“Yu Neva Rili Stap Yuwan,” Fren, Ogis 2023, 22–23.
Yu Neva Rili Stap Yuwan
?Wanem sapos Ethan i kasem kil bakegen taem i nogat wan man i stap blong helpem hem?
Stori ia i tekem ples long YSA.
Ethan i sakem ol leg blong hem long swing. Hem i go antap mo antap moa. !Win i mekem hem i filim olsem se hem i stap flae!
Afta, bel i ring. Ethan i pulum longfala win. Hem i no redi blong brektaem i finis yet.
Ol pikinini oli laenap blong gobak insaed. Ethan i lego swing blong hem i slo daon. Afta hem i kamaot long swing blong gobak long klas.
Be taem ol leg blong Ethan i kasem graon, hem i filim wan strong filing blong soa long leg blong hem. Hem i foldaon long graon. Hem i traem blong stanap be hem i filim olsem faea i stap bonem leg blong hem. !I soa tumas!
“!Help!” Ethan i singaot. Wota blong ae i ron kamdaon long fes blong hem. Ol pikinini mo ol tija oli ron i kam blong helpem hem.
“?Wanem i rong?” wan tija i askem.
“!Mi brekem leg blong mi!”
Hemia i no fas taem we Ethan i bin brekem wan bun blong hem. !I no iven nambatu taem o nambatri taem! Ethan i gat wan sik blong bun, wan siknes we i mekem ol bun blong hem i stap brok isi nomo. Iven ol smol samting olsem blong stanap i kamaot long fut pat o fas long wan man, i save brekem bun blong hem.
“Bae mifala i ringim papa mo mama blong yu blong karem wan dokta,” tija i talem. “Evri samting bae i oraet.”
Ethan i glad se i gat ol pipol blong helpem hem. Leg blong hem i soa bigwan yet, be hem i save bae hem i sef.
Mama mo Papa oli go long skul mo karem Ethan i go long wan dokta. Oli putum wan simen we i blu long leg blong hem mo hem i go long haos blong spel.
Ethan i spendem fulap taem long bed from leg blong hem i brok. Hem i gat fulap buk blong stap ridim. Samtaem ol fren blong hem oli kam blong plei ol gem wetem hem. Be yet hem i filim boring yet.
Wan naet, Ethan i wekap mo i no save silip bakegen. Hem i traem blong rilaks, be hem i wokem wari. ?Wanem sapos mi brekem wan bun afta i nogat wan man i stap, olsem long medel blong naet? Ethan i tingting. Hat blong hem i pam kwik . Hem i filim fraet.
“!Papa!” Ethan i singaot.
Papa i ron i go insaed long rum blong Ethan. “?Wanem i rong?”
“Mi mi fraet,” Ethan i talem. “?Wanem sapos mi brekem wan nara bun afta i nogat wan man i stap blong helpem mi?”
Papa i sidaon narasaed long hem long bed. “Hemia wan fraet tingting lelebet,” hem i talem. “Iven taem yumi traem blong lukaot mo stap sef, ol nogud samting oli save hapen yet. Be nomata long hemia, Papa long Heven i stap lukaot long yu.”
“So hemia i minim se ?Hem i oltaem stap wetem mi?” Ethan i talem.
“Hemia nao.” Papa i givim wan hag long Ethan.
Ethan i tingting abaot olsem wanem Papa i bin kam hariap blong helpem hem. Hem i save se papa i lavem hem mo i oltaem wantem blong helpem hem. Ating Papa long Heven Hem i olsem tu.
Long nekis dei, Ethan i ridim wan skripja insaed long Fren magasin. I talem olsem: “Yufala i stap glad, mo yufala i no fraet, from we mi Lod, mi stap wetem yufala, mo bae mi stanap wetem yufala”*
Ethan i filim kwaet mo sef taem hem i ridim ol skripja, semmak olsem we hem i filim taem hem i toktok wetem Papa. Hem i save se Tabu Spirit i stap kamfotem hem. I olsem se hem i stap haggem Papa bakegen.
Ating bae mi brekem sam moa bun, Ethan tingting, be mi no nid blong fraet. Hem i save se bae hem i neva rili stap hemwan.
Ol pikja droing oli kam long Simini Blocker