E Dua na iTukutuku ni Koniferedi mai vua na Parofita

Kune Vakacegu e Lomamu

Mai vei Peresitedi Russell M. Nelson

Tauri mai na “Vunautaki ni Kosipeli ni Vakacegu” kei na “Na Kaukauwa ni Bulabula Vakayalo,” Liaona , Me 2022.

Au lomani kemuni ka masulaki kemuni e veisiga. E sa vuqa sara tu na veika dredre e vuravura. Na veisaqasaqa kei na matedewa e sa tara e vuqa na tamata. Na gadreva na vuravura na veivuke.

O Jisu Karisito e Ravouvou ni Vakacegu. Na Nona kosipeli sa sala tudei duadua ga me kunei kina na vakacegu. Ena gauna saraga oqo, eda gadreva na vakacegu duadua ga e rawa ni kauta mai o Koya.

O ira na daumuri Jisu Karisito e dodonu me ra tuva na ivakaraitaki me ra muria ko vuravura taucoko. E rawa vakacava ni da namaka me tiko na vakacegu e vuravura vakavo ga kevaka eda vakasaqara na vakacegu ena noda bula? E sega ni dua e rawa ni lewa na nodra ivakarau na tani. Ia e rawa ni da lewai keda.

Yalovinaka vakayacora na veika taucoko o rawa ni cakava mo tinia kina na veisaqasaqa ena nomu bula. Mo yalomalumalumu, yaloqaqa, ka kaukauwa. Oqori ena vukei iko mo vosoti ira na tani ka vakasaqara na veivosoti ni o cakava e dua na cala. Kerea na kaukauwa mai vei Jisu Karisito kei na Nona Veisorovaki me vukei iko.

Sai Jisu na Karisito! E bula tiko o Koya! E lomani iko ka na vukei iko o Koya.

veisaqasaqa: veiba se sega ni duavata

“Sa noqu veikacivi me‘u tinia na veisaqasaqa ka tiko e lomamu kei na nomu bula.”

Peresitedi Russell M. Nelson

Vakacavara na iTalanoa:

Na cava o na cakava ni yaco e dua na veisaqasaqa kei na dua na tacimu, ganemu, se itokani? Digitaka e dua vei ira na iyaloyalo e ra. Qai droinitaka e dua na iyaloyalo se vola me baleta na sala o rawa ni kunea kina na vakacegu.

Veivala

Na tauri ni veika e nona e dua tale

Na veivakalolomataki

iVakasala ni Veivakameautaki

• Cegu mada mo rawa ni yalo malumu mai.

• Nanuma tiko ni tamata taucoko era luve ni Kalou.

• Vakayagataka na domo vinaka.

• Vakasamataka mada na veika e vakila o koya kadua.

• Veitalanoa kei rau na nomu itubutubu.

• Masu.

• Wilika a dua na ivolanikalou.

• Kaya “Vosoti au” se “Au sa vosoti iko.”

Me‘u kunea vakacava na vakacegu?