Siyuck sin Misineri an! Elos Kuh In Kahsrwe Kowos!
Sel Elder Russell M. Nelson
Ke U luhn Mwet Sap Singucul Luo
Misineri nuh kwewa, mwet fuhsr mwet mahtuh, kuhlwacnsap ke finsrak sefanna ke oruh moul uh in wo nuh sin mwet sahyac.
Tamuhlwel, tahmtahel, ac kawuck wolacna wiyuck an, kuht tahfweoht luhngse lasr ac pwacngohk nuh suwos kais sie. Kuht pwacrwack ke mwe fahkwack se lal Prestuhn S. Monson olutu uh, suc moklwe yac in kuhlwacnsap luhn misineri uh nuh key ac 18 nuh sin tuhlihk mukul ac 19 nuh sin tuhlihk muhtwacn uh. Ke oruh se inge, puhseni mwet fuhsr lasr kuh in engankihn mwe insewowo ke misin uh.
Yac luo somlah ah ac sulpacna ahkpwacyeiyuck kuh olutu se inge, Prestuhn Monson el fahkwack “lah mukul fuhsr suwohs nuh kwewa, enenuh in ahkolah in oruh sie misin. Kuhlwacnsap luhn misineri uh pa ma se kunen pristut uh—orekma se Leum el motko kuht suc utuckuh yohk nuh se in oruh.”1 El sulpacna ahkuhtweyac lah tahmtahel fuhsr uh, misin se pa sie ma kowos kuh in sulaclah in oruh, tuhsruhk tiac kunohkohn se. Ac el sulpacna suli in puhs siacnyacn mahtuh in kuhlwacnsap.
Ahkolah nuh ke sie misin uh yohk srihpac. Misin se pa sie mukwikwi in kuhlwacnsap mihsaclah nuh sin God ac mwet uh. Misineri uh tahpuhk pacl wo se ke mani elos sefiyac lalos sifacna. Pahpah ninac, sucu, kawuck, ac sang ma oreklac nuh ke General Missionary Fund uh kuh pac in kahsruh. Misineri nuh kwewa, mwet fuhsr ac mahtuh, kuhlwacnsap ke finsrak sefanna ke oruh moul uh in wo nuh sin mwet sahyac.
Sulaclah in kuhlwacnsap ke sie misin fah orwaclah acn misineri an e som nuh we ke ip luhn nguhn, mukul kuh muhtwacn kiyacl an, ac tuhlihk nahtuhlos an ke fihl tok an. Kena se in kuhlwacnsap pa sikyak se ma orek ke eklac luhn mwet se, nwacsnwacs, ac ahkolah.
Ke puhsiyacn mwet fin facluh se inge uh, puhs suwos tiac mempucr ke Alu luhn Jisus Kraist luhn Mwet Luhlahlfongi ke Lwen-sahflah ac srihklac etuh la kacsr ac misineri lasr uh. Kowos oasr inge kuh lihpsre ke srihpen kowos ke etuh yohk ke Mormon, ac ke ma misineri lasr uh luti uh. Ke kowos luti yohk kacsr uh, kowos ac konwacack lah oasr ohiyac wo pucspucs yohrohsr ma oasr yuruwos pac. Kuht kwacfe kowos in sruok kwewa ma wo ac pwacye an, na liye lah kuht kuh in sang pac kuhtuh. Ke facluh se inge sesseslah ke ma upac uh, kuht enenuh kahsruh ke fihlfihl in pacl. Alu, ma pwacye, ac misineri lasr uh pa ip yohk srihpac se ke kahsruh sacn.
Misineri fuhsr lasr uh ikollah nuh tok lutlut lalos, orekma, ahko, ac kuhtwena ma sahyac mwet fuhsryak uh kwacna oruh ke fihl in moul se inge. Nuh ke mahlwem 18 nuh ke 24 ah elos fihliyac wihn ma nuh kwewa ke srihpen kena loal lalos in kuhlwacnsapuh Leum.2 Ac kuhtuh misineri lasr uh kuhlwacnsap ke elos mahtuh kuhtuh. Nga etuh lah sucu lalos ahkinsewowoyeyuck. Ke sucu lasr sifacna uh, mwet alkosr pa kuhlwacnsap ke misin ingena uh—tuhlihk muhtwacn tolu, mukul tuhmwaclos, tuhlihk muhtwacn ac tuhlihk mukul se nuhtin nahtuhsr.
Kuhtuh suwos kuh in motko ke ine se Mormon uh. Ine se sahyac lasr. Tiac ine na pwacye lasr uh, tuhsruhktuh kuht etweyuck yohk muh Mormon. Kahs se tuhkuh ke puk ke ma suhmuhslah muhtahl etweyuck muh Puk luhn Mormon.
Ine pwacye luhn Alu uh pa Alu luhn Jisus Kraist luhn Mwet Luhlahlfongi ke Lwen-sahflah. Pa Alu luhn Jisus Kraist pwacye se ma sifil akwucki uh. Ke El oasr fin facluh ah, El akiyac Alu Lal uh. El pahngon Mwet Sap, Mwet Itngucul, ac mwet kol sahyac ma El sang kuh luhn pristut in mukwikwi ke Inel.3 Tukun Kraist ac Mwet Sap Lal misac ah, mwet uh ekuhllah akwuck ac mwe luti uh. Alu pwacye sac ac pristut uh tuhlac. Tukun Pacl Lohsrlohsr ah, ac ye kohkoh luhn Pahpah Lucng, Jisus Kraist fohlohkohnwack Alu Lal uh. Ingena sifil moul, fohlohkyak, ac ahkfahsryeyuck ye kohkoh muhtahl Lal.4
Kuht ukwe Leum Jisus Kraist ac luti Kacl. Kuht etuh lah tukun kuhtanglah wolacna Lal ke misac ah, Leum moulyak se sikyang nuh sin mwet tuhma lutlut Lal ke pacl puhs. El weluhlos mongo. El weluhlos fahsr. Met liki som Lal, El suhpwaclos in “som … ac luti facluh nohfohn, pacptaiselos ke Inen Pahpah, ac Wen, ac Nguhn Muhtahl.” 5 Mwet sap ah ahkos mwe ahkuhtweyac sac. Elos pahngon pac mwet sahyac in kahsrwelos ahkfalye masap luhn Leum.
Mihsenge, ye kohkoh luhn mwet sap ac mwet pahluh in pacl inge, sap sacpacna tuhtahflah nuh sin misineri ke Alu luhn Jisus Kraist luhn Mwet Luhlahlfongi ke Lwen-sahflah. Misineri inge kuhlwacnsap ke muhtuhnfacl puhs liki 150. Ke kunohkohn lalos in ahol Leum Jisus Kraist, elos kampare in ahkfalye sap muhtahl sac—ahksasucyeyucklac ke lwen lasr uh sin Leum Sifacna—in us wosasuc fohnlah se nuh sahyac ac ahkinsewowoye moul luhn mwet yen nuh kwewa.6
Misineri ke yac fuhsr lalos kuh yac 20 srihklac etuh lalos fin facluh. Tuhsruhk elos ahkinsewowoyeyucklac ke mwe sang—ma oacna kuh luhn Nguhn Muhtahl, luhngse luhn God, ac fahkwack luhlahlfongi ke ma pwacye—ma oruh elos mwet utuck pweng yohk kuh la luhn God. Elos akacsruhi ke pweng wowo ke wosasuc ma ac fah use engan pwacye ac engan wacngihn sahflahiyac nuh selos kwewa suc ahkos pweng lalos. Ac ke ohiyac pucspucs, elos oruh ohinge ke facl ac kahs ma sasuc nuh selos.
Misineri uh srihke in ukwe Jisus Kraist ke kwewana ma elos fahk ac ma elos oruh uh. Elos fahkwack ke Jisus Kraist ac ke Iwaclah Lal.7 Elos luti ke Fohlohkyak pwacye ke Alu mahtuh luhn Kraist sin mwet pahluh se emet ke lwen-sahflah, Joseph Smith.
Sahp kom ac lohng met, kuh finne sruhnga lohng, misineri lasr uh. Finsrak luhk uh pa kowos in tiac sahngweng selos tuhsruhk etwaclah selos. Elos kuh in oruh mwe kahsruh suhpweyuckme lucng me nuh yuruwos.
Ohiyac sacn sikyak nuh sel Jerry, mukul wi Protestant ke el yac 65 muh suc muhta Mesa, Arizona. Pahpah tuhmwacl Jerry ac mwet luti se luhn Baptist; ninac kiyacl ah, mwet luti se ke Methodist. Sie lwen ah Pricilla kawuck se lal Jerry fahk nuh sel ke ngal se el puhla ke srihpen misac se luhn tuhlihk se nahtuhl ke isuslac ah ac sahf kweok se ma sikyak tiac paht tohkoh ah. Upac nuh se in oruh ninac wacngihn mukul tuhma se, tuhlihk ahkosr nahtuhl Pricilla— tuhlihk muhtwacn tolu ac tuhlihk mukul se. Ke el akacsruhi nuh sel Jerry ke puhla loal lal, el fahkwack lah el motko in eslah moul lal sifacna. Ke kuh ac luhngse nuh kwewa ma Jerry el kuh in oruh ah, el srihke in kahsrwel kahlwem kac lah moul lal uh yohk srihpac. El solwacl in som wi alu lal ah, tuhsruhk Pricilla el ahkuhtweyac lah el fuhlweack ke God.
Jerry el tiac etuh lah meac el ac oruh. Tohkoh, ke el twekofi sahk ke lukunum sel ah, mukul luhlahlfongi ke God se inge pruhe nuh sin God ke kolyuck. Ke el pruhe ah, el lohng puhsra se ke nuhnak lal ah fahk, “Tilokihnyac tuhlihk mukul ke pwacskuhl soko ngwacn.” Jerry, el luhman lut kac, motko lah meac kalmeyac. Ke el motko ke pihrihkyuck se inge ah, el sis muhtahl nuh inkacnek ah ac liyacack mukul fuhsr luo wes fasrfasr ac nektai pwacskuhl apkuhran nuh lohm sel ah. Lut ke “ohiyac sac,” el liyaclos kahsruhsr ahluhkwelah. Na, akihlacnwack lah ohiyac sac el enenuh in mukwi nuh kac, el wolac, “Wei, komtacl, nuhnak muhnahs tui! Nga enenuh in sramsram nuh suwos!”
Ke fohsack tuhsruhk ngwetngwet pwacrack sac, mukul fuhsr luo ah tui. Ke elos apkuhranyang ah, Jerry el liye lah elos ohloh ine sihmlac lalos ahkkahlwemye lah elos misineri ke Alu luhn Jisus Kraist luhn Mwet Luhlahlfongi ke Lwen-sahflah. Jerry el ngwetwacng nuh selos ac fahk, “Ma se inge kuh in ake kuhtuh, tuhsruhk nga pruhe ac fwackyuck nuh sihk in ‘tilokihnyac tuhlihk mukul ke pwacskuhl an.’ Nga ngwetack nuh inkacnek uh, ac kowos pa inge. Kowos kuh in kahsrweyuc?”
Misineri ac isracsr srihsrihk, ac sie fahk, “Ahok, nga etuh lah kuht kuh.”
Jerry el ahkuhtweyac lah efuh el elyah sel Pricilla. Pacl na sa misineri ac ohsun nuh yohrohl Pricilla, tuhlihk nahtuhl, ac Jerry. Elos sramsramkihn srihpac luhn moul uh ac plwacn ma pahtpaht luhn God nuh selos. Jerry, Pricilla, ac tuhlihk nahtuhl ah kapwack ke luhlahlfongi ke pruhe ke inse pwacye, lutlutkihn Puk luhn Mormon lalos, ac atuhkweni luhngse nuh sin mempucr luhn Alu. Luhlahlfongi kuh ke Jisus Kraist lal Jerry ac fokokoi liki met ah. Suhlahlahlfongi ac nuhnak in sifacna eslah moul lal Pricilla ah forlah nuh ke finsrak ac engan. Elos pacptaislac ac orwaclah mempucr ke Alu fohlohkyak luhn Kraist.8
Ahok, Misineri uh kuh in kahsruh ke ohiyac pucspucs. Nuh ke mwe srihkasrak, kuhtuh suwos kuh in ke etuh yohk ke mwet mahtuh lowos somlah ah. Kom ac kuh in etuh inen pahpah ninac kiyowos an ac pahpah ninac mahtuh ahkosr kiyowos an, tuhsruhk ac pahpah ninac mahtuh alkosr kiyacn pahpah mahtuh ninac mahtuh an? Kuh kowos etuh inelos? Yac kowos luhngse etuh yohk kaclos? Siyuck sin misineri an! Elos kuh in kahsrwe kowos!9 Elos kuh in sa sokwack ma sihmlac ke sramsram mahtuh luhn sucu luhlahp ke Alu luhn Jisus Kraist luhn Mwet Luhlahlfongi ke Lwen-sahflah.
Kuhtuh suwos mempucr tuhsruhk tiac wi ma orek uh. Kowos luhngse Leum ac kwacna nuhnkuh in fohlohk nuh ke Alu Lal. Tuhsruhk kowos tiac etuh lah kowos ac muhtwacwacack fuhkah. Nga luhngse kowos in siyuck sin misineri an!10 Elos kuh in kahsruh! Elos kuh in kahsruh pac luti mwet kowos luhngse an. Kuht ac misineri uh luhngse kowos ac kena fohlohkohnoht engan ac kahlwem luhn wosasuc nuh in moul lowos an.
Kuhtuh suwos kuh in luhngse etuh ohiyacn kuhtanglah sie pahlah luhn ikoac kuh moul in paht kuhtuh ac engankihn kuh luhn mahno. Siyuck sin misineri an! Elos kuh in kahsrwe kowos! Ma konweyuckyak ahkkahlwemye lah, in oruh sie u, mwet ke Alu luhn Jisus Kraist luhn Mwet Luhlahlfongi ke Lwen-sahflah uh pa un mwet kuh mahno se. Pihsen mwet misac wi suhpuhs ac moul loeloes lalos wo liki nuh kwewa ke konwacack luhn u etweyuck ma lutlutkihn ke lusacn pacl na loeloes se fin can United States.11
Kuhtuh suwos kuh in puhla lah moul uh kahfofo ac elyah, tuh loali nuh ten ke insiyowos kowos puhla ngal luhn oalallah, ke wacngihn kolyuck ac srihpac. Siyuck sin misineri an! Elos kuh in kahsrwe kowos! Elos kuh in kahsrwe kowos in etuh yohk ke srihpac pwacye luhn moul uh—efuh kowos oasr inge facluh ac kowos ac som nuh oyac tukun misac. Kowos kuh in etuh ohiyacn wosasuc luhn Jisus Kraist uh ac fah ahkinsewowoye moul lowos an liki ma nuh kwewa kowos kuh in motko in pacl inge uh.
Fin oasr elyah lowos ke sucu lowos an, siyuck sin misineri an! Elos kuh in kahsrwe kowos! Ahkkweye pahyuck uh ac sucu uh pa yohk srihpac na upac nuh sin Mwet Luhlahlfongi ke Lwen-sahflah uh. Sucu uh kuh in tuhkweni ne tok. Siyuck sin misineri an in luti kowos lah ohiyac se inge e kuh in orek fuhkah nuh ke sucu lowos an.
Misineri uh kuh in kahsrwe kowos ke kena lowos nuh ke etuh yohk. Nguhnin mwet uh luhngse yohk mwe ahkkahlwemye uh. Finne ma pwacye uh tuhkuh ke konwacack luhn science kuh ke fwackyuck tuhkuh sin God me, kuht suk kac! Wolacna luhn God uh pa lahlmwetmwet uh.12
Yohkwelihk luhn etuh uh weacng ip luhn nguhn ac oacyacpac etuh luhn moul uh. Kuht ahkuhtweyac wo yohk srihpaciyacn etuh luhn ma suhmuhslah muhtahl uh. Ma sukokyak ingena uh pa Mwet Luhlahlfongi ke Lwen-sahflah uh pa etuh emet ke Ohiyacn Mwet Kristin ac Pwacpuhl uh.13 Kowos fin ke etuh wo ke Pwacpuhl, Puk luhn Mormon uh, ac eis etwacack yohk ke ohiyacn tuhkweni luhn mwet uh ac ohiyacn pahpah nuh sin God, siyuck sin misineri uh! Elos kuh in kahsrwe kowos!
Puhs suwos oasr kena yohk la in kahsruh mwet ma enenuh. Ke srihpen kuht ukwe Jisus Kraist uh, Mwet Luhlahlfongi ke Lwen-sahflah uh kwacfeyuck pac ke ahkkweye wacngihn sahflahiyac se.14 Mwet nuh kwewa kuh in wi kuht in kahsruh mwet enenuh ac sang kahsruh nuh sin mwet ongaiyac ke muhsahllah yohk ke acn nuh kwewa facluh. Kom fin ke wi, siyuck sin misineri an! Elos kuh in kahsrwe kowos!
Ac kowos fin ke etuh yohk ke moul tukun misac uh, ke inkuhsrao, ke plwacn luhn God nuh suwos an; kowos fin ke etuh yohk ke Leum Jisus Kraist, Iwaclah Lal, ac Fohlohkyak ke Alu Lal oacna ke akwucki met ah, siyuck sin misineri an! Elos kuh in kahsrwe kowos!
Nga etuh lah God el moul. Jisus pa Kraist. Alu Lal uh fohlohkihnyuckyak. Nga fucsrfucsr in pruhe tuh God lacn ahkinsewowoye kais sie suwos ac kais sie misineri sacohk lasr an. Ke inen Jisus Kraist, amen.