« Tē rahi na tō ’oe hina’aro iā’u i teie ? », Nō te Pūai o te Feiā ’Āpī, Novema 2021.
Tuha’a purera’a nō te pō mahana mā’a
« Tē rahi na tō ’oe hina’aro iā’u i teie ? »
Fa’ahitira’a parau
Tē uiui ra ānei ’outou i te uira’a a Iesu ia Petero ra : « Tē rahi na tō ’oe hina’aro iā’u i teie ? » [Ioane 21:15] […]
Tē hōro’a mai ra ānei te mau mea nō teie nei ao i te ’oa’oa ’e te poupou ’e te hau tā te Fa’aora i hōro’a i tāna mau pipi ’e ’o tāna e hōro’a nei ia tātou ? ’O ’ōna ana’e tē nehenehe e hōro’a mai i te ’oa’oa mau, te pōpou mau ’e te hau mau nā roto i te herera’a iāna ’e te pe’era’a i tāna mau ha’api’ira’a […]
’Ia ’ite tātou i te aura’a pāpū a’e i teie uira’a, e nehenehe tātou e ha’amaita’i ia tātou ’ei melo nō te ’utuāfare, ’ei ta’ata tupu, ’ei tino huira’atira, ’ei melo nō te ’Ēkālesia ’e e tamaiti ’e e tamāhine nā te Atua […]
I aroha mai te Metua i te ao ra ia tātou ’e ’ua fa’aineine mai ’oia i tāna fa’anahora’a nō te fa’aorara’a ’e te hō’ē Fa’aora i te pū o te reira […]
Tītauhia ’ia ti’aturi ia Iesu ’e i te fa’anahora’a nō te ’oa’oa a te Atua. Te ti’aturira’a ’o te herera’a ïa ’e te pe’era’a i tō tātou Fa’aora ’e te ha’apa’ora’a i tāna mau fa’auera’a, noa atu tei roto tātou i te fifi ’e te mārō […]
E’ita e ti’a ia ha’amo’e i tō tātou here ’e tō tātou tīa’i ia Iesu, noa atu tē fa’aruru nei tātou i te mau fifi huru teimaha. E’ita roa atu te Metua i te ao ra ’e Iesu e ha’amo’e ia tātou. ’Ua here rāua ia tātou […]
E ha’amana’o noa tātou ē, tō tātou ’oa’oa mau, tei ni’a ïa i tō tātou tā’amura’a i te Atua ’e Iesu Mesia ’e ia vetahi ’ē.
Hō’ē rāve’a nō te fa’a’ite i tō tātou here ’o te ’āmuira’a ïa i te ’utuāfare, te mau hoa ’e te mau ta’ata tupu nō te rave i te tahi mau mea na’ina’i nō te tāvini maita’i a’e te tahi i te tahi. ’A rave i te mau ’ohipa e fa’ariro i teie ao ’ei vāhi maita’i a’e.
E aha te mau mea tā ’outou e nehenehe e rave i roto i tō ’outou iho orara’a nō te fa’a’ite ē ’ua here nā mua ’outou i te Fatu ?