“Koe ʻAho Lahi ʻo Siosiá,” Ko e Kaumeʻá, ʻAokosi 2023, 8–9.
Ko e ʻAho Lahi ʻo Siosiá
Naʻe talaange ʻe Siosiā, “ʻE vavé ni pē haʻaku papitaiso. Hangē pē ko Sīsuú!”
Naʻe hoko ʻa e talanoa ko ʻení ʻi ʻAositelēlia.
Naʻe lele ʻa Siosiā ki ʻolunga ki hono lokí mo e muimui ʻofi atu ʻa Matila ʻi mui. Ko ha ʻaho fakafiefia maʻu pē ia ʻa e taimi ʻoku haʻu ai hono kaungāmeʻá ke vaʻingá.
“ʻE lava nai ke ta vaʻinga ʻaki hoʻo lōpotí?” Ko e ʻeke ange ia ʻa Matilá.
“ʻIo!” Ko e tali ange ia ʻa Siosiá. Ko e taha ia ʻo e ngaahi meʻa ʻokú ne saiʻia taha ke fakahokó.
Lolotonga e hifo ʻa Siosiá ki tuʻa mei he lōpotí, naʻe sio ʻa Matila ki he ʻū tā ʻi he holisi ʻo e loki ʻo Siosiá. Naʻá ne tuhu ki he fakatātā ʻi lotomālié.
Naʻá ne fehuʻi ange, “Ko e hā e meʻa ko é?”
Naʻe tala ange ʻe Siosiā, “Ko hono papitaiso ia ʻo Sīsū Kalaisí.” “Pea ʻe vavé ni pē haʻaku papitaiso. Hangē pē ko Iá!”
“Ka ko e hā ʻokú ke teu papitaiso aí?” Ko e ʻeke ange ia ʻe Matilá.
Naʻe tala ange ʻe Siosiā, “Koeʻuhí ʻoku ou fie muimui kia Sīsū.” ʻI he taimi te u papitaiso aí, ko e meʻa ia te u palōmesi ke faí!”
Fakafokifā kuó maʻu ʻe Siosiā ha foʻi fakakaukau. “Te ke fie haʻu ki heʻeku papitaisó?”
Naʻe tala ange ʻe Matila, “Te u kole ki heʻeku mamí pe te u lava.”
Naʻe fakaʻau ke ofi mo ofi ange ki he ʻaho papitaiso ʻo Siosiá. Naʻá ne lau mei heʻene tohi talanoa mei he folofolá peá ne ʻalu ki he Palaimelí ʻi he uike kotoa pē. Hili ʻene fai ʻene lotu mohé, naʻá ne sio ki he tā ʻo Sīsuú. Naʻá ne saiʻia he fakakaukauloto pe ʻe fēfē ʻa e papitaisó.
ʻI he Sāpate kimuʻa peá ne papitaisó, naʻe fakahoko e ʻinitaviu papitaiso ʻo Siosiaá. Naʻá ne talanoa mo ʻene ongomātuʻá ki he pīsopé ʻi hono ʻōfisí. Naʻá ne fai ange ha ngaahi fehuʻi ke tokoni ʻi hono fakapapauʻi ʻokú ne mateuteu ke papitaisó.
Naʻá ne fehuʻi ange, “ʻOkú ke tui ko Sīsū Kalaisí ko e ʻAlo Ia ʻo e ʻOtuá?”
Naʻá ne tui ki ai! Naʻá ne tali ange, “ʻIo.”
Naʻe malimali ange ʻa e pīsopé kiate ia. “Ko e papitaisó ko ha fili matuʻaki mahuʻinga. ʻOkú ke fiemaʻu ke ke papitaiso?”
Naʻe fakakaukau ʻa Siosiā ki he lahi ʻo ʻene ʻofa kia Sīsuú mo ʻene fie muimui kiate Iá. Naʻá ne tali ange, “ʻIo!”
Fāifai, pea aʻu ki he ʻaho mahuʻinga ʻo Siosiaá. ʻI heʻene hifo atu ki he vaí, naʻá ne sio atu ki he siofi ia ʻe hono ngaahi kaungāmeʻá mo e fāmilí. Naʻe ʻi ai foki mo Matila!
ʻI he taimi naʻe fai ai ʻe heʻene tetí ʻa e lotu papitaisó, naʻe ʻai ʻe he ngaahi leá ʻa Siosiā ke ne ongoʻi nonga mo fiefia ʻi loto. Hili iá naʻá ne fakauku fakalelei ia ki lalo he vaí pea toe ʻohake ia ki ʻolunga. ʻI heʻene ʻasi haké, naʻá ne ongoʻi fiefia mo maʻa.
Naʻe faʻofua ange ʻene tetí, kiate ia. Naʻe talitali mai ʻene mamí kiate ia ʻi ʻolunga ʻi he sitepú mo ha taueli mo malimali.
Naʻe ongoʻi loto-māfana ʻa Siosiā. Ko ha ʻaho makehe ia. Naʻá ne fili ke muimui ʻia Sīsū. Pea naʻá ne fie muimui maʻu pē kiate Ia he ʻaho kotoa!
ʻŪ tā fakatātā ʻa Shana Keegan