“Tumatila i Aialani,” Mo Le Malosi o le Autalavou, Oke. 2021.
Tumatila i Aialani
E na o Evan K. lava le alii talavou e auai i le Ekalesia i lana aoga —ae e le tuua lava na o ia.
Ata na pueina e Ashley-Ann K.
Na e faalogo i le faaupuga “The grass is always greener on the other side of the fence (E sili atu le manuia o loo i le isi itu)”? Masalo o se taimi lata mai o le a le toe faia ai e Evan K. e sefululima tausaga le matua o Aialani lena tala. “E lanumeamata lava le matou vao!” o lana tala lea.
E i ai se mafuaaga lelei e ta’ua ai Aialani i nisi taimi o “Le Motu o Maa Taua Meamata.”
“E matagofie iinei,” o le tala lea a Evan. Na te faatauaina foi lena matagofie, i le tele o taimi a’o tietie ai i lana uila. “Ou te fiafia e tietie atu i la’u uila i nisi o auala filemu e tele o loo siomia ai i matou.”
O le vao lanulau’ava meamata ma isi mea matagofie faalenatura ua siomia ai o ia. Peitai, e tau leai nisi O Le Ekalesia a Iesu Keriso o le Au Paia o Aso e Gata Ai o lana tupulaga. O Evan ma ona tuafafine laiti ua na o le pau ia o tagata o le Ekalesia i la latou aoga.
O Le Tagata e Ese Mai Ai Lava
I Aialani, o le tele o a’oga o ni a’oga faalelotu. O Evan ma ona tuafafine e auai i le aoga Katoliko i le lotoifale faatasi ai ma isi talavou o loo nonofo i lena vaega o Aialani.
Pe a oo mai i filifiliga o le olaga, e iai nisi o vaega mautinoa e tumatila ai Evan. “E faigata i nisi taimi ona o isi tagata uma e palauvale,” o lana tala lea. O le palauvale e taatele lava iina, o le faamalamalama mai lea a Evan. Ae o loo i ai se vaega o le aganuu Aialani lea na fai mai Evan e mafai ona avea o se luitau e sili atu ona tele.
“E fiafia alii talavou e faapotopoto ma o atu e inu ava malosi,” o lana tala lea. “E ese ai lava a’u.”
O loo talanoa o ia e uiga i uo i le aoga i lana lava tausaga. O le inu ava malosi i se tausaga talavou e taatele lea i le mea e ola ai Evan. O nei tafaoga faasamasamanoa e tupu soo lea e fai mai Evan o isi taimi na te mafaufau e alu ai ina ia ona le lagona le tuuatoatasi i taimi uma. Ae o taimi uma lava, e nofo ai o ia i le fale.
“Ou te manatu, ’O le a le mea o le a tupu pe a ou alu faatasi ma i latou?‘” o lana tala lea. “Ou te iloa afai ou te filifili ou te le alu, o le a faamanuiaina a’u ona o lena mea. O faamanuiaga o le tausia o poloaiga e sili mamao atu nai lo le tiga o le avea ai ma se tagata e ese mai ai lava. ”
E faalagolago Evan i le Agaga Paia e fesoasoani ia te ia e ala i filifiliga o aso taitasi. E le gata i lea, o loo i ai foi ia te ia isi punaoa o le malosi e faaauau ai.
O ana uo Aialani i le Ekalesia e faigofie lava ona auina atu iai se feau tusitusia.
Uo i le Initoneti ma le Malosi i Aso Taitasi
I le nofoaga e nofo ai Evan, ona o le autalavou i le Ekalesia e vavamamao, e tele ina latou faia fonotaga i luga o le initoneti. Mo se tasi mea, latou te feiloai i le seminare i luga o le Initoneti.
“E ese le lelei o le seminare i vaiaso taitasi,” na fai mai ai Evan. “E le gata ina matou aoao e uiga ia Keriso ma le talalelei a o matou faia le seminare, ae e faaavanoa lava e le faiaoga le Zoom mo matou i le taimi e tuua ai.”
I lena talanoaga tatala, latou te faatasitasi ai, talasua, taaalo i taaloga, ma tau lava na o na faauo i isi o e tutusa o latou tulaga faatauaina. Mo Evan, o nisi o ana faauoga vavalalata na faia e ala i nei fesootaiga a le Ekalesia.
O se tasi o na sootaga o lana uo lelei o Rob. “Matou te maua le tele o ni mea malie e tutusa,” o le tala lea a Evan. “O le a maua e Rob se mea malie i luga o ala o faasalalauga faaagafesootai lea na te iloa o le a ou fiafia i ai, ma o le a ia auina mai ia te a’u. Ona ma talanoa ai lava lea e ala i feau tusitusia mo sina taimi. I ni nai itula mulimuli ane, ou te mauaina ai se mea malie ma auina atu ia te ia.”
O mea masani lava, a ea? Ae o nei fegalegaleaiga laiti o se fesoasoani tele i le aluga o le vaiaso. “E lelei aua e mafai ona ma talie faatasi ai, ae e le tatau ona i ai se palauvale po o se isi lava mea e aofia ai.” E mafai foi ona la tusi atu feau tusitusia i le tasi ma le isi i soo se taimi la te manaomia ai sina malosiaga faaopoopo i le talalelei.
O se Faatasiga Faa-Aialani
E ui lava e vavamamao le autalavou o le Au Paia o Aso e Gata Ai i Aialani, latou te taumafai pea e faatasitasi faaletino i le aluga o le tausaga— o nisi taimi e aofia ai le autalavou mai le atunuu atoa.
O nei gaoioiga ua aofia ai mea uma mai galuega faatino i le lisiina o suti pa’u sumo. “E matuai manaia lava!” Fai mai Evan.
O nisi taimi i le faaiuga o gaoioiga o le a fai ai se disco (o se siva). O nei mea e matuai ese lava mai siva a le aoga ma le nuu lea e faia latalata ane. Mo se faataitaiga, i se siva a le nuu, afai e fai atu se tamaitiiti i se teineitiiti e siva ma ia, e toetoe lava a pei o le fesili ia te ia i se tafaoga faamasani—po o le avea foi ma ana uo teine. Ou te toe fai atu, ua na o se vaega o le aganuu iina.
Ae peitai, e ese aga o siva a le Ekalesia. O iina, na fai mai ai Evan, “e mafai ona tatou fai atu i se tasi e siva, ma latou te le manatu ua tatou talosagaina i latou ina ia fai ni a tatou sootaga mautu. E sili atu. ”
O nei faatasiga ma le autalavou o le Ekalesia i Aialani e i ai se aafiaga tumau i le aluga o le tausaga. Latou te faaauau pea a latou faauoga e ala i le taaalo i taaloga i luga o le Initoneti, auina atu o feau tusitusia ma talanoa i le telefoni, ma lagolagoina o le tasi ma le isi seia oo ina mafai ona latou toe potopoto faaletino.
E fiafia Evan e faaalu le taimi ma lona aiga, e aofia ai le tietie uila faatasi ma le usuina o viiga i le fale.
Tuputupu A’e ma le Malamalama o le Talalelei
O loo iai sina fautuaga a Evan mo isi talavou o loo i se tulaga e pei o ia. “Afai e te lagona e na o oe le talavou o le Ekalesia i lau aoga, aua nei suia ou tulaga faatonuina e taumafai ai e faafetaui oe i ai. Afai e te palauvale, inu ava malosi, pe ulaula ina ia faaaofia ai oe, o le a e misia le tele o mea. O faamanuiaga e sili atu nai lo le faamalieina o le taumafai e faaaofia i ai oe! ”
Ma afai e te fefe i le faapea ai o Evan e tuuatoatasi i le aoga ona ua ia filifili e ese le ala e ola ai, toe mafaufau. Fai mai o ia, e iloa e tagata ona talitonuga ma faaaloalo ia te ia e tusa lava pe ese lana lotu. “Ou te taliaina o latou talitonuga, ma latou te talia au,” o lana tala lea. “O a’u o se uo lelei i tagata uma i la’u aoga.”
I le faaiuga, atonu e le o siomia Evan e le autalavou a le Ekalesia i lea aso ma lea aso, ae na te faasusuluina pea lona malamalama o le talalelei. E le gata i lea, o ai o iloa le tele o fatu o le talalelei o loo ia totoina i le na o le avea ai ma se faataitaiga lelei? E ui i na mea uma, o loo ola lelei lava mea uma i Aialani!