Sere kei na Vuso ni Sovu
A dredre kubukubu o Alice ni vakasamataki Peresitedi Kimball ni lagasere tiko kei na dua na bulumakau.
A biuta o Alice e dua na itaki noodles ki na nona veleti na tacina. E dau lomani iratou na tacina kei na ganena lalai—o iratou limalima! E dau vakila na vinaka ni yalona ni dau vukei iratou. Ia ena so na gauna e dau dredre ni da qase duadua. Tekivu mai na gauna a lako mai kina ki vale na gone sucu vou, sa gadrevi vakalevu cake sara na nona veivuke. Sa levu sara na ka e yaco tiko ena nona vale!
“Na cava o vulica ena lotu nikua?” A taroga o Ta.
“Jisu!” A kaya na taci Alice lailai o Sarah. A sova vakasivia na kirimu ni apolo ena nona peleti.
A matadredredre o Alice. A rairai matavinaka o Sarah. Ka sakuca talega.
“Au a vulica me baleti Peresitedi Kimball” A tekivu kaya o Alice. Ia a qai kaci mai o Na mai na rumu kadua. E gadreva na veivuke nei Ta vua na gonelailai.
“Vosota,” a kaya o Ta. “Au na totolo tale mai.”
Ni vukei Na tiko o Ta, a vukei iratou na kena vo o Alice. A vakatasovataka o Eric na mena bilo sucu. A samaka o Alice. A tekivu tagi o Sarah. A mokoti koya o Alice. A vinakata o Clara me dua tale na kena noodles. A solia vua o Alice eso.
Ena gauna mada ga e lesu mai kina o Ta, e sa kosakosa tikoga ka sakuca na valenikuro. A diva tu o Alice me rawarawa cake na nona vakila na vakacegu.
Oti oya, sa mai oti yani na vakasigalevu. A vukei iratou na tacina o Alice me ratou kauta na iyayanikana ki na siqi. Sa qase toka o Alice ka na sega ni voroka na iyaya. Sa mani nona itavi na savata na iyaya ni kana. A vakasinaita na siqi ena wai sovusovua.
Au diva me‘u kakua vakadua ni cakava e dua na cakacaka ni vale, a vakasamataka o Alice. A qai nanuma o koya na ka a vulica ena Lalai me baleti Peresitedi Spencer W. Kimball. Ni se gone, e dau cakava talega na cakacaka e vale. A dau lagata na serenilotu ni lobaka tiko na sucu ni bulumakau!
A raitayaloyalotaka o Alice ni rau domoruataka taka tiko e dua na sere o Peresitedi Kimball kei na dua na bulumakau. A sosokiki.
Sa qai yaco mai vua e dua na vakasama. E rawa ni vakataka na parofita! A taura na ivolanisere ka dolava ki na imatai ni serenilotu.
Ia me na saga me tadola tikoga. A biuta o Alice na ivola ena katubaleka. A ciqimaka e dua na yasa ni ivola ena daku ni dua na pokete itei. A qai ciqira na yasana kadua ena daku ni dua na bilo bibi. Oqo sa qai rawa ni na raica tiko ena gauna e cakacaka tiko kina.
Ni masia tiko o Alice na veleti titobu, bilo, kei na sevuni, a lagata o koya na serenilotu. E kanakana vinaka e ligana na wai katakata, sovusovua. Ka vakamarautaka na yalona na sere.
Ena siga ka tarava, a lagasere tale o Alice. Kei na siga ka tarava yani oya. A tovolea me nanuma na qaqa ni sere yadua. Sa qai toso yani ki na kena e tarava. A vulica talega o Alice na veiserenilotu vou! E a vulica na taba piano me vica na yabaki. Ni sega ni kila e dua na serenilotu, e a vulica sara o koya na kena ilagalaga ena piano.
Sega ni dede sa sega soti ni dau leqataka o Alice na masi yaya ni kana. Ena so na gauna e dau taleitaka sara o koya! E totoka na lagasere kei na vakananumi Jisu. Na vulici ni dua na serenilotu vou yadua sa vaka e dua na itokani vou. Veitalia na levu ni kosakosa ni bula e wavoliti koya tu, na serenilotu a vukea me vakila na vakacegu.
Droini mai vei Erin Taylor