“Koe Hina Vai Maumaú” Ko e Kaumeʻá, ʻAokosi 2023, pēesi–pēesi.
Ko e Hina Vai Maumaú
Naʻe fieinua ʻa Keiti. ʻE tokoni fēfē ʻa Sōfiá?
Naʻe hoko ʻa e talanoa ko ʻení ʻi Siela Leone.
Naʻe fakafanongo lelei ʻa Sōfia ʻi hono fakamatalaʻi ange ʻe heʻene faiakó ʻa e palopalema fakafiká ʻi he palakipoé.
Naʻe fehuʻi ange ʻe he faiakó, “Ko e fiha leva ʻa e hiva liunga faá?”
Ne hiki hake ʻe Sōfia hono nimá. Naʻá ne tali ange, “Tolu ono!”
Naʻe malimali ʻene faiakó. “Ko e tonú ia, Sōfia!”
Hili e kalasí naʻe taimi ke nau foki ki ʻapi. Naʻe luelue ʻa Sōfia mo hono ngaahi kaungāmeʻá. Naʻa nau toʻo kotoa ʻenau ngaahi hina vaí ke inu e toenga ʻo ʻenau vaí. Naʻe vela ʻaupito e ʻahó ni!
Ka naʻe fakatokangaʻi ʻe Sōfia ha meʻa faikehe. Naʻe ʻikai inu vai hono kaungāmeʻa ko Keití. Naʻá ne lue fakalongolongo pē.
“Keiti, ko e fē hoʻo foʻi hina vaí?” Ko e fehuʻi ange ia ʻa Sōfiá. Naʻe fieinua maʻu pē ʻa e taha kotoa ʻi he tuku ʻa e akó.
Naʻe talaange ʻe Keiti, “Naʻá ku maumauʻi ia ʻaneafi, pea ʻoku ʻikai ke u lava ʻo maʻu ha hina foʻou.” “Ko ia ai he ʻikai ke u lava ʻo ʻomi ha vai ki he akó.”
Naʻe sio hifo ʻa Sōfia ki heʻene foʻi hina vaí. Naʻá ne fakaʻamu ke ne lava ʻo vahevahe! Ka kuo ʻosi kotoa ʻene vaí.
ʻI he ʻahó kakato, naʻe fakakaukau ʻa Sōfia kia Keiti mo ʻene hina vai ne maumaú. Naʻe ʻikai faingofua ke maʻu ha vai maʻa ʻi he feituʻu ne nau nofo aí. Ko e tokolahi taha ʻo e fānaú naʻa nau maʻu ha foʻi hina vai pē ʻe taha ke fakaʻaongaʻi he taʻú kakato. Naʻa nau fakafonu ia mei ha fuʻu hina vai maʻa ʻi ʻapi. Te ke lava ʻo puke ʻi hono inu ha vai kehé. Kapau ʻe ʻikai ke maʻu ʻe Keiti ha hina vai, ʻe ʻikai ke ne lava ʻo ʻave ha vai mei ʻapi ke inu ʻi he akó.
ʻI he pongipongi hono hokó, naʻe fakakaukau ʻa Sōfia ki he founga ʻe lava ke ne tokoniʻi ai ʻa Keiti. Naʻe maʻu ʻe he fāmili ʻo Sōfíá ha ʻū hina pelesitiki naʻe fonu vai. Naʻe tānaki atu ʻe Sōfia ha taha ki heʻene kato āfeí, fakataha mo ʻene hina ʻalaminiumé. Naʻe toe mamafa ange ai e kató, ka naʻe ʻikai ke ne tokanga ki ai.
ʻI heʻene aʻu ki he akó, naʻá ne maʻu ʻa Keiti.
“Keiti, kuó ke ʻosi maʻu ha hina vai foʻou?” Ko e fehuʻi ange ia ʻa Sōfiá.
Naʻe kalokalo pē ʻa Keiti mo sio ki lalo.
Ne talaange ʻe Sōfia, “ʻOku sai pe ia. ʻʻOku ou maʻu ha foʻi hina maʻau.”
Naʻá ne ʻoange kia Keiti ʻa e hina vaí. Naʻe malimali ʻa Keiti.
“Mālō, Sōfia!” Naʻe fāʻofua ʻa Keiti ki hono kaungāmeʻá.
Lolotonga e kalasí, naʻe inu ʻa Keiti mei heʻene hina vaí ʻo hangē ko e fānau ko é. Naʻe fiefia ʻa Sōfia ke sio naʻe ʻikai fieinua hono kaungāmeʻá.
ʻI he ʻaho kotoa pē he uike ko iá, naʻe ʻomi ʻe Sōfia ha hina vai ʻe taha maʻa hono kaungāmeʻá. Pea ʻi ha pongipongi ʻe taha, naʻe toʻo hake ʻe he faʻē ʻa Sofia ʻene kató.
Naʻe pehē ange ʻe he Fineʻeikí, “ʻOi” “ʻOku mamafa ange ʻeni ʻi he anga mahení.” Naʻá ne fakaava ʻa e kato āfeí ʻo toʻo hake ʻa e hina vai kehe ʻe tahá.
“Ko hoʻo ʻuhingá ke faʻo e hina vai fakalahi mai ko ʻení ki he akó, Sōfia?” Ko e fehuʻi ange ia ʻa Mamí.
Naʻe kamokamo pē ʻa Sōfia. “Naʻe maumau ʻa e hina vai ʻa Keití, pea ʻoku ʻikai ke ne toe lava ʻo maʻu ha foʻi hina ʻe taha. Ko ia naʻe ʻikai ke ʻi ai haʻane vai ʻi he akó.”
“Ko e hā hono fuoloa hoʻo ʻave vai kiate iá?” Ko e fehuʻi ange ia ʻa Mamí.
Naʻe pehē ange ʻe Sōfia, “Ko e uike ní pē.” “Naʻe ʻikai ke u loto ke fieinua ʻa Keiti.”
Naʻe malimali ʻene faʻeé. “Ko e angaʻofa lahi ia hoʻo fakakaukauʻi ho kaungāmeʻá. Ko ha meʻa ia ʻe fai ʻe Sīsū. ʻOku ou fiefia ke sio ʻokú ke hangē ko Sīsuú.” Naʻá ne fāʻofua kia Sōfia. “Pea ʻoku ou tui ʻoku ou ʻilo ha founga ʻe taha te tau lava ai ʻo tokoni.”
Naʻe ʻoange ʻe heʻene Mamí ha hina vai ʻalaminiume kia Sōfia. “ʻOange ʻeni ki ho kaungāmeʻá ke lava ke ne toutou fakaʻaongaʻi ia. ʻI he founga ko iá, ʻe ʻikai fiemaʻu ia ke ke toʻo ha hina pelesitiki he ʻaho kotoa pē.”
“Moʻoni?” Ko e fehuʻi ange ia ʻa Sōfiá.
Naʻe kamokamo ange ʻene Mamí. “ʻIo. Kole ange pē ke ne tauhi lelei ia.
Naʻe ʻalu ʻa Sōfia mo e hina vaí ki he akó. Ko e ʻuluaki meʻa pē naʻá ne faí ko hono ʻoange kia Keiti ʻa e foʻi hiná.
Naʻe pehē ange ʻe Keiti, “ʻOi.” “Mālō ʻaupito, Sōfia!” Naʻe fāʻofua ʻa Keiti ki ai.
Naʻe ongoʻi loto-māfana ʻa Sōfia. Naʻá ne ʻiloʻi naʻá ne tokoniʻi hono kaungāmeʻá, ʻo hangē ko ia naʻe mei fai ʻe Sīsuú.
Ngaahi tā fakatātā ʻa Melissa Kashiwagi