Veivukevuke Tu ki Lotu
“Ni o lako mai vale, tukuna vei au na sere cava so o lagata ena Lalai,” a kaya o Jenny.
“Au na cakava!” a kaya na tacina o Miriama ni daramaka na nona ivava.
E sega ni rawa ni lako i lotu ena vei Sigatabu o ira kece ena matavuvale i Jenny. E ono tu na tamata ena matavuvale i Jenny. Ia e veirauti tu ga na ilavo i Na me volia e rua na tikite ni basi ena veimacawa. Sa dodonu kina me ra veivukevuke ena vodo basi ki lotu.
A diva o Jenny me rawa ni lako e veimacawa. Dau taleitaka o koya ni vulica na veika baleti Jisu Karisito. Dau taleitaka o koya na lagasere ena Lalai. Dau vinakata o koya me raici ira na nona itokani. Kena ilutua, dau vinakata o koya me vakila na loma vinaka, mamarau e rawata tu ga e valenilotu. Ia nikua sa na tiko e vale o koya.
“Sa gauna ni lako.” A mokoti Jenny kei tacina kei ganena o Na ena vakamoce.
A tovolea o Jenny me matadredredre ni biubiu o Miriama kei Na. Ia a vakila o koya e dua na ka ena nona itilotilo ni vakaraica tu na nodrau gole yani. Au diva me sa noqu gauna ni lako, a vakasamataka o Jenny. E dau dredre tu na tiko e vale.
Vinakata mo rokarokataki? A dulaka o Marco, na ganei Jenny lailai eso na peni duiroka kei na pepa.
A deguvacu o Jenny.
Ena vica na auwa ka tarava, a wili talanoa o Jenny ka rokarokataki vata kei Marco kei rau na tuakana. E sa lasa, ia a vakasamataka tikoga o Jenny na lotu. Era sa vulica tiko beka ena Lalai na sere vou eso ena gauna oqo? Na cava e tukuni tu ena lesoni nikua?
iTinitini sa rogoca o Jenny na tadola ni katuba e liu. Sa lesu mai o Na kei Miriama!
“Na!” Miriama!” A cici ki na katuba o Jenny ka mokoti rau.
A biuta sobu o Na na nona bausi. “Tou veitalanoataka mada na ka keirau vulica mai valenilotu.”
Era sa dabe vata vakataucoko. A dreta mai o Na na ivola ni serenilotu lailai e maroroya tu ena nona bausi. Sa lagata na matavuvale i Jenny na “Rawa ni Tawamudu na Matavuvale.” Sa kila taucoko o koya na qaqana.
Qai tarogi Miriama o Jenny me baleta na Lalai. A dolava o Miriama na nona iVola i Momani ka dreta mai e dua na tiki ni pepa lobi. A dulaka o koya me rawa ni ra raica taucoko. Oya e dua na iyaloyalo a rokataka o koya me baleti Jisu kei na so na gone.
“Keimami rokataka e dua na iyaloyalo ka lagata na ‘I’m Trying to Be like Jesus.’ Keimami a qai veivosakitaka na sala e rawa ni vukei ira kina na tamata kecega o Jisu.”
“Keimami a veivosakitaka talega oqori ena iSoqosoqo ni Veivukei,” a kaya o Na. “E rawa ni vukei keda o Jisu Karisito ni da rere se galili.” A dreta mai o Na e dua na tiki ni pepa mai na nona bausi. “A solia na qasenivuli vei keimami kece na vosa cavuti oqo mai vua na parofita. ‘Ni o digitaka mo tiko ena yasa ni Turaga, o sa sega ni galili.’”*
“Eke sara mada ga e vale!” A kaya o Jenny.
A matadredredre o Na. “E vale sara mada ga. Sa rawa ni da vakila tikoga na voleka ni iVakabula kivei keda.”
A matadredredre vakalevu o Jenny. E sega ni dau lako tu ki lotu o koya ena veimacawa. Ia sa rawa ni vakilai Jisu voleka o koya e vale. Ka sa nanamaki tu o koya ena nona gauna ni gole tale ki lotu.
Droini mai vei Laura Catrinella