O le Fatu o le Eseta: O Le Iesu Keriso Soifua

Saunia e Elder Gerrit W. Gong

O Le Korama a Aposetolo e Toasefululua

I le faamanatuina o le Eseta, tatou te olioli ai o loo soifua Iesu Keriso i le taimi nei ma mo i tatou uma lava.

Mai se lauga o le konafesi aoao o Aperila 2020.

I le vaitau lenei o le Eseta, tatou te faamanatuina ai le Iesu Keriso Soifua. Faatasi ai ma se alofa e atoatoa, ua faamautinoa mai ia i tatou e lo tatou Faaola: “Ina ia outou maua le manuia ia te a’u. E maua foi outou e le puapuaga i le lalolagi: a ia outou loto tetele; ua ou manumalo i le lalolagi” (Ioane 16:33).

I le faamanatuina o le Eseta, tatou te olioli o loo soifua Iesu Keriso — e le gata i lena taimi, ae o le taimi nei; e le mo na o nisi, ae mo tagata uma. Na afio mai o Ia ma e afio mai e faamalolo i e loto momomo, e talai le saolotoga i le tafeaga, ia pupula mata o e tauaso, ma tuu saoloto i e ua faasauaina (tagai Luka 4:18). O i tatou uma lava. O Lana folafolaga togiola e faatatau, po o le a lava lo tatou taimi ua tuanai, lo tatou taimi nei, po o mea tatou te ono mafaufau i ai i lo tatou lumanai.

Osana ma Aleluia

I le Aso Sa o le Lau Pama, na ulufale atu ai Iesu i Ierusalema o loo tietie i le tamai asini ma le toatele o “tagata … ua ave e i latou o lau o pama, ma o mai e faafetaiai ia te ia ”(Ioane 12:12–13; tagai foi i le Mataio 21:8–9; Mareko 11:8–10). O le mea e masani ai, o lau o pama o se faatusa paia e faaalia ai le olioli i lo tatou Alii. Na iloa e le au faatuatua lenei mea o le faataunuuga o valoaga ma sa alalaga atu ma le iloa, “Osana i mea e aupito i luga” (Mataio 21:9). Osana o lona uiga o le “faaola i le taimi nei” (tagai i le Bible Dictionary, “Osana”).

O se vaiaso na sosoo ma le Aso Sa o le Lau Pama, o le Aso Sa o le Eseta. Ua aoao mai Peresitene Russell M. Nelson e faapea na “afio mai [Iesu Keriso] e totogi se aitalafu Na te lei faia auā sa tatou nofo aitalafu i se aitalafu sa le mafai ona tatou totogia.”¹² E moni lava, e ala i le Togiola a Keriso, “e mafai ai ona faaolaina [fanau uma a le Atua], e ala i le usiusitai i tulafono ma sauniga o le Talalelei.” (Mataupu Faavae o le Faatuatua 1:13). I le Eseta, tatou te lagiina ai le aleluia. Aleluia o lona uiga o le “ia outou vivii atu i le Alii o Ieova” (tagai Bible Dictionary, “Aleluia”).

Na afio mai Keriso e totogi aitalafu na te lei faia aua sa tatou nofo aitalafu i se aitalafu sa le mafai ona tatou totogia.”

—Peresitene Russell M. Nelson

O mea paia na tutupu i le va o le Aso Sa o le Lau Pama ma le Aso Sa o le Eseta o le tala i le osana ma le aleluia. O le Osana o la tatou aioiga i le Atua ia faaola i tatou. O le Aleluia o loo faaali atu ai la tatou viiga i le Alii mo le faamoemoe ua i ai i le faaolataga ma le faaeaga. I le osana ma le aleluia tatou te aloaia ai le Iesu Keriso soifua o le fatu o le Eseta.

Toefuataiga ma le Toetu

I le Aso Sa o le Eseta, aso 3 Aperila, 1836, i ona popofou o le Toefuataiga, sa faaali mai ai le Iesu Keriso soifua ina ua mavae le faapaiaina o le Malumalu o Katelani. O i latou sa vaai ia te Ia iina, na molimau e uiga ia te Ia i eseesega logolelei o le afi ma le vai: “O Ona fofoga sa pei o se afi mumū; o lauao o lona ao sa papa’e e pei o le kiona mamā; o ona fofoga sa susulu e sili atu i lo le pupula o le la; ma o lona siufofoga sa pei o le leo o le tafe-taalili o vai tetele, o le siufofoga lava o Ieova” (Mataupu Faavae ma Feagaiga 110:3; faaopoopo le faamamafa).

I lena vaaiga, na malele mai ai lo tatou Faaola, “O A’u o lē muamua ma lē mulimuli; o Aʼu o lē o ola, o Aʼu o lē na fasia; o Aʼu o lo oulua fautua i le Tamā.” (Mataupu Faavae ma Feagaiga 110:4). Ua toe ta’ua foi eseesega logomalie—muamua ma le mulimuli, ola ma le fasia. O ia o le Alefa ma le Omeka, o le amataga ma le gataaga (tagai i le Faaaliga 1:8; 3 Nifae 9:18; Mataupu Faavae ma Feagaiga 19:1; 38:1; 45:7), o le taitaiina ma faaatoatoaina o lo tatou faatuatua (tagai i le Eperu 12:2; Moronae 6:4).

Ina ua mavae le afio mai o Iesu Keriso, na o mai foi Mose, Elaia, ma Elia. E ala i le taitaiga mai luga, na toefuatai mai ai e nei perofeta maoae anamua ia ki ma le pule o le perisitua. O lea la, “ua toe tuuina mai ai ki o lenei tisipenisione”(Mataupu Faavae ma Feagaiga 110:16) i totonu o Lana Ekalesia toefuataiina e faamanuiaina ai fanau uma a le Atua.

E ofoofogia, le faamatalatalaina e le tusi a Mamona o le “mana ma le toetu o Keriso” (Alema 41:2)— o le agaga o le Eseta—i faaupuga o le toefuataiga e lua.

Muamua, o le toetu e aofia ai le toefuataiga faaletino o lo tatou “autino tatau ai ma atoatoa”; o “[vae] ma sooga uma,” “e oo i se lauulu o le ulu o le a le leiloa.” (Alema 40:23). O lea folafolaga ua maua ai le faamoemoe e i latou o e ua leai ni aao; o e ua le mafai ona pupula, faalogo, pe savavali; po o e ua manatu ua leiloloa i faama’i ogaoga, faama’i o le mafaufau, po o isi gafatia ua faaitiitia. Na te sueina i tatou ia maua. Na te faaatoatoaina i tatou.

O se folafolaga lona lua o le Eseta ma le Togiola a lo tatou Alii e faapea, i le faaleagaga, “o le a toefuataia mea uma i o latou tulaga e tatau ai.” (Alema 41:4). O lea toefuataiga faaleagaga e atagia mai ai a tatou galuega ma manaoga. Ua toefuatai mai ai “mea e lelei,” “amiotonu,” “mo le amiotonu,” ma le “alofa mutimutivale” (Alema 41:13). E leitioa faaaoga e le perofeta o Alema le upu toefuatai faa-22² a o ia uunaia i tatou e “fai mea tonu, faamasino ma le amiotonu, ma fai mea lelei e le aunoa.” (Alema 41:14).

Talu ai “ua togiola ai e le Atua lava ia mo agasala a le lalolagi,” (Alema 42:15), e mafai e le Togiola a le Alii ona toefuatai mai e le gata i mea sa i ai a o mea foi e mafai ona i ai. Talu ai Na te silafia o tatou tiga, mafatiaga, ma’i, o tatou “faaosoosoga o ituaiga uma,” (Alema 7:11), e mafai e Ia, faatasi ma le alofa mutimutivale, ona fesoasoani ia i tatou i o tatou vaivaiga (tagai Alema 7:12). Talu ai o le Atua o se “Atua ua atoatoa, faamasinotonu, ma se Atua alofa mutimutivale foi,” e mafai e le fuafuaga o le alofa ona “faamalie ai manaoga o le faamasinotonu.” (Alema 42:15). Tatou te salamo ma faia mea uma tatou te mafaia. Na te siosiomia i tatou e faavavau “i aao o lona alofa.” (2 Nifae 1:15).

Usuina o Pese o le Olioli e Faavavau

Faatasi ma outou, i lenei vaitau o le Eseta, ou te molimau atu i le Atua, lo tatou Tama e Faavavau, ma Lona Alo Pele, o Iesu Keriso Soifua. O tagata soifua na faasatauroina mataga ma sa toetutu mulimuli ane. Ae na o le Iesu Keriso soifua lava i Lona tino na toetu atoatoa mai ai o loo iloga ai pea faailoga o le faasatauroga i Ona lima, vae ma le itu. Ua na o Ia lava e mafai ona fetalai, “Ua Ou togitogia oe i luga o alofilima o o’u lima.” (Isaia 49:16; 1 Nifae 21:16). Ua na o Ia e mafai ona fetalai: “O A’u o lē na sii a’e i luga. O A’u o Iesu o le na faasatauroina. O A’u o le Atalii o le Atua” (Mataupu Faavae ma Feagaiga 45:52).

I nei taimi, e mafai ona tatou aoaoina le tele o le agalelei o le Atua ma lo tatou gafatia paia mo le alofa o le Atua e tuputupu a’e i totonu o i tatou a o tatou sailia o Ia ma aapa atu i le tasi ma le isi. “ “Ma o le a oo mai o le a faapotopoto mai e e amiotonu i fafo mai atunuu uma, ma o le a o mai i Siona, ma pepese i pese o le olioli e tumau-faavavau.”(Mataupu Faavae ma Feagaiga 45:71). I lenei vaitau o le osana ma le aleluia, pepese aleluia—auā o le a nofotupu o Ia e faavavau ma faavavau lava! Alalaga osana i le Atua ma le Tamai Mamoe!

Faamatalaga

1. Russell M. Nelson, i le Handel’s Messiah: Debtor’s Prison (vitio), ChurchofJesusChrist.org/media-library.

2. O upu toefuatai, na toefuatai, toefuataiga, po o isi o loo faaali eseese mai faa22 taimi i le Alema 40:22–24 ma i le Alema 41, o loo faamamafa ai uma le toefuataiga faaletino ma le faaleagaga.