Me Vakanamata Noda Bula vei Jisu Karisito
Lotu ni iTabagone Qasecake e Vuravura Raraba
Sigatabu, 18 ni Feperueri, 2024
Elder Ulisses Soares: Na taro totoka kece eda sa veivosakitaka ena bogi nikua e icavacava ni ulutaga bibi duadua o ni a kauta mai vei keirau me baleta na noda lotu: “na vakanamata ni noda bula vei Jisu Karisito.”
Vidio, kerekere.
BOLIVIA LA PAZ—TARO 3
Elder Soares, e dua na noqu taro. Eda na rawa vakacava, ena dua na vuravura rarawa vakaoqo, me tara cake e dua na veivakabauti levu cake vua na iVakabula ka vakacilava vakavinaka cake na rarama i Jisu Karisito ena vuravura oqo?
MEXICO CITY #1—TARO 4
Elder Soares, meu na toro voleka vakacava kina kaukauwa ni Kalou ka, ena noqu cakava vakakina, vakavinakataka cake na noqu bula ka rawa meu vukei ira na tani?
PHILIPPINES CEBU—TARO 9
Elder Soares, au via taroga, Eda na vakaduiduitaka beka vakacava na bula vinaka sara mai na veisureti i Karisito meda vinaka sara me vakataki Koya?
Elder Soares: Vinaka vakalevu sara na nomuni gagadre dodonu mo ni muria na iVakabula ka sa vakaraitaki mai ena veitaro oqo. E gadrevi moni kila ni sa tu na noda iVakabula o Jisu Karisito ena matamata ni noda gauna, ena Ligana loloma sa dolele tu, vakarau tu, ka rawa ni vakavolivoliti keda ena Nona loloma. E gadreva o Koya meda vakataki Koya, meda vakasama ka cakava me vakataki Koya baleta ni kila o Koya ni oqori ga na sala meda rawata kina na vakacegu kei na marau e tudei. Ena vuku ni ka oqo, e dau sureti keda tu ga na iVakabula meda toro voleka Vua ka muri Koya ena yaloda taucoko. Vakasamataka na veisureti oqo me vaka ni volai tu ena ivolanikalou:
“Drau vakararavi tikoga mai vei au ena vakasama kece, kakua ni vakatitiqa, ka kakua ni rere.” Nida ciqoma na veisureti oqo, e vakayacora kina na iVakabula na Nona yalayala vakasakiti, oka kina na lako voli ena Nona rarama ka ciqoma na veidusimaki yadua ena noda bula.
Me vakanamata na noda bula ki vua na iVakabula e gadrevi kina me veidonui na noda vakasama kei na gagadre vei Koya. Me rawati na sasaga oqo, e gadrevi meda ssaga ka vulica vakalevu cake na veika baleti Koya, raica me salavata tiko ga kei na Nona kosipeli na noda bula, ka cakava e dua na sasaga vagumatua e veisiga meda vakanamata kina veika kecega e vinaka.
Ena noda sasaga me vakaduavatataka na noda bula vata kei na iVakabula, eda na rairai veilecayaki beka ena ibalebale ni noda yaco meda vinaka sara vei Karisito kei na bula vinaka sara. Daulomani, e rawa beka nio wasea e dua na vakasama me baleta na ka oqo?
Sister Rosana Soares: Io. Au via tokaruataka tale na veika e tukuna Elder Vern Stanfil ena Vitusagavulu ka vakatavulica me baleta na veika qo. E tukuna o Koya meda nanuma ni vakataucokotaki e sega ni tautauvata na noda vakataucokotaki vei Karisito. Na bula vinaka sara e gadrevi kina e dua na ivakatagedegede e dredre, eda vakavuna ga vakataki keda ka vakatauvatani keda kei ira na tani. Oqo ena vakavurea na yalo luvuci kei na lomaleqa ka rawa ni vakavuna meda via vakasuka ka vakatikitikitaki keda.
Na yaco meda vinaka sara vei Karisito e dua tale na ka. Sai koya na iwalewale—ena veidusimaki ena loloma ni Yalo Tabu—ni yaco me da vakataka vakalevu cake tiko na iVakabula. Na ivakatagedegede oqo e tuvanaki mai vua e dua na Tamada Vakalomalagi yalovinaka ka kila na ka kecega ka vakamacalataki vakamatata tu ena veiyalayalati eda sureti meda ciqoma. Nida ciqoma na veisureti ni iVakabula me da lako mai Vua, eda vakila kusarawa ni noda vinaka duadua e sa vinaka varauta ka ni loloma soliwale ni iVakabula dauloloma ena vakacavara yani ena sala eda sega ni vakasamataka rawa.
Elder Soares: Kemuni noqu itokani, na vakaitavi ena ivakarau oqo e, sega ni vakatitiqataki, e dua na iwalewale ni bula taucoko malua, ka gadrevi kina e levu cake na ka mai na vakabauta walega. Ia nida ciqoma, eda na sotava na reki, vakacegu, kei na tubu vakayalo, ka rawa ni yaco na ivakarau ni iVakabula me tiki ni noda itovodei, ka na rawa ni ceuti tu na Nona ivatuka ena keda irairai.
Au sa raica e matanavotu ni kena vakanamata na noda bula vua na iVakabula ena kauta mai na kaukauwa meda vorata kina na dredre, malumalumu, kei na mosi ni bula, ka na dredre sara meda vosota ke sega na Nona veivuke kei na kaukauwa ni veivakabulai. E dua na noqu itokani e sotava tiko ena gauna oqo e dua na tauvimate bibi, ka sega ni vinaka na kena ituvaki. Na itokani oqo e sega ni lomaleqataka na ka oqo. Na nona gagadre duadua ga me kila kevaka sa yaloqaqa ka doudou tiko ena nona ivakadinadina me baleta na iVakabula o Jisu Karisito ena nona bula. E matata vei au ni itokani oqo sa vakanamata tu na nona bula vua na iVakabula ka sa vakila ni sa mokoti o koya ena Ligana sa dolele tu, vakabibi ena gauna ni leqa vakaoqori.
A vakavulica o Peresitedi Nelson: “Ena [gadrevi e dua] na vakasama donu [kei] na sasaga gugumatua me da vakasinaita noda bula e veisiga ena vosa [ni iVakabula], Nona veivakavulici, [kei na] Nona dina.” E sega ni dua na ka e sureta vakalevu cake na Yalotabu mai na nomu vakadeitaka na nomu rai vei Jisu Karisito.
Kemuni na noqu itokani lomani, au vakabauta nida sa na yacova na icavacava ni veika totoka eda mai sotava vata. Ni bera niu tinia na noqu vosa, au vinakata meu sureti rau na noda tokani lomani Baraca kei Sisita Webb me rau wasea vakalekaleka na nodrau ivakadinadina. O na cakava rawa oqo? Vinaka.
Sisita Kristi Webb: Kemuni na Taciqu kei na Ganequ, au lomana na noda iVakabula, o Jisu Karisito. Na noqu mai kila na Nona loloma uasivi sara me baleti au a veisautaka na noqu bula. A veisautaki au o Koya. Au vakadinadinataka ni bula tiko o Koya. Au vakadinadinataka ni lomani keda yadua o Koya. Au vakadinadinataka ni a solia o Koya na Nona bula me vueti keda. Na nona ivakaraitaki ni yalomalumalumu, talairawarawa, kei na loloma e dau vakauqeti au e veisiga. E vakavulici au tiko o Koya ena ivakarau me’u nuitaka ka qarava kina na Tamaqu Vakalomalagi. O Koya na noqu rarama, noqu kaukauwa, ka noqu inuinui. Ena yaca i Jisu Karisito, emeni.
Baraca Chad H Webb: Sa dua na ka dokai vei keirau me mai tiko vata kei kemuni ena bogi nikua vata kei Elder kei Sisita Soares. Au vinakata meu vakuria na noqu ivakadinadina ni veikacivi nei Elder Soares vaka dua na iApositolo ni Turaga o Jisu Karisito. Au kila talega nio Peresitedi Nelson e parofita ni Turaga e vuravura nikua. Au vakuria talega na noqu ivakadinadina ni lomani kemuni na Tamada Vakalomalagi. E tiko e dua na Nona ituvatuva vinaka sara ni bula marau me vakabulai ka vakacerecerei ira na Luvena. O Jisu Karisito e tu ena lomadonu ni ituvatuva uasivi oya ka sa iVakabula ka Dauveivueti kei vuravura. O Koya na noda ivakaraitaki uasivi duadua. Sai Koya na Karisito sa bula. O Koya na Kalou ni veisereki. Eda rawa ni vakararavi Vua ena yaloda taucoko. Au vakavinavinakataka vakalevu ni’u lewe ni Nona Lotu kei na veivakalougatataki kece sara e mai noda ena Nona kosipeli vakalesuimai. Ena yaca i Jisu Karisito, emeni.
Sister Rosanna Soares: Kemuni na noqu itokani lomani, Au vakavinavinaka vakalevu vua na Kalou ni tiki ni veika lalai ni noda bula. E kila o Koya na noda gagadre, ka tiko Vua na isau ni noda vakatataro. Ka ga meda cakava meda kerekere! Nida vakaraitaka na noda dau vosota, vakavinavinaka, kei na noda vakabauti Koya ena noda masu yalodina, e tu ika o Koya, ka tu vakarau me vukei keda. Ena sega ni biuti keda Koya. Kevaka mada ga eda sega ni vakilai koya ika, e tu ika ena veigauna kece o Koya.
Na ka e solia vakalevu vei au na inuinui niu kila ni na noda iVakabula e liutaka na Nona Lotu ena vuravura oqo vei Peresitedi Nelson ka Nona parofita, daurairai, ka dauvakatakila. Ena yaca ni noda iVakabula, o Jisu Karisito, emeni.