« Te ti’a-mā-ra’a e ’ere ïa i te hape-’ore-ra’a », Nō te Pūai o te Feiā ’Āpī, Novema 2021.
Tuha’a purera’a nō te pō mahana mā’a
Te ti’a-mā-ra’a e ’ere ïa i te hape-’ore-ra’a
Fa’ahitira’a parau
Tē fāri’i hape nei vetahi i te poro’i ē, te tātarahapa ’e te tauira’a e ’ere i te mea faufa’a. Te poro’i a te Atua e mea faufa’a roa te reira […]
Tē fāri’i hape nei vetahi i te poro’i ē, te tātarahapa e ’ohipa ïa nō te hō’ē noa taime. Te poro’i a te Atua ’oia ho’i, mai tā peresideni Russell M. Nelson i ha’api’i, « te tātarahapa […] e ’ohipa tau maoro. » […]
’Ua fāri’i hape vetahi i te poro’i ē, e’ita rātou i te mea ti’a-mā nō te ’āmui tā’āto’a mai i roto i te ’evanelia, nō te mea ’aita rātou i mā roa i tō rātou mau huru ’ino. Tā te Atua poro’i ’oia ho’i e ’ere te ti’a-mā-ra’a i te hape-’ore-ra’a. Te ti’a-mā-ra’a ’o te vai ha’avare-’ore-ra’a ïa ’e te tāmatara’a. E tītauhia ia tātou ’ia vai ha’avare ’ore i te Atua, i te feiā fa’atere o te autahatu’ara’a ’e ia vetahi ’ē tei herehia e tātou, ’e ’ia tūtava tātou i te ha’apa’o i te mau fa’auera’a a te Atua ’e ’eiaha e fa’aru’e ’ia topa ana’e tātou […]
Te fāri’i hape nei vetahi i te poro’i ē, tē tīa’i nei te Atua nō te tauturu ia tātou i muri a’e i tō tātou tātarahapara’a. Te poro’i a te Atua ’oia ho’i e tauturu ’oia ia tātou ’a tātarahapa ai tātou […]
Tōna aroha e ’ere ïa i te hō’ē ha’amāuruurura’a noa nō te feiā ti’a-mā. E « tauturu hanahana » tāna e hōro’a, ’o tē tauturu ia tātou ’ia riro ’ei feiā ti’amā. E ’ere noa te reira i te utu’a maita’i nō te feiā parauti’a. E « hōro’a nō te pūai » tāna e hōro’a, ’o tē tauturu ia tātou ’ia riro ’ei feiā parauti’a. ’Aita tātou e haere noa nei i te Atua ’e i te Mesia. Tē haere nei tātou ’e rāua ato’a […]
’Ia mana’o ana’e ’outou ē, e mea pinepine ’outou i te manuia ’ore ’a tāmau noa ai ’outou i te tāmata, ’a ha’amana’o i te tāra’ehara a te Mesia ’e te aroha tā te reira e fa’atupu e mea pāpū ïa. « ’Ua fa’atorohia atu [tōna] rima nō te aroha ia ’outou na » [3 Nephi 9:14]. ’Ua herehia ’outou—i teie mahana, i roto i nā 20 matahiti, ē a muri noa atu.