“Mai Le Tagata Faasino Atu i Faifeautalai i le Vavega,” Mo le Malosi o le Autalavou, Oke. 2021.
Mai Le Tagata Faasino Atu i Faifeautalai i le Vavega
Alofa. Faasoa. Valaaulia. Ma o lenei, ua sili atu ona faigofie nai lo se isi lava taimi.
Pe na i ai se taimi na e maua ai le lototele e faasoa atu lau molimau i se tasi? Atonu na e mauaina se uunaiga faapea o se tagata o le aiga po o se uo e manaomia ona faalogo i le talalelei.
O le ola ai i le talalelei e aumaia ai ia i tatou le malamalama i totonu, ma ua fetalai mai Iesu Keriso ia i tatou e faasoa atu lena malamalama i le lalolagi (tagai i le Mataio 5:16). A o tatou faia, e mafai ona tatou maua se tasi ua saunia e aoao mai faifeautalai. Afai o lea, o loo i ai se vaega i le polokalama o Meafaigaluega a le Ekalesia mo Tagata e mafai ona fesoasoani i faifeautalai e fesootai ma i latou. O tala o loo i lalo ua faaalia ai le ala na faaaoga ai e tagata lenei vaega—ma le auala e mafai ai ona faamanuiaina i latou e te valaaulia e feiloai ma faifeautalai.
Ua Tali e Jason se Tatalo
Ata na tusia e Michael Mullan
E le’i leva atu, sa asiasi atu ai Jason i San Diego, Kalefonia, ISA, mo se togafitiga o le kanesa. E ui lava o se taimi faigata lea mo ia, o le tala lea a Jason, “O le taeao o la’u faigamalaga sa ou tatalo ai ina ia maua se avanoa e faasoa atu ai le talalelei i se tasi na saunia.”
Sa ia malaga atu i se taavale la’upasese i le malaevaalele ma amata se talanoaga ma le avetaavale, o Robert. E le’i umi ae faaalia e Jason lona faatuatua i le Atua ma faasoa atu o ia o se tagata o Le Ekalesia a Iesu Keriso o le Au Paia o Aso e Gata Ai. “Sa fiafia Robert ma fai mai ia te a’u ua ia vaai i le matou malumalu e latalata i le auala pisi,” o le tala lea a Jason. “Sa ia tatalo ma talosagaina e aoao atili e uiga i o tatou talitonuga. Sa ou ta’u atu ia te ia ua tali mai lana tatalo. ”
Sa ofo atu Jason e faafeiloai atu Robert i faifeautalai, ma sa vave ona ia ioe i ai. Sa faaaoga e Jason le vaega o le “Auina Atu o se Tagata Faasino Atu” i luga o le polokalama o Meafaigaluega a le Tagata o le Ekalesia e auina atu ai faamatalaga a Robert. I ni nai masina mulimuli ane, na maua ai e Jason se savali mai faifeautalai i San Diego. “Sa la ta’uina mai ia te a’u sa papatisoina Robert i le aso na muamua atu. Sa manaia tele!”
Ua Auina atu e Karen se Faamafanafanaga
E silia ma le 1,200 maila le vavamamao o mea e nonofo ai Karen ma lona tausoga o Amy. Sa iloa e Karen o loo manaomia e Amy se faamafanafanaga, ma e ui sa le mafai ona iai ai iina, ae sa mafai e faifeautalai i le nuu o Amy! Sa faaaoga e Karen le meafaigaluega o le tagata faasino atu e ta’u atu ai i faifeautalai i le aai o Sate Leki, Iuta, ISA, e uiga ia Amy. “Sa la valaau mai ia te a’u, ma sa ou faamalamalama atu i ai le olaga tuputupua’e o Amy, tulaga o i ai nei, ma sa ia lagonaina sa le fiafia le Atua ia te ia,” o le tala lea a Karen.
E le’i umi, sa aapa atu faifeautalai tamaitai ia Amy. A o talanoa ma ia i le telefoni, sa la tatalo mo ia. I lena po, a o tagi masusu, na valaau atu ai Amy ia Karen e ta’u atu ia te ia e uiga i faifeautalai o e na tatalo mo ia. “Sa matua ootia o ia i lo la’ua agalelei,” o le tala lea a Amy.
E ui lava e le’i amata ona auai ia Amy i le lotu, ae sa amata ona ia tatalo i aso uma i le Tama Faalelagi. E le iloa e Karen le mea o loo i ai i le lumanai, ae na ia fai mai, “O le a latalata atili atu Amy ia Keriso.”
Ua Faasoa Atu e Eduarda Lona Malamalama
“I le taimi muamua, sa ou le’i iloa pe faapefea ona faasoa atu le talalelei i soo se tasi pe faapefea foi ona faailoa atu faifeautalai i a’u uo,” o le faamalamalama mai lea a Eduada. O Eduada e sau mai Pasila ma, e ui e le toatele ni tagata o le Ekalesia o siomia ia, ae na te iloa “e saunia e le Alii i taimi uma se ala mo Ana fanau ia iloa le upumoni.”
Sa faasoa atu e Eduada se vitio a le Ekalesia i se uo, o le sa fiafia i mea sa ia vaaia. Ina ua faateleina le fiafia o lana uo i le Ekalesia, sa valaaulia o ia e Eduada e feiloai ma faifeautalai ma faaaoga le vaega o tagata faasino atu i faifeautalai i luga o le uepisaite a le Ekalesia. Sa faaopoopo mai e Eduada se manatu faaalia e faapea, sa manao o ia e auai i le faagasologa o le aoaoina o le talalelei a lana uo. Sa malilie fiafia faifeautalai. Sa auai foi Eduada i le papatisoga.
Fai mai Eduardo sa ia lagonaina le alofa o le Atua mo Ana fanau i lena taimi. Ua ia faamalamalama mai foi, “Ua tofu i tatou uma ma se tasi e vaai i le Malamalama o Keriso ia i tatou. Pau lava le mea tatou te manaomia o le valaaulia o i latou e vaai po o le a lena malamalama!”
O Se Valaaulia i Tagata Uma
I se isi taimi e te maua ai le uunaiga e faapea e mafai e se tasi ona manuia mai le faalogo atu i faifeautalai, aua le faatuai ona faaaoga lenei meafaigaluega e fesoasoani e faafesootai ai au uo ma faifeautalai. O le a faagaeetia faifeautalai i le valaaulia o oe e auai a o feiloai au uo ma i la’ua. Ma o ai o iloa? Atonu e mafai foi ona e molimauina se vavega i luga o le ala.