Timi kei na Taledi
Era cakacaka vata na timi vinaka duadua ka veivukei vakai ira me ra vinaka cake.
“Cici, Jillian, cici!” A kailavaka yani o Ta. Na tamai Jillian e dauveivakatavulici ni nona timi ni veicaqe. Era a vakatovotovo vakaukauwa ni vakavakarau tiko ki na qito levu duadua. A katakata na matanisiga, ia a cici tikoga o Jillian.
Sa qai uvuca tu o Ta na sici. “Mai, da cegu mada.”
A dreta na nona tavaya wai o Jillian ka dabe vata kei ira na gonetagane. O koya duadua ga na goneyalewa ena timi, ia e sega ni kauwaitaka. Era a cakacaka vata ka veivukei vakai ira me ra vinaka cake. E dina ga ni sa wawale ka buno levu, a yalo marau tu ni qito vata kei na nona timi.
“Ta, keimami a vakacava tu nikua?” a taroga o koya.
A matadredredre o Ta. “Totoka! Au vakabauta ni sa vakarau tu na timi ki na qito.”
A matadredredre lesu o Jillian. Sa yaga sara na nodra cakacaka kaukauwa taucoko!
Ena nona ilakolako lesu ki vale mai na vakatovotovo, a raica o Jillian na nona itokani o Mei. Rau a tiko ena kalasi vata ga ni Lalai. Ia a sega tu ni lako mai o Mei ki na Lalai ena dua na gauna.
A matadredredre vei Mei o Jillian. “Bula, Mei! Au sa calati iko ena Lalai. O daumaka tiko?”
A raica sobu o Mei na nona ivava. “Sa sega ni via lako i lotu o tinaqu.”
“Baleta?”
“Au sega ni kila.” A laveta cake na uluna o Mei. “Io, au sa lako mada.”
A yaloyalo o Jillian ka vakaraici Mei ni lako yani. E rawa vakacava niu vukei Mei? a vakananuma o koya.
Ni sa yaco i vale o Jillian, a vakatagitaka eso na sere ni Lalai ena nona ukulele. A qai sureti ira na ganena o koya me ra laga mai. Era lagasere tu me yacova ni sa kacivi ira o Na me ra vakayakavi.
“Au na laki sikovi Sister Aurea tiko ni mataka,” a kaya o Na.
“E tinai Mei o Sisita Aurea, e dina?” A taroga o Jillian. “Rawa niu lako vata kei iko? E sega ni lako tiko mai o Mei ki na Lalai. Ia niu raici koya nikua, sa vaka me rarawa tu.”
“Io, o rawa ni lako,” a kaya o Na.
“Au na kauta mai na noqu ukulele! Au rawa ni vakatagitaka na sere ni Lalai. Au kila ni calata tu na kedra lagati,“ a kaya o Jillian.
Ni rau sa yaco ki na vale nei Mei ena siga ka tarava, a mokoti Mei o Jillian. Ni veivosaki tiko na tinadrau, rau a gole i tuba na goneyalewa. A vakatagitaka o Jillian na nona ukulele, ka digitaka o Mei na sere. Rau a veidredrevaki ka lagasere vata me yacova na gauna ni lesu i Jillian.
“Sa ka taleitaki na raici iko,” a kaya o Jillian. “Keimami sa calati iko ena Lalai.”
“Io, au diva meu rawa ni lako yani. Au na kerei tinaqu tale mada. ”
Na Sigatabu ka tarava, sa tiko e valenilotu o Mei. A dabe tikivi koya o Jillian. “Au marau sara ga ni o rawa ni lako mai,” a kaya o koya.
A matadredredre o Mei. “O au talega.”
Ni oti e vica na siga sa yaco tu me gauna ni qito veicaqe levu. A kerea o Jillian me cabora na timi e dua na masu ni bera na qito. Sa qai mai gauna tu ni qito. A cici sara vakatotolo o Jillian. A cakacaka vata kei na nona timi me rawata na polo ka caka kai. A qaqa ena qito na nona timi!
Ena bogi oya ni davo koto ena loga, a vakasamataki Mei kei na nona timi ni veicaqe. A marau o koya ni lewena e dua na timi, me vaka ga na nona marau ni lewena na Lalai. Era a veivukei taucoko vakai ira. A marau o Jillian ni rawa ni vukei ira na nona itokani, se tiko e valenilotu se na buturara.
Droini mai vei Marcos Calo