iVolaniveisiga nei Tamaqu
Na italanoa oqo a yaco mai Taiti.
A dabe o Allan ena dua na idabedabe ena tautuba ni nona vale. Sa dromu tiko yani na matanisiga. Era duri tu na veivunikau ka tu mai dakuna na lomalagi piqi ka seninawanawa.
A cega na draunipepa ni ivola e wilika tiko. E sega ni dua na kena iyaloyalo. Ia a sega ni kauwaitaka o Allan. A taleitaka vakalevu na nona wilika tiko na ivola oqo!
E wilika ga vakatotolo na maqosa ni volavola i Tamana. A nanuma o koya na tikina oqo! E dau vakavuna me dredre.
Ena gauna vata oya, a lako mai kina ki tautuba o Tata. “Na cava e lasa?”
“Au wilika tiko e dua na nomu ivola.” A vakasuka dredre o Allan. “Au taleitaka na tikina me baleta na niu.”
“Oi, o tukuna tiko na noqu ivolaniveisiga.” A dabe tikivi Allan o Tamana. “E tukuna tiko na italanoa ni noqu bula. Ia e sega walega ni baleti au. O tiko talega kina. Sa vakakina o Na, kei ira na tacimu kei na ganemu.”
“Me vakataki Nifai!” A kaya o Allan. “A vola na italanoa eso me baleta na nona bula, ka vola me baleta talega na nona matavuvale.”
“Dina!” A kaya o Tamaqu.
“Au taleitaka vakalevu duadua na tikina e baleti iko,” e kaya o Allan. “Me vaka na gauna o a kaulotu tiko kina eke e Tahiti.”
“Au taleitaka vakalevu duadua na italanoa me baleti iko ,” e kaya o Tamaqu. “O kila beka ni keirau a vakayacani iko ena yaca e loma nei Elder Bednar?”
“O sega ni tukuna vei au oqori! Au sega ni rawa ni wawa me‘u wilika na tikina oya.”
A dredre o Tamaqu. “E vuqa tu na italanoa ena noqu ivolaniveisiga. Au a tekivu volavola tiko ena ivolaniveisiga mai na gauna au a se qai yabaki walu kina. ”
“Me tekivu mai na gauna o se qai yabaki walu?” A taroga o Allan. “Oqori e dua na gauna balavu sara.”
E dredre o Tamaqu. “Au sega ni sa qase sara .”
A vakasamataka vakalalai o Allan. “Au sa na yabaki walu ena dua na gauna walega oqo,” a kaya. “E rawa beka ni dua na noqu ivolaniveisiga ena noqu siganisucu?”
“Io e rawa!” A kaya o Tamaqu.
“Au na rawa ni vola na noqu italanoa me rawa ni ra wilika na luvequ ena dua na siga.”
“Oqori e vaka e dua na ivakarau tudei cecere ni matavuvale!” A kaya o Tamaqu.
Droini mai vei Alessia Girasole