងផ្ដោតដួងចិត្ត និងគំនិតពួកគេលើព្រះយេស៊ូវគ្រីស្ទ និងដំណឹងល្អដែលស្ដារឡើងវិញរបស់ទ្រង់ នោះពួកគេនឹងទទួលអារម្មណ៍នៃក្ដីស្រឡាញ់របស់ទ្រង់ រីករាយនឹងដំណឹងល្អទ្រង់ និងខិតកាន់តែជិតទ្រង់ ។ បំណងប្រាថ្នាមួយដើម្បីស្ដាប់ព្រះសូរសៀងទ្រង់ និងទទួលពន្លឺទ្រង់នឹងរីកលូតលាស់ឡើងនៅក្នុងចិត្តពួកគេ ។។ វិវរណៈផ្ទាល់ខ្លួនគឺជាឯកជន ។ ព្រះអម្ចាស់ដឹងថាសិស្សរបស់យើងយ៉ាងជិតស្និត និងដោយផ្ទាល់ ។ ទ្រង់នឹងមានបន្ទូលទៅកាន់ពួកគេដោយផ្ទាល់ដោយក្ដីស្រឡាញ់ដ៏ឥតខ្ចោះ ក្ដីអាណិតអាសូរ និងចំណេះដឹងអំពីអ្វីដែលពួកគេត្រូវការ ។ វិវរណៈកើតមានតាមរយៈព្រះវិញ្ញាណបរិសុទ្ធ ប៉ុន្តែវាគឺជាព្រះបន្ទូលនៃព្រះអម្ចាស់ ។ ទ្រង់ស្រឡាញ់ ។ ទ្រង់មានបន្ទូល ។ ទ្រង់ដឹកនាំ ។ ទ្រង់ការពារ ។ វាគឺជារឿងផ្ទាល់ខ្លួន ។

ទីពីរ សិស្សទាំងអស់របស់យើងមានសមត្ថភាពដើម្បីទទួលវិវរណៈផ្ទាល់ខ្លួន ។

វិវរណៈផ្ទាល់ខ្លួនកើតឡើងពីព្រះវិញ្ញាណទៅវិញ្ញាណ វាជាការប្រាស្រ័យទាក់ទងដ៏ទេវភាពពីព្រះវិញ្ញាណបរិសុទ្ធទៅកាន់វិញ្ញាណដ៏អស់កល្បនៃសិស្សរបស់យើង ។^៤៦ សិស្សយើងគ្រប់រូបមានសមត្ថភាពនៅខាងក្នុងខ្លួនគេដើម្បីទទួលវិវរណៈផ្ទាល់ខ្លួនពីព្រះ ។ វាដំណើរការទៅតាមច្បាប់ដ៏ទេវភាព ។ វាត្រូវការការខិតខំ—ការស្វែងរកវិវរណៈដោយឧស្សាហ៍នៅក្នុងការអធិស្ឋាន ការតមអាហារ ការសិក្សា ការស្ដាប់ ការសរសេរ និងការធ្វើសកម្មភាពដោយសេចក្ដីជំនឿលើព្រះយេស៊ូវគ្រីស្ទ ។ នេះគឺជាកិច្ចការ—និងសេចក្ដីសុចរិតផ្ទាល់ខ្លួន—ដែលបើកបណ្ដាញនៃវិវរណៈផ្ទាល់ខ្លួន ដែលពួកគេទាំងអស់គ្នាមាន ។

ទីបី សមត្ថភាពសិស្សយើងដើម្បីទទួលវិវរណៈអាច ហើយត្រូវតែរីកលូតលាស់ ។

សមត្ថភាពរបស់សិស្សយើងដើម្បីទទួលវិវរណៈផ្ទាល់ខ្លួនអាចរីកលូតលាស់បាន ។ តាមពិតទៅ វាត្រូវតែរីកលូតលាស់ ប្រសិនបើពួកគេត្រូវរស់រានខាងវិញ្ញាណ ហើយទទួលជីវិតដ៏នៅអស់កល្បជានិច្ចនោះ ។ នោះគឺជាការពិតសម្រាប់យើងផងដែរ ។ នេះជាមូលហេតុដែលប្រធាន ណិលសុន បានទទូច និងអង្វរពួកគេ ( និងយើង ) ឲ្យ « ពង្រីកសមត្ថភាពខាងវិញ្ញាណរបស់យើងដើម្បីទទួលបានវិវរណៈ » ។^៤៧ ព្យាការី យ៉ូសែប ស្ម៊ីធ បានបង្រៀនថា « ដោយការរៀនសូត្រ និងយល់ពីព្រះវិញ្ញាណនៃព្រះ នោះ [ សិស្សរបស់យើង ] អាចរីកលូតលាស់នៅក្នុងគោលការណ៍នៃវិវរណៈ រហូតទាល់ [ ពួកគេ ] ក្លាយជាឥតខ្ចោះនៅក្នុងព្រះគ្រីស្ទយេស៊ូវ » ។^៤៨

ទីបញ្ចប់ មិនត្រូវមើលស្រាលលើអំណាចនៃវិវរណៈនៃការធ្វើតាមព្យាការីឡើយ ។

សិស្សរបស់យើងរស់នៅក្នុងគ្រាដ៏ស្រស់បំព្រង តែលំបាកមួយ ។ ពួកគេនឹងមានការការពារ ហើយមានពរ ហើយវិវរណៈនឹងហូរចូលទៅក្នុងជីវិតពួកគេ ប្រសិនបើពួកគេនឹងធ្វើតាមការប្រឹក្សា និងការអញ្ជើញរបស់ព្យាការីនៃព្រះអម្ចាស់ ។ ព្យាការីថ្លែងជំនួសព្រះអម្ចាស់ ។ នេះគឺជាឧទាហរណ៍ថ្មីៗមួយ៖ ក្នុងការថ្លែងទៅកាន់សិស្សរបស់យើង ប្រធាន រ័សុល អិម ណិលសុន បានសរសេរថា « សមត្ថភាពរបស់បងប្អូនក្នុងការមានឥទ្ធិពលទៅលើពិភពលោកកាន់តែខ្លាំងឡើងជាងជំនាន់មុនៗ គឺពឹងផ្អែកទាំងស្រុងទៅលើកម្រិតនៃការលះបង់របស់បងប្អូនចំពោះព្រះយេស៊ូវគ្រីស្ទ ។ បងប្អូនម្នាក់ៗមានទំនួលខុសត្រូវដើម្បីជួយបង្រៀនដំណឹងល្អនៅក្នុងផ្ទះរបស់បងប្អូនដល់អស់អ្នកដែលបងប្អូនរស់នៅជាមួយ ។ ថ្នាក់សិក្ខាសាលា និងវិទ្យាស្ថាននឹងជួយបងប្អូនដើម្បីជួសជុលផ្ទះរបស់បងប្អូនឲ្យក្លាយជាជម្រកនៃសេចក្ដីជំនឿ—ជាកន្លែងមួយដែលដំណឹងល្អនៃព្រះយេស៊ូវគ្រីស្ទត្រូវបានបង្រៀន រៀន រស់នៅតាម និងស្រឡាញ់ » ។^៤៩

បងប្អូនប្រុសស្រីទាំងឡាយ សូមជួយសិស្សរបស់យើងឲ្យធ្វើតាមព្យាការី ។ បង្រៀនពួកគេឲ្យគាំទ្រឪពុកម្ដាយរបស់ពួកគេ នៅក្នុងការធ្វើឲ្យគេហដ្ឋានរបស់ពួកគេផ្ដោតទៅលើការរៀនដំណឹងល្អ ។ បង្រៀនពួកគេឲ្យចែកចាយសេចក្ដីស្រឡាញ់របស់ពួកគេចំពោះព្រះអម្ចាស់ និងដំណឹងល្អរបស់ទ្រង់ ជាមួយក្រុមគ្រួសារ និងមិត្តភក្ដិ ។ កាលដែលពួកគេធ្វើដូច្នោះ នោះពួកគេនឹងទទួល « វិវរណៈថែមទៅលើវិវរណៈ ...ដែលនឹងនាំឲ្យមានសេចក្ដីអំណរ ជាអ្វីដែលនាំឲ្យមានជីវិតដ៏នៅអស់កល្បជានិច្ច » ។^៥០ ពួកគេនឹងក្លាយដូចជាពលទ័ពហេលេមិន ជាអ្នកបំផុសគំនិតដល់មនុស្សទាំងអស់ដែលស្គាល់ពួកគេ ជាពិសេសដល់ពួកអ្នកដែលនៅក្នុងផ្ទះគេផ្ទាល់ ។

សាក្សី

បងប្អូនប្រុសស្រីជាទីស្រឡាញ់របស់ខ្ញុំ ខ្ញុំសូមថ្លែងជាសាក្សីពីព្រះវរបិតាដ៏ពោរពេញដោយក្ដីស្រឡាញ់របស់យើង ។ ទ្រង់មានព្រះជន្មរស់ ។ ព្រះយេស៊ូវគឺជាព្រះគ្រីស្ទ ជាព្រះអង្គសង្គ្រោះ និងជាព្រះប្រោសលោះរបស់យើង ។ ខ្ញុំដឹងថា ទ្រង់មានព្រះជន្មរស់ ។ ព្រះវិញ្ញាណបរិសុទ្ធធ្វើកិច្ចការនៅក្នុងជីវិតយើង ។ ស្ថានសួគ៌បើកចំហរ ។ នេះជាថ្ងៃនៃអព្ភូតហេតុមួយ ថ្ងៃនៃវិវរណៈដោយព្រះចេស្ដានៃ « ព្រះវិញ្ញាណ ... ត្រូវបានចាត់ឲ្យមកដោយសារបំណងព្រះហឫទ័យរបស់ព្រះវរបិតា តាមរយៈព្រះយេស៊ូវគ្រីស្ទ ជាព្រះរាជបុត្រារបស់ទ្រង់ » ។^៥១ ខ្ញុំដឹងថា នោះគឺជាការពិត ។ សូមឲ្យយើងម្នាក់ៗស្វែងរកវិវរណៈពីព្រះអម្ចាស់ ដើម្បីជួយសិស្សយើងម្នាក់ៗ គ្រប់ៗគ្នា រៀនឲ្យបានជ្រៅជ្រះពីគោលការណ៍ដ៏រុងរឿងនេះ ហើយទទួលវិវរណៈផ្ទាល់ខ្លួននៅក្នុងជីវិតពួកគេនៅពេលឥឡូវនេះ និងជារៀងរហូតតទៅ ។

ក្នុងព្រះនាមដ៏ពិសិដ្ឋនៃព្រះយេស៊ូវគ្រីស្ទ អាម៉ែន ។