“O Lau Tagavai o le Saolotoga,” Mo Le Malosi o le Autalavou, Oke. 2021.
O Lau Tagavai o le Saolotoga
O upu musuia o le Autu fou a le Korama o le Perisitua Arona e mafai ona avea ma se malosiaga ia te oe i se lalolagi faigata.
I se taimi o taua ma finauga, na sii a’e ai e le perofeta anamua o Moronae le tagavai o le saolotoga ma sa valaau atu i ona uso a sa Nifae e puipui la latou tapuaiga, saolotoga, filemu, ma aiga (tagai Alema 46:12). O le tagavai o le saolotoga na faamanatu atu ai i tagata lo latou tiute i le Atua ma mea na e taua ona tau ai.
E pei lava o aso o Moronae, e toatele tagata i aso nei ua liliu ese mai aoaoga a Iesu Keriso. Ina ia fesoasoani i alii talavou ia tutu mausali e pei o Moronae, ua fatuina ai e taitai o le Ekalesia se autu, o se tagavai o le saolotoga i ona po nei, e fesoasoani ai ia te outou alii talavou i le feagai ai ma luitau o aso nei.
A o e aoao ma ola i upu o le Autu o le Korama a le Perisitua Arona, e mafai ona e tu malosi ma lotogatasi ma isi alii talavou i le lalolagi atoa e puipuia le upumoni. Faitau pe na faapefea ona musuia e le Autu o le Korama a le Perisitua Arona isi ia avea ma atalii sili atu o le Atua a o latou saili e saunia le lalolagi mo le toe afio mai o le Faaola i le lalolagi.
“O le Autu fou a le Korama o le Perisitua Arona e fesoasoani ia te a’u e manatua ai po o ai a’u ma po o ai e tatau ona ou avea ai a’u ina ia faatasi ai ma Keriso. Ua faamanatu mai ai ia te a’u o a’u o se atalii faapelepele o le Tama Faalelagi ma e tatau ona ou auauna atu ma le atoatoa i le filiga ma galue malosi ina ia mafai ai ona faamanuiaina a’u lava ma i latou o siomia a’u. Na te faamoemoe mai ia te a’u ia sili ona lelei, ma o le a ou tuuina atu. E faamoemoe o Ia i la’u fesoasoani e saunia le lalolagi mo le toe afio mai o le Faaola e ala i le faasalalauina o le talalelei i soo se mea.”
Anderson E., 14, Pasila
“Ua ou faatuina se sini e amata ona tauloto le autu ina ia le na o se mea ou te faitauina i le Aso Sa. Ou te manao ia avea ma se mea e i totonu o lo’u loto ina ia avea ma se vaega o lo’u olaga. ”
Andrew, 17, Iuta, ISA
“Ou te fiafia tele i le autu. O le fai atu o mea e pei ’Ua ou saunia e auauna atu i se misiona‘ ma le ’avea ma se tane lelei’ e uunaia ai tagata uma, e oo lava ia i latou e le o faia, ia avea ma ni faifeautalai lelei ma ni tane lelei. E fesoasoani ia te a’u i a’u taumafaiga i aso taitasi ia avea ma se tagata sili atu ona lelei ma sili atu ona tuuto i le talalelei a Iesu Keriso. ”
Ricardo P., 15, Pasila
“Ou te fiafia i le faamamafa a le Autu o le Korama a le Perisitua Arona i luga o le aiga ma le taua o le auauna atu i le aiga. E fesoasoani lenei mea e faamanatu mai ai ia te a’u o se tasi o nofoaga sili ona taua e auauna atu ai o lo’u aiga ma tauaiga. ”
Mitchell B., 16, Ausetalia
“‘O a’u o se atalii faapelepele o le Atua, ma ua i ai ia te Ia se galuega mo a’u e fai.’ O le tele o taimi tatou te manatu faatauvaa ai i na folafolaga, ae pe a ou ole atu i taimi faigata, ou te lagonaina le aao mafanafana o le Atua i lo’u tau’au ma Lona alofa i lo’u loto. Pe a ou se ese ma o’u leiloa, e faaloaloa mai e le Atua Lona aao ma talo atu ia te a’u e toe foi mai. O a’u o Lona afafine/atalii, ma e finagalo o Ia i le mea sili mo a’u. O loo i ai se galuega ua Ia manaomia a’u ou te faia. ”
Eli S., 18, New Jersey, ISA
“O le autu fou e fesoasoani ia te a’u e mafaufau ai i mea e mafai ona ou faia i le galuega a le Alii. O loo aoao mai ai ia te a’u o mea laiti e talafeagai ma e taua foi. ”
Mateus S., 14, Pasila