“Saensaen Nekles,” Fren, Ogis 2023, 42–43.
Saensaen Nekles
Carolina i wantem nomo blong holemtaet nekles ia longtaem smol moa.
Stori ia i bin tekem ples long Ajentina.
Carolina i ronron krosem yad. Fren blong hem Isabella i stap aotsaed,
Isabella i tata. “!Kam mo pleiplei!”
Carolina i krosem yad i go long haos blong Isabella.
Isabella i pusum han blong hem i go insaed long poket blong hem. “Mi wantem soem wan samting long yu,” hem i talem. Afta hem i pulumaot wan !nekles we i naes tumas we Carolina i neva luk bifo! Ol smosmol ston blong hem oli saensaen we mo oli saen strong.
“Hem i blong mama blong mi,” Isabella i talem. “Hem i talem se mi save pleplei wetem tedei. Traem lukluk nekles ia long san.”
Isabella i leftemap nekles ia i go long laet blong san. Handred blong ol renbo i saenaot long ol ston blong nekles ia. !I naes tumas!
“!Naoia ia yumi pleplei haed!” Isabella i talem.
“!OK!” Carolina i talem. “Mi save kipim nekles ia i stap sef.”
“!Tangkyu!” Isabella i givim nekles long Carolina, mo Carolina i putum long poket blong hem.
Kolosap hem i taem blong Carolina i gobak long haos. Taem hem i talem tata, Isabella i no askem abaot nekles. Ating hem i fogetem ia. Mo Carolina i no rimaenem Isabella.
Carolina i filim nogud smol blong karem nekles ia i go long haos. Be hem i wantem nomo blong holemtaet longtaem smol moa. Hem i no lisin long nogud filing ia mo i putum nekles andanit long pilo blong hem.
Nekis dei hem i Satedei. Carolina i mekem ol wok blong haos blong hem mo i go aotsaed blong pleplei. Hem i fogetem gud abaot nekles ia.
“!Carolina!” Papa i singaot. “?Yu save kam long ples ia?”
Carolina i ron i go insaed. “?Yes?”
Papa i holem nekles long han blong hem. “Mama i faenem hemia andanit long pilo blong yu. ?Hem i blong huia?”
“Hem i blong Isabella.” Wota blong ae blong Carolina i kam antap. “Mi stap kipim i sef insaed long poket blong mi taem mitufala i stap pleplei yestedei. Be afta mi disaed blong karem i kam long haos.”
Mama i sidaon wetem Carolina long jea. “Tangkyu blong stap talem trutok. ?Yu ting se yu mas mekem wanem nao?”
Carolina i stap kwaet. Hem i tingbaot Jisas. Bae Jisas i wantem Carolina blong stap ones mo givimbak nekles.
“Mi mas givimbak long Isabella mo talem long hem se mi sori,” Carolina i talem. Smol taem nomo afta we hemi talem toktok ia, nogud filing i lus. Hem i filim wom insaed.
Carolina i go long haos blong Isabella.
“Halo,” Carolina i talem. Hem i givimbak nekles long Isabella. “Mi sori from mi holemtaet nekles ia. ?Yu save fogivim mi?”
“Yes,” Isabella i talem. “Tangkyu blong karem i kambak.” Afta hem i smael. “?Yu wantem plei haed bakegen?”
“!Yes! Yu kaon fastaem—!Bae mi go haed!”
Long naet ia, Carolina i talem wan prea. “Dia Papa long Heven, plis fogivim mi from mi holemtaet nekles ia. Mo tangkyu blong helpem mi blong stretem fasin ia.”
Carolina i filim wom filing ia bakegen. Hem i glad se hem i save mekem wanem we bae Jisas i wantem hem blong mekem.