“Faavae Mautu,” Mo le Malosi o le Autalavou, Mat. 2021, 14–15.
Faavae Mautu
O se Puipui e Aea
Ata na tusia e Alyssa Petersen
Sa tutu ni tamaitai talavou se luasefulu i ou autafa, ma faataupupula atu i se puipui laau, e 16-futu. O la matou lui o le fesoasoani lea i teine uma ia tofu oo uma i le pito i luga. Mo le toatele o teine, o lo latou tausaga muamua lea i le tolauapiga a Tamaitai Talavou. O teine matutua ma au na avea ma taitai o le autalavou, ae matou te lei auai lava i se gaoioiga faapenei. Sa matou taufai faalogologo uma i tulafono ma le naunautai.
Sa tatau i tamaitai talavou uma ona oo i luga o le puipui. O le taimi lava e oo ai se tasi i luga, e mafai e ia ona tu i luga o se tulaga ma fesoasoani e toso i luga isi. Peitai, afai e pai o ia i le eleele, ua le toe faatagaina ona fesoasoani e sii ae ia teine na totoe.
Sa matou tauivi muamua, ae e lei umi ae mafai ona matou galulue faatasi ma amata ona siitia atu ia teine. O nisi na fefefe e matuai siitia maualuga atu lava e ui lava i puipuiga o le saogalemu. O nisi na popole i le faaaogaina o lo latou lava malosi e oo atu ai i le tumutumu. Na manaomia ai e i matou uma lava ona faateleina lo matou faatuatuaga ma le lagolago mo le tasi ma le isi. I le faaiuga, sa matou faamaeaina ma le manuia le lui.
A o agai mai i lalo ia tamaitai talavou mulimuli, sa matou faapotopoto e talanoaina le tele o lesona mai le gaoioiga o le puipui.
Tatou te fetaiai uma lava ma mea e foliga mai e faigata ona faatoilaloina. Ae peitai, e le o tuua na o i tatou. Ua siomia i tatou e tagata e fesoasoani e siitia ma tuuina atu le lagolago. O le Tama Faalelagi ma Iesu Keriso o loo i ai iina e tuuina atu le fesoasoani ma le malosi pe a tatou liliu atu ia i Laua.
Megan B., Ohaio, ISA
“Na Ou Folafola Atu O Le a Ou Sau”
Sa ou manao lava e faasoa atu le talalelei i isi, ae mo le tele o tausaga sa le faamanuiaina au. Seia oo ina ou faauo ma se tama e igoa ia Tiago. Sa ma nonofo latalata atu i le tasi ma le isi, o lea na ma savavali faatasi ai i le fale pe a tuua le aoga i aso taitasi.
I se tasi aso, sa ese ai lo ma auala i le fale ma pasia le falesa lea sa ou lotu ai. Sa ou fai atu ia te ia ua leva ona avea au ma se tagata o le Ekalesia. Sa ou tau atu ia te ia mea sa matou talitonu i ai ma le tele o le faamanuiaina o lou aiga e le lotu. Sa ou valaaulia Tiago i le lotu i lena Aso Sa, ma sa ia fai mai o le a sau o ia.
Na oo i le Aso Sa, ma sa ou faatalitali ma le naunautai mo ia i le lotu, ae sa lei sau o ia. Mulimuli ane i lena vaiaso, sa ou toe valaauliaina o ia. O lenei mea na tupu i le lua po o le tolu masina, ae o taimi uma lava sa i ai lava sana alofaga e le sau ai. Ae ou te lei taofia le valaaulia o ia.
I le taeao o se tasi Aso Sa, sa ou i ai i le sauniga faamanatuga ma tilotilo atu ae vaaia Tiago o tutu mai iina. Sa ou tei i lou vaai atu ia te ia, ae na sau o ia ma nofo ifo i lalo ma fai mai, “Na ou folafola atu o le a ou sau!”
Sa ou faafeiloai atu o ia i faifeautalai, ma sa amata ona la aoaoina o ia. Mulimuli ane, sa papatiso o ia. Ua ma sauni nei e o i ni misiona. Ou te matuai fiafia lava ou te lei fiu ia te ia!
Meiry R., Pasila
Faatuatua i le Taimi a le Atua.
Sa aafia le uso o lou tina i se teteaga ae na o lona atalii ulumatua na papatisoina. Ina ia faatumauina se mafutaga toafilemu ma le tama moni o lana fanau, sa ia manao ai ia maua lana faatagaga mo isi tamaiti ina ia papatisoina. Ae paga lea, na te lei tuuina atu se faatagaga mo le tele o tausaga.
Na iu ina tonu i le uso o lou tina ua manao o ia e papatiso ia tamaiti e ui lava i le le faamaoniaina e lo latou tama. Ae ina ua uma ona anapopogi ma tatalo le uso o lou tina ma ou tausoga e uiga i le faaiuga, sa maua e tagata uma le uunaiga e tatau ona latou faaauau pea ona faatalitali.
O le vaiaso lava lena, sa tau atu ai e le tama moni o ou tausoga ua ia manao i tamaiti e feiloai ma faifeautalai ma ia papatisoina. Ou te manatua pea le olioli na ou lagonaina ina ua tau mai e lou tina ia te au le tala. Sa ou iloa na faamanuiaina e le Tama Faalelagi ou tausoga ina ua mavae le tele o tausaga o faatalitali ma le onosai.
Atonu e le masani ona tatou iloa le taimi o le a tali mai ai le Alii i a tatou tatalo, ae ou te iloa o le a Ia tali mai pea lava. Ou te le iloa pe aisea na finagalo ai le Tama Faalelagi i ou tausoga e faatalitali ina ia papatisoina, ae ou te iloa na Ia faamanuiaina i latou ona o lo latou faatuatua.
Bre J., Florida, ISA