Luwas nga Pagapundokon Pauli sa Panimalay
Mubo nga mga Kinutlo
Ang Amahan sa atong mga espiritu nagtinguha nga ang Iyang mga anak luwas nga pagapundokon pauli sa panimalay. …
Kadto kinsa modawat sa ebanghelyo ni Jesukristo, dili igsapayan sa kaliwat, mahimong bahin sa napundok nga Israel. Uban niana nga pagpundok ug sa daghang templo nga natukod ug gipahibalo, kita anaa sa usa ka talagsaon nga posisyon sa pagpundok sa Israel sa duha ka habig sa tabil nga wala mahitabo sukad pinaagi sa pagsunod sa plano sa Amahan. …
… Mapasalamaton kami nga ang mga miyembro ug ang mga misyonaryo nagpalapad na karon sa mga paningkamot sa pagpundok sa nagkatibulaag nga Israel. … Bisan pa man, ang atong pasalig sa paghigugma, pagpakigbahin, ug pagdapit mahimong mapalapdan pa og maayo.
Usa ka importante nga bahin niining misyonaryo nga paningkamot mao ang alang sa indibidwal nga mga miyembro nga mahimong talagsaon nga mga ehemplo bisan asa kita nagpuyo. Kita kinahanglang dili magtakoban. Ang atong Kristohanon nga ehemplo sa kamabination, katarong, kalipay, ug tiunay nga gugma alang sa tanang katawhan makamugna og dili lamang usa ka makagiya nga kahayag alang kanila apan usa usab ka pagsabot nga adunay kahilwasan diha sa mga ordinansa sa kaluwasan ug kahimayaan sa gipahiuli nga ebanghelyo ni Jesukristo. …
Kita nagtahod sa kabubut-on. Sa atong sekular nga kalibotan, daghan ang dili mosanong ug moapil sa pagpundok sa Israel. Apan daghan ang moapil, ug ang Ginoo naglaom niadtong kinsa nakadawat sa Iyang ebanghelyo nga maningkamot karon nga mahimong usa ka talagsaon nga ehemplo nga motabang sa uban nga moduol ngadto sa Dios. Kini magtugot sa atong mga igsoon nga lalaki ug igsoon nga mga babaye sa tibuok kalibotan nga makatagamtam sa langitnon nga mga panalangin ug mga ordinansa sa gipahiuli nga ebanghelyo ni Jesukristo ug mahimong luwas nga pagapundokon pauli sa panimalay.