iVakamacala Taumada
Lotu ni iTabagone Qasecake e Vuravura Raraba
Sigatabu, 18 ni Feperueri, 2024
Oi kemuni na itabagone qase cake e vuravura raraba, eda kalougata me keirau tiko kei kemuni ena lotu ni vuravura raraba ni CES ni itabagone qase cake oqo. Eda marautaka tale ga ni tiko kei keda ena bogi nikua o Baraca Chad Webb, ka tomani koya tiko mai na watina o Kristi. Erau tisaipeli yalodina o i Karisito o Brother kei Sister Webb ka ivakaraitaki vinaka ni yalodina kei na loloma ena veitiki kece sara ni nodrau bula.
Keitou marautaka vakalevu na nomuni tiko ena lotu oqo. Na nomuni tiko rawa e ivakaraitaki vinaka ni nomuni vakabauta na Kalou kei Jisu Karisito kei na gagadre moni vakila na Nodrau loloma ka muri Rau. Nio digia mo muria ka sokalou vei Rau, na nomu bula ena rawa ni sinai ena dua na igu e levu cake kei na qaqaco vakayalo ka gadrevi vakalevu ena noda ilakolako vaka Nona tisaipeli ena noda siga. Keitou lomani kemuni kece!
Au mai vakaraitaka talega na nona veikidavaki kei na iloloma na noda parofita lomani, Peresitedi Russell M. Nelson, mai vei rau na nona daunivakasala ena Mataveiliutaki Taumada kei na Kuoramu ni iApositolo Le Tinikarua vei kemuni kece. Eratou lomani ka kauwaitaki kemuni ka masulaka e veigauna na nomuni tiko-vinaka. Au nuitaka nio ni na vakila na nodra ka vakabibi na loloma ni Kalou kei Karisito ena soqoni oqo edai.
Au marautaka dina na sere veivakauqeti ka lagati ena vica na miniti sa oti. Na qaqa ni sere veivakauqeti oqo e solia edua na draki veilaveti kina noda lotu ena bogi nikua ka sauma edua vei ira na taro bibi duadua ena noda bula ena veisiga oqo: “Meu gole tu ki vei meu kunea kina na vakacegu?”
“Evei, me’u gole kina, ni’u gadreva?
Evei na liga dauloloma me walia na noqu rarawa?
“O cei, e rawa ni kila?
“O Koya, Taudua ga.”
“Tudei ka yalovinaka,
Ena loma ni olo ni Valenivolavola Liu ni Lotu e Salt lake City, e tiko kina edua na droini totoka kei Jisu Karisito ni dodo tu na ligana ena kedra maliwa na Nona tisaipeli. E bula voli na iVakabula e vuravura ka sureti ira na nona tamata mera lako mai Vua, ena yalo loloma e vakadeitaka vei ira o Koya na gauna e lako kina era na rawa ni “kunea na vakacegu [ki] yalodra.”
O Jisu Karisito e duri tu ka dolava tu na ligana ena matamata ni noda bula ni veisiga, ka tukuna, “Au na ovici iko ena liga ni noqu loloma.” Kevaka mada ga eda sotava tiko na dredre se veika lelevu , eda rawa ni vakararavi kina Ligana,, vakila na Nona loloma, ka kila ni sa vakatabui tu edua na tikina me noda, ena vuku ni Nona isoro ni veivakaduavatataki. Sa dua na sala veivakurabuitaki me kunei kina na vakacegu ena vuravura ni rarawa oqo.
Ena yalo ni vakasaqarai ni vakacegu vua na iVakabula, keitou sureti ira na gonevuli ni institute e veiyasai vuravura mera wasea na nodra nuiqawaqawa kei na lomatarotaro vei keda. Mera katona na nodra taro ena vidio leleka ka vakauta mai veikeirau. Keirau kurabui ka tarai vakalevu ena nodra wasea mai na lomadra dina ena nodra dui vakatataro. Keirau rawa ni vakila na nomuni gagadre moni toro voleka vua na iVakabula ka yaco moni Nona tisaipeli yalodina.
Keirau biuta vata na vidio leleka oqo vakaiulutaga: (1) Vaqaqacotaki ni iVakadinadina, (2) vosota na veitemaki, (3) muria na ituvatuva ni Kalou veikeda, (4) vakavakarau mo curu ka sokalou ena valetabu, kei (5) meda vakanamata kina bula i Jisu Karisito.
Keirau na vakaraitaka vei kemuni na vidio digitaki ni nomu vakatataro na kena ivakamacala ka vakamacalata na ulutaga eda na veitalanoa kina ena bogi edai. Erau na tomani keda o Brother kei Sister Webb me veitalanoataki eso vei ira na ulutaga oqo, me rau wasea kina na nodrau kila-ka kei na nodrau ivakadinadina totoka ni kosipeli i Jisu Karisito.
Vinaka vakalevu. Keitou lomani kemuni kece, kei na nomuni vakatataro oni vakauta mai vei keirau me baleta na nomuni lomana na noda iVakabula o Jisu Karisito.