“E Faapefea Ona Maua i Taimi Uma le Agaga,” Mo le Malosi o le Autalavou, Mat. 2021, 26–29.
Sau, Mulimuli Mai ia te A’u
Saunia e Maua i Taimi Uma Lona Agaga
O le saunia e ai ma inu ma le agavaa i le faamanatuga i vaiaso taitasi e mafai ona fesoasoani ia i tatou ia maua i taimi uma le Agaga e faatasi ma i tatou.
Ina ua 12 ou tausaga, sa matou o ma lou aiga e asiasi i nofoaga o le talafaasolopito o le Ekalesia i Setete o Niu Ioka, ISA. I le Vao Paia, ou te manatua le mafaufau loloto e uiga i le Uluai Faaaliga ma isi faaaliga mataina na vaai i ai Iosefa ma mafaufau, “Oka! Afai o le a ou maua se feiloaiga matagofie faaleagaga ma ni tagata faalelagi e pei ona sa faia e Iosefa, o le a seki a lou olaga.”
Sa ou iloa talu mai lena taimi nai lo se isi lava mea faaleagaga sa faia i lou olaga, ou te manaomia ni nai aafiaga laiti e faatumauina ai lou malosi i lau molimau ma saogalemu ai i le ala e toe foi ai i le fale. Sa silafia e le Tama Faalelagi o le a tatou manaomia se taitaiga e le aunoa i o tatou olaga, ma sa Ia saunia le ala mo i tatou e maua ai.
Mo i latou uma ua lava le faatuatua i Lona Alo e salamo ai ma papatisoina, ua Ia tuuina mai le meaalofa o le Agaga Paia. E ala i le sauniga faalevaiaso o le faamanatuga, ua Ia tuuina mai ai ia i tatou le avanoa e “maua pea lona Agaga e faatasi ma i [tatou]” pe afai tatou te manatua le Faaola ma tausi Ana poloaiga (Mataupu Faavae ma Feagaiga 20:77). O le a mafai ai e i tatou ona maua le taitaiga i aso taitasi a le Agaga i o tatou olaga pe a tatou faaaoga lo tatou faitalia e fai ai faaiuga o le a fesoasoani ia i tatou i le ala e toe foi atu ai i le Tama Faalelagi.
O Le Faamanatuga ma le Agaga
Sa silafia e le Tama Faalelagi o le a tatou manaomia le mauaina soo o le taitaiga a Lona Agaga, ae le na o ni aafiaga tetele e faatasi i se taimi. Na ala mai i le Perofeta o Iosefa Samita, na Ia toefuataiina mai le sauniga o le papatisoga e ala i le faatofuina, lea e fesoasoani tatou te mama ai. Ona tatou saunia ai lea mo le mauaina o le meaalofa o le Agaga Paia e ala i le faamauga, ma tatou maua ai le gafatia o le taitaiga i aso taitasi e le Agaga.
Na silafia e le Tama Faalelagi o le faamamaina faatasi o le a le lava lea, ma o le a manaomia ona tatou manatua le Faaola ma toe faamamaina ma toe mama ina ia faatumauina ai pea le Agaga ia i tatou. Sa Ia toefuataiina mai le sauniga o le faamanatuga mo lena faamoemoe. Afai tatou te saunia ma le faaeteete ma aai ma feinu soo i le faamanatuga, ua folafola mai ia i tatou ina ia tatou “maua pea lona Agaga e faatasi ma i [tatou]” (Mataupu Faavae ma Feagaiga 20:77; ua faaopoopo le faamamafa).
Ae peitai, o le na o le alu atu lava i le lotu ma ai i le falaoa ma inu i le vai, o le a le faatagaina ai i tatou e maua le folafolaga a le Alii. O la tatou sauniuniga ma le faamoemoeina mo le sauniga e mafai ai ona tatou maua le mana o le Faaola i o tatou olaga.
E le atamamai ia tagata taaalo i le na o le ofu o se toniga po o le savali atu i luga o le malae po o le malae taalo. E tatau ona latou aoaoina o latou tino, aoao metotia, ma faataitai ina ia atamamai i la latou taaloga. E faapena foi, e ao ona tatou aoao e saunia e aai ma feinu i le faamanatuga ma le migao ma le agavaa ina ia mafai ona tatou maua le mana e mafai ona Ia tuuina mai ia i tatou.
O se tasi o auala e saunia ai lou loto ma le agaga e ai ma inu i le faamanatuga o le faia lea o se faatalanoaga laitiiti ma oe lava ia i vaiaso taitasi. Ou te fiafia e faaaoga le Mataupu Faavae ma Feagaiga 20:37 e faatalanoa ai au lava. O lenei fuaiupu o loo i ai mea e manaomia mo le papatisoga lea na faaali mai e le Atua i le Perofeta o Iosefa. O loo i ai agavaa o i latou uma e mananao e papatiso, e tatau ona ausia. Ua ou iloa e fesoasoani ia te au e saunia ai au lava ia maua folafolaga faafouina o loo maua i le faamanatuga.
Atapue mai le Getty Images
O le faaaogaina o lena mau e fai ma ou taiala, o nisi nei o fesili ou te fesiligia ai au lava ia e iloa ai pe ua ou saunia e ai ma inu i le faamanatuga.
Pe ua ou faalotomaualaloina au lava i luma o le Atua?
O le mea manaomia muamua o loo lisiina i le Mataupu Faavae ma Feagaiga 20:37 o le faamaualaloina lea o se tasi i luma o le Atua. Tatou te faia lenei mea e ala i le taliaina ma le naunau e mulimuli i Lona finagalo e pei ona tusia i tusitusiga paia, aoaoina mai e Ana auauna, pe e pei ona oo mai ia i tatou i uunaiga.
Ou te fesili ia te au lava ia pe o ou tauivi ma le Atua i soo se mea i lou olaga i le taimi nei. Pe o ou teenaina ea Lana taitaiga? Pe o ou gauai atu i aoaoga a Ana auauna? Afai ou te le o faia, ou te faia ni fuafuaga ia faaleleia ma tautino atu ia faia ia sili atu ao ou saunia e ai ma inu i le faamanatuga. Ua silafia e le Atua mea uma—pe a ou iloaina e mafai ona Ia vaai i le ata atoa o lo’u olaga, e faigofie atu le faamaualaloina o au lava i ona luma ma talitonu o le a ia taialaina au i le mea e sili ona lelei.
Pe o i ai ia te au se loto momomo ma se agaga salamo?
O le i ai o se loto momomo ma se agaga salamo e fesootai i le lotomaualalo. O lona uiga o le naunau e usitai i le finagalo o le Atua. O le lotomaualalo o lona uiga o le faapea atu, tatou te faatoese atu ma faamagalo atu e tusa lava pe faigata pe tatou te lagona e sese isi. E mafai ona e fai atu, “Ua lelei lo’u loto i tagata uma”? Pe na e faatiga ea i soo se tasi o siomia oe, pe o i ai ni ou lagona le lelei e uiga i se tasi? E manaomia ona e talosaga mo le faamagaloga?
A i ai sou loto momomo ma se agaga salamo, ua ou naunau e fai se taumafaiga e fai ia sa’o mea i le Atua ma i latou o loo siomia ai au. Ou te taumafai e aveese mai manatu ma lagona le lelei agai i isi. E le mau faatasi le Agaga ma i tatou pe a i ai ni o tatou lagona fefinauai, o lea o le a aveesea o se laasaga taua lea i le sauniaina o i tatou lava e maua le folafolaga o le faamanatuga.
Pe ou te manao e toe mama, ma e mafai ona ou molimau atu ua ou salamo i au agasala uma?
O le isi tulaga manaomia i le Mataupu Faavae ma Feagaiga 20:37 o le “salamo moni i a tatou agasala uma.” Ina ua tatou papatiso, sa faamamaina i tatou ma le mama i a tatou agasala. Sa tatou faia se folafolaga e taumafai e tausia poloaiga a le Atua ma salamo pe a tatou faia ni mea sese.
Ou te fesili ifo ia te au lava ia, “Pe na o lo’u tago lava i le faamanatuga aua ou te manatu e tatau ona ou faia, pe ou te manao moni lava ia ou toe mama?” Ou te toe tepa i tua i au agasala ma mea sese mai lena vaiaso ma fesili ifo ia te au lava, pe ou te manao moni lava e sui ma lafoaia. A o e maua le manao ia mama, o le a e iloa ai, e ala i le Agaga, mea e tatau ona e faaleleia, ma o le a faaauau pea ona Ia uunaia oe e salamo ma faia ni filifiliga sili atu.
O le ta’uta’u atu i le Alii (ma i isi tatou te ono faatiga pe afaina pe a manaomia) o se vaega lea o la tatou sauniuniga.
Fesili ifo ia te oe lava, “Pe i ai se mea e tatau ona ou suia ae lei faia lava? Pe o i ai se mea e tatau pea ona ou salamo ai?” O le foiaina o faafitauli e ala i le salamo faamaoni e mafai ona faaagavaaina ai tatou ina ia aai ma feinu ma le agavaa i le faamanatuga.
Pe ua ou naunau e tauave i ou luga le suafa o Iesu Keriso?
O feagaiga taitasi tatou te faia o se faailoga o se tautinoga e ave atoatoa atili le suafa o Keriso i o tatou luga. Pe a papatisoina i tatou, ua tatou faaali atu lo tatou naunautai e tauave i o tatou luga le suafa o Iesu Keriso ma tausi Ana poloaiga. A tatou osia ni feagaiga faaopoopo i le malumalu pe talia valaauga, ua tatou toe tauaveina i o tatou luga le galuega a Keriso ma Ana aoaoga. O le faaalia o lo tatou naunautai e tauave i o tatou luga Lona suafa o se vaega o le faamanatuga i vaiaso taitasi, o lona uiga o le toe tuuto lea i feagaiga ma tautinoga uma na tatou osia muamua ma Ia.
I le iloiloina o au sauniuniga e tagofia le faamanatuga, ou te fesili ifo ai ia te au lava ia ia fesili e pei o le: “Pe o ou faia ea le mea sili ou te mafaia e avea ai ma se faataitaiga o Keriso ma Ana aoaoga? Pe o ou tausia ea folafolaga uma na ou faia e fesootai ma au feagaiga? Pe ua ou tautino atu ea i le aso nei ia Keriso ma au feagaiga ma Ia e pei ona sa ou i ai i le aso na ou muai faia ai?”
Pe o i ai so’u naunautaiga e auauna atu ia te Ia e oo i le iuga?
Sa tatou folafola atu i le Alii ina ua tatou osia a tatou feagaiga o le papatisoga, o le a tatou taumafai e tausi Ana poloaiga. O poloaiga sili e lua o le alofa i le Alii ma le alofa atu i lou tuaoi (tagai i le Mataio 22:36–40). Tatou te faaalia lo tatou alolofa i le Atua ma o tatou uso a tagata e ala i le auauna atu ia i latou.
Ou te fesili ifo ia te au lava, “Pe o ou faaavanoaina ea le taimi e auauna atu ai? Pe ua ou musu e auauna atu, pe o ou fiafia ea e auauna atu?” “Pe o ou taumafai e faalautele lou valaauga?” O le auauna atu i isi o se auala matagofie lea e saunia ai e aai ma feinu i le faamanatuga. O le mea moni, e masani lava o le auauna atu i isi tatou te manaomia ai le taitaiga a le Agaga.
Talitonu i Folafolaga a le Alii
A o tatou sauniuni ma le faamoemoe i vaiaso taitasi ina ia taumamafa ma le agavaa i le faamanatuga, o le a tatou agavaa e maua i taimi uma le Agaga e uunaia ma taialaina o tatou olaga. O se folafolaga lena mai le Alii.