iVuvu ena Vanua Kecega
Sotavi Rau na Daukaulotu o Harriet
E rawa beka ni tiko vata tale kei Ta o koya?
A wadrava tu o Harriet na iyaloyalo kei Ta ena lalaga. Sa oti oqo e walu na vula na nona mate. A vakananuma o koya ke na rawa ni raici Ta tale. E sa calati koya vakalevu.
Tukituki, tukituki, tukituki.
A dolava o Harriet na katuba ni nodratou itikotiko lailai. A tucake tu e tautuba e rua na cauravou.
“Guten Tag! Bula! O keirau na daukaulotu mai Na Lotu i Jisu Karisito ni Yalododonu-Edaidai. Keirau na taleitaka na veivosaki kei na nomu matavuvale me baleti Jisu Karisito.”
A matadredredre o Harriet. E dua na ka baleta na ka rau a tukuna a vakalomavinakataki koya. “Au na tarogi Mutti (Na).”
Sa kunei Na o Harriet. “Rau sa tu e katuba na daukaulotu,” a kaya o koya. “Rau via vosa tiko vei kedaru baleti Jisu.”
A vakadudugusu o Na. “Tukuna vei rau ni sega nodaru gauna.”
“Ia rau rairai daumaka,” a kaya o Harriet. “Ena sega ni balavu.”
A dagava na kaloko o Na. “Sa donu. Me vica ga na miniti.”
Rau a curu mai na daukaulotu ka vosa vei Na, Harriet, kei na taci Harriet, o Carmen. Rau a tukuna vei ratou baleti Jisu kei na dua na ivola ka vakatokai na das Buch Mormon, na iVola i Momani. Rau qai solia ki na matavuvale i Harriet e dua na ilavelave me ratou wilika.
“Au vakabauta ni rawa ni keitou wilika e vica na drauna,” a kaya o Na, ni dolava tu na katuba. Ena vica na siga ka tarava, a wiliwili tu ga o Na. A wilika e cake na tikina eso kivei Harriet kei Carmen.
Au diva me rawa ni wilika oqo o Ta. Ena taleitaka o koya, a vakananuma o Harriet.
Ni rau lesu mai na daukaulotu, rau a vakatavulica na ituvatuva ni Kalou. “Eda a bula vata tu kei na Kalou ni bera noda sucu mai. Eda lako mai ki vuravura meda vuli ka vakataki Koya. Ni da sa mate, sa rawa ni da tiko vata tale kei Koya.”
Vakacava o Ta? A vakananuma tu o Harriet.
Rau a raici Harriet na daukaulotu. “Baleta ni a mate o Jisu ka bula tale, sa rawa ni da tiko tawayalani vata kei na noda matavuvale. Vakakina o ira na daulomani ka sa mate. ”
A vakila o Harriet e dua na inuinui kusari. Sa rawa vua me tiko vata tale kei Ta! A matadredredre vakalevu talega o Na—nai matai ena dua na gauna balavu.
A vuli tikoga o Harriet, Na, kei Carmen mai vei rau na daukaulotu. Ratou a gole ki lotu. A veitokani sara o Harriet kei na dua na gonetagane totoka na yacana o Dieter.
Oqo sa vaka me cilavi siga tu na rumu kecega ena itikotiko i Harriet. Sega ni dede sa navuca tu o Harriet kei na nona matavuvale me ratou sa papitaiso.
Na bogi ni bera na nodratou papitaiso, a tekiduru o Harriet vata kei Na kei Carmen me ratou masu. “Tamaqu Vakalomalagi,” a kaya o Harriet, “keitou sa vakavinavinakataki rau vakalevu na daukaulotu, na kosipeli, kei na neitou matavuvale. Keitou sa sega ni rawa ni wawa me papitaisotaki.”
Ni dolava na matana o Harriet, a raica o koya na yaloyalo kei Ta ka matadredredre. Sa sega ni rawa ni wawa o koya me raici Ta tale ena dua na siga.
E rua tiko na valetabu e Jamani.
E dua nai katolu i Jamani e kovuti tu ena veikau.
E wasea tu o Jamani e dua na iyalayala kei na ciwa na matanitu.
Ni sa tubu cake o Harriet, a vakamautaka na gonetagane totoka na yacana o Dieter.
Na gauna oqo sa dua vei ira na Apositolo o Dieter—Elder Dieter F. Uchtdorf!
E kaya o Elder Uchtdorf ni o Harriet “na cilanisiga ni [nona] bula.”
Droini mai vei Giovanni Abeille