Vakavakarau ni Curu ka Sokalou ena Valetabu
Lotu ni iTabagone Qasecake e Vuravura Raraba
Sigatabu, 18 ni Feperueri, 2024
Elder Ulisses Soares: Keimami sa ciqoma oti e vuqa na taro vinaka me baleta na ulutaga talei nei Peresitedi Russell M. Nelson: “na vakavakarau ni curu ka sokalou e valetabu.”
Baraca kei Sisita Webb, e rawa beka mo drau soli vakasama talega ena ulutaga oqo nida rogoca oti veitaro katoni oqo?
CANADA EDMONTON—TARO 1
Elder Soares, na noqu taro o ya meu na vakavakarau vakacava meu gole ki valetabu ena imatai ni gauna ka ciqoma na noqu edaumeni?
CANADA EDMONTON—TARO 2
Elder Soares, au na kila vakacava niu sa tu vakarau meu ciqoma na noqu edaumeni?
CHILE CONCEPCIÓN—TARO 2
Ni bula, Elder Soares. E dua tiko na noqu taro. Meu cakava vakacava noqu gole tiko ki valetabu me bibi cake sara ka me usutu ni noqu bula?
Brother Chad H Webb: Oqori e dua na taro totoka ka bibi sara.
Na imatai ni ka au vakatututaka mera vakavakarau vakayalo. Vulica mo rogoca na domo ni Turaga ka vakaio ki na veivakauqeti. Sasaga mo tiko savasava ka lako tani mai na veika ena tarova na Yalo ki na nomu bula. Kevaka o sa cakava eso na ca, veivutunitaka sara ka mo bula kilikili mo gole ki na vale ni Turaga. Se na vanua cava ga o a tu mai kina ena nomu bula, sa baleti iko tiko na Veisorovaki i Jisu Karisito. Ena Vukuna ga, sa rawa mo kilikili. Ena vukei iko o Koya.
Sister Kristi Webb: Dua talena vakasama me veivosakitaki na valetabu vata kei ira na lewe ni matavuvale nuitaki, iliuliu, se itokani. Na valetabu e ka tabu, ia na veika kece e baleta e sega ni yalani na kena vakatakilai raraba, ka da rawa ni veivosakitaka vakalevu na valetabu ka sega ni vakalailai ga. Kau nanuma ni na veivuke cake oqo ni bera nomu gole ka lesu mai ena imatai ni gauna. E ka vinaka na taro; eda na vuli mai kina, mo laki taroga eso o nuitaki ira, o ira era taleitaka na valetabu ka sa ka tabu vei ira. Vakabibi ga, mo dau taroga tiko na Turaga. Na noda vakatataro tiko sa sala vinaka duadua vua na Turaga me vakavulici keda tiko ena ivakatakila. Na levu ga ni nomu gole ki na valetabu, na levu cake ni Nona vakavulici iko.
Brother Webb: iOtiotini ka mera vulica. Vulica na veika kece o rawata baleta na valetabu. Dua na vanua cecere mo cakava oqo o ya ena ChurchofJesusChrist.org/temple, ni ko na vulica vakalevu kina na edaumeni, na qameni ni valetabu, ka vakabibi o na vulica kina na veiyalayalati yadua o na cakava tiko ena loma ni valetabu. Na mataveilawa oqo ena veivuke sara.
Me tiki ni nomu vuli oqo, mo vulica ena kena o rawata rawa na veivakatakilakila ni valetabu. Kivei au, e dua na sala vinaka duadua ni vakavakarau meu kila vinaka na valetabu o ya noqu vulica na veivalecavu makawa e tukuni tu ena Veiyalayalati Makawa. Na veivakatakilakila ni veivaletabu ena gauna nikua e duidui mai na kena ena gauna makawa, ia na kedra ivakavuvuli kei na inaki era via tautauvata ga ka rawa ni vukea noda vakavakarau ena noda dui gauna ena valetabu.
Vei ira era a curuma na valeniveitavaki makawa era na duri mada ena dua na icabocabo ni soro, mera na cabora e dua na isoro me vakataka na solibula veisorovaki ni iVakabula. E ra vakasavasavataki ka lumuti ena waiwai ka solivei ira na isulu. E tiko talega ena loma ni valeniveitavaki e dua na valelaca e vakatokai na Vanua Tabu e tauri kina na itutu ni cina, e vakatakarakarataka na bula vata kei na Yalo se na rarama ni Kalou. Na teveli ni madrai tabu sega ni vakaleveni kei na waini, sa ivakatakilakila tauvata ni sakaramede. E tiko tale ga na icabocabo ni veika boi vinaka, e matanataka na masu. Na iotioti ni tikina ena valeniveitavaki sai koya na Savasava ni Veika Savasava Duadua, sa taura tu na Kato ni Veiyalayalati vata kei na iTutu ni Loloma Veivueti. Na bete levu duadua ga ena lakova yani na ilati ka curuma na Savasava ni Veika Savasava Duadua, ni oqori ena dua ga na siga ena dua na yabaki, ena siga ni Veisorovaki. Na rara e tautuba e matataka na matanitu telesitieli, na Vanua Tabu, na matanitu teresitieli, kei na Savasava ni Veika Savasava Duadua, na matanitu silesitieli. Na cakacaka oqo ena valeniveitavaki e vakavulici Isireli makawa baleta na nodra ilakolako ena bula oqo, vata kei na ilalawa cecere mera curu ki na iserau ni itikotiko ni Kalou.
Au nanuma kina ni dua na ivakatakilakila cecere duadua ena itukutuku kei vuravura, o ya na gauna a mate kina o Jisu, ka yaco kina na uneune ka kasei rua na ilati ni valetabu nei Eroti, e vakatakilakilataka tiko ni sa mai vakacavari na Veisorovaki, sa rawa ki na tamata kecega mera curu ki na matanitu silesitieli, se ena itikotiko ni Kalou.
Na veiroka mada ga ena valeniveitavaki—karakarawa, lokaloka, damudamu, kei na vulavula—era sa ivakatakilakila tiko. Na karakarawa e tukuni ni matataka tiko na lomalagi, na lokaloka e ivakatakilakila makawa ni veika vakatui, na damudamu e vakavotuya vei keda na dra nei Jisu Karisito, kei na vulavula sa dau vakatakilakilataka tikoga na savasava vakalou. Ni biu vata na ilati ni valeniveitavaki kei na kote balavu ni bete, e rau na dusia vei keda na vakasama ni ena dra ga vakatui vakalomalagi eda na savasava kina vakalou.
Oqo na vuna eda gole kina ki valetabu—meda vulica na sala meda rawata kina na kaukauwa taucoko ni solibula veisorovaki i Jisu Karisito ki na noda bula. Eda vulica ni ena veiyalayalati kei na cakacaka vakalotu ni valetabu, kei na iVakabula, sa rawa me da vakavakarau lesu kina vua na Kalou, kilikili ka savasava vakalou. Ena valetabu eda vulica kina na veika baleti Atama kei Ivi ena nodrau a vakasevi tani mai na iserau ni Kalou kei na sala ni nodrau vakavakarau me lesu ki Vua. Mai na kedrau italanoa eda vulica kina na sala eda rawa ni vakavakarau kina ki na siga totoka o ya. E kaya o Peresitedi David O. McKay ni valetabu “sa ikakalawa veitaravi ki na ilakolako cake ni iTikotiko tawamudu. Kevaka ena rawa vei ira na noda itabagone mera raica oqo, sa na yaco me veivakauqeti kaukauwa sara vakayalo kina nodra bula.”
Koya gona nio sa lako tiko ki valetabu, vakaraici Jisu Karisito ka raica na veika o sa vulica tiko baleta na vakavakarau mo laki tiko ena iserau nei Tamada Vakalomalagi, ko na qai sotava kina veika totoka.
Sisita Webb: Mau sauma da la na taro “Au na kila vakacava niu sa vakarau tu meu ciqoma na noqu edaumeni?”
E vakavuna, na taro oqo meu nanuma kina na parofita o Eparama. E dua na gauna ena bula nei Eparama a vakauqeti kina me gadreva me vakararamataki ka kila-ka vakalevu sara. A vinakata me veisemati vakavoleka kei na Kalou ka me gugumatua cake me qaravi Koya. Ena Eparaama 1:2 a kaya kina: “Ia, niu kila ni na levu cake kina na noqu marau na sautu kei na vakacegu, au sa vakasaqara na nodra veivakalougatataki na noqu qase.” E vakamacalataki koya eke o Eparaama ni “tamata yalosavasava, ena gadreva me ciqoma ka taukena na e levu na kika, ka me tamata yalosavasava, ka taukena e levu na kilaka … e gadreva me dusimaki, ka muria na ivakaro ni Kalou.”
Au vakila vakaoqo niu sa tekivu vakasamataka meu gole i valetabu meu laki ciqoma na noqu edaumeni. Au sa bula vakataucokotaka tiko na kosipeli. Au sa vuli vakalevu sara ena noqu vulica tiko na ivolanikalou; kau sa tubu ka veiqaravi tiko ena reki ena noqu tabanalevu. Ia au a vakila na titobu ni noqu gagadre meu vuliuca vakalevu na Tamada Vakalomalagi kei na Nona ituvatuva me baleti au. A sega walega niu lomatarotaro, au a vakila e dua na gagadre kaukauwa meu vulica meu voleka sara vua na Kalou ka meu yaco me dua na tisaipeli tudei i Jisu Karisito. Au a vinakata dina me sa lewa ga na Kalou ki na noqu bula. E ra sa kila rawa na noqu itokani voleka kei noqu bisopi niu sa tu vakarau meu cakava na noqu veiyalayalati ni valetabu ka vukei au meu vakarau ciqoma na noqu edaumeni.
Elder Soares: Daumaka dina. Vinaka vakalevu na nomudrau vakasama totoka, Baraca, kei Sisita Webb. Kemuni na itokani lomani, me vaka a vakavulica o Peresitedi Nelson, “Na bula kilikili ni tamata yadua me curuma na vale ni Turaga e gadrevi kina vakalevu na vakavakarau vakayalo ni tamata yadua. … Na bula kilikili ni tamata yadua e gadrevi kina na saumaki e taucoko ni vakasama kei na yalo me vaka na Turaga, … mo ivakaraitaki vinaka cake, ka mo tamata savasava cake.” O koya gona, kevaka meda na raimatua tiko ena yalododonu baleta na noda vakavakarau meda curuma na valetabu, eda na veisautaka na noda bula ena valetabu, ni na veisautaka na noda bula ena taudaku ni valetabu.