E dua na Piano ni Parofita
Na italanoa oqo e a yaco mai Greater Accra, Ghana.
E dua na cauravou na yacana o Parofita e rua na nona takete bibi.
“Na ivakatagi e vosa me rawa ni ra kila taucoko na tamata” (iVolanisere ni Gonelalai, iii).
E dau taleitaka Parofita na ivakatagi. E dau taleitaka vakabibi na sere ni Lalai kei na sere ni Lotu. E dau vakagigitaka na sere ena siga taucoko. A raitayaloyalotaki koya ni dabe tika ena dua na piano, ka tabaka na nona sere taleitaki. E raitayaloyalotaka talega ena nona vakavulici ira eso tale na tamata ena iwalewale ni tabapiano.
E dua ga na leqa. E sega ni dua tiko na nona piano.
A vakatarogi o Parofita e dua na siga vei nona bisopi.
“O sa tuva beka e dua na takete me baleti na Porokramu ni Gone kei na iTabagone?” a taroga o bisopi.
“Io” kaya o Parofita. “Au via vulica meu kila na taba piano.”
“Oqori e dua na takete vinaka,” e kaya na bisopi.
“Niu yacova yani na takete oya,” a kaya na parofita, “sa na qai dua tale na noqu itakete. Au vinakata meu vakavulica e 20 tale na tamata mera kila na vakatagi.”
“E rua na takete vinaka oqori,” a kaya o bisopi.
“E dua ga na leqa,” e kaya o Parofita. “E sega ni tiko na noqu piano.”
“Ia, me da raica mada na cava eda rawa ni cakava.”
Ena lotu ena Sigatabu ka tarava, a tukuna o bisopi vei Parofita ni sa kunea e dua na veiwatini daukaulotu e rawa ni vakavulici koya. Era na kauta mai na piano livaliva me baleti koya kei ira tale eso me ra vakatovotovo. Rau a vinakata me rau vakavulica e levu na tamata na sala me vuli vakatagi piano.
A vosa na bisopi vei ira na tamata. A vosa o Parofita vei ira na tamata. Vosa na matavuvale nei Parofita vei ira na tamata. Sega ni dede sa robota na tabanalevu na veitalanoa ni vuli vakatagi piano. Sa vakakina vei ira tale eso.
“E vuqa na noqu itokani era sega ni lewenilotu era vinakata me ra vuli,” a kaya o Parofita vei bisopi.
“Era ni ra lako mai,” a kaya o bisopi. “Rau na solia vei iko na daukaulotu e dua na ivola me vukei iko mo vulica na lesoni. Ni ko sa vuli oti, sa rawa mo vukei rau mera vakavulici ira na tamata. ”
“Oqori na ikarua ni noqu inaki!” A kaya o Parofita.
Sega ni dede sa vakatovotovo tiko kei rau na daukaulotu o Parofita. E dau taleitaka na vulica na ibalebale ni ivakatakilakila yadua ni vakatagi kei na nodra biu vata kece me lagata kina e dua na sere. E rua na nona itokani mai na Lotu, o Kelvin kei Alexander, erau a vuli talega. Ni oti e dua na vula, eratou sa tekivu veivakavulici talega na lewe tolu na gonetagane oqo.
Ratou sa dau vakavulica na cauravou ena veisiga na kalasi ni piano livaliva ena vale ni Lotu. Taumada e rauta e 10 na gonevuli, qai 20, qai 50!
“Oqo na ka marautaki!” A kaya o Kelvin ena dua na siga ni sa oti na kalasi.
“Au vakabauta ni marau na Tamada Vakalomalagi baleta ni da sa vukei ira tiko eso tale me ra vuli,” a kaya o Alexander.
A deguvacu o Parofita. Sa mai vukei ira tiko e vuqa sara na tamata na nona inaki.
Ia e tiko tale e dua na ka e vakamarautaki Parofita. Ni ra vakatovotovo na vo ni gonevuli ena sere ni Lalai, era sa vulica talega na veika me baleta na Tamada Vakalomalagi. Eso vei ira era tarogi Parofita kevaka e rawa ni ra vulica eso tale na ka me baleta na Lotu.
Ia na ka dina, eso vei ira na tamata era a vulica taumada me baleta na Lotu mai na vuli piano sa mai yaco sara mera papitaiso.
“Ena gauna oqo ni soqoni,” e kaya o Parofita, “eda duavata ka lagata vata na sere eda dau lomana.”
ILLUSTRATIONS mai vei Violet Lemay