Mai na Mataveiliutaki Taumada
Ko Sa Dua na Luvena Lomani na Kalou
Tauri mai na Kakaburaki ni iTokani ki na iTokani Me Baleti Ira na Gonelalai: 2021. Sarava ena ChurchofJesusChrist.org/broadcasts.
Kemuni na noqu itokani itabagone lomani, au lomani kemuni! Niu raici kemuni, au dau nanumi ira na makubuqu vakarua. O ni kila ena noqu matavuvale, e sivia na 100 na makubui keirau vakarua era se bera ni yabaki 12? Era ramase ka vakamareqeti sara, me vakataki kemuni.
Ko sa dua na luvena lomani na Kalou! Yalovinaka ni nanuma tiko o ya. Kevaka o nanuma tikoga e duabulu na dina savasava oya, sa rawa ni o sotava na leqa kecega ena vakabauta kei na yaloqaqa.
Ni ko sa papitaiso ka vakadeitaki, o sa vakayacora e dua na yalayala ni ko na muria na Turaga. Ka sa yalataka o Koya ni na tala mai na Yalona me dusimaki iko. Vakasamataka mada na rarama kei na loloma e rawa ni o kauta mai ki vuravura me vaka e dua na dauvakamumuri yalodina i Jisu Karisito!
Kemuni na noqu itokani gone lomani, au dokai kemuni vakayadua! Au kila ni sa wanonovi kemuni tiko na Tamada Vakalomalagi. E lomani iko vakalevu sara o Koya, ka vakakina o iau.
Na iTuvatuva ni Bula Marau nei Tamada Vakalomalagi
Rokataka na itaba mo vulica kina eso tale na ka me baleta na ituvatuva ni Tamada Vakalomalagi. Wilika eso tale na ka ena Eparaama 3–5.
Eda a bula tu kei na Tamada Vakalomalagi ni bera ni da mai sucu.
A kerei Jisu Karisito me bulia na vuravura me baleti keda.
A bulia o Jisu na matanisiga, na vula, kei na kalokalo me solia na rarama.
A vakarairai vinakataka o Jisu na vuravura ena vunikau kei na senikau. A bulia na ika, manumanu vuka, kei na manumanu yavaiva.
A qai biuti Atama kei Ivi e vuravura na Tamada Vakalomalagi, ko irau na imatai ni noda itubutubu.
E lomani au na Tamada Vakalomalagi ka dau wanonovi au tikoga.
Droini mai vei Elise Black