« E fa’a’ore te hau o te Mesia i te au ’ore », Nō te Pūai o te Feiā ’Āpī, Novema 2021.
Tuha’a purera’a nō te po’ipo’i sābati
E fa’a’ore te hau o te Mesia i te au ’ore
Fa’ahitira’a parau
’Ua nā ’ō Iesu Mesia ē, e ’ere tāna ha’api’ira’a tumu « te fa’ati’arepura’a i te ’ā’au o te mau ta’ata ’ia riri te tahi ’e i te tahi ; teie rā [tāna] ha’api’ira’a tumu, ’ia fa’aru’e-’ē-hia atu taua mau mea ra » [3 Nephi 11:28–30] […]
I muri mai i te tere o te Fa’aora i Amerika, ’ua tāhō’ēhia te ta’ata […] ’Ua ha’amāhe’ahe’a tō rātou ta’a-’ē-ra’a i mua i tō rātou here ’āmui nō te Fa’aora, ’e ’ua tāhō’ē ’ei « feiā ’āi’a i te bāsileia o te Atua » [4 Nephi 1:17]. Te fa’ahope’ara’a, « ’aita ho’i e mau ta’ata i ’oa’oa roa atu i rotopū i te mau ta’ata i hāmanihia e te rima o te Atua » [4 Nephi 1:16].
E tītau te tāhō’ē i te itoito. E tupu te reira ’ia fa’a’apu tātou i te here nō te Atua i roto i tō tātou ’ā’au ma te rōtahi i ni’a i tō tātou hope’a mure ’ore. ’Ua tāhō’ē tātou i tō tātou hīro’a ’āmui mātāmua ’ei tamari’i nā te Atua ’e i tō tātou fafaura’a ia tātou i te mau parau mau nō te ’evanelia i fa’aho’ihia mai. ’Ei fa’aho’ira’a, e fa’atupu tō tātou here nō te Atua ’e tō tātou ti’ara’a pipi nā Iesu Mesia i te māna’ona’ora’a mau ia vetahi ’ē […]
’Ia pū’ohu te here o te Mesia i tō tātou orara’a, e rave tātou i te mau mana’o tū’ati ’ore ma te marū ’e te fa’a’oroma’i ’e te hāmani maita’i. ’Aita tātou e ha’ape’ape’a rahi ia tātou iho, e ha’ape’ape’a rahi rā i te ta’ata tupu. E ’imi tātou ’ia tāmarū ’e ’ia tāhō’ē. E’ita tātou e fa’aō i roto i te mau « mānianiara’a pāpū ’ore », te fa’ahapara’a i tei ’ore i tū’ati ia tātou ’e te tāmatara’a i te fa’aturori ia rātou. E feruri rā tātou ē, terā ta’ata tā tātou i ’ore i tū’ati, tē fa’aitoito roa nei ïa ’oia i tōna pae noa atu te mau ’ohipa i roto i tōna orara’a […]
’Ei itoito tātou i te tu’ura’a i tō tātou here i te Atua ’e tō tātou ti’ara’a pipi nā te Fa’aora nā ni’a roa i te tahi atu mau mana’ora’a. Turu ana’e i te fafaura’a nō tō tātou ti’ara’a pipi—te fafaura’a ’ia hō’ē.