Ma Sap Yohk Se Emet
Sel Elder Jeffrey R. Holland
Ke U luhn Mwet Sap Singucul Luo
Kuht enenuh in moul oacna mwet tuhma lutlut kihsackuhnlah in ahkkahlwemye luhngse lasr nuh sin Leum.
Apkuhran in wacngihn u ke sramsram mahtuh ma nga pahkomuhta yohk oacna Mwet Sap singucul sie ma luhlah tukun na misac luhn Mwet Lahngo luhn facluh. Nga motko tuh kuhtuh pacl uh kuht muhlkuhnlah luhpan suhpah lalos ac ke elos arlac luhlahlfongwellah Jisus pacl eltahl enenuh. Nuh selos El fahk lah, “Yac nga tiac wi kowos ke pacl loeloes, a kowos tiac etweyuc … ?”1
Tuhsruhktuh, elos tiac pahngon muh muhta Lal yohrohlos ah fal. Yac tolu suhfallac in pahngon nohfohn U luhn Mwet Sap Singucul Luo sin mwet pucspucs ma tuhfahna auliyak, forlah liki tahfonglac lalos met, lotwelosyang ke ma usrnguck ke wosasuc luhn Jisus Kraist, ac sang elos in tahfwelah orekma sac nuh ke elos oacyacpac acnwucki. Eltahl, sie un elder sasuc akmuhsralah, fah konwacack upaciyen pacl fahsruh uh.
Yohkna nuh ke elos muhkwenalac ah. Jisus el sulpac srihke in fahk nuh seltahl lah El ac tiac weluhltahl ne tok, tuhsruhk eltahl koflah kuh tiac kuh in kahlwem ke sie mwe nuhnak suhpwacr. Mark el sihm:
“El luti mwet tuhma lutlut Lal, ac fahk nuh selos, Wen Nuhtin mwet el ituckyang nuh in poun mwet, ac elos fah unilyac; ac tukun el acnwucki, el fah moulyak in lwen tolu.
“Tuhsruhk elos tiac etuh kalmacn fahk sac, ac elos sahngweng in siyuck sel.”2
Na, tukun kihtin pacl srihsrihk in lotwelah ac finne srihklac pacl in ahkolah, oasr ma sikyak suc elos tiac pahngon kuh luhlahlfongi muh ac sikyak. Leum ac Mwet Luti Fuhlwact lalos, mwet Pwacpa wolacna lalos, ac Tohkohsrah el srihpsrihpyak. Orekma Lal fin facluh sahflah, ac Alu srihsrihk se El akiyac ah oacna in ac muh fahsr in wacngihnlac. Mwet Sap Lal elos loh ke moulyak Lal tuhsruhk ma se inge oruh elos fohsack. Pwacyena elos nuhnkuh, “Mac kuht ac oruh ingena?” elos foracng nuh ke topukyac elos som nuh yohrohl Peter, Mwet Sap mahtuh emet.
Nuhnak muhnahs lwelah nuh sihk in motko lah mac elos fahk nuh sin sie sin sie ke kahs suc wacngihn in ma suhmuhslah. Peter el fahk nuh sin mwet wiyacl sie ma apkuhran nuh ke ma se inge: “Tamuhlwel, oasr yac wolacna tolu. Wacngihn sie sesr ma tiac esam kuhtuh mahlwem fototo somlah ke usrnguck ma kuht liye ac wolacna kuht puhlakihn. Kuht sramsram wi, pruhe wi, ac orekma wi Wen na pwacye Nuhtin God Sifacna. Kuht fahsr weluhl, ac tuhng Yohrohl, ac fong se ke sruhuh El ac misac ahksahfyelah asruoki inmahsrlon Leum ac Peter ac Mwet Sap, wacngihn sie suc tuhng upac oacna nga. Tuhsruhk sahflah tari. El ahksahfyelah orekma Lal, ac El moulyak liki inkuclyuck uh. El oraclah inkacnek in molwelah Lal ac kuht. Na elos siyuck, “Mac kuht ac oruh ingena?” Nga nihkihn lah mac sahyac nga kuh in fahk nuh sum sahyacn fohlohklac nuh ke moul lom met ah, enganwack, Nga nuhnkuh ngan ‘som pahtuhr.’” Ac ohnkohsr ke mwet luhlah sin Mwet sap ah ahkkweye, “Kuht ac wi kom pac.” John, suc sie selos, el suhmuhslah, “Elos som in kihtin pacl ah, ac sroacng nuh fin soko oak.”3
Tuhsruhk, mwe suhpwacr, pahtuhr sac tiacna wo. Fong se met eltahl som nuh ke luhluh ah, wacngihn ma eltahl sruokyac, tiacna soko. Ke kuhsruhn lwen ah tuhkuh, elos suhpwacrlac ac kihfaslah oak ah nuh ke acn ah ke elos liye mwet se lihksreni pahng nuh seltahl, “Tuhlihk, oasr ik komtacl sruokyac?” Tiac pwacr Mwet Sap ma fohlohklac mwet pahtuhr inge topuk ke sie top ma wacngihn mwet pahtuhr luhngse fahk, “Wacngihn ma kuht sruokyac,” eltahl mungulngul, nuh koluk uh pahngpahng eltahl, “tuhlihk.”4
“Sislah nwek an nuh lacyacn lacyot ke oak an, ac kom fah konwacack,”5 mwet sac lihksreni pahng—ac ke kahs fihsracsr ingoh, eltahl akihlacnwack lah suc sramsram inge. Yac na tolu somlah mwet ekahsr inge pahtuhr ke acn se pacna inge. Ke pacna pacl se ingoh eltahl orekma fong fohn, ac [tuh] wacngihn ma elos sruokyac,6 ma suhmuhslah fahk. Tuh sie mwet Galilee fin mwes ah pahng eltahl in sislah nwek nahtuhltahl ah, na eltahl “sruokyac ik na puhkantwen,”7 puhslac ne nwek ah mihsaclihk, ik sruokyucki ac nwacklah oak lukwac toasrlac ne kuhrwacna moti.
Ingena sulpac sikyak, Ke “tuhlihk” inge, pahngonyuck, sisyac nwek nahtuhltahl nuh ten, “ac elos koflahna olwack ma ke puhkantwen luhn ik.”8 Jon el fahk kahlwem: Leum pa inge.”9 Ac Peter suc ingunyacr, ahtulac liki oak ah.
Tukun sie tuhkweni engan yurin Jisus, oasr sramsram lal Peter nuh sin Mwet Lahngo ma nga nuhnkuh tuh pa ahkuhtweyac ke ma etweyuck ke Mwet Sap Pwacye, ac yohkna kacl Peter sifacna, moklweyuck mwet fokoko se inge nuh ke mwet kol fuhlwact oaru. Ngwetwacng liye mahn kihtin oak okwacltahl ah, nwek mihsacsac, ac yol in ik se ik 153, Jisus el fahk nuh sin Mwet Sap mahtuh sac, “Peter, yac kom luhngse nga yohk liki ma inge nuh kwewa?” Peter el fahk, “Ahok, Leum; kom etuh nga luhngse kom.”10
Leum el topuk fahk sac tuhsruhk tiac tui in siyac muhtuhn mwet tuhma lutlut Lal ac sifil fahk, “Peter yac kom luhngse nga?” Mwet pahtuhr sac, suc yuckihn fohsack kuhtuh srihk ke kihsen siyuck sac, ac topuk pacl ahkluo, “Ahok, Leum; kom etuh nga luhngse kom.”11
Leum el sulpac siyuck, tuhsruhk puhsrwacl toasr El siyuck pacl ahktolu, “Peter, yac kom luhngse nga?” Pacl se inge toasr insiacl Peter. Sahp el esamwack lwen ekahsr somlah ke siyuckyuck sel kihsen siyuck se pacl tolu ac el topuk fal kahlwem—tuhsruhk kihsen siyuck se el topuk ac moh. Kuh sahp el muhtwacwacack in nuhnkuh muh el tiac kahlwem ke kihsen siyuck luhn Mwet Luti. Kuh sahp el suk insiyacl, suk top na pwacye elan ahkolah in sang, sifacna sikyak. Finne fuhkah puhla lal ke pacl sac, Peter el fah pacl se ahktolu, “Leum, kom etuh lah nga luhngse kom.”12
Ke top lal Jisus, (inge nga sulpac tuhkahkihn lah nga petsacelah inge tiac sihmlac in ma suhmuhslah), sahp fahk ange, “Na Peter, efuh kom oasr inge? Efuh kuh kuht fohlohk nuh fin mwes uh, ke nwek ekahsr ah pacna, oruh kain sramsram sac pacna? Kuh tiac kahlwem met ac kahlwem ingena lah nga fin luhngse ik, nga kuh in eis ik? Ma nga enenuh uh, Peter, pa mwet luhlahlfongi—ac nga enenwaclos ne tok. Nga enenuh mwet in kihte sip nuhtihk ac molwelah lahm nuhtihk. Nga enenuh mwet in luti wosasuc luhk ac loango luhlahlfongi luhk. Nga enenuh el suc luhngse nga, na pwacye, luhngse nga na pwacye, ac luhngse ma Pahpah tuhmwacsr Inkuhsrao El pahngonyuc in oruh. Ma kunacsr uh tiac sie sap muhnahs. Kunohkohn ma ac tiac sa na tari se. Tiac suntacn, tiac wacngihn finsrak kac, tiac ma in fihliyucki ne oacna mulut tohktohkyak ke puhlan pacl uh. Ma inge pa orekma luhn God Kuhlwacna, ac ma inge ac ekuhllah facluh. Oruh, Peter, pacl se ahkluo ac sahp pacl sahflah, Nga siyuck sum in fihliyac ma inge nuh kwewa, ac som in luti ac fahkwack, orekma ac kuhlwacnsap ke suwohs, ne ke lwen se ma elos ac oruh koluk nuh sum oacna elos oruh nuh sihk.”
Na tahpuhllac nuh sin Mwet Sap ah kwewa, sahp El fahk oacna ohinge, “Yac kom oacna mwet lahlfon oacna etahin sahk ac Facrisi ac? Oacna Herod ac Pilate? Yac kom, oacna elos, nuhnkuh muh orekma se inge ac fihsracsr in misac ke kom uniyucwi? Yac kom, oacna elos, nuhnkuh muh sahksin ac osra ac kuclyuck pa sahflahiyac ac kais sie mwet fah engan in fohlohklac nuh ke oacna sie ma kom oruh met? Tuhlihk, yac moul luhk ac luhngse luhk tiac fakihsyac insiyom upac liki inge?
Tamuhlwel ac tahmtahel sacohklacna wiyuck an Nga tiac etuh na pwacye lah e fuhkah puhlakihn lasr ke Lwen in Nuhnuhnkuh sac, tuhsruhk ngwac lut na pwacye God el fin tiac siyuck sesr na pwacye lah meac Kraist el siyuck sel Peter ah: “Kuh kowos luhngse nga?” Nga muh El ac ke etuh lah fin moul na pwacye lasr uh, suhfaliyacsr, ac kuhtuh pacl uh sruokwacni ma uh oacna tuhlihk uh, yac kuht luhman kahlwem ke sie masap, masap se met ac yohk srihpac emet selos uh—“Kom in luhngse Leum God lom ke insiyom kwewa, ac ke nguhnum kwewa, ac ke kuhiyom kwewa, ac ke nuhnkom kwewa.”13 Ac fin oasr pacl se kuht kuh in fahk muh, “Ahok, Leum, kom etuh lah nga luhngse kom,” na El fah ahkacsmakihnye kuht lah ohiyacn luhngse pwacye pa in luhlahlfongi pacl nuh kwewa.
“Kom fin luhngse nga, liyacacng masap luhk,”14 Jisus el fahk. Tuh oasr yohrohsr mwet tuhlan in ahkinsewowoyeyuck, tuhlihk in karihngihnyuck, mwet suhkahsruhp in kahsrweyuck, ac ma pwacye in loango. Oasr ma tahfonglac in oreklac pwacye, ma pwacye in akacsruhi kac, ac ma wo in orek. In ahkfototoye, kuht enenuh in moul oacna mwet tuhma lutlut kihsackuhnlah in ahkkahlwemye luhngse lasr nuh sin Leum. Kuht tiac kuh in tui ac kuht tiac kuh in fohlohklac. Tukun sie ohsun yurin Wen moul nuhtin God moul, wacngihn ma ac fah sifil oacna met ah. Acnwucki, Iwaclah, ac Moulyak luhn Jisus Kraist akihlenyac muhtwacwacack luhn sie moul in Kristin pwacye, tiac sahflahiyac. Ma pwacye se inge, ma sikyak inge, pa lwelah tuh sie un mwet pahtuhr Galilee elos forlah lain Mwet Sap finne wacngihn “lohm in alu lalos kuh katlas”15 in som liki koa ah ke pacl ahkluo ac som in luhmahlah sramsram mahtuh luhn facluh suc kuht inge muhta kac.
Nga fahkwack ke kapihn insiyuck, ke luhngse luhn nguhnihk, nuh suwos nuh kwewa ma kuh in lohng puhsrek lah ki luhn mwet sap ingacn fohlohkihnyuckyak nuh fin facluh, ac sukokyak ke Alu luhn Jisus Kraist luhn Mwet Luhlahlfongi ke Lwen Sahflah. Nuh suwos suc soenna wi kuht ke srihpac yohk sahflah luhn Kraist inge, kuht fahk, “Nuhnak muhnahs fahsruh.” Nuh suwos ma wi kuht met ac forlah, ma tuhkuh nuh ke tuhkweni pwacr luhn Alu uh, ac tiac lohacng nuh ke mwe insewowo puhs ke wosasuc fohlohkyak ac fihliyac ma luhlah ke mongo uh, nga fahk lah nga sahngweng ke kowos ngwetngwet loeloes ke fong ac wacngihn koanon nwek an. Pahng uh pa in fohlohkoh, in sruokyac na ma pwacye, in luhngse God, ac in saplakyang in kahsruh. Nga sang nuh ke pahng sac in oruh luhlahlfongi ke misineri mahtuh nuh kwewa suc tuh tu lun baptismal font ac wi pahol nuh ke square ac fahk, “Utuckuh nuh sihk kunohkohn se inge sin Jisus Kraist.”16 Kunohkohn sac enenuh in ikihlkowoslac in auliyak ne tok, tuhsruhk enenuh na pwacye in ikihlkomlac ne tok ma pahtpaht. Nuh sin mwet fuhsr luhn Alu uh kapkapwack nuh ke misin ac tempuhl ac pahyuck, kuht fahk: “Luhngse God ac oruh kom in nwacsnwacs liki srah ac ma koluk luhn facl se inge. Oasr sie orekma na yohk kom in oruh ahkyohkyeyuck ke ma Prestuhn Thomas S. Monson el sulkackihn ke lututacng eke ah ah. Pahpah tomowos Inkuhsrao el tuhpan ahkostwen lowos ac luhngse lowos ke pacl nuh kwewa ke moul lowos an.”
Nga fahk nuh suwos kwewa ma lohng pweng sihk, puhsrwen Kraist lohngyuck ke puhlan pacl e nuh kwewa ac siyuck sin kais sie sesr ke e oasr pacl uh, “Yac kom luhngse nga?” Ac nuh sesr nuh kwewa, nga siyuck ke ahkfuhlwact luhk ac nguhnihk, “Ahok, Leum, kuht luhngse kom.” Ac ke srihpen kuht fihliyac “pahosr nuh fin mwe puckpuck,”17 kuht ac fah tiacna tahpuhllac ne ke na orekma se inge sahflah ac luhngse luhn God ac mwet tuhlan kol facluh. Ke inen Jisus Kraist, amen.