“O le a se mea e tatau ona ou faia pe afai ua ou salamo ae le mafai ona tuua lo’u mafaufau pea e uiga i le mea sese sa ou faia?” Mo Le Malosi o le Autalavou, Oke. 2021.
Fesili ma Tali
“O le a se mea e tatau ona ou faia pe afai ua ou salamo ae le mafai ona tuua lo’u mafaufau pea e uiga i le mea sese sa ou faia?”
Ia Iloa Lou Alualu i Luma
E le o faamoemoe mai le Tama Faalelagi ia tatou atoatoa, o lea ou te faaaogaina ai a’u mea sese o ni aafiaga e aoao ai. E taumafai Satani e aumai i tatou i lalo e ala i le faalofituina o i tatou i le ta’usalaina, ae e leai se isi lava ona mana e ese mai lena. O lea la ua ou iloa lena mea, ou te taumafai e vaai pe o faapefea ona ou alualu i luma nai lo le taula’i atu i a’u agasala.
Luke M., 14, Iuta, ISA
Faamagalo Oe Lava
Pe a e faamagaloina oe lava, o le a e lagonaina le alofa o le Faaola mo oe, aua ua uma ona Ia faamagaloina oe. E manao Satani e tuu ni mafaufauga faalotovaivai i totonu o lou ulu, ae e sili atu lou malosi. O na manatu e le mai le Tama Faalelagi, o lea ia fai atu i ai e o i fafo!
Camila A., 18, Dominican Republic
Musika Musuia
Ou te fiafia e faalogologo i pese musuia e fesoasoani e siitia ma faamalosiau ai a’u. Pe a ou tatalo i le Tama Faalelagi e ole atu mo Lana fesoasoani, ona ta lea o ni musika musuia, ou te lagona moni lava le malosi o le Agaga ma e fesoasoani ia te a’u e agai ai i luma.
Elma P., 18, Negros Occidental, Filipaina
Toafilemu i Tusitusiga Paia
Afai e te lagona ua e salamo, saili mo le filemu i tusitusiga paia. O afioga a le Alii na tuuina mai ia i tatou ina ia mafai ai ona tatou lagonaina le filemu i o tatou olaga. Afai e te tatalo ina ia i ai le Agaga Paia ia te oe a o e faitau, o le a ia taialaina oe.
Emma M., 19, Sepania
E Mafai Ona Fesoasoani le Manatuaina
I le Alema 36:17–19, na faamatala ai e le Perofeta o Alema le manatuaina o ana agasala, ae o lena mea na atili ai ona ia fiafia e uiga i le tele na ia suia ma faaleleia. E pei o Alema, o le manatuaina o a tatou mea sese ua tuanai e fesoasoani ia i tatou e aua nei toe pauu atu ia i latou.
Julia M., 18, Bahia, Pasila
E le toe manatuaina e le Atua a tatou agasala
Ua ta’u mai e tusitusiga paia ia i tatou e faapea, a uma ona e salamo mai agasala, e le toe manatuaina e le Atua lena agasala (tagai i le Mataupu Faavae ma Feagaiga 58:42). E ui lava e le toe manatuaina na agasala e le Atua, ae tatou te manatua pea. E mafai ona avea ma se mea tiga le manatuaina o mea sese ua tuanai, ae nai lo le mafaufau i le ta’usalaga ua mavae o se avega, mafaufau i ai o se faamanatu o le faia o le mea sili e te mafaia.
Elijah W., 17, Iuta, ISA
O Le Togiola a Keriso—Mo Oe
Pe a ou mafaufau i a’u agasala ua tuanai, e faigofie lava ona lagona e pei ou te le’i salamo atoatoa pe ou te le agavaa i le faamagaloga a le Atua. Ae e taua le manatuaina e finagalo le Tama Faalelagi ia faaleleia i tatou. E le finagalo o Ia tatou te nonofo ai pea i le taimi ua tuanai pe tauaveina le ta’usalaina i o tatou loto e faavavau. Na auina mai e le Tama Faalelagi ia i tatou Lona Alo, o Iesu Keriso, o se Faaola ina ia mafai ai ona tatou salamo ma faamamaina e ala i Lana Togiola.
Chloe W., 16, Arisona, ISA
Liliu Atu i Isi
Atonu e te manatu o le taimi lava e te salamo ai, o le a taofia ou faafitauli ma manatu o au mea sese. Ae e le moni ai pea lena mea. O nisi taimi e tuuina pea e le Atua na lagona iina ina ia mafai ona e aoao e faatoilalo i latou. Afai ua e salamo faamaoni ae e foliga mai e le mafai ona galo au mea sese, taumafai e liliu atu i isi, e pei ona faia e Keriso, e ala i le auauna atu ia i latou o siomia oe ma faasoa atu lau molimau. O le a fesoasoani e aveese ai lou mafaufau mai ou lava sese, ma o le a e fesoasoani i se isi tagata i lea faagasologa.
Jacob W., 21, Iuta, ISA