Vakavakarau ki na Siganimate
“Qarava na Tamada ena yacana, ena yalo savasava kei na liga savasava” (2 Nifai 25:16).
“Yadra cake, Lydia,” e kaya o Nau. “Oqo na siga Lotulevu ni Savasava!” Mai Rusia, na vanua e vakaitikotiko kina o Lydia, dau bibi na siga Lotulevu ni Savasava me vakavakarau ni Siganimate.
E vuki yani o Lydia ka raica na nona katubaleka. Se butobuto tu ga e tautuba.
“Nau, au sa oca sara ga,” e kaya o Lydia. “E rawa beka niu moce mada vakalailai ka qai cakacaka malua?”
A matadredredre o Nau ka dabe e yasa ni loga. “E dua tiko na vuna eda dau yadra kina vakamatakalailai ena siga nikua. “O kila beka na vuna?”
E vakasama vakaukauwa o Lydia, ia se sega ga ni kila.
“Eda cakacaka vakaukauwa me savasava na noda vale me ivakananumi kina vei keda ni gauna a savata kina o Jisu na yavadra na nona tisaipeli. E lomani ira ka qaravi ira na tani, ka da vinakata me da veiqaravi me vakataki Jisu ena noda lomanivale. Nikua na siga meda nanumi Jisu! ” A kaya o Nau.
A vinakata o Lydia me veiqaravi me vakataki Jisu, sa mani lade sara yani mai na imocemoce. Ena vo ni siga oya, sa cakacaka sara vakaukauwa. Samaka na vuloa, savata na isulu, ka veivuke ena vakasaqari ni kakana. Ni sa cava na siga, sa taleitaka sara okoya na veika sa cakava. Era tatalivaliva na kena savasava na veikakece.
Na siga e tarava sa Vakaraubuka ni Siganimate. E bulia na yaloka ni Siganimate o Lydia, o Nau, kei Tata. E vaqara lalai taki na taudaku ni yaloka ka sovari mai tuba na yaloka droka. Era droinitaka ena yaloka me kena ivakarau ka ubia ira yadudua ena kadrala waicala. Era sa qai tonia na yaloka ena loma ni boro damudamu, lokaloka, kei na drokadroka. E taleitaka o Lydia na kena vinaka na iwalewale kece ni kena cawiri vinaka na rairai ni boro ena yaloka.
Ni ra sa mamaca na yaloka, sa kauta sara mai o Lydia na itaba lailai ni nona matavuvale ka yaduataka sara ena loma ni yaloka. Na Vakaraubuka oqo e dua na siga ni soqoni vata ka nanuma tiko na solibula nei Jisu. Oqo na siga ni macawa a mate kina o Jisu. Na yaloka e vakavotuya vei Lydia na ibulubulu ka davo koto kina o Jisu. E ratou cakava na matavuvale nei Lydia na nodra vinaka duadua me ra nanumi Koya.
Ena Vakarauwai Tabu, a cakava o Nau na kulich (madrai ni Siganimate). Na caka ni kulich e dua na ivakarau bibi ni siga ni mate e Rusia. Era dau tovolea na tamata me ra dau vakarokoroko ena gauna e vavi kina na kulich . E vakasamataka o Lydia na nona matavuvale, na Tucaketale nei Jisu, kei na veika e dau vakavinavinakataka o koya. E rawarawa me vakasamataka na veika vakayalo ni sa savasava ka veivakacegui na nona vale.
Sa yaco sara mai na itinitini ena Sigatabu ni Siganimate! Sa dua na nona marau o Lydia! Era a veisiko mai na wekana. Era dovia vata na kakana totoka a vukea na kena vakasaqari o Lydia. E tiko na pie, kulich, soseji, kei na cheese. Ni ra kana voli, era qai wasea na nodra ivakadinadina ka tukuna na veika era vakavinavinakataka.
Ni oti na vakayakavi era qai qitora e dua na qito taleitaki. Na tamata yadua e taura e dua na yaloka droinitaki qai dirika vakamalua ki dua tale na yaloka. Na tamata e kavoro duadua eliu na nona yaloka e lusi. Sakure toka na ligai Lydia ni saga tiko me tabaka kaukauwa yani na yaloka nei tavalena. “Vakaukauwa, yaloka!” a kailavaka yani. Qai kavoro vakamatailalai na nona yaloka lokaloka. Sa tu sara tu ena yaloka kakavorovoro oya edua na itaba ni nona matavuvale.
E matadredredre o Lydia ni raica na itaba. A sega ni nanuma ni a lusi ena qito o ya. A vakasinaita na yalona e dua na yalo vakacegu, ka mamarau. A cakacaka vakaukauwa o koya me vakavakarau ki na Siganimate oqo ena nona vukea ka lomana na nona matavuvale. Ena vuku ni tucaketale i Karisito, era na bula kece tale!
Droini mai vei Sofia Cardoso