“Saunia mo Lou Faaeega Paia,” Mo Le Malosi o le Autalavou, Oke. 2021.
Saunia mo Lou Faaeega Paia
Ua faasoa mai e le autalavou matutua o latou aafiaga i le ala na latou saunia ai mo ma maua o latou faaeega paia i le malumalu.
O le alu i le malumalu ina ia maua ou faaeega paia o se aafiaga fou mo tagata uma. Afai e te le iloa le mea e faamoemoe i ai, o se mea masani le fiailoa po o se popole laitiiti foi. O le tele lava o lo tatou saunia o i tatou lava, o le tele foi lena o lo tatou lagonaina o le Agaga Paia a o tatou feagai ai ma lenei sauniga paia o le malumalu mo le taimi muamua—ma i taimi taitasi mulimuli ane.
Afai e te le’i mauaina ou faaeega paia, atonu o i ai ni au fesili—ma e le afaina le fesili atu! O le tala fiafia o le mafai lea ona e aoaoina le tele o tali ae e te le’i alu. (O nisi o le a faatali seia e i ai i totonu o le malumalu, ma o isi o le a faaauau pea ona e aoaoina i se olaga atoa o le auai atu ai i le malumalu.)
Sa matou fai atu i le autalavou matutua i le salafa o le lalolagi e tali mai i nisi o fesili atonu o loo outou popole e fesili atu ai—ma nisi atonu e te le’i mafaufau lava i ai!
O a ni ou lagona ina ua e alu i le malumalu ia maua ou faaeega paia? O le a sou lagona pe a e alu atu nei?
Mo a’u lava ia, sa faigata ona iloa le Agaga aua sa ou taulai atu i isi mea uma na tutupu. Ae o taimi uma lava ou te alu ai i le malumalu talu mai lena taimi, ua sili atu ona ou to’a i le sauniga, ma ua ou aoaoina e uiga i tulaga faafaatusa ma le taua o feagaiga.
Johanna A., 21, Austria
Sa faate’ia a’u i le mafanafana o le faaeega paia. Sa i ai vaega o le sauniga o le faaeega paia sa ese mai nai lo le auala tatou te tapuai ai i le Lotu, ae o mea uma na i ai le uiga. O lenei, ou te lagona e pei ua mafai ona faigofie ona ou taulai atu i le Agaga. E filemu ma e leai ni mea faalavefau, o lea ou te faaaluina ai lea taimi e mafuta ai ma le Atua.
Luke E., 21, Alberta, Kanata
Luke E.: Malumalu o le Aai Tutotonu i Provo
Ata na tusia e Kahee Shin
O le a se mea na fesoasoani ia te oe e lagona ai le saunia e maua ou faaeega paia?
O le mea na fesoasoani ia te a’u e malamalama atili ai i le malumalu o le toe alu atu lea i le malumalu. Afai e te mafaia, aumai ni tagata e te faatuatuaina ma alofa i ai. Pe a e i ai i le potu selesitila i le mae’a ai o le sauniga, e mafai ona e nofo faatasi ma i latou ma talanoa ma le migao e uiga i fesili o loo ia te oe ma mea o loo e aoaoina.
Hannah S., 21, Alberta, Kanata
Hannah S.: Malumalu o Cardston Alberta
Sa ou sailia vitio ma tama’itusi uma e uiga i le malumalu i luga o le uepisaite a le Ekalesia. O loo i ai vitio e uiga i laei o le malumalu, ofusa, ma foliga o le faaeega paia ma le potu selesitila. O le tamaitusi o le Saunia e Ulu Atu i le Malumalu Paia sa fesoasoani foi ou te lagona ai le saunia sili atu.
Johanna A., 21, Austria
Johanna A.: Malumalu o Freiberg Siamani
Ou te fiafia lava i le 2 Nifae 2 pe a oo mai i le malamalama i sauniga o le malumalu. O loo faamanino mai ai vaega o le ata o le faaolataga lea ou te le’i malamalama muamua i ai.
Zachary M., 21, Alberta, Kanata
Zachary M.: Malumalu o Los Angeles Kalefonia
O le a se mea semanu e fesoasoani ia te oe e maua ai se aafiaga muamua e sili atu?
Ou te le’i iloa o le a ou aoaoina le tele o mea i le faaeega paia! Maimau pe ana ou lava saunia mo le aafiaga o le aoaoina i totonu o le malumalu e ala i le taumafai e aoao atili e uiga i faatusa o sauniga ua ou masani ai.
Luke E., 21, Alberta, Kanata
Maimau pe ana ou iloaina o le a i ai ni tagata faapitoa i totonu o le malumalu e fesoasoani ia te a’u mo la’u uluai sauniga o le faaeega paia. Sa ofoofogia i latou! Sa latou tuu mai ia te a’u se pine o le igoa e faapipii i lo’u ofutino ina ia mafai e tagata uma ona vaai i ai o lo’u taimi muamua lea, ma sa o’u lagona le matua’i talileleia o a’u e tagata ina ua latou vaaia lena pine igoa. O le muai iloaina o lenei mea na fesoasoani ou te lagona ai le toafilemu.
Anna G., 24, Île-de-France, Farani
Anna G.: Malumalu o Lonetona Egelani
O le a sau tala e fai atu i se tasi o loo popole e uiga i le alu i le malumalu ina ia maua o latou faaeega paia?
O le maota o le Alii o se nofoaga matagofie. Ua matua faamanuiaina lava a’u, ma o lo’u manaoga o le avea o tagata o lo’u aiga ma se vaega o lenei faamanuiaga maoae.
Vida G., 29, Greater Accra, Kana
Vida G.: Malumalu o Accra Kana
Ou te uunaia i latou e suesue i lauga o le konafesi ma mau e uiga i le malumalu, fai ni fesili, ma ia tatala o latou manatu i o latou popolega. O le vitio o le fale tatala o le Malumalu o Roma Italia sa faamaninoina foi le tele o mea mo a’u. Sa ou matamata i ai ina ua uma ona ou mauaina o’u faaeega paia.
Johanna A., 21, Austria
Saunia oe lava faaleagaga ae e te le’i alu i le malumalu. Sa ou tatalo ina ia maua faaaliga i le taimi o le faaeega paia, ia i ai se mafaufau matala, ma ia vaai atu i ni mata faaleagaga. Na ou iloa sa ou saunia ina ua ou manao e alu i le malumalu ina ia latalata atili i le Tama Faalelagi, ae le na o le fiailoa.
Anna G., 24, Île-de-France, Farani
O le a se mea ua faateleina ai lou malamalama e uiga i le faaeega paia?
O le asiasi soo atu i le malumalu i taimi uma ou te mafaia ai e fesoasoani lea ou te malamalama atili ai. O taimi uma ou te tuua ai le malumalu, ou te faaaluina se taimi e mafaufau loloto ai ma tatalo e uiga i mea fou sa ou aoaoina i le taimi o lena sauniga.
Michelle L., 24, Ekuatoa
Michelle L.: Malumalu o Guayaquil Ekuatoa
O le manatuaina o mea uma i le sauniga o le malumalu e faasino ia Keriso ua fesoasoani ou te malamalama atili ai i le faaeega paia. Talu ona ou maua o’u lava faaeega paia, ua ou faitauina lauga, suesue i tusitusiga paia, ma fai atu ni fesili se tele.
Johanna A., 21, Austria
O Le Malumalu e faatatau i le Filemu
O le malumalu o le maota o le Atua, ma e fiafia o Ia ona o loo e i ai iina. Atonu e i ai ni au fesili pe a uma ona faia ni nai sauniga o le faaeega paia, ma e le afaina lena mea! O le mea taua o le faaauau pea ona o atu i le malumalu ma se mafaufau matala, se agaga lotomaualalo, ma se naunautaiga e aoao se mea fou.