Painia ena Veivanua Kecega
E Kunea o Dinis e dua na iSaunitaro
A sodrega na meteresi ni idavodavo tabarua ena gauna a vuki kina o Dinis. A veivukiyaki ena bogi taucoko. Ia a sega ga ni moce rawa!
Vakacava ke rau cala na daukaulotu? A vakasamataka o Dinis. Vakacava ke sega ni lotu dina oqo? Vakacava ke‘u sa muria tiko na sala cala? A vakasosataki koya tikoga na taro oqo.
E ratou a lewena na Lotu na matavuvale nei Dinis ena rua na yabaki yani ki liu, ni sa yabaki 10. Ena imatai ni gauna ni rau vakavulici iratou na daukaulotu, a vakila sara o Dinis ni dina na veika e rau vakavulica. O Dinis kei na nona matavuvale e ratou a isevu ni tamata me ra lewena na Lotu mai Potukali. E a dua na painia o Dinis!
Ia ena dua na gauna lekaleka oqo e sa tekivu me lomaleqa. Vakacava kevaka a sega ni digidigi dodonu na nona papitaiso?
A sega ni tukuna o Dinis vua e dua ni lomaleqa tiko. Sega vei iratou na tacina se ganena. Sega mada ga o rau na nona itubutubu. Ia ena bogi nikua, sa ikoya ga oqori na ka e vakasamataka voli.
A mai biuta yani e dua na icegu ni lomaleqa o Dinis. A rai sobu yani ena yasa ni idavodavo. E rau moce lutu na tacina ena idavodavo e ra. E a tu taudua o Dinis.
A vakila o koya ni gadreva me taroga na Kalou kevaka e dina na Lotu. A tekiduru o koya ena nona idavodavo. A vakacuvara na uluna ka tekivu masu.
“Yalovinaka, Na Kalou,” a kaya vakamalua o Dinis. “Vakaraitaka mai vei au ke a raici kemudrau dina kei Jisu o Josefa Simici.”
Sa masu oti vakavuqa e liu o Dinis. Ia a duidui ena bogi oqo. A gadreva dina o Dinis me kila. A masu vakaukauwa cake sara mai na veigauna e liu me vukei.
“Au sega ni vinakata me‘u cala,” a vakasolokakanataka o koya. “Au vinakata ga me‘u kila na ka dodonu.”
Sa qai vakila o Dinis e dua na ka. A kaukauwa ka veiragiti na yalo oya. A tubu me yacova ni sa vakila taucoko na yagona. A vakila ni vaka me sa na kacabote ena reki!
A kila o Dinis ni ka e vakila oya sa ikoya na Yalo Tabu. Sa sauma na Kalou na nona masu! E rau a dina na daukaulotu. E dua dina na parofita o Josefa Simici. Na nona papitaiso a sega walega ni digidigi vinaka. E digidigi vinaka duadua.
E davo vakatadraicake o Dinis ka raica cake tu na dokanivale. Sa yali na nona lomaleqa. A ologi koya vakavinaka ena itutuvi. Ni bera ni qai vakila, sa mai lutu yani na nona moce.
Ni sa qase cake mai o Dinis, a dau nanuma tu ga na bogi a masu kina ena nona idavodavo tabarua. E kila o koya ni sa tiko ena sala dodonu ena nona lewena na Lotu i Jisu Karisito. Ka kila o koya ni na dau rogoca na nona masu na Tamada Vakalomalagi.
O Potukali e dua na matanitu ena ra kei Iurope.
E tiko e dua na valetabu e Potukali. A vakatabui ena 2019.
E tiko mai Potukali na sitoa makawa duadua ni ivola e vuravura.
A papitaiso o Dinis ena dua na tobu ni sisili ena vale ni kaulotu.
A lak‘i kaulotu ki na veiyanuyanu ena ra ni baravi kei Sipeni, Potukali, kei Aferika.
O Dinis kei iratou kece na tolu na tacina eratou a lai kaulotu ena dua vata ga na gauna!
iVakaraitaki mai vei Sammie Francis