Kahsruh Tuhlihk Nuhtuwos in Oruh Finsrak Wo
Sel Prestuhn Henry B. Eyring
Mwet in Kahsruh Se Met ke Prestuhnsi Se Met
Ke kolyuck lowos, mwet kowos kahsruh in liye, kena, ac luhlahlfongi elos kuh in sun ohiyac fal in kuhlwacnsap ke tohkohsrahi luhn God.
Nga kuloh ke pacl wo inge in oasr yuruwos ke toeni luhlahp wolacna se inge, in lohng ma lutiyuck ac luhlahlfongi wolacna. Oruh nga in nuhnkuh ke ma sikyak nuh sihk sifacna. Apkuhran ma nuh kwewa ma nga kuh in ahksahfyelah oacna sie mwet sruok pristut sikyak ke srihpen mwet suc etweyuc liye ma ma nga tiac kuh in liye sifacna.
Oacna sie pahpah fuhsr nga pruhe in etuh ke mwe kahsruh ac fah sikyak nuh sin tuhlihk nahtuhsr nuh ke tohkohsrahi luhn Leum. Nuh sin tuhlihk mukul uh, nga etuh lah elos ac eis pacl wowo ke pristut uh. Nuh sin tuhlihk muhtwacn uh, nga etuh lah elos ac eis pacl in kuhlwacnsap in ahol Leum. Tuhlihk nuh kwewa ac oruh orekma Lal. Nga etuh lah kais sie siena, na Leum El ac sang nuh selos kais sie mwe sang in orekmakihn ke kuhlwacnsap Lal.
Ingena, nga tiac kuh in fahk nuh sin pahpah ac mwet kol nuh kwewa luhn mwet fuhsr uh ma wo emet kowos in oruh uh. Tuhsruhktuh nga kuh in olwelah tuh kowos ac fah ahkinsewowoyaclos in akihlen mwe sang luhn nguhn ma elos isuslac kac. Mwet nuh kwewa siena ac kuh in kahsruh ke kain in ohiyac. Wacngihn mwet enenuh in puhtatlac. Ke kowos suk fwackyuck in liye mwe sang God El liye ke mwet suc kowos kol ke pristut—yohk nuh sin mwet fuhsr—kowos ac ahkinsewowoyeyucklac in kohlohlos nuh ke kuhlwacnsap elos kuh in oruh uh. Ke kolyuck lowos, mwet kowos kahsruh in liye, kena, ac luhlahlfongi elos kuh in sun ohiyac fal in kuhlwacnsap ke tohkohsrahi luhn God.
Ke tuhlihk nuhtihk uh, nga pruhe ke fwackyuck in etuh ohiyac nga kuh in kahsrwelos kais sie in ahkolah nuh ke pacl wo in kuhlwacnsapuh God. Na nga srihke in kahsrwelos liye, finsrak, ac orekma nuh ke ma inge. Nga taflwelah kais sahk soko nuh sin kais sie mukul nuhtihk ke sie mwe sramsram ke ma suhmuhslah ma ahkuhtweyac mwe sang sacohk lalos ac sie petsac ma oacna mwe sang inge. Ye petsac ac kahs uh, nga taflwelah lwen ke kais sie lwen ma kais sie mukul pacptais ac eis akwuck se nuh ke ohfohs luhn pristut, ke luhpahkah tuhlihk sacn ke lwen se inge.
Nga ac fah ahkuhtweyac sahk se nga taflwelah nuh sin kais sie tuhlihk mukul nuhtihk in kahsrwel liye mwe sang luhn nguhn lal ac ma el kuh in oruh in kahsruh orekma luhn Leum. Kowos kuh in moklweyuck in akihlen, oacna nga, mwe sang yohk ac siena ke kais sie mwet fuhsr kowos luhngse ac kol an.
Ke tuhlihk mukul mahtuh se emet nuhtihk ah sun tikin ac Eagle Scout, sie petsac ke eagle tuhkuh nuh ke nuhnak luhk uh ke nga nuhnkuh kacl ac pacl fahsruh lal uh. Kuht muhta fin acn Idaho fototo nuh South Teton mountain, ma kuht tuhkweni fahsr ac liye ke eagle uh sohkwack uh. Petsac se inge use nuh ke nuhnak luhk uh puhla ke kahs lal Isaiah:
“El ahkkweyaclos suc muhnahs ac tohtohlah.
“Finne elos suc fuhsr uh kuh in tohtohlah ac ikori:
“Finne elos suc fihliyac luhlahlfongi lalos in Leum God el ac fah ahksasucye kuh lalos. Elos fah sohkwack ke paho sohksohk oacna eagle uh, elos fah kahsruhsr ac tiac tohtohlah; elos fah fahsr ac tiac muhnahslah.”1
Na, ke mukul nahtuhsr ma mahtuh emet, kuht tui tilac fahsr ye finohl South Teton ke srihpen tuhlihk mukul se nuhtihk ah ullac kac. El kena tui. El fahk, “Yac nga ac ahsor pacl nuh kwewa lah kuht tiac sun acn e lucng? Pahpah, kom kuh in som—nga sruhnga kom in suhpwacrlac.”
Nga topuk, “Nga tiacna suhpwacrlac, ac wacngihn pacl kom ac auli kac. Kuht ac esam pacl nuh kwewa lah kuht tuhkweni fanyak.” Fin sahk se lal ah, nga taflwelah eagle se ac suhmuhslah “Fin Paho Sohksohk luhn Eagle uh.”
Ke yac somlah, tuhlihk mukul se nuhtihk ah sohkwack nuh lucng oacna sie misineri yohk likina nga finsrakkihn uh. Ke mwe srihke luhn misin uh, kuhtuh ma el puhlakihn uh luhman upaclaclac. Nuh sin tuhlihk mukul suc kowos kahsruh, sahp, oacna nuh sin tuhlihk mukul se nuhtihk an, Leum El ac kahsrwel in sun acn lucng in luti wosasuc an ke siena kahs yohk likina nga pahngohn el kuh uh. Kowos fin srihke ke kuhtwena mukul fuhsr in suk ke ohiyacn pristut lal, nga olwelah nuh suwos lah Leum El ac fahk nuh suwos ma nuh kwewa kowos enenuh an. Sahp tuhlihk mukul uh oasr ohiyac yohk likina ma Leum El ac ahkkahlwemye nuh suwos uh. Kahsrwel in oasr finsrak yohk.
Mukul fuhsr kowos ac ahkkweye uh ac sahp luhman muhnahs ac tiac luhman oacna mwet kuhlwacnsap kuh ke pristut. Sie tuhlihk mukul nuhtihk sahyac el mwekihn na pwacye lah el tiac fahsr nuh ke stoh ac sramsram nuh sin sie mwet liyacacng stoh uh. El sahngweng ac nga elyah ke nga pruhe ke pacl fahsruh ke pristut lal an. Nga nuhnkuh ke el ac wi misin—ma inge tiac luhman wo. Nga kolyuck nuh ke ma suhmuhslah oasr ke Soakas: “Mwet koluk uh kahing finne wacngihn mwet ukwaclos, ac sie mwet suwohswohs el puhlaik oacna soko lion.”2
Nga taflwelah “Puhlaik Oacna Soko Lion” ke sahk se lal an, oasr ten ke petsac luhn insifacn lion ngihrngihr soko. Ke misin lal ac yac pucspucs tokoh, el ahkfalye finsrak luhk. Tuhlihk mukul mwekihn se met nuhtihk ah luti wosasuc ke kuh yohk ac puhlakihn ma sensen uh ke puhlaik. El ahkfokokoyeyucklac ke kunohkohn lal in kahsruh Leum.
Ma inge kuh in sikyak nuh sin mukul fuhsr nuh kwewa kowos kol an. Kowos enenuh in muhsaheack luhlahlfongi lalos lah Leum el kuh in ekuhluhllah nuh ke sie mukul fuhsr in kuhlwacnsap likina tuhlihk mukul mwekihn se kom liye ingena uh.
Kuht etuh lah Leum el orwaclah mwet kuhlwacnsap Lal in kuh. Mukul fuhsr Joseph suc liye God suc Pahpah ac Wen Nahtuhl, Jisus Kraist, ke sie insack el eklac nuh ke sie mukul fokoko ke nguhn. Parley P. Pratt el liye lah ke Mwet Pahluh Joseph Smith el tulokihn mwet topang suc sruokilyac ke acn kaclpous. Elder Pratt el suhmuhslah:
“Tiac paht el tuyak, ac sramsram ke puhsrwen puhlahl, kuh oacna soko lion suc wohwohn, fahkwack, ke kahs nga kuh in esam, kahs inge:
“‘KALIYAC INWACLUMTACL, mwet koluk luhn hell. Ke inen Jisus Kraist nga kai komtacl, ac sapkihn komtacl in tui; Nga sruhnga in moul sie minit sahyac ac lohng kahskahs koluk inge. Tulokihnyac kain sramsram ingacn, kuh komtacl kuh nga ac misac INGENA!’”
Ke puhlakihnyuck ingacn, Elder Pratt el suhmuhslah, “Nwacsnwacs ac wolacna nga liye pacl sefanna, ke el tu ke sein, ke fong, lun sie acn in kaclpous ke inkucl se fin acn Missouri.”3
Leum El ac sang pacl wo nuh sin mwet kuhlwacnsap suwohs Lal in kuh oacna lion uh ke elos sramsram ke Inel ac oacna mwet loh ke pristut Lal uh.
Sie tuhlihk mukul sahyac, ke el fuhsr, oasr u luhlahp ke kawuck suc luhngse weluhl. El suhmaht ke kawuck nuh sin mwet uh. Ke nga pruhe ac srihke in liye ma el kuh in sang nuh ke tohkohsrahi luhn God, nga puhla lah el ac us kuh in orwacni mwet ke luhngse ac tuhkweni.
Ma se inge kolyuc nuh ke Doctrine and Covenants ma sramsramkihn elder luhn pristut suc srihke in muhsahi Sion fin acn Missouri in ahkfuhlwactye lihpufacn suc liye orekma lal. Ma inge enenuh kihsac yohk. Fwackyuck oasr ke Doctrine and Covenants uh fahkwack lah ke kuht insewowo ke srihpen fahkwack luhlahlfongi ma kuht fahkwack ac fahkwack luhlahlfongi lasr ma sihmlac inkuhsrao tuh lihpufacn uh kuh in riti, ac lihpufacn uh kuh in enganwack suwos, ac ma koluk lasr fah eis nuhnak muhnahs.4
Ke lusen sahk taflah luhn tuhlihk mukul se nuhtihk ah, nga taflwelah “Lihpufacn uh Enganwack Sum.”
Ohiyac wo luhn tuhlihk mukul se inge in kai mwet uh som ahluhkwelah yac in lutlut lal an. Ke mwet suc sruok pristut uh, el oraclah mukwikwi luhn stek nuh sin mwet fuhsr tuh sang luhlahlfongi fal la in kampare ac kuhtanglah pacl upac uh. Ke el muhsahi luhlahlfongi ke mwet fuhsr inge, el kahsruh muhsahi u srihsrihk luhn Sion ke siti luhn acn Macrike. Ke taflweyuck sac, oasr lihpufacn suc ukuk tuhram, suc sahp tiac pa elos oruh ah, tuhsruhktuh fihsracsr in taflwelah mwe ukuk se likina sie wowoyak.
Lihpufacn uh enganwack ke mwet kol luhn pristut fin facluh nohfohn muhsahi Sion ke ward, stek, ac misin lalos an. Ac elos fah enganwack ke mukul ac muhtwacn fuhsr kowos kahsruh muhsahi Sion ke kuhtwena acn elos oasr we ke kuhtwena ohiyac elos moul kac. Sion oasr ke mwet suc oracni ke wuhlweacng ac luhngse. Nga suli kowos in kahsruh mwet fuhsr lowos an in wi.
Nuh ke sie tuhlihk mukul nuhtihk ah, nga moklweyuck in taflwelah faht—pa inge, faht ke kuhsrao—se ac kahs ma tuhkuh ke pruhe luhn Mwet Lahngo: “Pa Inge Moul Ma Pahtpaht.” Ke sahflahiyacn moul Lal, Mwet Lahngo El Pruhe nuh sin Pahpah Tuhmwacl:
“Pa inge moul ma pahtpaht, in etwekom, God pwacye sefanna, ac in etuh Jisus Kraist, suc kom suhpwacma.
“Nga fahkwack tari wolacna lom nuh facluh, ke nga ahksahfyelah orekma ma kom use nuh sihk in oruh.”5
Tuhlihk mukul se nuhtihk uh el sang kuhlwacnsap luhn pristut ke acn luhlahp tolu tuhsruhktuh ma yohk srihpac se emet pa nuh ke lohm sel ac sucu lal. El oraclah moul lal kaclos. El orekma fototo nuh lohm ah, ac el fohlohk pacl puhs in wi muhtwacn kiyacl ac tuhlihk fuhsr nahtuhl ke pacl in mongo. Sucu lal an muhta fototo nuh sel Tahmtahel Eyring ac nga. Elos karihngihn acn lasr oacna acn lalos sifacna. Mukul se nuhtihk inge tiac moul in eis moul ma pahtpaht muhkwena tuhsruhktuh oacyacpac na in moul yurin mempucr ke sruikihn luhn sucu lal pac suc el oracni nuh sel.
Moul ma pahtpaht pa in moul ke ma sefanna, ke sucu, yurin Pahpah, Wen, ac Nguhn Muhtahl. Moul ma pahtpaht tuhkuh ke ohiyac sefanna ke ki luhn pristut luhn God, ma fohlohkihnyuckyak sel Mwet Pahluh Joseph Smith. In kahsruh mwet fuhsr in oasr finsrak ma pahtpaht in eis ma inge pa mwe sang yohk emet kowos kuh in sang nuh selos an. Kowos ac oruh ke srihkasrak lowos ke sucu lowos. Sahp mwet suc kowos kol uh wacngihn sucu la ke Alu uh, tuhsruhktuh nga kaifwe kowos in kahsrwelos puhla ac kena luhngse luhn sucu ke kwewana acn inkuhsrao ac facluh.
Lusen sahk nga sramsram kac uh tiac ohiyac sefanna in kahsruh mwet fuhsr in akihlen ma yohk God el liye kaclos ac ma lalos tohkoh ac kuhlwacnsap sefanna El ahkolah in sang nuh selos. El ac kahsrwe kowos in liye ohiyac in oruh nuh sin tuhlihk nuhtuwos ac tuhlihk fuhsr sahyac kowos kol an. Tuhsruhktuh ke kowos srihke in sifacna kahlwem kac ke pacl fahsruh se inge ac sramsramkihn nuh sin mwet fuhsr uh sie sin sie, kowos ac fah etuh lah God El luhngse kais sie tuhlihk Nahtuhlos ac El liye mwe sang siena ke kais sie selos.
Oacna pahpah se nga ahkinsewowoyeyuck in liye ma yohk ke tohkohsrahi luhn God nuh sin tuhlihk muhtwacn nuhtihk pac oacna tuhlihk mukul nuhtihk uh. Ke nga suk kolyuck ke pruhe, ahkkahlwemyeyuck nuh sihk ohiyac wo in kahsruh tuhlihk muhtwacn nuhtihk uh in akihlen luhlahlfongi luhn God el sang nuh selos oacna sie mwet in kuhlwacnsap suc kuh in muhsahi tohkohsrahi Lal.
Ke tuhlihk muhtwacn nuhtihk uh fuhsr ah, nga liye lah kuht kuh in kahsruh mwet sahyac puhla luhngse luhn mwet suc som liki moul se inge tari, nuh ke fihl puhkantwen. Nga etuh lah luhngse tuhkuh ke kuhlwacnsap ac moklweyuck finsrak ke moul ma pahtpaht uh.
Kuht in muh kuh in taflwelah sahk in orek fuhlao ma kuht sang fuhlao nuh kac ac tuhkweni in sang nuh sin mwet lolacp, katinmas, ac sucu uh. Kahs nga taflwelah nuh ke kais sie sahk fahk muh, “J’aime et J’espere,” kahs France ke “Nga luhngse ac nga finsrak.” Mwe loh ke mwe sang luhn nguhn sifacna tiac oasr ke sahk soko muhkwena tuhsruhktuh yohk na ke pacl kuht sang sahk ingacn nuh sin mwet suc enenuh, mwet suc puhla kweok kuh tuhlac, ahkkweye lah luhngse luhn Mwet Lahngo ac Iwaclah Lal kuh in oraclah finsrak suwohswohs ac kahlwem. Pa inge moul ma pahtpaht nuh sin tuhlihk muhtwacn nuhtihk ac nuh sesr kais sie uh.
Ingena, sahp kowos nuhnkuh, “Tamuhlwel Eyring, yac kom fahk lah kuht enenuh in etwaclah ohiyacn taflwelah?” Top uh pa moh. Nga etwaclah ohiyacn taflwelah sin mwet kuhlwacng ac luti wo, ke pacl sacn Elder Boyd K. Packer. Ma nuh kwewa nga etwaclah ke mwe sang se inge tuhkuh ke mwe luti lal. Inkuhsrao muhkwena kuh in sang mwet luti ohinge oacna Prestuhn Packer. Tuhsruhktuh oasr ohiyac puhspuhs kowos kuh ekuhllah insiyacn tuhlihk uh sahyacn taflwelah kuhtuh sahk uh nuh selos.
Nuh ke mwe srihkasrak, technology in sramsram sasuc uh lwelah mwet in akacsruhi pweng ke luhlahlfongi ac finsrak ke acn loes infulwacn kuht, sa ac srihk kuh wacngihn molo. Muhtwacn kiyuck ah kahsrweyuc in oruh ma se inge. Kuht muhtwacwacack in sramsram ke tacluhfon uh yurin tuhlihk nuh kwewa nahtuhsr kuht kuh in ohsun. Kuht siyuck selos in akacsruhi mwe sramsram ke ma wo lalos ac kuhlwacnsap elos oruh uh. Kuht oacyacpac solwaclos in suhpwacma petsac ke mukwikwi lalos uh. Kuht orekmakihn petsac inge in ahkuhtweyac kuhtuh kahs. Kuht sang sie kuh luo fuhs ke Puk luhn Mormon. Sahp Nephi ac Mormon tiacna arlac pwacrkihn ohiyac luhn nguhn ke ma suhmuhslah lasr kuh kuh srihsrihk in oraclah ma se kuht pahngohn “Mwe Sihm luhn Sucu: Puhlwet Srihk uh.” Tuhsruhktuh Tahmtahel Eyring ac nga ahkinsewowoyeyuck ke orekma lasr. Kuht puhla moklweyuck in sulwaclah kuhtuh fuhs ke ma suhmuhslah ac pweng srihsrihk ke luhlahlfongi kuht suhmuhslah uh. Ac kuht liye mwe loh ke moul lalos forlah nuh sesr ac nuh sin Mwet Lahngo an lucng.
Oasr ohiyac sahyac in kahsruh mwet sahyac; kowos kahsruh puhs selos tari. Ke kowos pruhe ac riti ma suhmuhslah ke sucu kowos oraclah mwe esamyac yohk ac eklac luhn insiyaclos likina ma kowos akihlen ingena. Finne wi mukwikwi luhn facluh, oacna wi sritacl kuh liye petsac tuhkweni, kuh in ekuhllah insiyacn tuhlihk se. Mukwikwi uh pa tiac yohk srihpac uh tuhsruhktuh puhla ma tuhkuh ke kowos oruh uh. Nga konwacack ohiyac wo in etuh fin mukwikwi wo kuh koluk in ekuhllah moul luhn mwet fuhsr. Pa in lwelah elos in sulwaclah ma elos kena oruh tuh elos in puhla pa mwe sang sin God. Nga etuh lah ma inge kuh in sikyak ke etuh luhk sifacna.
Ke nga wi tikin ke nga sun yac 12, nga muhta fin acn New Jersey, mael 50 liki New York City. Nga finsrak ngan sie mwet in yakyu suhmaht. Pahpah tuhmuhk el insese in usyuc in liye sie sritacl ke Yankee Stadium, mahtuh se fin acn Bronx. Nga kuh in srwackna liye srihngsrihng ke patta sac ke Joe DiMaggio el sruhnguhllah omran se nuh ke siyac in muhta ke center field wi pahpah tuhmuhk ah muhta siskuck., pacl sefanna kuht som tuhkweni nuh ke sritacl luhn yakyu ke major league.
Tuhsruhktuh sie pac lwen yurin pahpah tuhmuhk ah ekuhllah moul luhk uh ma pahtpaht. El usyuc liki acn New Jersey nuh ke sie lohm sin patriarch fin acn Salt Lake City. Nga tiacna liye mwet sac met. Pahpah tuhmuhk ah fihliyucwi ke sruhnguhl ah. Patriarch sac suli ngan muhta ke sie siyah, fihliyac pahol fin sifuck, ac use sie mwe insewowo ma mwe sang sin God wi fahkwack se inge ke kena yohk luhn insiyuck.
El fahk lah nga pa sie suc wi sramsram ohinge, “Insewowo elos suc akiwe mwet uh.”6 Nga lut na pwacye lah sie mwet suc nihkihnyuc kuh in etuh insiyuck lah nga muhtwaclihk in liye infuckihl se ma kain usrnguck inge kuh in sikyak. Mwe insewowo ke ma nga kuh in oruh ingacn ekuhllah moul luhk, pahyuck luhk, ac kuhlwacnsap ke pristut luhk uh.
Ke ma sikyak ah ac ma tohkoh, nga kuh in fahkwack lah mwet nuh kwewa tiac eis mwe sang nuh kwewa. Oasr mwe sang puhkantwen, ac mwet nuh kwewa eis mwe sang se sin Nguhn luhn God.7
Ke Leum el ahkkahlwemye mwe sang se nuh sihk, nga kuh pac in akihlen ac ahkolah pacl wo in orekmakihn ma se inge in kahsruh mwet suc nga luhngse ac kuhlwacnsapuh uh.
God El etuh mwe sang lasr. Nga kaifwe kowos ac nga in pruhe in etuh mwe sang kuht eis tari, in etuh ohiyac kuht kuh in ahkfokokoyaclos, ac akihlen pacl wo in kuhlwacnsapuh mwet sahyac ma God El use nuh sesr. Tuhsruhktuh yohk liki nuh kwewa, nga pruhe tuh kowos in moklweyuck in kahsruh mwet sahyac konwacack mwe sang sacohk lalos sin God in kuhlwacnsap.
Nga olwelah nuh suwohs lah kowos fin siyuck, kowos ac fah ahkinsewowoyeyuck in kahsruh mwet sahyac in ahkfalye ma elos kuh, in kuhlwacnsapuh mwet elos kol ac luhngse. Nga fahkwack nuh suwohs lah God El Moul, Jesus El pa Kraist, pa inge pristut luhn God, ma kuht sruok, ac God El ahkoekuhtlac ke mwe sang yohk in Kuhlwacnsapuhl yohk likina finsrak lasr uh. Ke inen Jisus Kraist, amen.