iTokani ki na iTokani
Vakila na loloma i Karisito
Mai na veivakatarogi kei Haley Yancey.
Noqu tubu cake tiko mai Japani, a soli vei au e dua na iVola Tabu e koronivuli. E rau tiko veitikivi na vosa vaka Valagi kei na vosa vaka Japani. A tukuna na Qasenivuli Liu vei keitou me vakayagataki ena kena vulici na vosa Vakavalagi.
Noqu wilika tiko, au vulica sara na veika me baleti Jisu. O cei na tamata oqo ka sinai tu ena loloma? Au taroga. Na vosa a cavuta o Koya e kauta mai vei au na marau. Au sa gadreva dina meu kila tale e levu na ka me baleti koya.
Ni oti vakalailai, au sotavi rau sara na daukaulotu. Rau solia vei au e dua na iVola i Momani ka kerea meu wilika ka masulaka. Au taleitaka niu wilika baleti Jisu ena iVola i Momani talega. Au a masulaka ka vakila ni sa dina.
E sega ni dua tale ena noqu matavuvale e vinakata me vulica na veika me baleta na Lotu. E vakavulica o Jisu ni dodonu me da rokovi ira na noda itubutubu, ia erau sega ni vinakata na noqu itubutubu meu lewena na Lotu. Sa dredre sara.
Au wasea vei rau na noqu itubutubu na veika au vakila. Au wasea vei rau na noqu masu. Se sega ga ni rau kila vakavinaka. Era vakataroga se cava au via biuta tu mai kina na neitou Lotu.
Au tovolea tikoga noqu sasaga kei na vakamacala. Sa yaco me rau kaya na noqu itubutubu niu sa rawa ni papitaiso. Ni oti e vica na yabaki, a papitaiso talega o tinaqu.
Au kila niu a vakalougatataki niu vinakata meu muri Jisu. Au taleitaka na vulica na ka baleti Koya, kau kila na noqu muri Koya ena kauta mai na veivakalougatataki.
E Vinakata o Jisu Meu Muri Koya.
E vinakata o Jisu meda muri Koya ena noda papitaiso. Wilika tale na veitikina eso oqori. Qai rokataka na ibulibuli rau veidonui.