Muria na iTuvatuva ni Kalou Baleti Keda
Lotu ni iTabagone Qasecake e Vuravura Raraba
Sigatabu, 18 ni Feperueri, 2024
Elder Ulisses Soares: Na noda ulutaga e tarava o ya “meu muria na ituvatuva ni Kalou me baleti au.”
Niu rogoca tiko na nomuni taro, au vinakata meu sureti Baraca Webb me solia mada na nona vakasama baleta na ulutaga oqo. E sa donu beka oqo?”
PHILIPPINES CEBU—TARO 8
Elder Soares, au via taro ga e dua na ka. Na gauna cava o kila kina vakai iko ni Kalou e tiko dina ena nomu bula ena veisiga?
BRAZIL—TARO 3
Elder Soares, au na kila vakacava niu bulataka tiko na veika sa namaka tiko na Tamada Vakalomalagi vei au ka sa vakadonuya na noqu digidigi au sa cakava?
Brother Chad H. Webb: Na imatai ni gauna au a vakila vakaidina oqori oya ena gauna au ciqoma kina na noqu veivakalougatataki vakapeteriaki. E vukei au na Yalotabu meu kila ni sa kilai au tiko na Turaga ka gadreva me vukei au ena ituvaki kece ni noqu bula. Mai na gauna oya, a vuqa sara na gauna tawa wili rawa au a raica ka vakila na ka oqo. E dina sara niu se kaulotu tu kina au raica na Ligana ena noqu bula vakakina ena nodra bula e vuqa sara na tamata eke e Mexico. Ni se bera noqu laki kaulotu au a dau mamadua ka rerevaka na vosa vei ira na tamata. Niu kaulotu tiko vakalougatataki au na Turaga ena vuqa na sala veivakurabuitaki, ka qai veisautaka dina na vo ni noqu bula taucoko.
Ia na kena ivakaraitaki au taleitaka duadua na gauna oya e vukei au kina o Koya meu sotavi Kristi kina. Ni bera ni keirau mai sota, au lai taro cakacaka ena cakacaka au dau taleitaka dina. Au rarawa sara vakalevu niu a sega ni tauri meu cakacaka kau nanuma sara noqu a masu ena rarawa, kau kaya vua na Turaga ni a sega ni dodonu. Au nanuma cala ni baleta niu tovolea tiko meu bulataka na kosipeli, sa dodonu me solia vei au o Koya na ka au vinakata. Ni oti toka e vica na macawa a yaco e dua na cakamana, au a rawata kina e dua tale na cakacaka. Na cakacaka oqo a veimuataki meu sotavi Kristi kina. E italanoa balavu, ia na ka dina ke yaco na noqu gagadre au nanuma meu rawata kina na imatai ni noqu cakacaka, au na sega ni sotavi koya. Au rawa ni vakasamataka na cava e nanuma na Tamada Vakalomalagi baleta na noqu sega ni dau masu vinaka. Ena vakatoka beka vakaoqo, “Ena rawa beka mo vosota mada? E tiko na noqu ituvatuva. E tiko vei au na ka ena vinaka cake vei iko kevaka mo vakabauti au ga.” Au marau vakalevu ni sa lewa tikoga o Koya na noqu bula ka sega o au. Au vulica rawa ni okati Koya kina noda bula e veisiga ka rawa Vua me vakaceceretaka na noda bula mai na kena eda rawata rawa ke sega o Koya. Au sega ni vakasamataka rawa na noqu bula ke sega kina o Kristi. Au marau vakalevu ni kila vinaka cake o Koya maivei au na veika au gadreva vakaidina. Na veika au vulica oya ni rawa vei keda meda nuitaki Koya ena yaloda taucoko.
Elder Soares: Vinaka vakalevu na nomuni veituberi totoka, Baraca Webb. Kemuni na noqu itokani vinaka, sa dina sara ni Kalou sa tiko na Nona ituvatuva baleti keda. Na Nona itutvatuva sai koya na bula tawamudu. Au vakadinadinataka vei kemuni ni gauna eda na cakacakataka kina na noda galala ni digidigi ka lewa ena bula dodonu, eda sa vakadeitaka ni sa vinaka na noda muria tiko na ituvatuva ni Kalou baleti keda.