Tosina Atu i le Itupa e Tasi: O Oe o Se Tasi

Afai o e aafia i le tosina atu i le itupa e tasi, ia e iloa e alofa le Atua ia te oe. O loo i ai se nofoaga mo oe i Lona malo.

Mo soo se tasi o loo aafia i le tosina atu i le itupa e tasi, atonu e te mafaufau pe talafeagai oe ma le Ekalesia, pe e tusa lava pe o le fuafuaga o le fiafia a le Atua e faatatau ia te oe.

O ou lagona atonu e feteenai ma le tele o faamoemoega. Atonu e te mafaufau: “Aisea ua tupu ai lenei mea ia te a’u? Pe alofa moni ea le Atua ia te a’u? O i ai se nofoaga mo a’u i Lona malo?”

1. E Alofa le Atua ia te Oe

O le mea muamua lava ia iloa e alofa lou Tama Faalelagi ia te oe. O le alofa o le Atua e atoatoa, tumau, ma e maofa-musuia. Ma e alofa o Ia ia te outou taitoatasi. Na te silafia lou igoa.

Sa aoao mai Elder Dieter F. Uchtdorf, o le sa avea ma Fesoasoani Lua i le Au Peresitene Sili:

“E le vaai le Atua i foliga vaaia. Ou te talitonu e matua le popole lava o Ia pe tatou te nonofo i se fale tioata po o se faleoo, pe tatou te lalelei pe faatauvaa, pe tatou te lauiloa pe le amanaiaina. E ui tatou te le atoatoa, ae atoatoa le alofa o le Atua ia i tatou. E ui lava tatou te le atoatoa, ae e atoatoa Lona alofa mo i tatou. E ui atonu tatou te lagona ua tatou se ma leai se tapasā, ae siomia atoa lava i tatou i le alofa o le Atua.

“E alofa o Ia ia i tatou aua ua tumu o Ia i se fuataga e le uma o le alofa paia, mama, ma le le mafaamatalaina. E taua i tatou i le Atua, e le ona o lo tatou taualoa ae ona o i tatou o Ana fanau. E alofa o Ia ia i tatou uma taitoatasi” (“O Le Alofa o le Atua,” Oke. 2009 konafesi aoao [Ensign poo le Liahona, Nov. 2009, 22–23]).

“E alofa le Atua ia i tatou uma. E alofa o Ia ia i latou e ese talitonuga ma i latou e aunoa ma se talitonuga. E alofa o Ia ia i latou ua mafatia. E tutusa Lona alofa i e mauoa ma e matitiva. E alofa o Ia i tagata o ituaiga ma aganuu uma, o e ua faaipoipo po o e nofotoatasi, ma i latou o aafia i le tosina atu i le itupa e tasi” (ChurchofJesusChrist.org/topics/gay).

2. O Oe o Se Tasi

E eseese i tatou uma i le tasi auala poo le isi. E eseese o tatou ituaiga, tagatanuu, talaaga, ma aganuu. O nisi o i tatou na fananau mai i le Ekalesia; o isi o tagata faatoa liliu mai. Ma o nisi ua aafia i le tosina atu i le itupa e tasi, ae o isi e leai.

Oi tatou uma o ni ō. Na aoao mai le Aposetolo anamua o Peteru, “E le faailogaina tagata e le Atua: a e peitai o le mata’u ia te ia i nuu uma lava, ma fai le amiotonu ua talia i latou e ia.” (Galuega 10:34–35). O lona uiga o tagata uma o e taumafai e tausi poloaiga, o le a maua e ia Ana faamanuiaga, e tusa lava po o a o latou talaaga.

Na aoao mai Elder L. Whitney Clayton, o le sa avea muamua ma Fitugafulu: “Ou te talanoa sa’o atu i tagata o le Ekalesia o e o loo aafia i le tosina i le itupa e tasi. … Matou te mananao ia e iloa matou te alolofa ia te oe. E talia lelei oe. Matou te mananao ia avea oe o se vaega o la matou faapotopotoga. Ua ia te oe ni taleni ma ni tomai maoae e ofo atu i le malo o le Atua i le lalolagi, ma ua matou aloaia le tele o saofaga taua ua e faia” (ChurchofJesusChrist.org/topics/gay).

3. Liliu atu i le Atua—O Le a Ia Fesoasoani ia te Oe

E ui lava e le o taimi uma tatou te maua ai tali e faatatau i le mafuaaga e tutupu ai mea i o tatou olaga, ae ua tatou iloa e silafia e le Tama Faalelagi le mea o loo feagai ma oe. Ma ona o le Togiola a Lona Alo, o Iesu Keriso, ua mafai ai e fanau uma a le Atua ona maua le alofa tunoa, faamanuiaina, ma toe foi atu ia te Ia.

O lea, afai o loo e aafia i le tosina atu i le itupa e tasi, o le a le mea e te faia i le taimi nei?

O le mea lenei na fesoasoani i se talavou matua a o ia iloaina o loo ia aafia i le tosina atu i le itupa e tasi:

“Sa ou faia le filifiliga mai i le amataga o le a valaaulia le Atua i laasaga uma o lo’u olaga, ma o se aafiaga faaleagaga lena mo a’u.

“E le mafai ona ou valoia pe o le a faape’ī lo’u olaga i le isi 20 tausaga. E le mafai ona ou vaai faalemafaufau i lo’u gafatia e faavavau, ma e seasea lava ona ou iloa po o le a le faamafanafanaga po o le taitaiga ou te manaomia, ae e silafia e le Atua na mea uma. Ou te le iloa pe o le a faapefea ona ou faia i nai tausaga ua mavae atu e aunoa ma Lana fesoasoani.

“O mea faatauvaa—tatalo, suesue i tusitusiga paia, auai i le malumalu ma le lotu—e faia moni ai se eseesega. Ua avea nei i latou ma se taula i lo’u olaga i le taimi nei e sili atu nai lo se isi lava taimi. E silafia lelei a’u e le Tama Faalelagi nai lo le mea ou te iloa ia te a’u lava, o lea e le manaomia ai ona natia mai ia te Ia. Ou te ole atu ia te Ia mo se fesoasoani ma le talitonu e finagalo o Ia ia ou fiafia e sili atu nai lo a’u. Ou te taumafai foi e faailoa atu i isi le taimi ou te manaomia ai se opo po o se faamanatu latou te alolofa ia te a’u. Ua ou aoaoina e le tatau lava ona ou amoina a’u avega na o a’u. ”

Laura F., Iuta

4. E Mafai Ona e Maua le Filemu

E finagalo le Tama Faalelagi ia e maua le filemu ma le fiafia. E finagalo o Ia ia e alofa ia te oe lava ma ia maua le olioli i lau malaga i le olaga faaletino. Ma o le a i ai o Ia iina faatasi ma oe i laasaga uma o le ala — e oo lava i taimi e te lagona ai e le o oe o se tagata o le Ekalesia. E ō Ia oe—ma e tumau pea oe ia te Ia.

Mo nisi faamatalaga, alu i le ChurchofJesusChrist.org/topics/Gay.