« Te hiero ’e tō ’outou niu pae vārua », Nō te Pūai o te Feiā ’Āpī, Novema 2021.
Tuha’a purera’a nō te po’ipo’i sābati
Te hiero ’e tō ’outou niu pae vārua
Fa’ahitira’a parau
I Shall Not Want [E’ita vau e hina’aro], nā Yongsung Kim
Te vāhi patura’a o te hiero nō Roto Miti
Mai tā ’outou i ’ite, tē ravehia nei te mau fa’a’āpīra’a rarahi i ni’a i te hiero tu’iro’o nō Roto Miti […]
’Aita mātou e tārani nei i tā mātou mau tauto’ora’a nō te hōro’a i teie hiero fa’aturahia, ’o tē riro noa nei ā ’ei mea fa’aturahia, i te hō’ē niu e nehenehe e fa’aruru i te mau pūai o te nātura ē tae roa atu i te mileniuma. Mai te reira ato’a te huru, ’ua tae ato’a i te taime ’ia rave tātou tāta’itahi i te mau rāve’a fa’ahiahia—penei a’e e mau rāve’a ’aita ā tātou i rave a’e nei—nō te ha’apa’ari i tō tātou iho niu pae vārua. E tau ’aita i ’itehia a’enei, e rāve’a ïa ’aita i ’itehia a’enei.
E au mau taeaʼe ʼe mau tuahine here, e mau mahana hopeʼa teie. Mai te mea e hina’aro ’outou ’e ’o vau nei e pāto’i i te mau ’ino ’e te mau ha’afifira’a e tae mai, e mea ti’a ’ia vai tō tātou tāta’itahi hō’ē niu pa’ari pae vārua tei patuhia i ni’a i te papa o tō tātou Fa’aora, ’o Iesu Mesia.
Nō reira, tē ani nei au ia ’outou tāta’itahi, e nāhea i te ha’apa’ari i tō ’outou niu ? ’E e aha te mau ha’apa’arira’a e tītauhia nō tō ’outou ’itera’a pāpū ’e tō ’outou hāro’aro’ara’a i te ’evanelia ?
’O te hiero te pū nō te ha’apa’ari i tō tātou fa’aro’o ’e tō tātou pūai pae vārua, nō te mea ’o te Fa’aora ’e tāna ha’api’ira’a tumu te māfatu mau o te hiero […]
Mai te mea ’aita ’outou i au atu ra ’ia haere i te hiero, ’a haere pinepine atu—’eiaha ’ia iti mai. ’A vaiiho i te Fatu, nā roto i tōna Vārua, ’ia ha’api’i ’e ’ia fa’auru ia ’outou i reira […]
’A ti’aturi mai na iā’u, ’ia parau ana’e au ē, ’ia patu-ana’e-hia tō ’outou niu pae vārua ma te pa’ari mau i ni’a ia Iesu Mesia, ’aita e ti’a ia ’outou ia mata’u. Mai te mea e ha’apa’o maita’i ’outou i tā ’outou mau fafaura’a i rave i roto i te hiero, e ha’apūaihia ’outou nā tōna mana. I muri iho, ’ia tupu ana’e mai te ’āueuera’a fenua pae vārua, e nehenehe ’outou e ti’a ma te pūai nō te mea e mea pa’ari ’e te ’āueue ’ore tō ’outou niu pae vārua.