“Bigfala Dei blong Giorgia,” Fren, Ogis 2023, 8–9.
Bigfala Dei blong Giorgia
“I no longtaem bae mi kasem baptaes,” Giorgia i talem. “!Semmak olsem Jisas i bin mekem!”
Stori ia i hapen long Ostrelia.
Giorgia i ron i go long rum blong hem mo Matilda i ron biaen. Hem i oltaem wan gud dei blong hem taem fren blong hem i kam blong pleplei.
“?Yumi save pleplei wetem robot blong yu?” Matilda i askem.
“!Yes!” Giorgia i talem. Hem i wan long ol fevret samting blong hem blong mekem.
Taem Giorgia i stap karemaot robot, Matilda i lukluk ol pikja long wol blong Giorgia. Hem i poen i go long pikja we i stap long medel.
“?Hemia wanem ia?” hem i askem.
“Hemia i Jisas Kraes taem hem i baptaes,” Giorgia i talem. “Mo i no longtaem bae mi kasem baptaes. !Semmak olsem Jisas i bin mekem!”
“?From wanem bae yu baptaes?” Matilda i askem.
“From se mi wantem folem Jisas,” Giorgia i talem. “Taem mi kasem baptaes, !hemia i wanem we bae mi promes blong mekem!”
Afta, Giorgia i gat wan aedia. “?Yu laekem blong kam long baptaes blong mi?”
“Bae mi askem long mama blong mi sapos mi save kam,” Matilda i talem.
Dei blong baptaes blong Giorgia i stap kam kolosap moa. Hem i bin stap ridim skripja stori buk blong hem mo go long Praemeri evri wik. Afta we hem i stap prea long naet blong silip, hem i stap lukluk pikja blong Jisas. Hem i laekem blong stap pikjarem long maen blong hem se blong kasem baptaes bae i olsem wanem.
Long Sandei bifo baptaes blong hem, Giorgia i gat baptaes intaviu blong hem. Hem mo papa mo mama blong hem oli toktok wetem bisop long ofis blong hem. Hem i askem Giorgia sam kwestin blong helpem blong mekem sua se hem i redi blong kasem baptaes.
“?Yu yu biliv se Jisas Kraes i Pikinini blong God?” hem i askem.
!Hem i biliv! “Yes,” Giorgia i talem.
Bisop blong hem i smael long hem. “Baptaes hem i wan joes we i impoten tumas. ?Yu wantem blong kasem baptaes?”
Giorgia i tingting abaot hamas hem i lavem Jisas mo wantem blong folem Hem. “!Yes!” hem i talem.
Long en, bigfala dei blong Giorgia i kam. Taem hem i wokbaot i go insaed long wota, hem i luk ol fren mo famli blong hem oli stap wajem hem. !Matilda i stap yu!
Taem papa blong hem i talem prea blong baptaes. ol toktok blong hem i mekem Giorgia i filim pis mo hapi insaed. Afta sloslo hem i draonem hem evriwan andanit long wota mo leftemap hem bakegen. Taem hem i kam antap, hem i filim hapi mo klin.
Papa i givim wan bigfala hag long hem. Mama i stap wet long hem antap long ol step wetem wan tawel mo wan smael.
Giorgia i filim wom insaed. Hem i wan spesel dei. Hem i bin jusum blong folem Jisas. Mo hem i wantem blong gohed blong stap folem Hem !evri dei!
Ol droing oli kam long Shana Keegan