Patriyarkal nga mga Panalangin
Ecuador
Ang Inyong Patriyarkal nga Panalangin—Dinasig nga Direksiyon gikan sa Langitnong Amahan
Ang akong patriyarkal nga panalangin hilabihan ka importante kanako sa dihang batan-on pa ko sa daghang rason. Una, ang akong patriyarkal nga panalangin nakatabang kanako nga masabtan ang akong tinuod nga mahangtoron nga pagkatawo—kon si kinsa gayod ako ug kon si kinsa ako mamahimo. … Ako nasayod nga ako nailhan ug gimahal sa akong Langitnong amahan ug sa akong Manluluwas ug nga Sila personal nga nalambigit sa akong kinabuhi. Kini nakatabang kanako nga magtinguha nga mas maduol pa ngadto Kanila ug madugangan ang akong hugot nga pagtuo ug pagsalig diha Kanila. …
Ang masayod kon si kinsa gayod ako nakatabang kanako nga masabtan ug magtinguha sa pagbuhat kon unsa ang gilaoman sa Dios ngari kanako.
Kini migiya kanako sa pagtuon sa mga pakigsaad nga akong gihimo ug sa gisaad nga mga panalangin diha sa pakigsaad sa Dios ngadto ni Abraham. Kini nakahatag kanako og mahangtoron nga panglantaw nga nagdasig kanako nga mas hingpit nga motuman sa akong mga pakigsaad. …
Kini mahinungdanon alang kanako sa pagdawat sa akong patriyarkal nga panalangin samtang ako batan-on pa ug samtang ang akong pagpamatuod nagtubo pa. …
… Ang pagpangga sa akong patriyarkal nga panalangin mipanalangin samtang ako batan-on pa nakapanalangin kanako og kaisog kon ako nawad-an og kadasig, naghupay kanako kon ako nagmahadlokon, kalinaw kon ako mibati og kabalaka, paglaom kon ako mibati og kawalay paglaom, ug kalipay kon ang akong kalag nagkinahanglan kaayo niini. Ang akong patriyarkal nga panalangin nakatabang kanako nga mousbaw ang akong hugot nga pagtuo ug mosalig sa akong Langitnong Amahan ug sa akong Manluluwas. Kini nakapadugang usab sa akong gugma alang Kanila—ug kini nagpadayon gihapon.
Kanus-a Ka Angay nga Makadawat og Patriyarkal nga Panalangin
Minahal kong batan-ong mga lalaki, batan-ong mga babaye, mga ginikanan, ug mga bishop, ang patriyarkal nga mga panalangin dili lamang preparasyon sa pagserbisyo og misyon. Ang takos nga binunyagang mga miyembro makadawat sa ilang patriyarkal nga panalangin kon ang panahon husto na alang kanila. …
Mga kaigsoonan, mohatag ko sa akong pagsaksi nga ang Langitnong Amahan ug ang Iyang Hinigugma ug Bugtong Anak, nga si Ginoong Jesukristo, buhi. Sila nahigugma kanato. Ang patriyarkal nga mga panalangin sagradong mga gasa gikan Kanila. Kon kamo makadawat sa inyong panalangin, inyong maamgohan ug mabatyagan kon giunsa Nila kamo sa paghigugma ug giunsa Nila nga matutokan kamo sa tinagsa-tagsa.