Vosota na Veivakatovolei
Lotu ni iTabagone Qasecake e Vuravura Raraba
Sigatabu, 18 ni Feperueri, 2024
Elder Ulisses Soares: Daumaka sara. Vinaka. Meda sa qai raica mada na taro e semati ki na “vosota na veivakatovolei.”
GHANA—TARO 7
Elder Soares, au vinakata me’u kila na vuna e dau dredre kina na kena vakayagataki na vakabauta ena veigauna dredre.
CHILE CONCEPCIÓN—TARO 8
Bula, Elder Soares. Na noqu taro oqo: O na vukei koya vakacava e dua sa vakararawataki vakalevu ena nodra bula ka vaka me ra se bera vakadua ni ciqoma na veivakalougatataki ni kosipeli i Jisu Karisito?
SPAIN BILBAO—TARO 2
Elder Soares, ena Lotu sa tu vei keda na itabagone bula kilikili ka ra sa rawa ni kaulotu ka ra tomana tikoga na nodra veiqaravi ena Lotu kei na itikotiko raraba. Sega ni vakuwai kna na nodra veiqaravi, era sega ni rawa ni se raica na veivakalougatataki e yalataki. Na cava o na kaya vei ira na itabagone oqori ka sega ni vakalougatataki na nodra ilakolako e vuravura me vaka a yalataki vei ira?
Elder Soares: Vinaka vakalevu na vei taro vakasakiti oqo. Ia, e dua na cala kilai levu ena keda maliwa e vuqa o ya kevaka eda segata ena noda igu taucoko meda muria na loma ni Turaga, bulataka e dua na bula dodonu, ena sega ni dua na ka ca ena yaco vei keda. Nida ciqoma na ituvatuva ni Tamada Vakalomalagi ni bera na bula oqo, eda kila ni da na sotava na reki ka vakakina na veivakatovolei ena noda ilakolako ena bula oqo. Na lako curuma na ituvaki dredre oqo ena so na gauna sa tiki ni noda iwalewale ni vuli me rawa kina ni da lesu tale kina iserau ni Tamada Vakalomalagi. Na ka dina oya ni da na sotava na veika dredre ena noda bula veitalia na noda ivalavala dodonu. Ena yasana kadua, ena yaco dina mai na revurevu ni ivalavala vinaka ia ena so na gauna e sega ni yaco vakatotolo. Na veivakalougatataki oqo ena rawa ni yaco mai ena dua tale na gauna ka duidui mai na noda ka me vaka na lewa nei Tamada o koya, ena Nona vuku kei na kila ka kecega, e kila na veika eda gadreva kei na veika e vinaka duadua vei keda ena bula oqo.
Sa dua kina na ka bibi duadua eda rawa ni cakava ni da sotava na dredre ena bula oqo o ya meda vagolea na yaloda kei na vakararavi vua na iVakabula. Ni da vakayacora vakakina, eda na sega walega ni kunea na vakacegu eda vakasaqara ia eda na rawata talega e dua na vakabauta kei na ivakadinadina levu cake ni dina ni iVakabula kei na Nona Veisorovaki. A sotava na Karisito na mosi, veivakararawataki, kei na veitemaki ena veimataqali kecega me rawa ni vakasinaiti kina ena loloma cecere ka kila na sala me vukei keda kina me vaka na noda malumalumu. Na iVakabula, e rawa, ni vinaka cake mai vei ira kecega, me vakabula na revurevu ni ituvaki dredre cava ga ni bula oqo. Ena so na gauna, eda na sega beka ni vakabulai vakayago ena gauna vata ga oya mai na noda mosi se tauvimate, ia e rawa ni da vakabulai vakayalo ena noda soli vei keda na kaukauwa, kila ka, kei na vosota me da colata na icolacola e vakataqari vei keda. Ni da vagolea na yaloda vua na noda iVakabula, ena vakayacora o Koya na veika veivakurabuitaki ena noda bula.
E dua tale na tikina meda vakasamataka oya ni rawa ni da raica na noda dredre kei na veivakatovolei me madigi ni tubu ka sega ni vakatara meda vakila ni vakabibitaki keda. Au vakadeitaka vei kemuni na noqu itokani, na cakacaka ena ivakarau oqo ena rawa ni solia vei keda na madigi meda vakaraitaka vua na Turaga kei keda ni da sa rawa ka na cakava na veika kece sa vakarota vei keda na Turaga meda cakava—ka toro voleka yani ki na veika e tawamudu ka se cava ga na ituvaki eda sotava. E kila o Koya eda rawa ni cakava na veika dredre! E solia vakalevu vei keda o Koya na kaukauwa.
Me vaka e vakavulica o Elder Orson F. Whitney, e dua vei ira na iApositolo ni Veivakalesui Mai: “E sega ni dua na mosi eda sotava, e sega ni dua na veivakatovolei eda sotava e vakaoti. E sotava na veika meda vuli kina, kena vakatorocaketaki na itovo vakaoqo me vaka na vosota vakadede, vakabauta, yaloqaqa, kei na yalomalumalumu, … [ka] ni da vosota ena, tara cake na noda ivakarau ni bula, vakasavasavataka na yaloda, vakalevutaka na yaloda, ka vakavuna me da yalomalua ka loloma vakalevu cake, ka eda sa kilikili kina meda vakatokai meda luveni Kalou. … Sa ikoya na rarawa kei na veivakararawataki, cakacaka vakaukauwa ni sotavi na dredre, eda sa na qai rawata na vuli ka da lako mai kina eke meda mai vulica.”
Kemuni noqu itokani, na vakatorocaketaki ni vosota ena vukei keda meda raica na bula mai na dua na rai tawamudu, ka sa yaco me veivakayarayarataki ni veivakabulai ki yaloda. Ni da vuli mai na veika eda sa sotava, eda na dau veikauwaitaki ka yalololoma vei ira na tani ka rawa ni veivuke ena noda laveti ira cake ena gauna ni nodra dredre.
Na watiqu, o via tukuna beka e dua na ka ena ka bibi oqo?
Sister Rosana Soares: Io Era tu eso na tamata era duidui ena nodra dau sotava na bolebole vata ga se na nodra sotava na rarawa tikoga.
Eso vei ira era nanuma nira sa vakasavasavataki ena ligana na Dauveibuli Cecere Duadua, o koya na noda Kalou. Eso vei ira era nanuma ni sa guilecavi ira na Turaga ka taroga vakawasoma “Na cava?” ni bera na ituvaki vakaoqo. Eso tale era cakacaka ena vosota kei na vakabauti Jisu Karisito ka rawa ni ra raica ka ciqoma na loma ni Turaga vei ira me rawa ni ra vakabula vakayalo na yalodra. Eda tiko qo e vuravura me da vulica ka tubu. Eda na raica vakamalua na vua ni noda sasaga; e dodonu ga meda toso tikoga ka vosota. E sega ni rawarawa, oqori na vuna e tiko kina vei keda na noda iVakabula o Jisu Karisito!
Elder Soares: Vinaka vakalevu iVakamacala yalomatua.
Eso na noda bolebole era vu mai na ituvaki ni bula oqo, ka ra na sega ni tomani tiko kina bula tarava. Nikua eda na sega beka ni rawa ni taura vakavinaka na vuna kece ni noda bolebole se na madigi era na solia vei keda meda tubu. Ni da vosota ena ivalavala dodonu, ena rawa ni vakatakila vei keda na Turaga na kila ka cecere cake me baleta na noda veivakatovolei kei na kena inaki ena noda bula.