“O Se Tagavai mo Lou Olaga,” Mo Le Malosi o le Autalavou, Oke. 2021.
O Se Tagavai mo Lou Olaga
Ia avea le autu a Tamaitai Talavou ma se taiala ma se faasinoala mo lou olaga atoa.
O Le Autu a Tamaitai Talavou o se faamanatu o lou faasinomaga ma le faamoemoega. O loo i ai se malosiaga maoa’e e oo mai pe a avea upu e pei o le “afafine faapelepele,” “soo o Iesu Keriso,” ma le “molimau a le Atua” e faamatalaina ai po o ai moni lava i tatou. O nei fasifuaitau e faatumulia ai i tatou i le alofa ma tuuina mai ai ia i tatou le talitonuga i lo tatou tomai e fetaiai ai ma luitau ma maua ai le olioli. E faapena foi, o folafolaga o le “taunuuga e faavavau,” “faaaliga faaletagata lava ia,” ma le “faaeaga” e faamanatu mai ai ia i tatou o o tatou olaga e i ai le uiga ma le faamoemoega e sili atu i se aso faigata e tasi. Pe a e taulotoina lenei autu, ua e folafola atu le uiga o le avea ma se afafine o ni matua faalelagi, sauniaina oe lava ma le lalolagi mo le toe foi mai o lo tatou Faaola, o Iesu Keriso.
O nisi nei o tamaitai talavou mai le salafa o le lalolagi ua faasoa mai po o le a le uiga o le autu ia i latou.
“Ou te fiafia i le auala e amata ai faamatalaga uma i le ‘ o a’u. ’ O lenei faaupuga ua faamanatu mai ai ia te a’u o la’u molimau o la’u molimau lea ma e tatau ona ou galue malosi ia avea e faapei o lo’u Faaola.”
Caroline F., 15, Virginia, ISA
“O le mea e tasi o loo a’oa’o manino mai e le autu ia i tatou, o le tele o le alofa o o tatou matua faalelagi ia i tatou. Ua auina mai i tatou e lo tatou Tama Faalelagi i le lalolagi ae e le o tuua na o i tatou. E tofu i tatou ma gafatia ofoofogia, ma talu ai ona e alofa tele le Atua ia i tatou, o lea sa ia faia ai se fuafuaga ina ia mafai ai ona tatou ausia lena gafatia. O se faamafanafanaga tele le iloa e oo lava i aso sili ona faigata o loo iai ni o tatou matua faalelagi o loo faamalosiauina i tatou. ”
Rebecca S., 16, ma Megan S., 14, Texas, ISA
“O le autu a tamaitai talavou e taua tele ia te a’u aua e faamanatu mai ai ia te a’u ia avea pea lava ma se faifeautalai po o fea lava o o’u i ai ma po o fea lava ou te alu i ai: i le aoga po o le lotu po o le aiga.”
Quincy E, Connecticut, ISA
“O le autu o loo faamanatu mai ai ia te a’u e tatau ona ou saili mo avanoa e avea ai ma se tagata sili atu ona lelei. O nisi taimi ou te le fiafia pe a le mafai ona ou faia se mea ou te iloa e tatau ona ou faia. Ae pe a ou le ausiaina, ou te iloa o loo ia te a’u foi se avanoa e avea ai ma se tagata sili atu ona lelei. O le meaalofa o le salamo, atonu, o le mea e sili ona lelei i le lalolagi. ”
Anastasia S., 12, Moscow, Rusia
“O le avea ma se tagata o le Ekalesia i lenei vaitausaga e faigata. O nisi taimi tatou te fefefe ai i le tusitusi lima ma le faapea mai e ese i tatou. Ae o le autu o loo faamanatu mai ai ia te a’u o loo o’u taumafai e avea e pei o Iesu Keriso. O le autu e fesoasoani ia te a’u e faagalo mea e ono fai mai ai isi ma tumau ai le taulai atu i mea ou te manao moni lava i ai.”
Zoe V., 16, Atenitina
“O le fuaiupu ‘A o ou tauivi e agavaa mo le faaeaga, ou te faatauaina le meaalofa o le salamo ma saili ia lelei atili i aso taitasi’ ua faamanatu mai ai ia te a’u o le salamo e le o se mea leaga. O se avanoa matagofie e faafou ai i tatou lava ma ogatasi ma le Atua. Ou te matua faafetai lava mo le filemu ma le olioli e aumaia e le salamo!”
Hailey, S. 17, Arisona, ISA
“O le mulimuli i le autu e fesoasoani ia te a’u ia avea ma se vaega sili ona lelei o a’u lava ia.”
Eav N., 11, Iuta, ISA
“O le autu ua tuuina mai ia te a’u le malamalama o a’u o se afafine o ni matua faalelagi. O le iloaina o lenei mea e fesoasoani ia te a’u e le lagona ai le tuuatoatasi i taimi o faafitauli. Pe a faigata ia te a’u ona ausia a’u sini, ou te mafaufau e uiga i lo’u natura paia ma le taunuuga e faavavau. E musuia ai a’u ia ou malosi ma aua le fiu.”
Liza B., 12, Kyiv, Iukureini
“E taua le autu a Tamaitai Talavou ia te a’u aua e fesoasoani ou te malamalama ai i lo’u taua o se tamaitai talavou ma se afafine o le Atua. Ou te faamemelo i laina taitasi uma. E ta’u mai ia te a’u mea e tatau ona ou faia e latalata atili atu ai ia te Ia. E fesoasoani foi ia te a’u e maua ai lo’u faamoemoega i le olaga. ”
Sariah D., 14, St. Catherine, Jamaica