“O Le Mana o se Igoa,” Mo Le Malosi o le Autalavou, Oke. 2021.
Sau, Mulimuli Mai ia te A’u
O le Mana o se Igoa
Mataupu Faavae ma Feagaiga 115
E taua igoa—aemaise lava pe a oo mai i le igoa o le Ekalesia toefuataiina a Iesu Keriso.
Atatosi o Keriso, le Faaola, saunia e Heinrich Hofmann
Pe i ai ea se taimi na e mafaufau ai i le taua tele o se igoa? Mafaufau i lou lava igoa na tuuina atu ia te oe ina ua e fanau mai—o se igoa mo oe ina ia iloa ai oe i lou olaga atoa. O lou igoa e masani o le mea muamua lava lea e fesili atu ai se tasi pe a latou feiloai ia te oe. Ma o le auala aupito faigofie foi lea mo aiga, uo, ma isi e faailoa ai oe ma faasino atu ia te oe. I le avea ai ma fanau laiti, o le toatele o outou sa i ai foi le avanoa e maua ai se igoa ma se faamanuiaga e ala i le mana o le perisitua.
I lou papatisoga, ua e osia se feagaiga ma le Atua e faaali atu ai ua e loto e ave i ou lava luga le suafa o Iesu Keriso. O taimi uma lava e te ’ai ai ma inu i le faamanatuga, e te faafouina lena feagaiga ma le folafolaga ia manatua pea o Ia (tagai Mosaea 18:8–9; Mataupu Faavae ma Feagaiga 20:77, 79).
O lea, e taua igoa. E le gata e mafai e se igoa ona faafesootai i tatou taitoatasi i o tatou lava faasinomaga ma tagata taitoatasi, ae e mafai foi ona tauaveina le mana, tiutetauave, ma faamanuiaga. E faapitoa lava le moni o lenei mea pe a oo mai i le igoa o le Ekalesia toefuataiina a Iesu Keriso, e oo lava i le Ekalesia a Iesu Keriso o le Au Paia o Aso e Gata Ai.
Na Faaigoa e le Faaola Lana Ekalesia
Na aoao mai e lo tatou perofeta pele, o Peresitene Russell M. Nelson, le mafuaaga e taua tele ai le igoa o le Ekalesia a le Faaola. Na ia faapea mai: “O se poloaiga a le Alii. E le’i faaigoaina e Iosefa Samita le Ekalesia toefuataiina ia te ia; po o Mamona foi. O le Faaola lava Ia na fetalai, ‘Aua o le a faapea ona ta’ua la’u ekalesia i aso e gata ai, O Le Ekalesia a Iesu Keriso o le Au Paia o Aso e Gata Ai.’ [Mataupu Faavae ma Feagaiga 115:4].”1
E le o se taimi muamua lenei ua aumai ai faatonuga i le igoa e faaigoa ai le Ekalesia a Iesu Keriso. Ina ua faaali atu le Faaola toetu i sa Nifae ina ua uma ona latou tatalo i le Tama i Lona suafa, sa fesili atu tagata ia te Ia po o le a le igoa e tatau ona latou faaigoaina ai Lana Ekalesia. Sa tali mai le Faaola:
“Ia outou faaigoa ai le ekalesia i lo’u igoa. …
“Ma e faapefea ona fai ma’u ekalesia vagana ai ua faaigoaina i lo’u igoa? Aua afai e faaigoaina se ekalesia i le igoa o Mose o lona uiga o le ekalesia lea a Mose; pe afai e faaigoaina i le igoa o se tagata o lona uiga o le ekalesia lea a le tagata; ae afai e faaigoaina i lo’u igoa o lona uiga o la’u ekalesia lea, pe afai ua atiae i latou i luga o la’u talalelei” (3 Nifae 27:7–8).
Mo nei mafuaaga, na folafola mai ai e Peresitene Nelson, “e le o fetuunaia ai le igoa o le Ekalesia. Ina ua ta’ua ma le manino e le Faaola le igoa e tatau ona faaigoa ai Lana Ekalesia, lea na muamua lava i Lana ta’utinoga, ‘E faapea lava ona ta’ua o la’u ekalesia,’ e mamafa ia te Ia.”2
E molimau le Tusi Paia ma le Tusi a Mamona ia Keriso,, na saunia e Greg K. Olsen
Ua folafola mai e Peresitene Nelson afai tatou te faia le mea sili e toefuatai ma faaaoga ai le igoa sa’o o le Ekalesia a le Faaola, “o le a liligi mai e Ia o le e ana le Ekalesia Lona mana i lalo ma faamanuiaga i luga o ulu o le Au Paia o Aso e Gata Ai, i auala tatou te le’i vaaia lava.”3
E Mafai Ona Tatou Fesoasoani i Isi ia Iloa Mea Tatou te Talitonu i Ai
O se tasi o faamanuiaga o le faaaogaina o le igoa sa’o o le Ekalesia e oo mai pe a tatou tau’aveina ma le manatu mamafa i o tatou tiutetauave e folafola atu le suafa o le Faaola i le lalolagi atoa.
I le aluga o tausaga, o le igoa tauvalaau e pei o le “Ekalesia AAG” ma le “Ekalesia Mamona” ua faaaoga e sui ai le igoa na faaali mai e le Faaola. O le faafitauli i igoa tauvalaau e pei o nei ua latou aveesea le suafa o Iesu Keriso mai Lana Ekalesia. O le faia o lena mea, latou te ta’useseina ai po o ai i tatou ma mea tatou te talitonu i ai.
Tatou te talitonu o Iesu Keriso o le Faaola ma le Togiola o le lalolagi. O le mea e faanoanoa ai, o nisi tagata e manatu tatou te le talitonu ia te Ia pe tatou te tapuai i se tasi e ese mai ia te Ia. O le faasoa soo atu i isi e faapea tatou te auai i le Ekalesia a Iesu Keriso o le Au Paia o Aso e Gata Ai, tatou te faamanino atu ai tatou te tapuai ia Iesu Keriso. O i latou tatou te fegalegaleai o le a amata ona iloa e moni lava o Iesu Keriso e totonugalemu i o tatou talitonuga ma o tatou olaga.
E Mafai ona Tatou Aumaia le Mana o Iesu Keriso i o Tatou Olaga
Sa aoao mai Peresitene Nelson, “Sa faatonuina i tatou e Iesu Keriso e faaigoa le Ekalesia i Lona suafa ona o Lana Ekalesia, ua faatumulia i Lona mana.”4
Sa soifua Iesu Keriso i se olaga e leai se agasala. Sa ia faatoilaloina faaosoosoga uma, tiga, luitau, ma puapuaga o le lalolagi. Na afu toto o Ia i Ketesemane ma luga o le satauro a o Ia mafatia i tiga matautia e le mafaamatalaina. Na Ia tauaveina i Ona lava luga o tatou tiga ma ma’i. E ala i lana taulaga togiola, ua Ia tu ai ua saunia e fesoasoani ia i tatou taitoatasi. A o tatou faatinoina le faatuatua ia te Ia ma o mai ia te Ia, ua “faamanuiaina [i tatou] i le mana faaopoopo e taulima ai faaosoosoga, faigata, ma vaivaiga.”5
Pe a tatou ta’u manino atu o i tatou o tagata o le Ekalesia a Iesu Keriso o le Au Paia o Aso e Gata Ai, ua tatou iloa foi o Ia o le ua i ai le mana e faamalosia ai i tatou, faamama a tatou avega, ma aumaia le olioli ma le filemu i o tatou olaga. I le faaopoopo atu i lena, ua folafolaina mai foi ia i tatou “le poto ma le mana o le Atua e fesoasoani ai ia i tatou e avatu faamanuiaga o le talalelei toefuataiina a Iesu Keriso i malo uma, ituaiga, gagana, ma nuu ma ia saunia le lalolagi mo le Afio Faalua Mai o le Alii.”6
O Le a Oo Mai Nisi Faamanuiaga
A’u uo e, tau lava o le mafaufau i le aafiaga e mafai ona tatou maua i le na o le faaaogaina o le igoa atoa o le Ekalesia a le Faaola. Ou te molimau atu o Iesu Keriso o loo tu i le ulu o Lana Ekalesia ma taitaia e ala i Ana perofeta, tagatavaai, ma tali faaaliga. Ou te valaaulia outou e saili i faamanuiaga o le Ekalesia a le Faaola ma faasoa atu Ana upumoni le mafaatauina i isi. Ou te iloa o Lana Ekalesia, o Le Ekalesia a Iesu Keriso o le Au Paia o Aso e Gata Ai, o le a faamanuiaina ai outou, o au uo, ma lou aiga i le taimi nei ma i le faavavau.