Na Yalo Vinaka.

Mai vei María Marta Molina de Monterroso

(Yavutaki ena italanoa dina)

E vakaitikotiko o koya e vola mai Quatemala, Guatemala.

“Au na ovici iko ena liga ni noqu loloma” (Vunau kei na veiyalayalati 6:20).

A young Guatemalan boy in the font after being baptized hugging his father. Boy in bed with stomach pains Boy in hospital bed with his parents at his side.

Sa dua na mataka totoka ka makare e San José Pinula, e dua na tauni lailai volekata na siti o Guatemala. “Au sega ni rawa ni wawa!” A kaya o Josua vei ganena lailai. Nikua na nona siga ni papitaiso!

Ni ratou yaco yani ki Lotu na matavuvale, erau sa vakaisulu vulavula sara o Josua kei Papá. Taumada, a vakila o Josua e dua na rere lailai. Ia a taura na ligana o Papá ni rau gole sobu ki na tobu, ka sega ni vakila na rere. Ni sa mata mai wai o Josua, sa matadredredre sara na matana.

Erau qai veisau o Josua kei Papá ena isulu mamaca. Sa qai tabaka o Papá, nona momo o Joshua kei na tukana ena ului Josua. Ka vakadeitaki koya me lewe ni Lotu i Jisu Karisito ni Yalododonu Edaidai. A rogoca o Josua ni kaya o Papá, “Ciqoma na Yalo Tabu.”

“Au sa marau saraga!” a kaya o koya ni a mokoti Papá.

“Nanuma tiko na yalayala o sa cakava nikua,” e kaya o Papá. “Kevaka o vakamuria, ena tiko vata kei iko na Yalo Tabu. O na sega sara ni tu duadua.”

Ena dua na mataka ni oti e vica na vula, a yadra cake o Josua ena tagi. Sa mosi kaukauwa na ketena! “Na!” A kaila mai na nona idavodavo o Josua. “Na ketequ e sa mosi dina!”

Na mosi ni ketena e sa qai mosi ga vakalevu. E sega saraga ni taubale rawa o koya. A solia vei Josua o Papá e dua na veivakalougatataki ni matabete, oti sa qai rau kauti koya kei Na me laki raici vuniwai.

E kaya na vuniwai ni gadreva o Josua me sele sara ga. Sa domobula dina na kena irogorogo.

“Keitou na kauti iko ki na dua na rumu digitaki mo laki sele kina,” a kaya o vuniwai. “O na sega ni vakila e dua na ka, baleta ni o na moce. Ka rau na waraki iko orau nomu itubutubu e tautuba ni rumu ni veisele .”

Sa qai rere ga vakalevu o Josua. Na cava e sega ni rawa ni rau tiko kina na nona itubutubu ena loma ni rumu? Sa sega ni tarova rawa na nona tagi.

A vosa vakamalua mai o Na. “Na cava e rawa me tou cakava me vukei iko mo yalo vinaka?” a kaya.

“Au kila na ka kedatou rawa ni cakava,” a kaya o Josua. “Yalovinaka lagata vata kei au na ‘ Au Luve ni Kalou’. Oti qai dua tale na nodatou masu.”

Ni ratou lagasere vakanomodi, e nanuma lesu o Josua na kena lagati na sere ena nona papitaiso. Ni ratou masu tiko, a vakasamataka o koya na veika a cavuta o Papá ena nona siga ni papitaiso: “e rawa ni tiko vata kei iko ena veigauna na Yalo Tabu. O na sega sara ni tu duadua. ”

Se vakila tikoga o Josua ni ra sa kauti koya yani na nasi ki na rumu ni veisele. A sega ni raica rawa na matadra na vuniwai kei na nasi baleta ni ra daramaka tiko na matavulo. Ia ni raica na matadra, e kila o koya ni ra nona itokani ka na dau qaravi koya vakavinaka.

Ni oti na nona sele era kaya na vuniwai ni na gadreva o Josua me vakacegu. E se wawale tikoga ka mosi, ia na mosi ni ketena sa vinaka cake sara. Sa sega tale ni via tagi o koya. Sa kila ni o koya ni sa na vinaka.

“Au vakila e dua na ka e lomaqu,” a kaya o Josua vei Na kei Papá. “Sa dua na yalo vinaka.”

“Oqori e dua vei ira na sala eda vakila kina na Yalo Tabu,” e kaya nona Na.

A deguvacu o Josua. A marau o koya ni tiko vua na isolisoli ni Yalo Tabu. Ena vuku ni Yalo Tabu, ena sega sara vakadua ni tu taudua o koya.